Kasi Mukwenera Kuŵa na Cisopo?

‘NKHWENERA kuŵa na cisopo yayi nesi kuluta ku chalichi nyengo zose mwakuti nigomezge Ciuta!’ Ŵanandi ŵakughanaghana nthena pa nkhani ya kuŵa na cisopo. Nakuti ŵanyake ŵakuwona kuti ŵali pafupi na Ciuta para ŵawukapo pa nyumba kukawona cilengiwa kunyake kuluska kuluta ku chalichi. Lero ŵanandi ŵakuwona kuti kugomezga Ciuta cikuthemba pa kuŵa na cisopo yayi.

Ndipouli, ŵanyake ŵakughanaghana nthena yayi. Ŵakugomezga kuti kuŵa na cisopo nchinthu cakuzirwa nkhanira mwakuti munthu watemweke na Ciuta. Usange kukolerana na cisopo nchinthu cakuzirwa nadi, ipo cakukhumbikwa nkhumanya waka cisopo na unandi wa ŵanthu awo ŵalimo yayi. Pakuti nkhani iyi yikusazgapo ubwezi withu na Ciuta, kasi nchiwemi yayi kumanya umo Ciuta wakuwonera nkhani ya kuŵa na cisopo? Kasi tingasambiramo vici mu Mazgu ghake, Baibolo, pa nkhani iyi?

Umo Ciuta Wakacitiranga na Ŵanthu Ŵake Kale

Vilimika vyakujumpha 4,400 kumanyuma, cigumula cikiza na kunanga caru cose. Cigumula ici ciluwikenge yayi, nakuti ŵanthu pa caru cose ŵakucimanya makora. Nangauli nkhani iyi yikuyowoyekera panandi, kweni unenesko ngumoza—ŵanthu ŵacoko waka pamoza na vinyama ndiwo ŵakapona.

Kasi awo ŵakapona pa Cigumula ŵakaponera waka mwaŵi, waliyose payekha? Baibolo likulongora kuti ndimo vikaŵira yayi. Ciuta wakaphalira munthu yose payekha yayi kuti kwizenge Cigumula. Kweni wakaphalira Nowa, ndipo nayo wakaphalira ŵanyake kuti Cigumula cikwiza.—Genesis 6:13-16; 2 Petros 2:5.

 Kuti munthu wapone, wakeneranga kukolerana na gulu na kupulikira ivyo Ciuta wakaphalira Nowa. Nanga ni vinyama ivyo vikapona pa Cigumula vikapona cifukwa vikakolerana na gulu ili. Nowa wakaphalirika ivyo wakenera kucita kuti vinyama vipone.—Genesis 6:17–7:8.

Vilimika vinandi vikati vyalutapo, ŵazukuru ŵa Nowa—ŵana ŵa mwana wake Shemu—ŵakaŵa ŵazga mu Eguputo. Kweni khumbo la Yehova likaŵa lakuti waŵawombore na kuluta nawo ku caru ico wakalayizga sekuru wawo Abrahamu. Apa napo tikuwona kuti Ciuta wakavumbulira munthu yose payekha yayi, kweni cakwamba wakavumbulira ŵalongozgi awo wakaŵasankha—Mozesi na mukuru wake Aroni. (Exodus 3:7-10; 4:27-31) Pamanyuma pakuti ŵazga wose ŵafuma mu Eguputo, ŵakapika Dango la Ciuta pa Phiri la Sinayi na kuŵazgora mtundu wa Israyeli.—Exodus 19:1-6.

Muisrayeli waliyose wakatenge wawombokwenge kwekha usange wakolerana na gulu ilo Ciuta wakalisankha na kupulikira ulongozgi wa ŵadangiliri. Nanga ni Mueguputo wakazomerezgeka kukolerana na gulu ilo likalongozgekanga na Ciuta. Apo Ŵaisrayeli ŵakafumanga mu Eguputo, Ŵaeguputo ŵakalongozgana nawo, ŵakajibatika kwa iwo mwakuti ŵapokere vitumbiko vya Ciuta.—Exodus 12:37, 38.

Kukwambilira kwa nyengo yithu yino, Yesu wakamba nchito yake ya kupharazga, kuwunganya ŵanthu kuti ŵaŵe ŵasambiri ŵake. Wakaŵacitiranga vinthu wose pamoza, nangauli wakawovwiranga munthu na munthu mwacitemwa malinga na umo wakaŵira. Yesu wakati kwa ŵapositole ŵakugomezgeka 11: “Imwe ndimwe mwakhala pamoza na ine mu viyezgo vyane; ndipo ine nkhumwimikirani Ufumu, umoso Ŵadada ŵali kundimikira ine.” (Luka 22:28, 29) Pa nyengo yinyake, mzimu utuŵa wa Ciuta ukiza pa ŵasambiri apo wose ŵakawungana pamoza.—Milimo 2:1-4.

Viyelezgero ivi vikulongora kuti nyengo zakale, Ciuta kanandi wakacitiranga vinthu ŵanthu wose pamoza. Ŵanthu ŵacoko waka awo Ciuta wakaŵacitiranga vinthu paŵekha—Nowa, Mozesi, Yesu, na ŵanyake—ŵakasankhika na Iyo kuti wayowoyenge na gulu lake. Tileke kughanaghana kuti Ciuta wali kuleka kucita nthena na ŵateŵeti ŵake lero. Ipo fumbo lingafumbika kuti: Kasi palije kanthu nanga tingakolerana na cisopo cilicose? Nkhani yakulondezgapo yizgorenge fumbo lakuzirwa ili.

[Vithuzithuzi pa peji 4]

Kwamba kale, Ciuta wakucitira vinthu ŵanthu pa gulu