“Ufiske Uteŵeti Wako”

“Cita mulimo wako makoraghene.”—2 TIMOTE 4:5, Byington.

1, 2. Nangauli Ŵakhristu wose mbapharazgi, kweni kasi Malemba ghakuti ŵalara ŵakwenera kucitaci?

 KASI ndimwe mupharazgi wa Ufumu? Usange ni nthena, wongani Yehova Ciuta cifukwa ca mwaŵi uwu. Kasi ndimwe mulara mu mpingo? Uwu ni mwaŵi unyake ukuru wakufuma kwa Yehova. Kweni tingaluwanga yayi kuti masambiro gha kucaru panji kuyowoya makora kuti ndivyo vikutipangiska kuŵa ŵakukwana yayi mu uteŵeti, nesi kuŵa mulaŵiliri mu mpingo. Yehova ndiyo wakutisambizga kuti tiŵe ŵakukwana pakucita uteŵeti. Ndipo cifukwa cakuti ŵanalume ŵanyake pakati pithu ŵakufiska vinyake ivyo Malemba ghakuyowoya, lekani ŵali na mwaŵi wa kuŵa ŵalaŵiliri.—2 Ŵakorinte 3:5, 6; 1 Timote 3:1-7.

² Ŵakhristu wose awo ŵali kujipatulira mbapharazgi, kweni comenecomene ŵalara ŵakwenera kulongora ciyelezgero ciwemi mu uteŵeti. Ciuta na Khristu, kweniso Ŵakaboni ŵanyawo ŵakuwona ŵalara awo “ŵakutokatoka mu mazgu na mu kusambizga.” (1 Timote 5:17; Ŵaefeso 5:23; Ŵahebere 6:10-12) Mulimose umo vingaŵira, mulara wakwenera kusambizga unenesko, cifukwa mpositole Paulosi wakati kwa mulaŵiliri Timote: “Nyengo yiti yizenge para ŵamkuwura kupulikizga cisambizgo ceneco; kweni, pakuŵa na makutu ghakunyenyera, ŵati ŵajiwunjikirenge ŵasambizgi ŵakuyana na makhumbiro ghawo; ndipo ŵati ŵaleke kupulika unenesko, na kung’anamukira ku vidokoni. Kweni iwe uzize mu vinthu vyose, ukunthirepo suzgo, ucite mulimo wa mupharazgi, ufiske uteŵeti wako.”—2 Timote 4:3-5.

3. Nchivici cikwenera kucitika kuti visambizgo vyautesi vileke kunjira mu mpingo?

³ Kuti visambizgo vyautesi vileke kunjira mu mpingo, mulaŵiliri wakwenera kulondezga ivyo Paulosi wakayowoya kuti: “Uŵe wamahara mu vyose, . . . cita makoraghene mulimo wako.” (2 Timote 4:5, Byington) Enya, mulara wakwenera ‘kufiska’ mulimo wake mwakukwana. Wakwenera kufiska, panji kukwaniska makora mulimo. Mulara uyo wakufiska uteŵeti wake wakuŵikapo mahara pa cose ico wakucita, wakuzerezga yayi nesi kucita mwaukata. Munthu wanthena ngwakugomezgeka nanga ni mu tunthu tucoko.—Luka 12:48; 16:10.

4. Nchivici cingatovwira kuti tifiske uteŵeti?

⁴ Kufiska uteŵeti withu kukuthemba pa kuŵa na nyengo yinandi pera yayi, kweni pa kuyigaŵa makora. Ndondomeko yiwemi yingawovwira Ŵakhristu wose kuti ŵafiske uteŵeti wawo. Kuti waŵe na nyengo yinandi mu uteŵeti wa m’munda, mulara wakwenera kunozga na kulondezga ndondomeko yake kweniso wamanye ivyo wangagaŵirako ŵanyake, na umo wangagaŵira. (Ŵahebere 13:17) Mulara wakweneraso kucita cigaŵa cake nga umo wakacitira Nehemiya uyo wakakorako na mawoko ghake pakuzenga viliŵa vya Yerusalemu. (Nehemiya 5:16) Nakuti nyengo na nyengo ŵateŵeti wose ŵa Yehova ŵakwenera kucita nchito ya kupharazga Ufumu.—1 Ŵakorinte 9:16-18.

5. Kasi tikwenera kuwuwona wuli uteŵeti?

⁵ Tili na nchito yakukondweska nkhanira ya kupharazga Ufumu uwo wuli kwimikika kucanya. Nadi pano, tikukondwa comene apo tikugwirako nchito ya kupharazga makani  ghawemi mu vyaru vyose pambere umaliro undize. (Mateyu 24:14) Nangauli tili ŵanthu ŵakwananga, kweni nkhongono zikukwera para tikupulika mazgu gha Paulosi ghakuti: “Tili na usambazi weneuwu mu viŵiya vya dongo, mwakuti kaluskiro ka nkhongono kaŵe ka Ciuta, ka ise tekha cara.” (2 Ŵakorinte 4:7) Enya, tingacita uteŵeti wakupatulika mu nkhongono na mahara ghekha agho Ciuta wakupeleka.—1 Ŵakorinte 1:26-31.

Kuŵaliska Ucindami wa Ciuta

6. Ni mphambano wuli yikaŵapo pakati pa Israyeli wanadi na Israyeli wauzimu?

⁶ Paulosi wakayowoya na Ŵakhristu ŵakuphakazgika kuti Ciuta ndiyo ‘wakutenereska kuti tiŵe ŵateŵeti ŵa phangano liphya.’ Paulosi wakalongora mphambano pakati pa phangano liphya—la Israyeli wauzimu kwizira mwa Yesu Khristu na phangano lakale—la Israyeli wanadi kwizira mwa Mozesi. Paulosi wakasazgirapo kuti apo Mozesi wakizanga na Malango Khumi kufuma ku Phiri la Sinayi, cisko cake cikaŵala comene mwakuti Ŵaisrayeli ŵakamudodoliska yayi napacoko. Cinthu cinyake cakuzizika comene cikacitika pakuti ‘maghanoghano ghawo ghakanonofyeka’ cifukwa cidiko cikaŵa pa mitima yawo. Apo ŵakazgokeranga kwa Yehova na kumusopa na mtima wose, cidiko cikafumangapo pa mitima yawo. Kuyana na uteŵeti uwo wuli kupika kwa awo ŵali mu phangano liphya, Paulosi wakati: ‘Ise tose, na visko vyambura kudikika, tiŵaliske nga ni gilasi ucindami wa Fumu [Yehova].’ (2 Ŵakorinte 3:6-8, 14-18; Exodus 34:29-35) Lero, “mberere zinyake” za Yesu zili na mwaŵi wa kuŵaliska ucindami wa Yehova.—Yohane 10:16.

7. Kasi ŵanthu ŵangaŵaliska wuli ucindami wa Ciuta?

⁷ Kasi ŵanthu ŵakwananga ŵangaŵaliska wuli ucindami wa Ciuta pakuti munthu wangawona yayi cisko cake na kukhala wamoyo? (Exodus 33:20) Pakuti Yehova ngwaucindami, ipo khumbo lake ndakuti wawoneske mazaza kwizira mu Ufumu wake. Unenesko wakukhwaskana na Ufumu ukusazgapo “vikuru vya Ciuta” ivyo vikamba kupharazgika na ŵanthu awo ŵakapokera mzimu utuŵa pa Pentekoste 33 C.E. (Milimo 2:11) Na ulongozgi wa mzimu, iwo ŵakafiska uteŵeti uwo ŵakapika.—Milimo 1:8.

8. Kuyana na uteŵeti, kasi Paulosi wakacita wuli?

⁸ Paulosi wakazomerezga cilicose yayi kuti cimujandizge kucita mwakukwana uteŵeti wake. Wakalemba kuti: “Uku tili na uteŵeti weneuwu, nga ndi umo tikapokelera lusungu, tikuvuka cara: kweni tapata nkhanira vyakubisika vya soni, kuti tikwenda mu ucenjezi cara, nesi kung’anamulanya mazgu gha Ciuta; kweni pakuwoneska unenesko, tikujilumba ku njuŵi za munthu yose pamaso pa Ciuta.” (2 Ŵakorinte 4:1, 2) Kwizira mu “uteŵeti weneuwu,” uwo Paulosi wakayowoyanga, unenesko na ungweru wauzimu vikuwoneka na kupharazgika palipose.

9, 10. Kasi tingaŵaliska wuli ucindami wa Yehova?

⁹ Paulosi wakazunura uko kukufuma ungweru wanadi na wauzimu, wakati: ‘Ciuta uyo wakati, Mu cisi ungweru uŵale, ndiyo wakaŵala  mu mitima yithu, kutipa ungweru wa kamanyiro ka ucindami wa Ciuta pa cisko ca Yesu Khristu.’ (2 Ŵakorinte 4:6; Genesis 1:2-5) Pakuti tapika mwaŵi wambura kuyelezgereka wa kuŵa ŵateŵeti ŵa Ciuta, ipo tiŵe ŵakutowa mwakuti tiŵaliske ucindami wa Yehova nga ni gilasi.

¹⁰ Ŵanthu awo ŵali mu mdima wauzimu ŵangawuwona yayi ucindami wa Yehova nesi ungweru wakufuma kwa Yesu Khristu, Mozesi Mulara. Kweni pakuti tili ŵateŵeti ŵa Yehova, tikuwona ungweru wa mu Malemba na kuwulongora ku ŵanyithu. Kuti awo ŵali mu cisi cauzimu ŵapone pharaniko, ŵakwenera kupokera ungweru kufuma kwa Ciuta. Na cimwemwe cose kweniso citatata, tikupulikira ulongozgi wa Ciuta wakuti tiŵaliske ungweru mu cisi mwakuti Yehova wacindikike.

Ungweru Winu Uŵale Pakucita Masambiro gha Baibolo

11. Kasi Yesu wakati wuli pa nkhani ya kuŵaliska ungweru withu, ndipo ni nthowa wuli iyo tingacitira nthena mu uteŵeti?

¹¹ Yesu wakati kwa ŵalondezgi ŵake: ‘Ndimwe ungweru wa caru. Cikaya cakuzengeka pa lupiri pacanya cilive kumanya kubisika. Ndiposo kuti ŵakukozga nyali na kuyiŵika kusi ku citundu cara, kweni pa cikolero cake; ndipo yikuŵamulikira wose ŵa mu nyumba. Ntheura ungweru winu uŵale panthazi pa ŵanthu, mwakuti ŵawone milimo yinu yiwemi, ndipo ŵacindike Ŵawiskemwe ŵa kucanya.’ (Mateyu 5:14-16) Nkharo yithu yiwemi yingacitiska ŵanthu ŵanyake kuti ŵacindike Ciuta. (1 Petros 2:12) Ndipo nthowa zinandi za upharazgi withu zikutipa mwaŵi wakuti tiŵaliske ungweru. Kucitiska masambiro gha Baibolo ni nthowa yimoza iyo tikulongora ungweru wauzimu wa mu Mazgu gha Ciuta. Iyi ni nthowa yiwemi yakufiskira makoraghene uteŵeti withu. Ni fundo wuli izo zingatovwira kucitiska makora masambiro gha Baibolo, zeneizo zingacontha mitima ya awo ŵakupenja unenesko?

12. Kasi kuromba kukwendezgana wuli na kucitiska masambiro gha Baibolo?

¹² Nchiwemi kuromba Yehova pa nkhani iyi cifukwa cikulongora kuti tikukhumba nadi masambiro gha Baibolo. Cikulongoraso kuti tikumanya uwemi wa kovwira ŵanthu kuti ŵamanye Ciuta. (Ezekiel 33:7-9) Yehova ngwakunozgeka kuzgora ivyo tikuromba na kutumbika citatata cithu mu uteŵeti. (1 Yohane 5:14, 15) Kweni tikuromba kuti tisange waka musambiri wa Baibolo yayi. Para tambiska sambiro, kuromba na kughanaghanira ivyo musambiri wakwenera kumanya kutovwirenge kuti timuconthe mtima pakumusambizga.—Ŵaroma 12:12.

13. Nchivici cingatovwira kuti ticite makora masambiro gha Baibolo?

¹³ Kuti sambiro lirilose liŵe lakucontha mtima, tikwenera kunozgekera makora. Usange tikuwona kuti tili ŵakupeleŵera, cingaŵa ciwemi kuwona umo mulaŵiliri wa Sambiro la Buku la Mpingo wakucitira sabata yiliyose. Nyengo zinyake tingalongozgana na ŵapharazgi ŵa Ufumu awo ŵakucita makora masambiro gha Baibolo. Kweniso nchiwemi kuwona maluso na nthowa izo Yesu Khristu wakasambizgiranga.

14. Kasi tingacontha wuli mtima wa musambiri withu wa Baibolo?

¹⁴ Yesu wakakondwanga pakucita khumbo la Adada ŵake ŵakucanya na kuyowoya ku ŵanthu za Ciuta. (Salmo 40:8) Wakaŵa wakuzika ndipo wakaconthanga mitima ya awo ŵakamupulikizganga. (Mateyu 11:28-30) Nase tifwilirepo kuti ticonthe mitima ya awo tikusambira nawo Baibolo. Kuti ticite ici, tikwenera kughanaghanira mikhaliro ya musambiri withu para tikunozgekera. Mwaciyelezgero, usange wali kubabikira mu mbumba iyo yikukana Baibolo, ipo timulongore ukaboni wakuti Baibolo ndaunenesko. Panthena apa, tikwenera kumuŵazgira na kumulongosolera malemba ghanandiko.

 Wovwirani Ŵasambiri Kuti Ŵapulikiske Viyelezgero

15, 16. (a) Kasi tingamovwira wuli musambiri uyo wandapulikiske ciyelezgero ico cili mu Baibolo? (b) Kasi tingacita wuli usange ciyelezgero ico cili mu buku nchinonono kuti musambiri wapulikiske?

¹⁵ Nyengo zinyake musambiri wangapulikiska yayi ciyelezgero ico cili mu Malemba. Mutepanyake wangamanya yayi ico Yesu wakang’anamuranga apo wakayowoya za kuŵika nyali pa cikolero. (Marko 4:21, 22) Yesu wakanenanga nyali ya mafuta na cisunda. Ŵanthu ŵakaŵikanga nyali pa cikolero ciwemi ndipo yikaŵalanga ngwee mu nyumba. Cingaŵa ciwemi kuwona mu buku la Insight on the Scriptures pa mutu wakuti “Lamp” (nyali) na “Lampstand” (cakuŵikapo nyali) mwakuti ciyelezgero cipulikikwe makora. a Nchakukondweska comene usange musambiri tamulongosolera nakuti wapulikiska makora.

¹⁶ Buku ilo mukusambira panji lingaŵa na ciyelezgero ico nchinonono kuti musambiri wapulikiske. Mulongosolerani mwakuzikira, panji yowoyani ciyelezgero cinyake ico cili na fundo yakuyana. Panyake buku ilo mukusambira likuyowoya za uwemi wa kuŵa na mufumu panji muwoli wakwenelera kweniso uyo mukukolerana. Panji mungayelezgera na mwanalume uyo waneza pa kandewe na kutayako, ndipo wakuthemba pa munyake kuti wamwankhe. Ciyelezgero cinyake cakukozgana na ici, ico cikulongora uwemi wa munyithu wakwenelera na kukolerana mu milimo, cingaŵa ca ŵanchito umo ŵakwankhira na kuponyerana makatoni para ŵakukhizga katundu mu galimoto.

17. Kasi tingasambirako vici kwa Yesu kuyana na viyelezgero?

¹⁷ Kuŵikapo ciyelezgero cinyake cikuthemba pa kunozgekera. Iyi ni nthowa iyo tikulongolera kuti tikumughanaghanira musambiri. Yesu wakayowoyanga viyelezgero vipusu mwakuti nkhani yinonono yipulikikwe. Upharazgi wa Yesu wa pa Phiri wuli na viyelezgero ivi, nakuti Baibolo likulongora kuti ŵapulikizgi ŵake ŵakatorangapo kanthu. (Mateyu 5:1–7:29) Yesu wakazikiranga pakulongosora tunthu cifukwa wakaŵaghanaghaniranga ŵanthu.—Mateyu 16:5-12.

18. Kasi malemba agho ghakulongoreka mu mabuku ghithu tikwenera kucita nagho wuli?

¹⁸ Kutemwa ŵanyithu kukutituma kuti ‘tidumbirane nawo vya mu Malemba.’ (Milimo 17:2, 3) Kuti ticite nthena, tikwenera kusambira, kuromba na kuŵazga mabuku agho “mulinda . . . wa magomezgeko” wakutipa. (Luka 12:42-44) Mwaciyelezgero, buku la Cimanyisko Ceneico Cikurongozgera ku Umoyo Wamuyirayira likuzunura malemba ghanandi. b Cifukwa cakuti malo ngacoko mu buku ili, Malemba ghanyake ghakulongoreka waka. Pakucita sambiro la Baibolo, nchiwemi kuŵazga na kulongosora malemba agha. Nakuŵanako, ivyo tikusambizga vikufuma mu Mazgu gha Ciuta agho ghali na nkhongono zikuru. (Ŵahebere 4:12) Ŵazgani Baibolo mu sambiro lose, wonani malemba gha mu ndime pafupipafupi. Movwirani musambiri kuwona ivyo Baibolo likuyowoya pa nkhani yinyake panji mukhaliro. Yezgani kumulongora umo wangapindulira para wapulikirenge Ciuta.—Yesaya 48:17, 18.

 Fumbani Mwakuti Munthu Waghanaghanirepo

19, 20. (a) Para tikucita sambiro la Baibolo, cifukwa wuli tikwenera kufumba musambiri umo wakughanaghanira? (b) Kasi tingacita wuli usange nkhani yinyake yikukhumbikwira kungweruskapo?

¹⁹ Yesu wakaŵa waluso comene pakufumba mafumbo mwakuti ŵanthu ŵaghanaghanirepo. (Mateyu 17:24-27) Tingamanya ivyo musambiri wa Baibolo wakughanaghana pa nkhani iyo yikusambirika usange tikumufumba mafumbo ghakuti waghanaghanirepo, kweni kumukhozga soni yayi. Tingamanya usange wacali na maghanoghano ghakubudika. Panji wangaŵa kuti wacali kugomezga cisambizgo ca Utatu. Mu cipaturo 3, buku la Cimanyisko likuti mu Baibolo mulije lizgu la “Utatu.” Buku ili liri na malemba agho ghakulongora kuti Yehova wakupambana na Yesu, nakuti mzimu utuŵa ni nkhongono ya Ciuta, ni munthu yayi. Kuŵazga na kudumbiskana Malemba agha kungawovwira comene. Kweni wuli usange pakukhumbikwira kumungweruska comeneko musambiri? Panji paumaliro wa sambiro linyake tizakasange nyengo yakuti tizakadumbiskane nkhani iyi mu buku linyake la Ŵakaboni ŵa Yehova, panji brosha lakuti Kodi Muyenera Kukhulupirira Utatu? Paumaliro tizakalutizge kusambira buku la Cimanyisko.

²⁰ Nyengo zinyake zgoro la musambiri lingaŵa lakuzizika panji lakugongoweska. Usange pawuka nkhani ya kukhweŵa hona, panji yinyake, tingamupempha kuti tizakadumbiskane nkhani iyo nyengo yinyake. Pakumanya kuti musambiri wacali kukhweŵa hona tingamupenjera nkhani zinyake izo zili kulembeka mu mabuku zeneizo zingamovwira kuti waleke. Apo tikuyezga kucontha mtima wa musambiri, tirombe Yehova kuti wamovwire wakule mwauzimu.

21. Kasi cingacitika nchivici para tingasintha kasambizgiro kuti kayane na vyakucitika vya musambiri?

²¹ Na wovwiri wa Yehova, kweniso kunozgekera makora, mbwenu tisinthenge kasambizgiro kithu kuti kayane na vyakucitika vya musambiri wa Baibolo. Apo wakulutilira kusambira, tingamovwira kuti wambe kutemwa comene Ciuta. Tingamovwiraso kuti wawonge na kucindika gulu la Yehova. Ndipo nchakukondweska comene para musambiri wa Baibolo wamanya kuti ‘Ciuta walimo [nadi] mwa ise.’ (1 Ŵakorinte 14:24, 25) Mphanyi tacita makora masambiro gha Baibolo na kucita vyose ivyo tingakwaniska kuti tovwire ŵanthu kuŵa ŵasambiri ŵa Yesu.

Usambazi Uwo Tikwenera Kuwukora Makora

22, 23. Kasi tikwenera kucita wuli usange tikukhumba kufiska makoraghene uteŵeti withu?

²² Kuti tifiske makoraghene uteŵeti withu, tikwenera kuthemba pa nkhongono za Ciuta. Kuyana na uteŵeti, Paulosi wakalembera Ŵakhristu ŵakuphakazgika kuti: “Tili na usambazi weneuwu mu viŵiya vya dongo, mwakuti kaluskiro ka nkhongono kaŵe ka Ciuta, ka ise tekha cara.”—2 Ŵakorinte 4:7.

²³ Kwali ndise ŵakuphakazgika panji “mberere zinyake,” tili nga ni viŵiya vya dongo. (Yohane 10:16) Ndipo mbu, Yehova wangatipa nkhongono zakucitira milimo yithu nangauli viyezgo vikutiwira nipera. (Yohane 16:13; Ŵafilipi 4:13) Ipo tiyeni tigomezge comene Yehova, kuwukora makora uteŵeti withu, na kuwufiska makoraghene.

[Mazgu ghamusi]

Kasi Muzgorenge Mbu?

• Kasi ŵalara ŵangacita wuli kuti ŵafiske makoraghene uteŵeti wawo?

• Kasi tingacita wuli makora masambiro gha Baibolo?

• Kasi mungacita wuli usange musambiri wandapulikiske ciyelezgero, panji usange wakukhumba kungweruskika pa nkhani yinyake?

[Mafumbo]

[Cithuzithuzi pa peji 18]

Ŵalara Ŵacikhristu ŵakusambizga mu mpingo na kovwira ŵabali mu uteŵeti

[Cithuzithuzi pa peji 20]

Nthowa yimoza yakuŵaliskira ungweru withu ndiyo kucita makora masambiro gha Baibolo