Kupwelelera Ŵacekuru—Udindo wa Ŵakhristu
Kupwelelera Ŵacekuru—Udindo wa Ŵakhristu
“Nanga mufike ku ucekuru, Ndine; ndipo tindimuyegheni ku ucekuru wa mbuha.”—YESAYA 46:4.
1, 2. Kasi pwelelero la Ŵadada ŵithu ŵakucanya ndakupambana wuli na la ŵapapi withu ŵa pano pa caru?
ŴAPAPI ŵakujipeleka ŵakusambizga ŵana ŵawo kwambira pa ŵanici. Ŵakulutilira nipera kuŵapwelelera mwacitemwa na kuŵavwira mupaka ku ulara apo ŵakuŵa na mbumba zawo na zawo.
2 Nangauli pali mphaka ya vinthu ivyo ŵapapi wangacitira ŵana ŵawo, Ŵadada ŵithu ŵakucanya nyengo zose ŵakupwelelera na kovwira mwacitemwa ŵateŵeti ŵawo ŵakugomezgeka. Peneapo wakayowoyanga na ŵanthu ŵake ŵakusoleka mu nyengo zakale, Yehova wakati: “Nanga mufike ku ucekuru, Ndine; ndipo tindimuyegheni ku ucekuru wa mbuha.” (Yesaya 46:4) Mazgu agha ngakukhozga comene ku Ŵakhristu ŵacekuru! Yehova wakuleka yayi ŵanthu awo ŵakulutilira kuŵa ŵakugomezgeka kwa iye. M’malo mwake, wakulayizga kuti wavikilirenge, wawovwirenge, na kuŵalongozga mu umoyo wawo wose, nanga ni mu ucekuru.—Salmo 48:14.
3. Kasi tisambirengeci mu nkhani iyi?
3 Kasi tingalongora wuli citemwa kwa ŵacekuru nga ni Yehova? (Ŵaefeso 5:1, 2) Tiyeni tiwone nthowa izo ŵana, ŵalara ŵa mpingo, na Mkhristu waliyose ŵangapwelelelera ŵabali na ŵadumbu ŵithu ŵacekuru.
Udindo Withu Nga ni Ŵana
4. Kasi ŵana ŵa Cikhristu wali na udindo wuli ku ŵapapi ŵawo?
4 “Cindika ŵawuso na ŵanyoko.” (Ŵaefeso 6:2; Exodus 20:12) Na mazgu ghapusu agha kweni ghakuzirwa comene ghakufumira mu Malemba gha Cihebere, mpositole Paulosi wakakumbuska ŵana za udindo uwo ŵali nawo ku ŵapapi ŵawo. Kweni kasi mazgu agha ghakukolerana wuli na kupwelelera ŵacekuru? Ciyelezgero cakukondweska ca mu nyengo zakale citovwirenge kuzgora fumbo ili.
5. (a) Nchivici ico cikulongora kuti Yosefe wakaluwa yayi udindo wakupwelelera mbumba yake? (b) Kasi cikung’anamuraci kucindika ŵapapi withu, ndipo nchiyelezgero wuli ciwemi ico Yosefe wakalongora pa nkhani iyi?
5 Kwa vilimika vyakujumpha 20, Yosefe wakawonana yayi na ŵadada ŵake ŵacekuru, Yakobe. Ndipouli, Yosefe wakaleka cara kumutemwa Yakobe. Ndipo nadi, apo wakajivumbura ku ŵabali ŵake, wakafumba kuti: “Kasi ŵadada ŵacali ŵamoyo?” (Genesis 43:7, 27; 45:3) Pa nyengo iyo, mu caru ca Kenani mukaŵa njara ya zanimuwone. Nchifukwa cake Yosefe wakatuma mazgu kwa ŵadada ŵake, wakati: “Khirani, mwize kwa ine, muleke kuziulika; mwamukhala mu caru ca Gosheni, timuŵenge pafupi na ine, . . . tindimulereni kuko.” (Genesis 45:9-11; 47:12) Nadi pano, kucindika ŵapapi ŵacekuru kukusazgapo kuŵavikilira na kuŵapa vinthu vyakukhumbikwa mu umoyo peneapo walije nkhongono za kujipwelelera ŵekha. (1 Samuel 22:1-4; Yohane 19:25-27) Yosefe wakazomera udindo uwu na cimwemwe.
6. Kasi Yosefe wakalongora wuli citemwa ceneko kwa ŵadada ŵake, ndipo ise tingalondezga wuli ciyelezgero cake?
6 Mwa kovwilika na Yehova, Yosefe wakaŵa yumoza wa ŵanthu ŵasambazi ndiposo ŵamazaza comene mu Eguputo. (Genesis 41:40) Kweni iye wakajiwonanga nga ngwakuzirwa yayi panji wakutangwanika comene mwakuti wangakwaniska yayi kupwelelera ŵadada ŵake ŵacekuru awo ŵakaŵa na vilimika 130. Wakati wamanya kuti Yakobe (panji Israyeli) wakwiza, ‘Yosefe wakanozga gareta lake kuyakakumana na Israyeli ŵawiske ku Gosheni; wakawa pa singo yake, wakalilira pa singo yake kanyengo.’ (Genesis 46:28, 29) Kuŵapokelera kukang’anamura vinandi padera pa nchindi. Yosefe wakaŵatemwanga comene ŵadada ŵake ŵacekuru ndipo wakacitanga soni yayi kulongora citemwa cake kwa iwo. Usange nase tili na ŵapapi ŵacekuru, kasi tikucita mwakuyana waka, kuŵatemwa na mtima wose?
7. Cifukwa wuli Yakobe wakakhumba kuti ŵakamusunge mu caru ca Kenani?
7 Yakobe wakalutilira kujipeleka comene kwa Yehova mu umoyo wake wose. (Ŵahebere 11:21) Cifukwa ca kuŵa na cigomezgo mu vilayizgo vya Ciuta, Yakobe wakapempha kuti para wafwa ŵakamusunge mu caru ca Kenani. Yosefe wakacindika pempho la ŵadada ŵake mwakucita nga umo iwo ŵakapemphera, mwambura kupwelerako kanthu za mtengo na vinthu ivyo vikanjizgikamo.—Genesis 47:29-31; 50:7-14.
8. (a) Kasi nchivici comenecomene ico cikutipangiska kupwelelera ŵapapi ŵithu ŵacekuru? (b) Kasi muteŵeti munyake wa nyengo zose wakacitaci kuti wapwelelere ŵapapi ŵake ŵacekuru? (Wonani bokosi pa peji 15.)
8 Nchivici ico cikamupangiska Yosefe kupwelelera ŵadada ŵake? Nangauli citemwa na kujipulika kuŵa na ngongoli kwa uyo wakamubaba na kumulera ndivyo vikamupangiska, mwambura kukayika khumbo likuru la Yosefe likaŵa la kukondweska Yehova. Ndimo nase ticitirenge nthena. Paulosi wakalemba kuti: “Usange cokoro cinji cili na ŵana panji ŵazukuru, iwo ŵasambire nanga kuŵalongora ulemu ŵa mu mbumba yawo, na kuŵawezgera uwemi ŵapapi ŵawo; cifukwa ceneici ndico ncha mapokelereko na Ciuta.” (1 Timote 5:4) Nadi pano, kutemwa Yehova na kumopa mwakwenelera kuzamuticiska kuti tipwelelere ŵapapi ŵacekuru, mwambura kupwelerako za masuzgo agho ghangaŵapo. a
Umo Ŵalara Ŵangalongolera Kuti Ŵakupwelelera
9. Kasi Yehova wasankha ŵanjani kupwelelera ŵanthu ŵake, kusazgapo Ŵakhristu ŵacekuru?
9 Wakati wakakhala pacoko kuti wafwe, Yakobe wakayowoya kuti Yehova ni “Ciuta uyo wandilera ine mazuŵa ghose gha umoyo wane mupaka zuŵa lino.” (Genesis 48:15) Lero, Yehova wakugwiliskira nchito ŵalara ŵa mpingo kupwelelera ŵateŵeti ŵake pa caru capasi, mwakulongozgeka na Mwana wake, Yesu Khristu, “Muliska mukuru.” (1 Petros 5:2-4) Kasi ŵalara ŵangalondezga wuli Yehova pa kupwelelera ŵacekuru mu mpingo?
10. Kasi ni vinthu wuli ivyo vyacitika kuti ŵapwelelere mwakuthupi Ŵakhristu ŵacekuru? (Wonani bokosi pa peji 17.)
10 Pakati pajumpha kanyengo kacoko mpingo Wacikhristu ukati wamba waka, ŵapositole ŵakasankha “ŵanalume ŵankhondi na ŵaŵiri ŵa lumbiri luwemi ŵakuzura na mzimu na vinjeru” kuti ŵalaŵilire nchito ya ‘kugaŵira’ vyokoro vikavu cakurya. (Milimo 6:1-6) Panyuma pake, Paulosi wakamuphalira Timote kuti walembe mazina gha vyokoro vya lumbiri luwemi vyeneivyo vikeneranga kupokera wovwiri wakuthupi. (1 Timote 5:3, 9, 10) Mwakuyana waka, ŵalara ŵa mpingo madazi ghano ŵakupanga manozgero gha kupeleka wovwiri ku Ŵakhristu ŵacekuru para nchakukhumbikwa kucita ntheura mwakujipeleka. Ndipouli, vinandi vikunjizgikamo pa kupwelelera ŵacekuru ŵakugomezgeka.
11. Kasi Yesu wakayowoyaci za cokoro cikavu ico cikapeleka tundarama tucoko?
11 Peneapo wakakhala pacoko waka kuti wamalizge uteŵeti wake pa caru capasi, Yesu wakakhala pasi mu tempele ndipo “wakawonanga umo mzinda ukatayirangamo ndarama mu cakulongeramo zithiro.” Ndipo munthu munyake wakamukondweska comene. Malemba ghakuti: ‘Cikiza cokoro cikavu, cikatayamo tundarama tuŵiri, uto tukulingana na kakopara kamoza.’ Ndipo Yesu wakacema ŵasambiri ŵake na kuŵaphalira kuti: ‘Nadi nkhumunenerani kuti cokoro ici cikavu catayamo kwakuluska wose awo ŵatayamo mu cakulongeramo zithiro: Cifukwa wose ŵatayamo vya ku uzali wawo; kweni ici mu ukavu wake catayamo vyose ivyo cikaŵa navyo, cuma cake cose.’ (Marko 12:41-44) Pakuyowoya za ndarama, cokoro ici cikapeleka tundarama tucoko comene, kweni Yesu wakamanya kuti ŵadada ŵake ŵakucanya ŵakuwonga comene kupeleka kwakufumira pasi pa mtima. Mwambura kupwelerako za msinkhu wa cokoro ici, Yesu wakayuyura yayi ivyo cikacita.
12. Kasi ŵalara ŵangalongora wuli kuti ŵakuwonga milimo iyo Ŵakhristu ŵacekuru ŵakucita?
12 Nga ni Yesu, ŵalara Ŵacikhristu ŵakudelera yayi ivyo ŵacekuru ŵakucita pa kukhozgera kusopa kwaunenesko. Ŵalara ŵali na vifukwa vyakukwana vyakuwongera ŵacekuru cifukwa ca kunjizgikamo kwawo mu uteŵeti, kutoramo kwawo cigaŵa pa maungano, kukhozga mpingo ndiposo kuzizipizga kwawo. Kuwonga kwakufumira pasi pa mtima kungavwira ŵacekuru kuti ŵaŵe na ‘cakuthumbwira’ mu mulimo wawo wakupatulika, ndipo ici cipangiskenge kuti ŵaleke kugongowa mwa kujiyaniska na umo Ŵakhristu ŵanji ŵakucitira panji ivyo ŵakacitanga kale.—Ŵagalatiya 6:4.
13. Kasi ŵalara ŵangamanya wuli maluso na vyakukumana navyo vya ŵacekuru?
13 Ŵalara ŵangamanya milimo yakuzirwa iyo ŵacekuru Ŵacikhristu ŵakucita mwakusambira kufuma ku vyakukumana navyo vyawo ndiposo maluso. Ŵacekuru ŵa ciyelezgero ciwemi nyengo zinyake wanganjizgikamo mu viyelezgero. Mbali munyake wakati: “Ŵategherezgi ŵakuŵa maso kutegherezga para ŵabali na ŵadumbu ŵacekuru awo ŵalera makora ŵana ŵawo mu unenesko ŵakufumbika umo ŵakacitira.” Ŵalara ŵa mpingo unyake ŵakayowoya kuti mudumbu mucekuru wa vilimika 71 uyo wakacitanga upayiniya, wawovwira comene ŵapharazgi kuti ŵatorengemo cigaŵa mu upharazgi mwakukhazikika. Wakaŵaciskaso kuti ŵacitenge ‘vinthu ivyo ni vyakuzirwa comene,’ nga ni kuŵazga Baibolo na lemba la zuŵa ndipo panyuma pake ŵalangurukenge pa ivyo ŵasambira.
14. Kasi wupu wunyake wa ŵalara wukawonga wuli mulara munyawo mucekuru?
14 Ŵalara ŵakuwongaso ivyo ŵalara ŵanyawo awo mbacekuru ŵakucita. José, uyo sono wali na vilimika vya mu ma 70 ndipo wateŵetera nga ni mulara kwa vilimika vinandi, sonosono apa wakalwara ndipo ŵakamucita opaleshoni yikuru. Cifukwa cakuti wakalwara kwa nyengo yitali, iye wakaghanaghana za kuleka kuteŵetera nga ni mulaŵiliri wakulongozga. “Ivyo ŵakayowoya ŵalara ŵanyane ŵa mpingo vikanizizika comene,” ndimo wakayowoyera José. “M’malo mwa kuzomerezga sacizgo lane, ŵakanifumba ivyo ŵanganicitira kuti nilutilire kuteŵetera nga ni mulara.” Mwa kovwirika na ŵalara awo ŵakaŵa ŵana ŵacoko kwa iye, José wakalutilira kuteŵetera mwakukondwa nga ni mulaŵiliri wakulongozga, ndipo waŵa thumbiko ku mpingo. Mulara munyake wakati: “Ŵabali mu mpingo ŵakuwonga comene mulimo wa José nga ni mulara. Ŵakumutemwa na kumucindika cifukwa ca cimanyisko cake na ciyelezgero ciwemi ca cipulikano. Wakukhozga mpingo withu.”
Kupwelelerana
15. Nchifukwa wuli Ŵakhristu ŵakwenera kupwelelera ŵacekuru?
15 Ni ŵana awo ŵali na ŵapapi ŵacekuru pera yayi na ŵalara ŵa mpingo awo ŵakwenera kupwelelera ŵacekuru. Mwakuyaniska mpingo Wacikhristu na thupi la munthu, Paulosi wakalemba kuti: “Ciuta pakugumanya thupi wali kupa nchindi zikuruko ku ico cikapelera; mwakuti muŵavye swekano mu thupi; kweni kuti viŵaro vipwelerane kwakuyanayana.” (1 Ŵakorinte 12:24, 25) Kuti mpingo Wacikhristu ucitenge vinthu mwakukolerana, ciŵaro cilicose cikwenera kupwelelera umoyo wa musopi munyake, kusazgapo ŵacekuru.—Ŵagalatiya 6:2.
16. Kasi tingalongora wuli kuti tikupwelelera ŵacekuru para tili pa maungano gha Cikhristu?
16 Maungano gha Cikhristu ghakutipa mwaŵi wakulongora kuti tikupwelelera ŵacekuru. (Ŵafilipi 2:4; Ŵahebere 10:24, 25) Kasi ise tikupatura nyengo kucezga na ŵacekuru pa maungano? Peneapo cingaŵa cakwenelera kuŵafumba kuti mumanye za umoyo wawo, kasi ‘tingaŵakhozga yayi mwauzimu,’ mutepanji kuŵaphalira nkhani yakukhozga panji fundo za mu Malemba? Cifukwa cakuti ŵacekuru ŵanyake ŵakwenda mwakusuzgikira, cingaŵa ciwemi kuti ise tiŵayenderenge m’malo mwakuti iwo ndiwo ŵatenderenge. Usange ŵali na suzgo la kupulika, tikwenera kuyowoya pacokopacoko ndiposo mwakupulikikwa makora. Kuti ‘tisanguluskane,’ tikwenera kutegherezga comene ivyo munthu mucekuru wakuyowoya.—Ŵaroma 1:11, 12.
17. Kasi tingalongora wuli kuti tikupwelelera Ŵakhristu ŵacekuru ŵeneawo ŵakutondeka kwenda ndipo ŵakukhala waka pa nyumba?
17 Kasi tingacita wuli usange ŵacekuru ŵanyake ŵakutondeka kwiza ku maungano? Lemba la Yakobe 1:27 likulongora kuti ni udindo withu “kupwelelera ŵalanda na vyokoro mu kusuzgika kwawo.” Lizgu la Cigiriki ilo likung’anamurika kuti “kupwelelera” lingang’anamuraso kuti “kuŵacezgera.” (Milimo 15:36) Ŵacekuru ŵakukondwa comene para tikuŵacezgera! Peneapo wakaŵa mu jere ku Roma ca mu ma 65 C.E., Paulosi mpositole “mucekuru” wakaŵa yekha. Iye wakakhumbisiska kuti wawonane na muteŵeti munyake Timote, mwantheura wakalemba kalata wakati: ‘Yezga comene kuti wize luŵiro kwa ine.’ (Filemone 9; 2 Timote 1:3, 4; 4:9) Nangauli iwo ŵali mu jere yayi nga ni umo Paulosi wakaŵira, ŵacekuru ŵanyake ŵakukhala waka pa nyumba cifukwa ca matenda. Nyengo zinyake ŵangayowoya kuti, ‘Conde muyezgeyezgenge kwiza kuzakaniwona.’ Kasi ise tikuzomera pempho la nga ni ili?
18. Kasi kucezgera ŵacekuru kungaŵa na phindu wuli?
18 Mungadeleranga yayi vyakufumapo viwemi vya kucezgera ŵabali na ŵadumbu ŵacekuru. Apo Mkhristu munyake zina lake Onesiforo wakaŵa ku Roma, iye wakamupenjisiska Paulosi, wakamusanga, ndipo wakamusanguluskanga nyengo zinandi. (2 Timote 1:16. 17) “Nkhutemwa kucezga na ŵana,” wakayowoya ntheura mudumbu munyake mucekuru. “Ico cikunikukondweska comene nchakuti ŵakunitora nga nili yumoza wa munyumba zawo. Ici cikunikhozga comene.” Mudumbu munyake mucekuru wakati: “Nkhuwonga comene usange yunji wanilembera kalata, wanitimbira foni kwa maminiti ghacoko waka, panji kunicezgera kwa kanyengo. Ici cikunisanguluska comene.”
Yehova Wakutumbika Awo Ŵakupwelelera Ŵacekuru
19. Kasi ni vitumbiko wuli ivyo vikwiza cifukwa ca kupwelelera ŵacekuru?
19 Muli vitumbiko vinandi mu kupwelelera ŵacekuru. Kucezga na ŵacekuru na kutorako mahara ghawo na cimanyisko ni mwaŵi wapadera comene. Awo ŵakupwelelera ŵacekuru ŵakusanga cimwemwe cikuru ceneico cikwiza cifukwa ca kupeleka, ndiposo ŵakuŵa na cimwemwe mu mtima cifukwa ca kufiska mulimo wawo wa mu Malemba. (Milimo 20:35) Kusazgirapo apa, awo ŵakupwelelera ŵacekuru ŵakwenera kwenjerwa yayi kuti panji iwo nawo ŵazamupwelelereka cara para ŵacekura. Mazgu gha Ciuta ghakutisimikizgira kuti: “Mzimu wa wanangwa tiusange usambazi, kweni uyo wakucefya tiwacefyeke.”—Zintharika 11:25.
20, 21. Kasi Yehova wakuŵawona wuli awo ŵakupwelelera ŵacekuru, ndipo tikwenera kuyezgayezga kucita vici?
20 Yehova wakutumbika ŵana awo ŵakopa Ciuta, ŵalara ŵa mpingo, ndiposo Ŵakhristu wose awo ŵakupwelelera vyakusoŵa vya ŵasopi ŵanyawo ŵacekuru. Kacitiro ka nga ni aka kakukolerana na ntharika yakuti: “Mweneuyo wakufwira lusungu mukavu wakubweleka Yehova, ndipo Iye tiwawezgere ceneico wacita.” (Zintharika 19:17) Usange citemwa ndico cikuticiska kuti tilongore lusungu ku ŵanthu ŵakavu, Ciuta wakuwona kacitiro kithu nga ni ngongoli ndipo wazamutiwezgera na vitumbiko. Iye wakutilipiraso cifukwa ca kupwelelera ŵasopi ŵanyithu ŵacekuru, ŵeneawo ŵanandi ŵa iwo ‘mbakavu mwakuthupi kweni mbasambazi mu cipulikano.’—Yakobe 2:5.
21 Ciuta wakupeleka nadi mwawanangwa! Ici cikusazgapo umoyo wamuyirayira. Ku ŵateŵeti ŵanandi ŵa Yehova, uwu uzamuŵa umoyo wambura kumara mu paradiso pa caru capasi, mweneumo muzamuŵavya masuzgo agho ghakucitika cifukwa ca kwananga uko tili kuhara ndipo ŵacekuru awo mbakugomezgeka ŵazamusangwa na kuweleramo kwa nkhongono zawo za uwukirano. (Civumbuzi 21:3-5) Peneapo tikulindilira nyengo ya vitumbiko iyi, mphanyi talutilira kukwaniska udindo withu Wacikhristu wa kupwelelera ŵacekuru.
[Mazgu ghamusi]
a Kuti musange fundo zakovwira za umo mungapwelelera ŵapapi ŵacekuru, wonani Galamukani! ya Febuluwale 8, 1994 mapeji 3-10.
Kasi Mazgoro Ghinu Ngakuti Wuli?
• Kasi ŵana ŵangacindika wuli ŵapapi ŵawo ŵacekuru?
• Kasi ŵalara ŵakuwongera wuli ŵacekuru mu mpingo?
• Kasi Mkhristu waliyose wangacitaci kulongora kuti wakupwelelera ŵacekuru?
• Kasi ni maphindu wuli agho ghakwiza cifukwa ca kupwelelera Ŵakhristu ŵacekuru?
[Mafumbo]
[Bokosi pa peji 15]
Apo Ŵapapi Ŵake Ŵakakhumbikwiranga Wovwiri
Filipu wakateŵeteranga nga ni muteŵeti wakuzenga munthavi ku Liberia mu 1999, ndipo pa nyengo iyi wakapokera uthenga wakuti ŵadada ŵake mbalwari comene. Cifukwa ca kumanya kuti ŵamama ŵake ŵangafiska yayi paŵekha kupwelelera ŵadada ŵake, iye wakaghanaghana za kuwelera kukaya kuti wakapenje mukhwara na vyakukhumbikwa vinyake.
“Kuwelera kukaya cikaŵa cakusankha cakusuzga comene,” wakukumbukira Filipu, “kweni nkhamanya kuti udindo wane wakudanga nkhupwelelera ŵapapi ŵane.” Vilimika vitatu vikati vyajumpha, mwakovwirika na Ŵakhristu ŵanyake ŵa kukaya kwake, ŵakasamuskira ŵapapi ŵake mu nyumba yiwemiko, mwakuti wapwelelere makora ŵadada ŵake.
Sono ŵamama ŵake ŵakumanya umo ŵangapwelelera matenda gha ŵadada ŵake. Ici cikapangiska kuti ciŵe cambura kusuzga kwa Filipu kuzomera nchemo ya kukateŵetera ku munthavi wa Ŵakaboni ŵa Yehova ku Macedonia.
[Bokosi pa peji 17]
Ŵakapwelelera Vyakusoŵa Vyake
Peneapo Ada, Mkhristu wa vilimika 85 wa ku Australia wakakhalanga pa nyumba pera cifukwa ca ulwari, ŵalara ŵa mpingo ŵakapanga manozgero gha kumupwelelera. Ŵakalinganizga gulu la ŵabali awo ŵangamovwira. Ŵabali na ŵadumbu aŵa ŵakaŵa ŵakukondwa comene kugwira nchito za nga ni kutozga pa nyumba, kucapa, kuphika, na kugura vinthu vyakukhumbikwa na vinyake vyantheura.
Manozgero agha ghakamba pafupifupi vilimika 10 ivyo vyajumpha. Kuzakafika sono, Ŵakaboni ŵa Yehova ŵakujumpha 30 ŵamovwira Ada. Ŵacali kumwendera, kumuŵazgira mabuku ghakulongosora Baibolo, kumuphalira umo ŵabali wakulutira panthazi mwauzimu mu mpingo na kumulombera nyengo zose.
Mulara wa mpingo wakayowoya kuti: “Awo ŵakumupwelelera Ada ŵakuwona ici kuŵa mwaŵi wapadera comene. Ŵanandi ŵakukhozgeka na kuteŵetera kwake Yehova mwakugomezgeka kwa vilimika vinandi ndipo ŵakughanaghana yayi za kuleka kupwelelera vyakusoŵa vyake.”
[Cithuzithuzi pa peji 14]
Kasi tikulongora citemwa ceneko ku ŵapapi withu ŵacekuru?
[Vithuzithuzi pa peji 16]
Waliyose mu mpingo wangalongora citemwa ku ŵasopi ŵanyithu awo mbacekuru