666 Ni Nambara Yakutindika Waka Yayi

‘Paŵavye munthu wangamanya kugura panji kusaska, kweni uyo wali na cidindo pera, ndilo zina la cikoko panji kapendekero ka zina lake. Penepapa ndipo pali vinjeru. Uyo wali na mahara, wapende kapendekero ka Cikoko; cifukwa nkhapendekero ka munthu: ndipo kapendekero kake ndi makumi pera makumi ghankhondi na limoza pacanya kankhondi na kamoza.’—Civumbuzi 13:17, 18.

NI NKHANI zicoko waka mu Baibolo izo ŵanthu ŵakunweka na kufipa nazo mtima comene nga ni umo ŵakucitira na ucimi wakuyowoya za cidindo cakutindika, panji zina la “cikoko”—nambara 666. Nkhani yambura kumara iyo yatora malo pa TV, pa Kompyuta, mavidiyo, mabuku, na magazini, nja cidindo ca cikoko.

Ŵanyake ŵakugomezga kuti 666 nchimanyikwiro ca awo Baibolo likuti ŵakususkana na Khristu. Ŵanyake ŵakuti nchimanyikwiro cilicose, nga ni simbo panji nambara yakulembeka pa kompyuta iyo yikulongora kuti munthu uyo ŵamubatika nayo wakuteŵetera cikoko. Kweni ŵanyake ŵakugomezga kuti 666 nchimanyikwiro ca muwuso wa papa wa Katolika. Para ŵafumyamo malemba gha Ciroma gha zina la udindo wa papa, lakuti Vicarius Filii Dei (Muteŵeti wa Mwana wa Ciuta), kuŵikapo manambara na kughasintha pacoko, ŵakusanga 666. Kweniso ŵanthu ŵanyake ŵakuti para mungapendesera kufuma ku zina la Cilatini la Fumu ya Ŵaroma, Diocletian na ku lizgu la Cihebere la zina la Kesare Nero, mungasangaso nambara 666. a

Ndipouli, mang’anamuliro ghakucita kuŵajilapo waka agha, ghakupambana comene na ivyo Baibolo likuyowoya pa nkhani ya cidindo ca cikoko umo tiwonerenge mu nkhani yakulondezgapo. Baibolo likuvumbura kuti awo ŵali na cidindo ici ŵazamukumana na ukali wa Ciuta apo wazamuparanya caru ici. (Civumbuzi 14:9-11; 19:20) Ntheura, kumanya ng’anamuro la 666, kukusazgapo vinandi kuluska kusanga waka zgoro la samuzi yakutindika iyi. Cakukondweska nchakuti Yehova Ciuta, uyo ni mweneko wa kutemwa kweniso uyo wakupeleka ungweru wauzimu, wandaŵaleke mu cisi ŵateŵeti ŵake pa nkhani iyi.—2 Timote 3:16; 1 Yohane 1:5; 4:8.

[Mazgu ghamusi]