‘Cita Mulimo wa Mupharazgi’
‘Cita Mulimo wa Mupharazgi’
“Uzize mu vinthu vyose, ukunthirepo suzgo, ucite mulimo wa mupharazgi, ufiske uteŵeti wako.”—2 TIMOTE 4:5.
1. Kasi Yesu wakaphalira ŵalondezgi ŵake kucita nchito wuli?
ZINA la Yehova na malayizgo ghake vikupharazgika pa caru cose. Ici nchifukwa cakuti ŵanthu awo ŵali kujipatulira kwa Ciuta ŵaŵikapo mtima kucita nchito iyo Yesu Khristu wakaphalira ŵalondezgi ŵake kuti: ‘Lutaninge mukasambizge mitundu yose, mukaŵabapatize mu zina la Ŵawiske na la Mwana na la mzimu utuŵa: muŵasambizge kukoreska vyose ivyo ndamulangulirani.’—Mateyu 28:19, 20.
2. Kasi mulaŵiliri Timote wakaphalirika vici, ndipo ŵalaŵiliri Ŵacikhristu ŵangafiska wuli uteŵeti wawo?
2 Ŵasambiri ŵa Yesu mu nyengo yira ŵakakhuka nayo nchito iyi. Mwaciyelezgero, mpositole Paulosi wakaphalira Timote, mulaŵiliri Wacikhristu kuti: ‘Cita mulimo wa mupharazgi, fiska uteŵeti wako.’ (2 Timote 4:5) Lero, nthowa yimoza iyo mulaŵiliri wakufiskira uteŵeti wake ndiyo kuŵikapo mtima pakupharazga Ufumu, kuluta mu uteŵeti wa munda kaŵirikaŵiri. Mulaŵiliri wa Sambiro la Buku la Mpingo wali na mwaŵi wapadera wa kulongozga nchito ya kupharazga kweniso kovwira ŵanji kucita nchito iyi. Paulosi wakafiska mulimo wake wa kupharazga makani ghawemi kweniso kusambizga ŵanyake kucita uteŵeti.—Milimo 20:20; 1 Ŵakorinte 9:16, 17.
Ŵapharazgi Ŵakale Awo Ŵakalimbikiranga
3, 4. Pakuŵa mupharazgi, ni vinthu wuli ivyo Filipu wakacita?
3 Ŵakhristu ŵakale ŵakamanyikwanga kuti mbapharazgi ŵakulimbikira. Awonani mupharazgi Filipu. Iyo wakaŵa yumoza wa ŵanalume ‘khumi na ŵaŵiri . . . ŵakuzura na mzimu na vinjeru’ awo ŵakasoreka kuti ŵagaŵenge cakurya kwambura kutemwera pakati pa vyokoro vya Cikhristu ivyo vikayowoyanga Cigiriki, na ivyo vikayowoyanga Cihebere mu Yerusalemu. (Milimo 6:1-6) Nchito iyi yikati yamara, nakuti wose ŵabalarika cifukwa ca suzgo, kusidapo ŵapositole, Filipu wakanjilira ku Samariya. Ku malo agha wakapharazga makani ghawemi ndipo mzimu utuŵa ukamovwira kufumiska viŵanda kweniso kucizga ŵanthu ŵakulemara na ŵavinjenje. Ŵanthu ŵanandi mu Samariya ŵakapokera uthenga wa Ufumu nakuti ŵakabapatizika. Ŵati ŵapulika ivi, ŵapositole mu Yerusalemu ŵakatuma mpositole Petrosi na Yohane ku Samariya mwakuti awo ŵakabapatizika ŵakapokere mzimu utuŵa.—Milimo 8:4-17.
4 Kufuma apo, mzimu wa Ciuta ukamulongozga Filipu kuti wakumane na nthunguli ya ku Etiyopiya pa msewu wakuya ku Gaza. Filipu wakati walongosora makora ucimi wa Yesaya, nthunguli ‘ya Kandake, fumukazi ya Ŵaetiyopiya,’ yikagomezga Yesu ndipo yikabapatizika. (Milimo 8:26-38) Kufuma apo, Filipu wakaluta ku Ashidodi na Kesareya, ndipo mu nthowa mose, “wakapharazganga ivangeli mu vikaya vyose.” (Milimo 8:39, 40) Nadi pano, wakaŵa ciyelezgero ciwemi comene pakucita mulimo wa mupharazgi.
5. Kasi ŵana ŵasungwana ŵanayi ŵa Filipu ŵakamanyikwanga na mulimo wuli?
5 Vilimika 20 vikati vyajumphapo, Filipu wakalimbikiranga nipera uteŵeti mu Kesareya. Apo Paulosi na Luka ŵakakhala mu nyumba yake, Filipu wakaŵa na “ŵana ŵanakazi ŵanayi ŵamwali, awo ŵakacimanga.” (Milimo 21:8-10) Ŵakwenera kuti ŵakasambizgika makora comene vinthu vyauzimu, kulimbikira uteŵeti, nakuti ŵakapika mwaŵi wa kucima. Lero, usange ŵapapi ŵakulimbikira uteŵeti, ŵana nawo ŵangamburako mzimu uwu, ŵangadoka kuti umoyo wawo wose uŵe pa nchito ya upharazgi.
Ŵapharazgi Ŵalero Awo Mbakulimbikira
6. Ni vici ivyo ŵapharazgi ŵakale ŵakacitanga?
6 Apo wakayowoyanga ucimi uwo ukufiskika lero mu nyengo ya umaliro, Yesu wakati: “Kukwenera kuti ivangeli lipharazgike nanga ku mitundu yose.” (Marko 13:10) Umaliro wizenge para makani ghawemi ghapharazgika “mu vyaru vyose.” (Mateyu 24:14) Apo Paulosi na ŵapharazgi ŵanyake mu nyengo yakale ŵakathuwuskanga makani ghawemi, ŵanandi ŵakamba kugomezga, ndipo mipingo yinandi yikapangikanga mu vyaru ivyo vikaŵa pasi pa mazaza gha Ŵaroma. Ŵalara awo ŵakasankhika mu mipingo iyi pamoza na ŵabali na ŵadumbu, ŵakacitanga nchito ya kupharazga nakuti ŵakaluta nayo patali comene nchito iyi. Mazgu gha Yehova ghakakulanga ndipo ghakatondanga mu mazuŵa ghara nga umo ghakucitira lero, cifukwa Ŵakaboni ŵa Yehova, awo ŵakukwana mamiliyoni, ŵakucita nchito ya mupharazgi. (Milimo 19:20) Kasi muli pamoza na awo ŵakulumba Yehova?
7. Kasi ŵapharazgi ŵa Ufumu ŵakucita vici lero?
7 Lero, ŵapharazgi ŵanandi ŵa Ufumu ŵakusanga mipata yakuti ŵasazgireko nchito ya kupharazga. Ŵanandi ŵamba umishonale, ŵanyake ŵanandi ŵakucita upayiniya wa kanyengo na wa nyengo zose. Ndipo ni nchito yakulumbika comene iyo madoda, nchembere, na ŵana ŵakucita pakupharazga Ufumu na mtima wose. Enya, ŵanthu wose ŵa Yehova ŵakuŵa na njombe pakuteŵetera na mtima umoza pakuŵa ŵapharazgi Ŵacikhristu.—Zefaniya 3:9.
8. Ni nchito wuli ya kulemba cimanyikwiro iyo yikucitika lero, ndipo mbanjani ŵakuyigwira?
8 Ciuta wapeleka mulimo wa kupharazga makani ghawemi pa caru cose kwa ŵalondezgi ŵa Yesu ŵakuphakazgika. Kweni paliso “mberere zinyake” za Khristu izo zikuŵawovwira pa mulimo wa kupharazga. (Yohane 10:16) Nchito iyi ya kuthaska umoyo yikuyana waka na kulemba cimanyikwiro pa visko vya awo ŵakulira na kutampha cifukwa ca viheni ivyo vikucitika lero. Sonosono apa, ŵaheni ŵamarenge petu! Kweni pa nyengo yasono ni mwaŵi ukuru kupharazga pa caru cose unenesko uwo ukuthaska umoyo.—Ezekiel 9:4-6, 11.
9. Kasi awo ŵamba sono unenesko tingaŵawovwira wuli mu uteŵeti?
9 Usange tagwirapo nchito ya kupharazga nyengo yitali, ipo cingaŵa ciwemi kovwira awo ŵamba sono unenesko. Tingaŵatora kuti tende nawo mu uteŵeti. Ŵabali ŵalara ŵakupempheka kuti ŵakhozgenge ŵanyawo mwauzimu. Ivyo ŵalaŵiliri ŵakujiyuyura ŵangacita vingawovwira comene ŵabali ŵanyake kuti ŵalimbikire nakuti ŵapambike vipambi mu upharazgi.—2 Petros 1:5-8.
Kupharazga Unenesko Nyumba na Nyumba
10. Nchiyelezgero wuli ico Khristu na ŵalondezgi ŵake ŵakaŵa naco mu uteŵeti?
10 Pakuti wakaŵa mupharazgi, Yesu Khristu wakaŵapa ŵalondezgi ŵake ciyelezgero ciwemi comene. Kuyana na uteŵeti wa Khristu na ŵapositole ŵake, Mazgu gha Ciuta ghakuti: “Wakendendekanga mu mizi na mu vikaya, . . . kupharazga na kuwuzga makani ghawemi gha Ufumu wa Ciuta, ndipo khumi na ŵaŵiri ŵakaŵa nayo.” (Luka 8:1) Nanga ŵapositole iwo ŵeneko ke? Ŵakati ŵapokera mzimu utuŵa pa Pentekoste 33 C.E., “mazuŵa ghose, mu tempele na mu nyumba zawo, kuti ŵakalekanga cara kusambizga na kupharazga Yesu kuti ndi Khristu.”—Milimo 5:42.
11. Kuyana na Milimo 20:20, 21, kasi mpositole Paulosi wakacita vici mu uteŵeti?
11 Cifukwa cakuti wakafwilirapo comene pa nchito ya kupharazga, lekani mpositole Paulosi wakaphalira ŵabali ŵalara ŵakufuma ku Efeso kuti: ‘Nkhaleka cara kumuphalirani kanthu ka kumovwirani, [kweni] nkhamusambizgani pakweru na mu nyumba na nyumba.’ Apo Paulosi wakasambizganga “mu nyumba na nyumba,” kasi ndikuti wakenderanga awo ŵakaŵa ŵateŵeti kale ŵa Yehova kuti waŵakhozge? Yayi, cifukwa wakayowoyaso kuti: ‘Nkhapanikizgira Ŵayuda na Ŵagiriki wuwo [kuti] ŵang’anamukire kwa Ciuta, na kuŵa na cipulikano mwa Fumu Yesu Khristu.’ (Milimo 20:20, 21) Pakaŵavya cifukwa cakuti ŵanthu awo ŵajipeleka kale kwa Yehova ‘ŵang’anamukire kwa Ciuta, na kuŵa na cipulikano mwa Fumu Yesu Khristu.’ Paulosi wakawovwira ŵabali ŵalara ŵa ku Efeso umo ŵangapharazgira nyumba na nyumba kweniso kusambizga ŵanthu ŵa kucaru kuti ŵalape na kuŵa na cipulikano. Pakucita nthena, Paulosi wakalondezganga ivyo Yesu wakambiska.
12, 13. Kuyana na Ŵafilipi 1:7, kasi ŵanthu ŵa Yehova ŵacita wuli kuti ŵapharazgenge mwawanangwa?
12 Upharazgi wa nyumba na nyumba ungaŵa wakusuzga. Ici cili nthena cifukwa ŵanyake ŵakukwiya para tiza panyumba yawo na uthenga wa Baibolo. Tikukhumba yayi kuti tikwiyiskenge ŵanthu. Ndipouli, Malemba ndigho ghakutituma kupharazga nyumba na nyumba, kweniso cifukwa cakuti tikutemwa Ciuta na ŵanyithu, lekani tikucita uteŵeti uwu. (Marko 12:28-31) Kuti ‘tivikilire na kukhozga’ upharazgi wa nyumba na nyumba, nyengo zinyake tatolera milandu ku makhoti, kusazgapo Khoti Likuru mu United States. (Ŵafilipi 1:7) Kanandi khoti ili ladumura makora milandu yithu. Pakudumura mulandu unyake Khoti ili likati:
13 “Kugaŵira mathirakiti gha cisopo ni upharazgi uwo wuli kwamba kale comene, kufuma apo ŵanthu ŵakamba kusindikizga mabuku. Visopo vinandi navyo vyacita nthena kwamba kale. Upharazgi uwu ukucitikaso comene lero na visopo vinandi ivyo ŵanthu ŵake ŵakupharazga Makani ghawemi ku nyumba zambura kupendeka, kukawonana na munthu maso na maso mwakuti ŵamuphenduske wanjire mpingo wawo. . . . Kuyana na Malango gha United States, nchakwenelera kuti machalichi ghacitenge nchito iyi, ghasopenge na kupharazga pa gome.”—Murdock v. Pennsylvania, 1943.
Cifukwa Wuli Tikwenera Kupharazga Nipera?
14. Nchivici ico cingaŵa cakovwira mu uteŵeti withu?
14 Pali vifukwa vinandi ivyo tikwenera kupharazgira nyumba na nyumba. Nyengo yose para tikufika pa nyumba ya munthu, tikupanda mbuto ya unenesko wa mu Malemba. Para tikuwelerako ndikuti tikuthilira. Kucita nthena kukovwira mweneko nyumba kuti wakule, cifukwa Paulosi wakalemba kuti: “Ine nkhapanda, Apolo wakathiliranga maji; kweni Ciuta ndiyo wakamezga.” (1 Ŵakorinte 3:6) Ipo tiyeni tilutilire ‘kupanda na kuthilira,’ tigomezge kuti Yehova ‘wamezgenge.’
15, 16. Cifukwa wuli tikuwelerako kaŵirikaŵiri ku nyumba za ŵanthu?
15 Tikucita nchito ya kupharazga cifukwa umoyo wuli pangozi. Para tikupharazga tingaponoska umoyo withu na wa awo ŵakutipulika. (1 Timote 4:16) Usange tamanya kuti umoyo wa munthu wuli pangozi, kasi tingacita mwaukata pakumovwira? Napacoko pose! Pakuti mweneko nyumba wangaponoskeka, lekani tikuwelerako kaŵirikaŵiri ku nyumba za ŵanthu. Vyakucitika vikusintha nyengo na nyengo. Munthu uyo ngwakutangwanika para tiza ulendo wakwamba, wangatemwa kupulikizga uthenga wa Baibolo pa ulendo unyake. Panji munthu munyake pa nyumba iyo wangatipokelera, mweneuyo wangazomera kudumba nayo vya mu Malemba.
16 Ni vyakucitika pera yayi ivyo vikusintha kweniso maghanoghano gha ŵeneko nyumba. Mwaciyelezgero, nyifwa ya munthu uyo ŵakamutemwanga yingacitiska kuti ŵategherezge uthenga wa Ufumu. Usange ni nthena, ipo tiŵapembuzge, kuŵawovwira kuti ŵamanye njala yawo yauzimu, na kuŵalongora umo ŵangayipozgera.—Mateyu 5:3, 4.
17. Kasi cifukwa cikuru ico tikupharazgira nchivici?
17 Cifukwa cikuru ico tikulutira kukapharazga nyumba na nyumba panji kucita uteŵeti unyake Wacikhristu, nchakuti tikukhumba kuthuwuska zina la Yehova. (Exodus 9:16; Salmo 83:18) Ni njombe yikuru comene para nchito yithu ya kupharazga yawovwira awo ŵakutemwa unenesko na urunji kwamba kulumba Yehova! Wamasalmo wakimba kuti: ‘Ŵapungwe (ŵanyamata) na ŵamwali wose pamoza, ŵalara na ŵana! Ŵalumbenge zina la Yehova, cifukwa zina la iye pera likwenera kukuzgika; ucindami wake wuli pacanya pa caru na pa mtambo.’—Salmo 148:12, 13.
Upharazgi Ukutovwira
18. Kasi nchito ya upharazgi yikutovwira wuli?
18 Nchito ya upharazgi yikutovwira mu nthowa zinandi. Tikusambira kujiyuyura para tikwenda na makani ghawemi nyumba na nyumba, comenecomene para ŵanthu ŵandatipokelere makora. Kuti tipambike vipambi mu upharazgi, tikwenera kucita nga umo Paulosi wakacitiranga, iyo ‘wakaŵa vyose ku ŵanthu wose mwakuti waponoske ŵanji.’ (1 Ŵakorinte 9:19-23) Ivyo vikuticitikira mu uteŵeti vikutovwira kuti tiŵe ŵaluso. Para tikuthemba Yehova kweniso kusankha makora mazgu ghithu, mbwenu tikoleranenge na ulongozgi wa Paulosi wakuti: “Mazgu ghinu ghaŵe na ucizi mazuŵa ghose, ghakulungika na mcere, kuti mumanye umo mukwenera kumuzgolera yumoza na yumoza.”—Ŵakolose 4:6.
19. Kasi mzimu utuŵa ukovwira wuli ŵapharazgi?
19 Nchito ya upharazgi yikutipangiska kuti tigomezge mzimu utuŵa wa Ciuta. (Zekariya 4:6) Mu uteŵeti withu, tikuŵa na vipambi ivyo mzimu ukupambika mwa ise—“kutemwa, cimwemwe, mtende, kuzizipizga, wezi, uwemi, magomezgeko, kuzika, [na] kujikora.” (Ŵagalatiya 5:22, 23) Vipambi ivi vikutovwira kuti tikhale makora na ŵanthu, cifukwa kupulikira ulongozgi wa mzimu kukovwira kuti tiŵe ŵacitemwa, ŵacimwemwe, ŵamtende, ŵakuzizipizga, ŵawezi, ŵawemi, ŵacipulikano, ŵakuzika na ŵakujikora apo tikupharazga makani ghawemi.
20, 21. Kasi tikuŵa na njombe wuli para tikutangwanika na upharazgi?
20 Njombe yinyake iyo tikuŵa nayo para tikupharazga njakuti tikulengera citima ŵanthu. Para ŵanthu ŵakuyowoya masuzgo agho ŵali nagho—ulwari, ulova, kusuzgana mu mbumba—tikunjilirapo yayi, kweni tikuŵapembuzga na Malemba. Tikufipa mtima na ŵanthu awo ŵali mu mdima wauzimu kweni ŵakuwoneka kuti ŵakutemwa urunji. (2 Ŵakorinte 4:4) Ndipo nchakukondweska comene kovwira awo ‘ŵakukhumba [nadi] umoyo wamuyirayira.’—Milimo 13:48.
21 Tikovwirika kuti maghanoghano ghithu ghaŵe pa vinthu vyauzimu para tikucita nchito ya upharazgi nyengo na nyengo. (Luka 11:34) Kucita nthena nkhuwemi comene cifukwa para taleka, mbwenu tiwenge mu viyezgo vya cuma ivyo vyandana comene mu caru lero. Mpositole Yohane wakaphalira Ŵakhristu kuti: “Mungatemwanga caru, panji nesi vinthu ivyo vili mu caru. Usange munthu wakutemwa caru, kutemwa kwa Ŵawiske kulimo mwa iyo cara. Pakuti vyose ivyo vili mu caru, [ni] makhumbiro gha thupi, na makhumbiro gha maso, na kuthumbwa kwa umoyo uno, kuti ni vyakufuma ku Ŵawiske cara, kweni ku caru. Ndipo caru cikuluta na makhumbiro ghake, kweni uyo wakucita khumbo la Ciuta, wakukhalilira muyirayira.” (1 Yohane 2:15-17) Kutangwanika na upharazgi na kucita vinandi mu mulimo wa Fumu kukutovwira kuti tileke kutemwa caru.—1 Ŵakorinte 15:58.
Jiŵikirani Usambazi Kucanya
22, 23. (a) Kasi Ŵakhristu awo mbapharazgi ŵajiŵikira usambazi wuli? (b) Kasi nkhani ya panthazi apa yizamutovwira wuli?
22 Kufwilirapo kupharazga Ufumu kuli na njombe zambura kumara. Yesu wakalongora fundo iyi apo wakati: “Mungajiŵikiranga usambazi pano pasi, penepapo cipupuruzu na mlosko vikunanga, ndipo penepapo ŵankhungu ŵakugumula na kwiba. Kweni mujiŵikire usambazi kucanya, kwenekuko nanga ndi cipupuruzu panji mlosko kuti vikunanga cara, nanga mbankhungu kuti ŵakugumula na kwiba cara: Cifukwa uko kuli usambazi wako, kwenekuko ndiko uti uŵenge mtima wako.”—Mateyu 6:19-21.
23 Ipo tiyeni tilutilire kuŵika usambazi kucanya, pakuti palije mwaŵi ukuru kuluska kuyimira Yehova, Fumu ya cilengiwa cose, na kuŵa Ŵakaboni ŵake. (Yesaya 43:10-12) Apo tikuteŵetera Ciuta nase tingamuwonga nga umo wakucitira Mkhristu munyake—mama wa vilika 90—uyo wateŵetera Ciuta nyengo yitali, wakuti: “Nkhuwonga Yehova cifukwa ca kuzizipizga nane mu vilimika vyose ivi, ndipo nkhuromba kuti waŵe Dada wane wakutemweka muyirayira.” Usange nase tikuwonga ubwezi uwo tili nawo na Ciuta, nadi pano, ticitenge mwakukwana nchito ya mupharazgi. Nkhani ya panthazi apa yitovwirenge umo tingacitira mwakukwana mu uteŵeti withu.
Kasi Muzgorenge Wuli?
• Cifukwa wuli tikwenera kucita nchito ya mupharazgi?
• Kasi mukutipo wuli na nchito ya ŵapharazgi ŵakale na ŵalero?
• Cifukwa wuli tikupharazga nyumba na nyumba?
• Kasi mukovwirika wuli para mukucita nchito ya mupharazgi?
[Mafumbo]
[Vithuzithuzi pa peji 12]
Mupharazgi Filipu na ŵana ŵake ŵasungwana ŵali na ŵanyawo ŵacimwemwe ŵalero
[Cithuzithuzi pa peji 16]
Kasi mukovwirika wuli para mukupharazga makani ghawemi ku ŵanthu?