Cilengiwa Cikupharazga Ucindami wa Ciuta!
Cilengiwa Cikupharazga Ucindami wa Ciuta!
“Mtambo kucanya ukupharazga ucindami wa Ciuta; mlengalenga ukulongora mlimo wa mawoko ghake.”—SALMO 19:1.
1, 2. (a) Cifukwa wuli ŵanthu ŵangawuwona yayi ucindami wa Ciuta maso na maso? (b) Kasi ŵalara makhumi ghaŵiri na ŵanayi ŵakumucindika wuli Ciuta?
‘UNGAMANYA kuwona cisko cane cara; cifukwa palije munthu wanganiwona na kuŵa wamoyo.’ (Exodus 33:20) Umu ndimo Yehova wakacenjezgera Mozesi. Cifukwa cakuti ŵanthu ŵali kupangika na thupi liteci la nyama, ŵangawuwona yayi ucindami wa Ciuta maso na maso. Ndipouli, mu mboniwoni, mpositole Yohane wakawona Yehova pa mpando Wake waucindami.—Civumbuzi 4:1-3.
2 Mwakupambana na ŵanthu, vilengiwa vyauzimu vikumuwona Yehova. Ŵanyake awo ŵakumuwona ni “ŵalara makhumi ghaŵiri na ŵanayi” awo Yohane wakawona mu mboniwoni, ŵeneawo ŵakwimira ŵa 144,000. (Civumbuzi 4:4; 14:1-3) Kasi ŵakucita wuli para ŵawona ucindami wa Ciuta? Mwakuyana na Civumbuzi 4:11, ŵakucemerezga kuti: “Ŵakwenelera ndimwe, Fumu yithu na Ciuta withu, kupokera nchindi na thumbiko na nkhongono: Pakuti imwe mukalenga vyose, ndipo cifukwa ca khumbo linu vikaŵako, ndipo vikalengeka.”
Ico Ŵalijire “Mpandira”
3, 4. (a) Cifukwa wuli kugomezga mwa Ciuta na sayansi vikukolerana? (b) Nyengo zinyake nchivici ico cikupangiska kuti ŵanthu ŵakanenge Ciuta?
3 Kasi mukujipulika kuti mukwenera kumupa ucindami Ciuta? Ŵanthu ŵanandi ndimo ŵakujipulikira yayi, nakuti ŵanyake ŵakukana kuti Ciuta waliko. Mwaciyelezgero, munthu munyake uyo wakusambira vya mu mtambo wakalemba kuti: “Kasi ni Ciuta nadi uyo wakapanga vyose mu caru capasi na kucanya kuti ise tikondwe navyo? . . . Ici nchambura kupulikikwa. Ndipo nkhuwona kuti fundo iyi njakupuluska. . . . Nchakukwana yayi kulongosora kuti Ciuta ndiyo wakalenga vinthu.”
4 Masambiro gha ŵasayansi ghakugota pa vinthu ivyo ŵangawona na kusambira. Kweni ŵalije ukaboni wanadi, ŵakucita kusacizga waka. Pakuti ‘Ciuta ni Mzimu,’ ŵasayansi ŵangamusanda yayi na nthowa zawo. (Yohane 4:24) Ntheura nkhujikuzga kuyowoya kuti sayansi yikukolerana yayi na kugomezga mwa Ciuta. Wasayansi Vincent Wiggleworth wa pa Yunivesite ya Cambridge wakawona kuti nthowa iyo ŵasayansi ŵakusambilira vinthu “yikuthemba pa cipulikano.” Mwauli? “Sayansi yikuthemba pa kugomezga mwakufikapo kuti vyose ivyo tikuwona na maso ghithu vili kupangika mwakulondezga ‘malango ghakuŵikika gha cilengiwa.’” Ntheura usange wasayansi wakukana kugomezga mwa Ciuta, asi ndikuti kulwande wakuzomera kuti wali na cipulikano? Nyengo zinyake vikuwonekerathu kuti ŵanthu ŵakukanira dala unenesko wakuti Ciuta waliko, cifukwa ŵakopa kususkika. Wamasalmo wakalemba kuti: “Mu kujikuzga kwa cisko cake muheni . . . wakumupenja [cara]; kughanaghana kose kwake nkhwakuti, Kulije Ciuta.”—Salmo 10:4.
5. Cifukwa wuli awo ŵakukana kugomezga Ciuta ŵalije pakugwenthera?
5 Kweni kugomezga Ciuta nchinthu cawaka yayi, cifukwa pali ukaboni wakukwana uwo ukulongora kuti Ciuta waliko. (Ŵahebere 11:1) Allan Sandage, uyo wakusambira vya mu mtambo wakati: “Nkhuwona kuti nchambura kupulikikwa kuyowoya kuti vinthu vyakupangika mwa ndondomeko yiwemi ivi vikaŵako mwangozi. Vikwenera kuti vikacita kunozgeka makoraghene. Ine nkhumumanya makora yayi Ciuta, kweni ndiyo wakwenera kuti wakapanga vinthu, lekani viliko.” Mpositole Paulosi wakaphalira Ŵakhristu ku Roma kuti “kufuma ku mtendeko wa caru, kaŵiro kake ako nkhambura kuwoneka ndiko nkhongono zake za muyaya na Uciuta wake kakuwoneka pakweru, pakumanyikwa mu ivyo vili kulengeka; ntheura ŵanthu [ŵambura kugomezga] ŵara ŵalive mpandira [pakugwenthera].” (Ŵaroma 1:20) Kufuma “ku mtendeko wa caru”—comene kufuma apo ŵanthu ŵakalengekera, ŵeneawo ŵakumanya kuti Ciuta waliko—tikumanya kuti kuli Mlengi wankhongono comene, Ciuta uyo tikwenera kumusopa. Ntheura awo ŵakuleka kuzomera kuti Ciuta wakwenelera ucindami ŵangagwentha yayi. Kweni kasi cilengiwa cili na ukaboni wuli?
Mtambo Ukupharazga Ucindami wa Ciuta
6, 7. (a) Kasi mtambo ukupharazga wuli ucindami wa Ciuta? (b) Cifukwa wuli ukaboni wa mtambo wasorota mu caru capasi?
6 Salmo 19:1 likuzgora na mazgu ghakuti: “Mtambo kucanya ukupharazga ucindami wa Ciuta; mlengalenga ukulongora mlimo wa mawoko ghake.” Davide wakamanya kuti nyenyezi na vyaru vya kucanya ivyo vikuŵara mu “mlengalenga,” panji mtambo, mbukaboni ukuru wakuti kuli Ciuta wa ucindami. Iyo wakulutizga kuti: “Zuŵa likuyowoyeskana na zuŵa, ndipo usiku ukulongora vya mahara ku usiku.” (Salmo 19:2) Zuŵa na zuŵa kweniso usiku na usiku, mtambo ukulongora vinjeru vya Ciuta na nkhongono zake pa kulenga. Vikuŵa nga kuti ‘vikuyowoyeskana’ mazgu gha kulumba Ciuta kucanya.
7 Ndipouli, kuti tipulikiske ukaboni uwu, tikwenera kuŵa ŵamahara. ‘Kuyowoya kulije; mazgu nagho kulije; kayowoyero kawo kakupulikikwa yayi.’ Kweni ukaboni wambura mazgu wa kucanya ngwankhongono. “Lizgu lawo likusorota mu caru cose capasi, mazgu ghawo ku mphelerekezgo za pano pasi.” (Salmo 19:3, 4) Mtambo ukuwoneseska kuti ukaboni wake wambura mazgu ukufika mu vigaŵa vyose vya caru.
8, 9. Kasi pali fundo wuli zapadera zakukhwaskana na zuŵa?
8 Sono Davide wakulongosora cinthu cinyake cakuzizwiska mu cilengiwa ca Yehova: “Mwenemura wali kuŵika cihema ca dazi ilo liri nga ndi mweneco wa utezi [uyo watolenge mwanakazi] wakufuma mu nyumba yake, na kusekelera nga nchinkhara kufiska nthowa yake. Mu mphelerekezgo za mtambo muli kufuma kwake, kuzingilira kwake nakoso nkhu mphelerekezgo; kulije kanthu kakubisika ku cifundizi cake.”—Salmo 19:5-6.
9 Paliso nyenyezi zinyake zikuru kuluska zuŵa. Kweni zuŵa ni nyenyezi yapadera comene, ndipo vyaru ivyo vikwenda mwakulizingilira vikucepa kutali. Ŵanyake ŵakuti zuŵa likupeleŵera pacoko waka kuti liyane na ukuru wa vyaru vyose 9 ivyo vikulizingilira para ŵavisazga pamoza! Zuŵa liri na nkhongono iyo yikucitiska kuti caru capasi cizingilirenge mu nthowa yake pa mtunda wa makilomita 150 miliyoni, kwambura kuya kutali comene panji kusendelera kufupi comene na ilo. Nkhongono yicoko comene ya zuŵa ndiyo yikufika pano pa caru capasi, kweni njakukwana kuti tilutilire kuŵa ŵamoyo.
10. (a) Kasi zuŵa likunjira na kufuma wuli mu “cihema” cake? (b) Kasi ni mwauli umo likucimbilira nga ‘nchinkhara’?
10 Wamasalmo wakuyowoya ntharika yakulongosora za zuŵa, wakuliyaniska na “cinkhara” ico cikucimbira kufuma ku mphelerekezgo ya mtambo kuya ku yinyake mu dazi limoza, ndipo usiku cikupumura mu “cihema.” Para nyenyezi yankhongono iyi yikunjira ku cigoti ca mtambo, yikuwoneka ngati yikunjira mu “cihema” kuti yipumure. Mulenji, yikuŵa ngati yabulika waka, yikuŵala comene nga ni ‘mweneko wa utezi, panji munthu uyo watolenge wakufuma mu nyumba yake.’ Apo wakaŵa muliska, Davide wakapimanga na mphepo usiku. (Genesis 31:40) Wakakumbuka umo wakafundiranga luŵiro na malazi gha zuŵa, ndiposo umo kukatoweranga para zuŵa likufuma. Zuŵa likavukanga yayi na ulendo wake wakufuma ku vuma kuya ku zambwe, kweni likawonekanga nga “nchinkhara” ico canozgeka kwambaso ulendo wake.
Nyenyezi na Vipingausiku Vyakuzizwiska
11, 12. (a) Kasi Baibolo likulongora fundo wuli apo likuyaniska nyenyezi na mcenga? (b) Kasi mtambo ukwenera kuti ngukuru wuli?
11 Kwambura telesikopu, Davide wakawonanga nyenyezi zicoko waka. Kweni kafukufuku uyo wakacitika sonosono apa walongora kuti pa telesikopu ya mazuŵa ghano, munthu wangawona nyenyezi zakukwana masekisitiliyoni 70—panji kuti 7 kusazgako ŵaziro 22! Yehova wakalongora kuti kucanya kuli nyenyezi zinandi comene apo wakayaniska unandi wake na unandi wa “mcenga uwo wuli mumphepete mwa nyanja.”—Genesis 22:17.
12 Kwa vilimika vinandi, ŵasayansi ŵakuwona “vigaŵa vinyake mu mtambo ivyo vikuŵara patalitali, kweni vikuwoneka makora viŵi yayi.” Pakwamba ŵakatenge panji vinthu ivi, vyeneivyo “vikuwoneka nga ni bingo lituŵa” vili mu cipingausiku ico cili pafupi na caru capasi. Mu 1924, vikawoneka kuti limoza mwa mabingo agha lakucemeka Andromeda, ilo liri kufupiko na caru, nchipingausiku pa ico cekha—kweni cili kutali nkhanira na caru capasi. Sono ŵasayansi ŵakusacizga kuti kuli vipingausiku mabiliyoni ghanandi, ndipo cilicose cili na nyenyezi zambura kupendeka. Ndipouli, Yehova “wakupenda nyenyezi, unandi wawo, na kuzipa zose mazina ghawo.”—Salmo 147:4.
13. (a) Kasi ni fundo wuli iyo njapadera pakukhwaskana na vilimera? (b) Kasi pali ukaboni wuli wakuti ŵasayansi ŵakughamanya yayi “malango ghakwimikika gha kucanya”?
13 Yehova wakafumba Yobu kuti: “Ungamanya kasi kukaka maunyoro gha Cilimera, panji kusutula vikakiri vya Mauta?” (Job 38:31) Cilimera ni gulu la nyenyezi izo zikuwoneka mu ndondomeko yakuyana. Nangauli nyenyezi zikwenera kuti zili patalipatali, kweni pano pasi zikuwoneka ngati zili kuŵikika mu ndondomeko. Pakuti yiliyose yili na malo ghake, nyenyezi “zikovwira comene para ŵasayansi ŵakwenda mu mlengalenga, kuti ŵamanyenge uko ndege yikulazga ndipo cikuŵa cipusu kuŵanika nyenyezi.” (The Encyclopedia Americana) Kweni, palije uyo wakumanya makora ico “cikuwunjika” nyenyezi mu cilimera. Inya, ŵasayansi ŵangazgora yayi fumbo ilo liri pa Job 38:33: “Kasi ukumanya malango ghakwimikika gha kucanya?”
14. Ni mwauli umo cikuŵira cinonono kumanya umo ungweru ukupatukirana?
14 Ŵasayansi ŵangazgora yayi fumbo linyake ilo Job wakafumbika: “Nthowa ndi nji yakuya pa kupatukirana kungweruka?” (Job 38:24) Mulembi munyake wakati fumbo lakukhwaskana na ungweru ili “ni fumbo lamahara comene pa sayansi mazuŵa ghano.” Likupambana na ivyo Ŵagiriki ŵanyake ŵavinjeru ŵakaghanaghananga, kuti ungweru ukufuma mu maso gha ŵanthu. Vilimika ivyo vyajumpha, ŵasayansi ŵayamba kughanaghana kuti ungweru nthumabulunga tucokotucoko. Ŵanyake ŵakuti ungweru ukwenda nga ni mphepo. Lero, ŵasayansi ŵakugomezga kuti vyose ni vyaunenesko, ungweru wuli nga ni mphepo, kweniso nthumabulunga. Kweni ŵacali ŵandapulikiske umo ungweru wuliri, na umo ‘ukupatukirana.’
15. Nga ni Davide, kasi ise tikwenera kujipulika wuli para tikughanaghana vya mtambo?
15 Pakughanaghanira vyose ivi, munthu waliyose wakujipulika nga ni mulembi wa masalmo Davide, uyo wakati: “Apo nkhupima mitambo yinu, mlimo wa minwe yinu, na mwezi na nyenyezi izo muli kwimika; kasi munthu ngwaci, kuti mumukumbuke? Na mwana wa munthu, kuti mucezge naye?”—Salmo 8:3, 4.
Caru Capasi na Vilengiwa Vikucindika Yehova
16, 17. Kasi vilengiwa mu “ndimba” za maji vikumucindika wuli Yehova?
16 Salmo 148 likulongora nthowa zinyake izo cilengiwa cikupharazgira ucindami wa Ciuta. Salmo 148:7 likuti: “Lumbani Yehova mu caru, mwa vikurukuru vya munyanja na mu zindimba zose.” Inya, mu ‘ndimba za maji’ muli vinthu vinandi vyakuzizwiska ivyo vikuvumbura vinjeru na nkhongono za Ciuta. Cisomba ico cikucemeka blue whale nchikuru comene, kanandi cikukwana matani 120—uwo ni uzito wa zovu 30! Mtima wake wekha ukukwana makilogiramu ghakujumpha 450, ndipo ungapopa ndopa zakukwana makilogiramu 6,400 mu thupi lake! Kasi vinyama vikuru vya mu nyanja ivi vikutondeka kuskuŵa mu maji? Yayi. Ivyo vikuskuŵa luŵiro comene, ndimo likuyowoyera lipoti la European Catacean Bycatch Campaign. Cisomba cinyake ico ŵakacijambura na satellite “cikenda makilomita ghakujumpha 16,000 mu myezi khumi.”
17 Cisomba cakucemeka bottle-nosed dolphin kanandi cikudukira mcanya na kubira mamita 45, kweni nyengo yinyake somba ya mtundu uwu yikabira pasi comene, mamita 547! Kasi zikupona wuli para zikubira mu maji? Mtima ukukhung’uska pacokopacoko para zikubira, ndipo ndopa zikuya ku mtima, maphapu na wongo. Kweniso mu misipa yake mukusungika mphepo za oxygen. Vinyama vinyake vyakucemeka Elephant seal na sperm whale vikubira pasi nkhanira. “Ivyo vikulimbana na kuthuta yayi,” ndimo yikuyowoyera magazini ya Discover, “vikulekerathu kuthuta.” Vikusunga mphepo zinandi zakuzirwa za oxygen mu misipa. Nadi pano, vilengiwa ivi vikulongora vinjeru ivyo Ciuta wali navyo, kweniso kuti iyo ni Ciuta wankhongono zose!
18. Kasi maji gha mu nyanja ghakulongora wuli vinjeru vya Yehova?
18 Nanga ghangaŵa maji gha mu nyanja ghakulongora vinjeru vya Yehova. Mu nthonyezi lililose la maji kufuma pacanya pa nyanja mupaka mamita 100 pasi, muli vyakumera vinandi comene vyambura kuwoneka na maso,” ndimo yikuyowoyera Scientific American. “Thondo lambura kuwoneka” ili likusefa mphepo mwa konkha mphepo za carbon dioxide zakukwana matani ghanandi comene. Vyakumera ivi ndivyo vikupanga mphepo zinandi za oxygen izo tikuthuta.
19. Kasi moto na ciwuvi cakukhoma vikufiska wuli khumbo la Yehova?
19 Salmo 148:8 likuti: “Imwe moto na matalala, ciwuvi na majithutwe, na cinkhuka [cimphepo] ico cikufiska dango lake!” Inya, Yehova wakugwiliskira nchito nkhongono zakulengeka izi kuti wafiske khumbo lake. Mwaciyelezgero, moto. Vilimika vinandi ivyo vyajumpha, ŵanthu ŵakawonanga ngati moto wa muthondo ukunanga waka vinthu. Kweni sono ŵanthu awo ŵakucita kafukufuku ŵasanga kuti moto ukovwira comene kuwezgerapo ivyo vyanangika, ukocha makuni ghakale panji agho ghakomira, ukovwira kuti njere zinandi zimere, ukuwezgeramo mcere mu dongo, nakuti ukucepeska luphya. Ciwuvi cakukhoma naco nchakuzirwa, cikuthilira dongo na kuwezgeramo vundira, cikuwezgeramo maji mu madambo, ndiposo cikovwira kuti makuni na vinyama vileke komilira na mphepo ku vigaŵa vyakuzizima comene.
20. Kasi mapiri na makuni vikovwira wuli ŵanthu?
20 Salmo 148:9 likuti: “Mapiri mitundu yose, makuni ghakupasa na milanje yose!” Mapiri mbukaboni wakuti Yehova ngwankhongono comene. (Salmo 65:6) Kweniso ghali na nchito yakuzirwa. Lipoti la Institute of Geography ku Bern, Switzerland, likuti: “Maji gha mu madambo ghose ghakuru pa caru ghakufuma mu mapiri. Ŵanthu ŵakujumpha hafu pa caru capasi ŵakuthemba pa maji ghawemi agho ghakufuma mu mapiri . . . ‘Visimi vya maji’ ivi ni vyakuzirwa comene pa umoyo wa ŵanthu.” Na makuni wuwo ghakucindika Mlengi wawo. Lipoti la United Nations Environment Programme likuti makuni “ngakuzirwa comene pa umoyo wa ŵanthu mu vyaru vyose . . . Mitundu yinandi ya makuni yikovwira pa cuma, pakuti tikusangako vinthu nga ni mathabwa, vipasi, skaŵa, ulimbo, na munkhwara wakubatikira vinthu. Pa caru cose, ŵanthu mabiliyoni ghaŵiri ŵakuthemba nkhuni pakuphika.”
21. Longosorani umo hamba likulongolera luso lwa kulenga?
21 Tikumanya kuti mlengi ngwavinjeru para tikuwona umo khuni liri kupangikira. Mwaciyelezgero, hamba. Kuwaro kwa hamba kuli nembanemba iyo yikovwira kuti lileke komira. Kusi ku nembanemba kuli maselo gha mtundu wakubiliŵira. Maselo agha ghakonkha nkhongono ya ungweru. Mahamba ghakupanga cakurya mu nthowa yakucemeka photosynthesis. Misisi yikutora maji na kughatumizga ku mahamba kwendera mu mphuwu izo zili mu ciŵiriŵiri na minthavi. Kusi kwa mahamba kuli tuvidolozi (twakucemeka stomata) uto tukujulika na kujalika, ndipo tukunjizga mphepo za carbon dioxide. Nkhongono iyo ungweru ukupeleka yikucitiska kuti maji na mphepo za carbon dioxide visazgikane na kuzgoka cakurya. Apa sono khuni likunozgeka kurya cakurya ico lapanga lekha. Kweni, palije ico cikunangika para khuni likupanga cakurya. M’malo mwa kunanga mphepo, khuni likufumiska mphepo ziwemi za oxygen!
22, 23. (a) Kasi ni vinthu wuli vyapadera ivyo tuyuni na vinyama vinyake vikucita? (b) Kasi ni mafumbo wuli ghanyake agho tikwenera kughanaghanirapo?
22 “[Imwe] vikoko na viŵeto vyose, vyakukhwaŵa na viyuni vyakuwuruka!,” ndimo likuyowoyera Salmo 148:10. Vinyama vinandi vya pa mtunda na ivyo vikuwuruka vikucita vinthu vyakuzizwiska comene. Mabaka ghanyake gha mu maji ghakuduka mtunda utali comene kwambura kupumulira, (makilomita 40,000 mu mazuŵa 90 pera). Kayuni kakucemeka blackpoll warbler kakwamba ulendo wake wakufuma ku North America kuya ku South America, kakuduka mcanya kwa maora 80 kwambura kupumulira. Ngamila yikusunga maji mu lununda yayi, nga umo ŵanandi ŵakughanaghanira, kweni mu nthumbo, ndipo yikukhala nyengo yitali comene kwambura komirwa. Lekani ŵanthu awo ŵakupanga vinthu ŵakusambira dankha umo vinyama vikucitira para ŵakukhumba kupanga makina na vinthu vinyake viphya. Mulembi yumoza, Gail Cleere, wakalemba kuti: “Usange mukukhumba kupanga cinthu cakuti cigwire nchito makora . . . kweniso cambura kunanga malo, ipo mukwenera kutolera pa cinthu cinyake cakulengeka.”
23 Inya, cilengiwa cikupharazga nadi ucindami wa Ciuta! Mtambo na nyenyezi zake, makuni na vinyama, vyose vikucindika Mlengi wawo mu nthowa izi na izi. Kweni taŵanthu ke? Kasi tingakolerana wuli na cilengiwa pa kwimbira Ciuta malumbo?
Kasi Mukukumbuka?
• Cifukwa wuli awo ŵakukana kuti Ciuta waliko walije pakugwenthera?
• Kasi nyenyezi na vyaru vya kucanya vikumucindika wuli Ciuta?
• Kasi nyanja na vinyama vikulongora wuli kuti kuli Mlengi wacitemwa?
• Kasi nkhongono za mu cilengiwa zikufiska wuli khumbo la Yehova?
[Mafumbo]
[Cithuzithuzi pa peji 24]
Ŵasayansi ŵakusacizga kuti tingawona nyenyezi zakukwana masekisitiliyoni 70!
[Credit line]
Frank Zullo
[Cithuzithuzi pa peji 27]
Ciwuvi cakukhoma
[Credit line]
snowcrystals.net
[Cithuzithuzi pa peji 27]
Citwana ca baka la mu maji