Mbakutumbikika Awo Ŵakupeleka Ucindami kwa Ciuta
Mbakutumbikika Awo Ŵakupeleka Ucindami kwa Ciuta
‘Ŵamulambiraninge, A Yehova, na kucindamiska zina linu.’—SALMO 86:9.
1. Cifukwa wuli taŵanthu tingapeleka ucindami kwa Ciuta mu nthowa izo vilengiwa vyambura kuthuta vingacita yayi?
YEHOVA ngwakwenelera kuti vilengiwa vyake vyose vimulumbe. Apo vilengiwa vyambura kuthuta vikupeleka ucindami mwacisisi, ise taŵanthu tikughanaghana, kupulikiska, kuwonga, kweniso tikumanya kusopa. Ipo wamasalmo wakuyowoya kwa ise apo wakuti: ‘Caru cose cipome na cimwemwe kwa Ciuta; yimbani, kwimbira nchindi zina lake; pelekani kwa iyo mazina gha ucindami!’—Salmo 66:1, 2.
2. Mbanjani ŵacitapo kanthu pa languro la kupeleka ucindami ku zina la Ciuta, ndipo cifukwa wuli?
2 Ŵanthu ŵanandi ŵakukana kupulikira Ciuta nesi kumupa ucindami. Ndipouli, mu vyaru 235, Ŵakaboni ŵa Yehova ŵakujumpha pa mamiliyoni ghankhondi na limoza ŵakulongora kuti ŵakuwona “kaŵiro kambura kuwoneka” ka Ciuta mu ivyo wali kulenga. Ndiposo “ŵapulika” ukaboni wacisisi wa vilengiwa. (Ŵaroma 1:20; Salmo 19:2, 3) Kweniso ŵamanya na kutemwa Yehova cifukwa ca kusambira Baibolo. Lemba la Salmo 86:9, 10 likayowoya kale kuti: “Mafuko ghose gha ŵanthu agho mwaghacita ghatighizenge na kusopa na kumulambirani, A Yehova, na kucindamiska zina linu. Pakuti ndimwe Mukuru, ndimwe mukucita minthondwe, ndimwe Ciuta, mwekha pera.”
3. Kasi “mzinda ukuru” ‘ukuteŵetera wuli muhanya na usiku’?
3 Mwakuyana waka, lemba la Civumbuzi 7:9, 15 likulongosora “mzinda ukuru” wa ŵasopi kuti “ŵakumuteŵetera [Ciuta] muhanya na usiku mu tempele lake.” Apa cikulongora kuti Ciuta wakukhumba kuti ŵateŵeti ŵake ŵalekenge kupumula yayi, kweni, ŵateŵeti ŵake ŵali pa caru cose. Ntheura, usange ku vyaru vinyake kwafipa, ndikuti ku vyaru vinyake ni muhanya ndipo ŵateŵeti ŵa Ciuta ŵakutangwanika na kupharazga. Lekani tingati zuŵa likunjira yayi pa awo ŵakupeleka ucindami kwa Yehova. Sonosono apa, “cinthu cilicose ico cikuthuta mvuci” cizamutumphuska mazgu na kulumba Yehova. (Salmo 150:6) Kweni pa nyengo yasono, kasi waliyose wangacita vici kuti wapeleke ucindami kwa Ciuta? Kasi ni masuzgo wuli agho ghangatijandizga? Ndipo kasi awo ŵakupeleka ucindami kwa Ciuta ŵakulindilira vitumbiko wuli? Kuti tizgore mafumbo agha, tiyeni tiwone nkhani ya mu Baibolo yakukhwaskana na Ŵaisrayeli ŵa fuko la Gadi.
Suzgo Ilo Likaŵapo Kale
4. Kasi ŵa fuko la Gadi ŵakasangana na suzgo wuli?
4 Pambere ŵandanjire mu Caru ca Layizgano, Ŵaisrayeli ŵa fuko la Gadi ŵakapempha kuti ŵakhale mu caru ciwemi ca kuliskako ng’ombe ca ku mafumiro gha dazi kwa Yorodani. (Maŵazgo 32:1-5) Kweni kukhala mu caru cira cikang’anamura kuti ŵasuzgikenge comene. Ku manjiliro gha dazi kukaŵa Dambo la Yorodani ilo likatenge liŵavikilirenge ku ŵalwani. (Joshua 3:13-17) Ndipouli, kuyana na caru ca ku mafumiro gha dazi kwa Yorodani, buku lakuti The Historical Geography of the Holy Land, lakulembeka na George Adam Smith, likuti: “[Caru ] cose nchakuthambalara ndipo nchisani kwambura na cilicose cakuchinga pa caru ca Arabiya cira. Kanandi ŵanthu awo ŵakuliska ng’ombe ŵakaciwukiranga caru ici, ndipo cilimika cilicose ŵanyake ŵakizanga ku caru ici kuzakapenja malo ghakuliskako ng’ombe.”
5. Kasi Yakobe wakaciska ŵina Gadi kucitaci para ŵalwani ŵaŵawukira?
5 Kasi ŵina Gadi ŵakati ŵakhalenge wuli pakati pa ulwani wose uwu? Vilimika vinandi pambere ivi vindacitike, mu ucimi wake, sekuru wawo Yakobe wakayowoya kuti: “Ŵaskoghi [ŵalwani] tiŵaskoghenge Gadi, kweni iyo tiwaskoghenge pa kuŵakonkha.” (Genesis 49:19) Pakughapulika mazgu agha ngakofya comene. Kweni unenesko ngwakuti, ghakang’anamuranga kuti ŵina Gadi ŵakenera kuzakawezgera. Yakobe wakaŵapanikizgira kuti usange ndimo ŵazamucitira, ŵalwani ŵazamuwelera cikhozga soni, ndipo ŵina Gadi ŵazamuŵaskera kumanyuma.
Masuzgo pa Kasopero Kithu Lero
6, 7. Kasi ukhaliro wa Ŵakhristu lero ukuyana wuli na wa fuko la Gadi?
6 Umo vikaŵira na fuko la Gadi, Ŵakhristu lero ŵakusuzgika kweniso kuzotofyeka na caru ca Satana; ndipo tikuvikilirika mwa munthondwe yayi. (Job 1:10-12) Taŵanandi vikutisuzga kuti tisambire sukulu, tisange vyakukhumbikwa mu umoyo, kweniso kulera ŵana. Paliso masuzgo ghanyake ghatekha panji gha mkati mwithu. Ŵanyake ŵakusuzgika na “munga mu thupi” cifukwa ca kupendera panji ulwari. (2 Ŵakorinte 12:7-10) Ŵanyake ŵakusuzgika cifukwa cakuti ŵakujiwona ngati mbambura kwenelera. “Mazuŵa ghaheni” gha ucekuru ghangatondeska Ŵakhristu awo mbacekuru kuteŵetera Yehova na nkhongono umo ŵakacitiranga kale.—Mupharazgi 12:1.
7 Mpositole Paulosi wakutikumbuskaso kuti ‘tikulimbana na vita vya mzimu vya uheni mu vyakucanya.’ (Ŵaefeso 6:12) Nyengo na nyengo tikukhwaskika na “mzimu wa caru,” mzimu wacigaruka na unyankhasi uwo Satana na viŵanda vyake ŵakuthandazga. (1 Ŵakorinte 2:12; Ŵaefeso 2:2, 3) Nga ni Loti munthu wakopa Ciuta, nase lero tikusuzgika comene na vinthu vyaunyankhasi ivyo ŵanthu awo tikukhala nawo ŵakuyowoya na kucita. (2 Petros 2:7) Kweniso, Satana mweneko wakutiwukira. Satana wakurwa nkhondo na Ŵakhristu ŵakukhalira ŵakuphakazgika, ‘awo ŵakusungilira malango gha Ciuta, na kukoreska cipanikizgo ca Yesu.’ (Civumbuzi 12:17) Satana wakuwukiraso “mberere zinyake” za Yesu mwa kukanizga nchito yawo kweniso kuŵatambuzga.—Yohane 10:16.
Kasi Tikwenera Kuthera Panji Kucitapo Kanthu?
8. Kasi tikwenera kucita wuli para Satana watiwukira, ndipo cifukwa wuli?
8 Kasi para Satana watiwukira tikwenera kucita wuli? Mwakuyana na fuko la Gadi, tikwenera kuŵa ŵakukhora mwauzimu na kucitapo kanthu, mwakuyana na ulongozgi wa Ciuta. Cacitima nchakuti ŵanyake ŵakuthera para ŵasangana na masuzgo mu umoyo, ŵakuleka milimo yawo yauzimu. (Mateyu 13:20-22) Pakuwona kucepa kwa ŵanthu awo ŵakwiza pa maungano mu mpingo wa kwake, Kaboni munyake wakati: “Ŵabali sono ŵavuka nadi. Mbakwenjerwa nkhanira.” Mbunenesko kuti lero pali vifukwa vinandi comene ivyo vingapangiska munthu kuvuka. Antheura, nchipusu comene kuwona kusopa Ciuta nga ni mphingo yinyake, mulimo uzito. Kweni kasi kughanaghana uku nkhuwemi?
9. Kasi kunyamura goliwori la Khristu kungatipumuzga wuli?
9 Pulikani ivyo Yesu wakayowoya kwa ŵanthu awo ŵakaŵa ŵakuvuka cifukwa ca masuzgo mu umoyo, wakati: “Zani kwa ine mose imwe mukulemerwa na kuzotofyeka, ndipo ine nditi ndimupumuzganinge.” Kasi Yesu wakati para munthu waleka kuteŵetera Ciuta ndipo wapumulenge? Yayi nadi, Yesu wakati: “Jitolerani goliwori lane, ndipo musambire kwa ine; cifukwa ndine wakuzika na wakujipepura mu mtima: ndipo muti musangenge kuvukuka ku mizimu yinu.” Goliwori panji joko ni khuni ilo likuŵikika pa singo za ng’ombe ziŵiri izo zikuguza ngolo. Ipo nchifukwa wuli munthu wangatemwa kunyamura goliwori lanthena ili? Asi tili ‘ŵakuzotofyeka’ kale? Ni nthena nadi, kweni lemba la Cigiriki likuŵazgika kuti: “Njirani kusi ku goliwori lane pamoza na ine.” Mwawona: Yesu wajipeleka kuti watovwire kuyegha katundu withu! Antheura palije cifukwa cakuti tijiphyolere.—Mateyu 9:36; 11:28, 29; 2 Ŵakorinte 4:7.
10. Kasi tikupindula wuli para tikulimbalimba kupeleka ucindami kwa Ciuta?
10 Para tikunyamura goliwori ilo Yesu watipa pakuŵa ŵasambiri ŵake, ndikuti tikwimikana na Satana. “Yimikanani na Satana, ndipo wati wamucimbirani,” ndimo likulayizgira lemba la Yakobe 4:7. Fundo iyi yikung’anamura kuti nchipusu kwimikana na Satana yayi. Kuteŵetera Ciuta kukukhumbikwira kulimbalimba. (Luka 13:24) Kweni pa lemba la Salmo 126:5, Baibolo likulayizga kuti: “Uyo sono waseŵa na masozi tiwavunenge na cimwemwe.” Inya, tikusopa Ciuta uyo ngwakuwonga. Iyo “ngwakuŵalambula [kuŵapa njombe] ŵeneawo ŵakumupenja,” ndipo wakutumbika awo ŵakumupa ucindami.—Ŵahebere 11:6.
Kucindika Ciuta Pakupharazga Ufumu
11. Kasi uteŵeti wa m’munda ukutovwira wuli kwimikana na mauryarya gha Satana?
11 Yesu wakalangura kuti: ‘Lutaninge mukasambizge ŵanthu ŵa mitundu yose.’ Kupharazga ni nthowa yakwamba yakupelekera “sembe ya malumbo” kwa Ciuta. (Mateyu 28:19; Ŵahebere 13:15) Para ‘takaka malundi ghithu na kanozgekero ka ivangeli la cimango,’ ndikuti tavwara cimoza mwa “mahomwa [vilwero] ghose” agho ghangatovwira kwimikana na mauryarya gha Satana. (Ŵaefeso 6:11-15) Kulumba Ciuta mu uteŵeti wa m’munda ndiyo nthowa yiwemi nkhanira yakukhozgera cipulikano cithu. (2 Ŵakorinte 4:13) Uteŵeti wa m’munda ukutovwira kuti tileke kughanaghana viheni. (Ŵafilipi 4:8) Tikukhozgeka comene para tikwenda na ŵasopi ŵanyithu mu uteŵeti wa m’munda.
12, 13. Kasi mbumba zingapindula wuli para zikucita uteŵeti wa m’munda nyengo na nyengo? Pelekani ciyelezgero.
12 Upharazgi ungaŵaso mulimo wa mbumba yose. Mbunenesko kuti ŵana ŵakwenera kumalira nyengo yose pa kuseŵera yayi. Ndipouli, ŵangawonanga uteŵeti wa m’munda nga ni mulimo wakuvuska cara. Ŵapapi ŵangapangiska uteŵeti wa m’munda kuŵa wakukondweska mwa kusambizga ŵana ŵawo umo ŵangayowoyera makora mu uteŵeti. Asi ŵana ŵakukondwa na vinthu ivyo ŵakucita makora? Mwa kuleka kuŵakoserezga, ŵapapi ŵangawovwira ŵana kuti ŵasange cimwemwe mu uteŵeti.—Genesis 33:13, 14.
13 Mwakusazgirapo, mbumba iyo yikulumba Ciuta pamoza yikuŵa yakukolerana. Pulikani za mudumbu munyake uyo mfumu wake wakaŵa Kaboni cara, ndipo wakamucimbira na kumulekera ŵana ŵankhondi. Mudumbu yura wakasangana na suzgo lakuti wagwire nchito kweniso wapwelelere ŵana ŵake kuthupi. Kasi wakavukanga comene kwakuti wakaleka kusambizga ŵana ŵake vinthu vyauzimu? Iyo wakukumbuka kuti: “Nkhalimbikira kusambira Baibolo na mabuku gha gulu la Yehova ndipo nkhayezga kucita ivyo nkhaŵazganga. Nyengo na nyengo nkhalutanga nawo ŵana ku maungano kweniso mu uteŵeti wa nyumba na nyumba. Kasi kulimbalimba kwanipindulira wuli? Ŵana wose ŵankhondi mbakubapatizika.” Kucita uteŵeti mwakukwana kungawovwira na imwe wuwo apo mukulimbikira kuti mulere ŵana ŵinu “mu kulanga na mu kucenjezga kwa Fumu [Yehova].”—Ŵaefeso 6:4.
14. (a) Kasi ŵawukirano ŵangapeleka wuli ucindami kwa Ciuta pa sukulu? (b) Nchivici cingawovwira ŵawukirano kuleka kucita “soni na ivangeli”?
14 Ŵawukirano, usange mukukhala mu caru ico cikuzomerezga kudumbiskana vya cisopo, kasi mukupeleka ucindami kwa Ciuta mwa kupharazga pa sukulu, panji mukutondeka cifukwa ca kopa ŵanthu? (Zintharika 29:25) Kaboni wa vilimika 13 wa ku Puerto Rico wakalemba kuti: “Soni zindanikorepo kupharazga ku sukulu cifukwa nkhumanya kuti uwu mbunenesko. Kanandi para nili mu kilasi nkhuwuska woko na kuyowoya ivyo nasambira mu Baibolo. Para nilije cakucita, nkhuluta ku layibulare na kukaŵazga buku la Achichepere Akufunsa.” a Kasi Yehova watumbika citatata ca msungwana uyu? Iyo wakuti: “Nyengo zinyake ŵanyane ŵakunifumba mafumbo ndiposo nanga nkhupempha kuti niŵape mabuku.” Usange mwatondekanga pa nkhani iyi, panyake mukwenera kusanda ‘ilo ni khumbo la Ciuta, liwemi na lakukondweska, na lakufikapo’ mwa kulimbikira kucita sambiro la mwaŵene. (Ŵaroma 12:2) Para mwakhorwa kuti ivyo mwasambira mbunenesko, muzamucitapo “soni na ivangeli cara.”—Ŵaroma 1:16.
‘Muryango Wakujulika’ wa Uteŵeti
15, 16. Kasi “muryango ukuru wa milimo” uwo Ŵakhristu ŵanyake ŵanjira ni vici, ndipo ŵatumbikika wuli?
15 Mpositole Paulosi wakalemba kuti “muryango ukuru wa milimo” ukamujulikira. (1 Ŵakorinte 16:9) Kasi mipata muli nayo kuti mwambe uteŵeti wakusazgikira? Mwaciyelezgero, kucita upayiniya wa nyengo zose kweniso wa kanyengo, munthu wakwenera kupharazga maora 70 panji 50 pa mwezi. Cifukwa ca kuteŵetera mwakugomezgeka, ŵapayiniya ŵakuwongeka comene na Ŵakhristu ŵanyawo. Kweni nangauli ŵakumalira nyengo yinandi mu uteŵeti, ici cikuŵapangiska kuti ŵajikuzge yayi pa ŵabali na ŵadumbu ŵawo. M’malo mwake, ŵakuŵa na mtima uwo Yesu wakayowoya kuti: “Tili ŵazga ŵambura candulo; tacita ico cikaŵa mulimo withu kucita ndipera.”—Luka 17:10.
16 Para tikukhumba kucita upayiniya tikwenera kujikora, kunozga makora vinthu, kweniso kujipata kuti titeŵetere. Kweni vitumbiko ivyo tisangenge, ni vinandi nadi. “Kulunjika makora mazgu gha unenesko ni thumbiko nadi,” ndimo wakuyowoyera mupayiniya munyake zina lake Tamika. “Para ukucita upayiniya, kanandi ukugwiliskira nchito Baibolo. Pa nyengo yasono para nkhupharazga nyumba na nyumba, nkhujura malemba agho ngakwenelera kwa mweneko nyumba waliyose.” (2 Timote 2:15) Mupayiniya munyake zina lake Mica wakuti: “Kuwona umo unenesko ukusinthira umoyo wa ŵanthu ni thumbiko linyake lapadera.” Mwakuyana waka, muwukirano munyake zina lake Matthew wakuyowoya za cimwemwe ico cikuŵapo para “ukuwona munthu wakusambira unenesko. Palije cimwemwe cinyake ico cingaluska apa.”
17. Kasi Mkhristu munyake wakovwirika wuli kuti wambe kuwuwona makora upayiniya?
17 Kasi mukughanaghana kucitako upayiniya? Panyake mukukhumba kweni mukuwona ngati mungakwaniska yayi. Kenyatte mudumbu muwukirano wakuzomerezga kuti: “Upayiniya nkhawukhumbanga yayi. Nkhawonanga ngati ningakwaniska cara. Nkhamanyanga yayi umo ningayowoyera malonje panji kudumbiskana na ŵanthu Malemba.” Ndipouli, ŵalara ŵakamupa mudumbu uyo wakaŵa mupayiniya wakukhwima kuti ŵateŵeterenge lumoza. Kenyatte wakukumbuka kuti: “Cikaŵa cakukondweska kuteŵetera lumoza na mudumbu uyu. Ici cikanipangiska kuti nane niŵe na mtima wakuti nicite upayiniya.” Para munthu munyake wangamukhuŵirizgani na kumusambizgani, panji namweso mungatemwa kucita upayiniya.
18. Kasi awo ŵakusankha uteŵeti wa umishonale ŵangasanga vitumbiko wuli?
18 Upayiniya ungamujulirani mwaŵi wakuti mucite mauteŵeti ghanyake. Mwaciyelezgero, ŵanthu ŵanyake ŵakutorana ŵangenelera kuti ŵasambire umishonale na kukapharazga ku vyaru vinyake. Ŵamishonale ŵakwenera kuzgoŵerana na caru cacilendo, panji ciyowoyero cacilendo, ukhaliro wacilendo, ndiposo vyakurya vyacilendo. Kweni cifukwa ca vitumbiko ivyo ŵakusanga, vinthu vyose ivi nkhanthu yayi. Mildred, mishonale waluso ku Mexico, wakuti: “Nindadandaulepo cifukwa cakuti nkhasankha kuŵa mishonale. Ndico nkhakhumbanga kufuma apo nkhaŵa mucoko.” Kasi Mildred watumbikika wuli? Iyo wakuti: “Apo nkhaŵa ku caru ca kwithu, cikaŵa cinonono kusanga sambiro la Baibolo. Kweni kuno ku Mexico, naŵa na mwaŵi wa kuŵa na ŵasambiri ŵakujumpha pa ŵanayi awo ŵakamba uteŵeti wa m’munda pa nyengo yimoza!”
19, 20. Kasi awo ŵakuteŵetera pa Beteli, mu vyaru vyakupambanapambana, kweniso awo ŵakuluta ku Sukulu Yakusambizga Uteŵeti ŵatumbikika wuli?
19 Awo ŵakucita uteŵeti wa pa Beteli mu minthavi ya Ŵakaboni ŵa Yehova nawoso ŵakutumbikika comene. Kuyana na uteŵeti wa pa Beteli, Sven, mbali waciwukirano wa ku Germany, wakuti: “Nkhuwona kuti nkhucita nchito iyo yili na vitumbiko vyambura kumara. Maluso ghane mphanyi nkhacitiranga nchito ya ku caru. Kweni mphanyi vikayana waka na kusunga ndarama ku banki iyo yili pafupi kumara.” Mbunenesko kuti kuteŵetera kwambura malipiro kukukhumbikwira kujipata. Kweni Sven wakuti: “Para ukuwera, ukumanya kuti vyose ivyo wacita pa zuŵa ilo ni vya Yehova. Ndipo ici cikukupangiska kuti ujipulike makora nkhanira.”
20 Ŵabali ŵanyake ŵaŵa na mwaŵi wa kuteŵetera mu vyaru vyakupambanapambana, pakuzenga minthavi. Ŵakhristu ŵanyake ŵakutorana awo ŵateŵetera mu vyaru vinkhondi na vitatu ŵakalemba kuti: “Ŵabali ŵa kuno mbawemi nadi. Ciŵenge cakupweteka comene kulekana nawo—ndipo kaŵenge ka nambara 8 kuti mitima yithu ‘yisweke.’ Nchakukondweska nkhanira!” Kweniso pali Sukulu Yakusambizga Uteŵeti. Sukulu iyi yikusambizga uteŵeti ŵabali ŵambura kutora. Yumoza uyo wali kumalizga sukulu iyi wakalemba kuti: “Mazgu ghakunisoŵa umo ningamuwongerani cifukwa ca sukulu yiwemi iyi. Kasi liliposo gulu linyake ilo lingalimbikira nthena pakusambizga?”
21. Kasi nchivici ico cikukhumbikwa kwa Ŵakhristu wose pakuteŵetera Ciuta?
21 Inya, miryango yinandi comene ya milimo njakujulika. Mbunenesko kuti taŵanandi tingateŵetera yayi pa Beteli panji mu vyaru vinyake. Yesu mweneco wakazomerezga kuti Ŵakhristu ŵazamupambika “vipambi” vyakupambanapambana cifukwa ca kupambana mipata. (Mateyu 13:23) Ipo, ico cikukhumbikwa pakuŵa Ŵakhristu nchakuti tisange nthowa izo tingateŵetera Yehova mwakukwana umo mipata yikutizomelezgera. Para ndimo tikucitira, ndikuti tikupeleka ucindami kwa Yehova, ndipo tingaŵa na cigomezgo kuti iyo wakukondwa. Pulikani za Ethel mudumbu mucekuru uyo wakukhala mu vikaya vyakusungirako ŵacekuru. Nyengo na nyengo wakupharazgira ŵacekuru ŵanyake awo wakukhala nawo ndiposo wakupharazga pa telefoni. Nangauli ngwakunyotwa, kweni wakucita uteŵeti wake na mtima wose.—Mateyu 22:37.
22. (a) Ni nthowa wuli zinyake izo tingapelekera ucindami kwa Ciuta? (b) Ni nyengo wuli yakukondweska iyo yili munthazi?
22 Kumbukani kuti kupharazga ni nthowa yimoza iyo tikupelekera ucindami kwa Yehova. Usange tikuŵa na nkharo yiwemi kweniso kawonekero kawemi para tili ku nchito, pa sukulu, na pa nyumba, ndikuti tikukondweska mtima wa Yehova. (Zintharika 27:11) Lemba la Zintharika 28:20 likulayizga kuti: “Munthu wamagomezgeka waŵenge na vitumbiko vyakuzara.” Antheura, tikwenera ‘kumija vinandi’ mu uteŵeti wa Ciuta, pakumanya kuti tivunengeso vitumbiko vinandi. (2 Ŵakorinte 9:6) Usange tacita ntheura, uzamuŵa mwaŵi withu kuzakaŵa na umoyo mu nyengo yakukondweska apo “cinthu cilicose ico cikuthuta mvuci” cizamupeleka ucindami kwa Yehova uwo ukumwenelera nkhanira!—Salmo 150:6.
[Mazgu ghamusi]
a Buku lakuti Mafunso Achichepere Akufunsa—Mayankho Amene Amathandiza likupharazgika na Ŵakaboni ŵa Yehova.
Kasi Mukukumbuka?
• Kasi ŵanthu ŵa Ciuta ŵakuteŵetera wuli Yehova “muhanya na usiku”?
• Kasi ŵina Gadi ŵakasangana na suzgo wuli, ndipo ici cikuŵasambizgaci Ŵakhristu lero?
• Kasi uteŵeti wa m’munda ukutivikilira wuli ku mauryarya gha Satana?
• Kasi ‘muryango wakujulika’ uwo ŵanyake ŵanjira ni vici, ndipo ŵatumbikika wuli?
[Mafumbo]
[Vithuzithuzi pa peji 31]
Upayiniya ungajura muryango wakucitira mauteŵeti ghanyake, nga ni:
1. Kuteŵetera mu vyaru vyakupambanapambana
2. Uteŵeti wa pa Beteli
3. Uteŵeti wa umishonale