“Lutaninge Mukasambizge”

“Mazaza ghose ghapika kwa ine kucanya na pasi. Ntheura lutaninge mukasambizge.”—MATEYU 28:18, 19.

1, 2. (a) Ni nchito wuli iyo Yesu wakapa ŵasambiri ŵake? (b) Kuyana na mazgu gha Yesu, ni mafumbo wuli agho tidumbiskanenge?

ZUŴA linyake mu 33 C.E., Yesu na ŵasambiri ŵake ŵakawungana pa phiri ku Galileya. Yesu, Fumu yawo iyo yikawuka ku ŵakufwa yikaŵa pafupi kukwera kucanya. Kweni pambere wandakwere wakakhumba kuŵaphalira cinthu cinyake cakuzirwa. Yesu wakakhumba kuŵapa nchito ŵasambiri ŵake. Kasi yikaŵa nchito wuli? Kasi ŵasambiri ŵake ŵakacita wuli nchito iyi? Ndipo nchito iyi yikutikhwaska wuli ise lero?

² Ivyo Yesu wakayowoya vili kulembeka pa Mateyu 28:18-20: ‘Mazaza ghose ghapika kwa ine kucanya na pasi. Ntheura lutaninge mukasambizge mitundu yose, mukaŵabapatize mu zina la Ŵawiske na la Mwana na la mzimu utuŵa: muŵasambizge kukoreska vyose ivyo ndamulangulirani: ndipo wonani, ine ndili namwe mazuŵa ghose mupaka ku umaliro wa mgonezi.’ Yesu wakayowoya za “mazaza ghose,” “mitundu yose,” “vyose ivyo ndamulangulirani,” ndiposo “mazuŵa ghose.” Mazgu ghake na fundo zinayi izo wakazunura vikuwuska mafumbo ghakuzirwa comene, agho tingaghaŵika mu mazgu ghanayi ghakuti cifukwa? nkhu? vici? kweniso pawuli? Tiyeni tiwone mafumbo agha limoza na limoza. *

“Mazaza Ghose Ghapika kwa Ine”

3. Cifukwa wuli tikwenera kupulikira languro lakuti tikasambizge ŵanthu?

³ Cakwamba, cifukwa wuli tikwenera kupulikira languro lakuti tikasambizge ŵanthu? Yesu wakati: “Mazaza ghose ghapika kwa ine kucanya na pasi. Ntheura lutaninge mukasambizge.” Lizgu lakuti “ntheura” likulongora cifukwa cikuru ico tikwenera kupulikira languro ili. Cifukwa nchakuti, Yesu mweneuyo wakayowoya mazgu agha, wali na “mazaza ghose.” Kasi mazaza ghake ngakuru wuli?

4. (a) Kasi mazaza gha Yesu ngakuru wuli? (b) Kasi kumanya makora mazaza gha Yesu kukwenera kutovwira wuli umo tikuwonera nchito ya kusambizga?

⁴ Yesu wali na mazaza pa mpingo wake, ndipo kwambira mu 1914 wali na mazaza pa Ufumu  wakwimikika wa Ciuta. (Ŵakolose 1:13; Civumbuzi 11:15) Iyo ni mungelo mulara, antheura wali na mazaza pa viwuru vyakucanya vya ŵangelo mamiliyoni ghanandi. (1 Ŵatesalonika 4:16; 1 Petros 3:22; Civumbuzi 19:14-16) Ŵawiske ŵamupa mazaza ghakuti waparanye “ufumu wose na mazaza ghose na nkhongono” ivyo vikwimikana na malango ghakunyoroka. (1 Ŵakorinte 15:24-26; Ŵaefeso 1:20-23) Mazaza gha Yesu ghakumalira pa ŵamoyo pera yayi. Kweniso ni “mweruzgi wa ŵamoyo na ŵakufwa” ndipo Ciuta wali kumupa nkhongono zakuwuskira awo ŵali mu tulo twa nyifwa. (Milimo 10:42; Yohane 5:26-28) Nadi pano, mazgu agho wayowoya Munthu uyo wapika mazaza ghakuru nthena ghakwenera kuŵa ghakuzirwa comene. Lekani tikupulikira mwanchindi kweniso na mtima wose languro la Khristu lakuti “lutaninge mukasambizge.”

5. (a) Kasi Petrosi wakapulikira wuli mazgu gha Yesu? (b) Kasi Petrosi wakatumbikika wuli cifukwa ca kupulikira mazgu gha Yesu?

⁵ Kukwambilira kwa uteŵeti wake pa caru, Yesu wakasambizga ŵasambiri ŵake mu nthowa yiwemi comene kuti ŵatumbikikenge para ŵamanya mazaza ghake na kupulikira ivyo wayowoya. Nyengo yimoza, wakaphalira Petrosi uyo wakaŵa mulovi kuti: “Kankhira ku luji, ndipo muponye mikwawu yinu.” Pakumanya kuti pakaŵavya somba, Petrosi wakati kwa Yesu: “Fumu, tatokatoka usiku wose, ndipo tilive kukora na kamo.” Ndipouli, mwakujiyuyura, Petrosi wakati: “Kweni pa mazgu ghinu ndiponyenge mikwawu.” Petrosi wakati wapulikira ivyo Khristu wakayowoya, wakakora “somba zinandi comene.” Cifukwa ca kutindikika, Petrosi “wakawa pa makongono gha Yesu, nakuti, Fumaniko kwa ine: cifukwa ndine munthu wakwananga, Fumu.” Kweni Yesu wakamuzgora kuti: “Ungopanga; kufuma kuno ku lero uti uŵenge wakukora ŵanthu.” (Luka 5:1-10; Mateyu 4:18) Kasi nkhani iyi yikutisambizgaci?

6. (a) Kasi nkhani ya kukora somba yikulongoraci kuyana na kupulikira uko Yesu wakukhumba? (b) Kasi tingamuyezga wuli Yesu?

⁶ Yesu wakaphalira Petrosi, Andreya na ŵapositole ŵanyake kuti ŵaŵe “ŵalovi ŵa ŵanthu,” pamanyuma pakuti ŵakora somba zinandi mwakuzizwiska. (Marko 1:16, 17) Nchakuwonekerathu kuti Yesu wakakhumbanga kuti ŵamupulikire kwambura fundo yeneko cara. Wakaŵapa cifukwa cakukhorweska ico ŵakenera kumupulikira. Nga ni umo ŵakakolera somba zinandi cifukwa ca kupulikira mazgu gha Yesu, ntheuraso ŵakenera kutumbikika cifukwa ca kupulikira languro la Yesu lakuti ‘ŵakakore ŵanthu.’ Na cipulikano cose, ŵapositole ŵakacitapo kanthu. Nkhani iyi yikumalizga kuti: “Ŵakati ŵakwezgera ngalaŵa zawo pa mlima, ŵakasida vyose, ndipo ŵakamulondezga.” (Luka 5:11) Lero, apo tikuciska ŵanyithu kucitako nchito ya kusambizga, ndikuti tikuyezga Yesu. Tikukhumba kuti ŵanthu ŵacitenge ivyo tikuŵaphalira pera cara, kweni tikuŵalongosolera vifukwa ivyo ŵakwenera kupulikira mazgu gha Khristu.

Vifukwa Vyakukhorweska na Vilato Viwemi

7, 8. (a) Ni vifukwa wuli vya mu Malemba ivyo tikupharazgira Ufumu na kusambizga? (b) Ni lemba wuli ilo likumuciskani kuti mucitenge nchito ya kupharazga? (Wonaniso futunoti.)

⁷ Pakuti tikumanya mazaza gha Khristu, lekani tikucita nchito ya kupharazga Ufumu na kusambizga. Kasi ŵanthu awo tikukhumba kuti ŵacite milimo yiwemi tingaŵaphalira vifukwa wuli vya mu Malemba ivyo tikucitira nchito iyi? Pulikani fundo izo Ŵakaboni ŵakugomezgeka mu vyaru vyakupambanapambana ŵakayowoya, ndipo wonani umo malemba agho ghalongoreka ghakukhozgera fundo zawo.

⁸ Roy, uyo wakabapatizika mu 1951 wakuti: “Apo nkhajipatuliranga kwa Yehova, nkhapangana kuti nimuteŵeterenge nyengo zose. Ntheura nkhukhumba kufiska phangano lane.” (Salmo 50:14; Mateyu 5:37) Heather, uyo wakabapatizika mu 1962 wakuti: “Para nkhughanaghanira vyose ivyo Yehova wanicitira, nkhukhumba kumuwonga mwa kumuteŵetera mwakugomezgeka.” (Salmo 9:1, 9-11; Ŵakolose 3:15) Hannelore, uyo wakabapatizika mu 1954 wakuti: “Nyengo yiliyose para tili mu uteŵeti, tikovwirika na ŵangelo—nalo ni thumbiko!” (Milimo 10:30-33; Civumbuzi 14:6, 7) Honor, uyo wakabapatizika mu 1969 wakuti: “Para zuŵa la ceruzgo la Yehova likwiza, nkhukhumba cara kuti munthu wazakapusikire Yehova na Ŵakaboni ŵake kuti ŵakaleka kumucenjezga na kuyowoya kuti, ‘Ine nkhacenjezgeka  yayi!’” (Ezekiel 2:5; 3:17-19; Ŵaroma 10:16, 18) Claudio, uyo wakabapatizika mu 1974 wakuti: “Para tikupharazga, ‘Ciuta wakutiwonelera’ ndipo tikuŵa ‘pamoza na Khristu.’ Ghanaghanani waka! Para tili mu uteŵeti, tikulongozgana na Ŵabwezi ŵithu ŵawemi nkhanira.”—2 Ŵakorinte 2:17. *

9. (a) Kasi nkhani ya kukora somba ya Petrosi na ŵapositole ŵanyake yikuvumburaci kuyana na cilato ciwemi ca kupulikira Khristu? (b) Kasi lero tili na cilato wuli cakwenelera ca kupulikira Ciuta na Khristu, ndipo cifukwa wuli?

⁹ Nkhani ya kukora somba mwakuzizwiska yikutilongoraso kuti nchakuzirwa kupulikira languro la Khristu na cilato ciwemi—citemwa. Apo Petrosi wakati, “Fumaniko kwa ine: cifukwa ndine munthu wakwananga,” Yesu wakafumapo yayi nesi kucombora Petrosi cifukwa ca kwananga kulikose. (Luka 5:8) Nangauli Petrosi wakamupempha Yesu kuti wafumepo, kweni iyo wakamususka yayi. M’malo mwake, Yesu wakazgora mwalusungu kuti: “Ungopanga.” Cikatenge ciŵenge ciheni kupulikira Khristu cifukwa ca wofi wambura kwenelera. Kweni Yesu wakaphalira Petrosi na ŵanyake kuti ŵaŵenge ŵalovi ŵa ŵanthu. Lero, nase tikofya ŵanthu yayi nesi kuŵacicizga kuti ŵapulikire Khristu. Mtima wa Yehova ukukondwa pekha para munthu wakupulikira na umoyo wake wose cifukwa ca kutemwa Ciuta na Khristu.—Mateyu 22:37.

‘Mukasambizge Ŵanthu ŵa Mitundu Yose’

10. (a) Kasi ni fundo wuli mu languro la Yesu la kusambizga iyo yikapangiska kuti nchito yiŵe yinonono kwa ŵasambiri? (b) Kasi ŵasambiri ŵakacita wuli na ivyo Yesu wakalangura?

¹⁰ Fumbo laciŵiri ilo tingafumba kuyana na languro la Yesu ndakuti, kasi nchito ya kusambizga yamucitikira Nkhu? Yesu wakaphalira ŵalondezgi ŵake kuti: ‘Mukasambizge ŵanthu ŵa mitundu yose.’ Pambere Yesu wandize, ŵanthu ŵa mitundu ŵakazomelezgekanga para ŵiza ku Israyeli kuzakateŵetera Yehova. (1 Mathemba 8:41-43) Yesu mweneco wakapharazganga  ku Ŵayuda pera. Kweni apa wakaphalira ŵalondezgi ŵake kuti ŵalutenge ku ŵanthu ŵa mitundu yose. Ici cikulongora kuti pakwamba malo agho ŵasambiri ŵake ŵakaloŵangako somba panji kupharazgako cikaŵa “ciziŵa” cicoko—Ŵayuda. Kweni sono ŵakenera kufika na ku “nyanja” wuwo panji ku ŵanthu wose. Nangauli nchito yikaŵaŵira yinonono ŵasambiri cifukwa ca kusintha uku, kweni ŵakaŵa mucanya kupulikira ivyo Yesu wakayowoya. Pafupifupi vilimika 30 panyuma pa nyifwa ya Yesu, mpositole Paulosi wakalemba kuti makani ghawemi ghakapharazgika ku Ŵayuda pera yayi kweni ku “cakwatika cose kusi ku mtambo.”—Ŵakolose 1:23.

11. Kasi ‘malo ghakuŵejako somba’ ghasanuzgika wuli kwambira mu ma 1900?

¹¹ Mwasonosono apa, vigaŵa vyakupharazgako vyasanuzgika. Kukwambilira kwa vilimika vya 1900, ‘malo ghakuŵejako somba’ ghakaŵa mu vyaru vicoko waka. Kweni ŵalondezgi ŵa Khristu pa nyengo iyo ŵakatolera ciyelezgero ca Ŵakhristu ŵakale ndipo nakalinga ŵakasanuzga vigaŵa ivyo ŵakapharazgangako. (Ŵaroma 15:20) Kuzakafika mu ma 1930, ŵakasambizganga mu vyaru pafupifupi handiredi. Lero, ‘malo agho tikuŵejako somba’ ghali mu vyaru 235.—Marko 13:10.

‘Kufuma ku Viyowoyero Vyose’

12. Kasi ucimi wa pa Zekariya 8:23 ukukonkhoska za vici?

¹² Nchinonono kusambizga ŵanthu ŵa mitundu yose, cifukwa ca ukuru wa malo pera cara, kweniso unandi wa viyowoyero. Yehova wakayowoya kale mwa mprofeti Zekariya kuti: “Mu mazuŵa agho ŵanthu khumi ŵa mafuko gha kayowoyero kose ŵati ŵakore saru ya uyo ndi Muyuda na kuti, Mutizomerezge tilute tose, cifukwa tapulika kuti Ciuta wali namwe.” (Zekariya 8:23) Pa kufiskika kwa ucimi uwu, “Muyuda” wakwimira Ŵakhristu ŵakuphakazgika awo ŵacali pano pasi, ndipo “ŵanthu khumi” ŵakwimira “mzinda ukuru.” * (Civumbuzi 7:9, 10; Ŵagalatiya 6:16) Umo Zekariya wakawonera, mzinda ukuru wa ŵasambiri ŵa Khristu ufumenge mu mitundu yinandi, ndipo ŵayowoyenge viyowoyero vinandi comene. Kasi mdauko wa ŵanthu ŵa Ciuta lero ukulongora kuti ndimo ŵaliri ŵasambiri? Ndimo ŵaliri nadi.

13. (a) Kasi nkhani ya viyowoyero yikwenda wuli pakati pa ŵanthu ŵa Ciuta lero? (b) Kasi muzga wa magomezgeko na wa vinjeru wacita wuli apo cakurya cauzimu cikukhumbikwa mu viyowoyero vinandinandi? (Muwoneso bokosi lakuti “Mabuku gha Ŵanthu Ŵacibulumutira.”)

¹³ Mu 1950, pa Ŵakaboni ŵa Yehova ŵankhondi, ŵatatu ŵakayowoyanga Cingelezi pa caru cose. Mu 1980, vinthu vikasintha, pa ŵanthu ŵankhondi, ŵaŵiri ndiwo ŵakayowoyanga Cingelezi. Ndipo lero, pa Ŵakaboni ŵankhondi, yumoza ndiyo wakuyowoya Cingelezi. Kasi muzga wa magomezgeko na wa vinjeru wacita wuli apo ŵabali ŵanandi ni awo ŵakuyowoya viyowoyero vinyake? Iyo wakupeleka cakurya cauzimu mu viyowoyero vinandi comene. (Mateyu 24:45) Mwaciyelezgero, mu 1950, mabuku ghithu ghakapharazgikanga  mu viyowoyero 90, kweni sono ghakupharazgika mu viyowoyero pafupifupi 400. Kasi kughanaghanira ŵanthu ŵa viyowoyero vyakupambanapambana uku kwaŵa na vyandulo? Inya! Sabata yiliyose mu cilimika, ŵanthu pafupifupi 5,000 ‘ŵa malulimi ghose’ ŵakuzgoka ŵasambiri ŵa Khristu! (Civumbuzi 7:9) Ndipo ŵakulutilira kusazgikira. Mu vyaru vinyake, “mikwawu” yikuzura na somba zinandi comene!—Luka 5:6; Yohane 21:6.

Uteŵeti Wakukondweska—Kasi Mungacitako?

14. Para mu cigaŵa cithu muli awo ŵakuyowoya ciyowoyero cinyake, kasi tingawovwira wuli? (Muwoneso bokosi lakuti “Kusambizga na Ciyowoyero ca Mawoko.”)

¹⁴ Mu vyaru vinandi muli ŵanthu awo ŵakusamuka kukwawo, lekani nchakukhumbikwa comene kusambizga ŵanthu ŵa ‘lulimi lose’ awo tili nawo pafupi. (Civumbuzi 14:6) Kasi tingaŵawovwira wuli awo ŵakuyowoya ciyowoyero ico tikucimanya yayi? (1 Timote 2:4) Mukayowoyero kanyake, tingacita nthowa zinyake zakuloŵera. Ŵanthu ŵanthena aŵa tiŵagaŵire buku la ciyowoyero ico ŵakuyowoya. Usange nchamacitiko, phalirani Kaboni uyo wakuyowoya ciyowoyero ico kuti wakakumane nawo. (Milimo 22:2) Sono nchipusu kupanga ndondomeko iyi cifukwa Ŵakaboni ŵanandi ŵasambira ciyowoyero cinyake padera pa cawo mwakuti ŵawovwire ŵalendo kuzgoka ŵasambiri ŵa Khristu. Malipoti ghakulongora kuti ŵapharazgi ŵakukondwa cifukwa ca kovwira ŵanthu mu nthowa iyi.

15, 16. (a) Ni viyelezgero wuli ivyo vikulongora kuti kovwira awo ŵakuyowoya ciyowoyero cinyake kuli na vitumbiko? (b) Kasi ni mafumbo wuli agho tingaghanaghanira para tikukhumba kuteŵetera mu cigaŵa ca ciyowoyero cinyake?

¹⁵ Pulikani viyelezgero viŵiri kufuma ku Netherlands, uko nchito ya kupharazga Ufumu yikucitika mu viyowoyero 34. Ŵakaboni ŵanyake ŵakutorana ŵakajipeleka kuti ŵasambizgenge ŵanthu ŵa ciyowoyero ca Cipolishi awo ŵakasamukira ku caru ico. Ŵanthu ŵakategherezga makora comene uthenga wawo. Ndipo mwanalume wakacicizgika kucepeskako nchito yake kuti waŵenge na zuŵa lakusazgikira sabata yiliyose kuti wasambirenge Baibolo na awo mbakunweka. Nakalinga, ŵapharazgi aŵa ŵakacitiskanga masambiro gha Baibolo  ghakujumpha 20 sabata yiliyose. Iwo ŵakuti: “Uteŵeti withu ukutipa cimwemwe cikuru comene.” Awo ŵakusambizga ŵanthu Baibolo ŵakukondwa nkhanira para ŵasambiri ŵawo ŵakupulika unenesko mu ciyowoyero cawo ndipo ŵakucitapo kanthu. Mwaciyelezgero, pa ungano uwo ukacitika mu ciyowoyero ca ku Vietnam, doda linyake likimilira na kupempha kuti liyowoyepo. Na masozi mu maso, likaphalira Ŵakaboni kuti: “Yewo comene cifukwa ca kulimbikira kwinu kuti musambire ciyowoyero cane cinonono. Nili wakukondwa comene pakusambira vinthu viwemi vinandi kufuma mu Baibolo mu ucekeru wane.”

¹⁶ Ntheura nchakuzizika yayi kuti awo ŵakuteŵetera mu mipingo ya viyowoyero vinyake, ŵakuwona kuti mbakutumbikika comene. Mbumba yinyake ya ku Britain yikati: “Mu vilimika 40 vya uteŵeti wa Ufumu uwo tacita, tasanga kuti kuteŵetera mu cigaŵa ico ciyowoyero cake mukucimanya yayi nchimoza mwa vinthu vyakukondweska.” Kasi namwe mungasinthako vinthu vinyake mu umoyo winu kuti muciteko uteŵeti wakukondweska uwu? Usange mucali pa sukulu, kasi mungasambira ciyowoyero cinyake kunozgekera kuzakacita uteŵeti uwu? Para mungacita nthena muŵenge ŵakukondwa mu umoyo winu, ndipo mutumbikikenge comene. (Zintharika 10:22) Mwalekeraci kuti mudumbiskane nkhani iyi na ŵapapi ŵinu?

Kusinthasintha Nthowa Zakupharazgira

17. Kasi tingakwaniska wuli kuyowoya na ŵanthu ŵanandi mu cigaŵa cithu?

¹⁷ Nchakupulikikwa kuti taŵanandi tingakwaniska yayi kuponya “mikwawu” mu vigaŵa ivyo ŵanthu ŵakuyowoya ciyowoyero cinyake. Ndipouli, tingakwaniska kuyowoya na ŵanthu ŵanandi comene mu cigaŵa cithu kuluska umo tikucitira. Kasi tingakwaniska wuli? Tingacita nthena mwa kusintha, uthenga withu yayi, kweni nthowa zakupharazgira. Mu malo ghanandi ŵanthu ŵakukhala mu nyumba za vipanga. Ŵanandi ŵakuŵapo yayi panyumba pa nyengo iyo ise tikupharazga nyumba na nyumba. Antheura, tikwenera kuponya “mikwawu” yithu pa nyengo na malo ghakupambanapambana. Usange ndimo tikucitira, ndikuti tikuyezga Yesu. Yesu wakalimbikira kuyowoya na ŵanthu mu malo ghakupambanapambana.—Mateyu 9:9; Luka 19:1-10; Yohane 4:6-15.

18. Kasi kupharazga mu malo ghakupambanapambana kwaŵa na candulo wuli? (Wonaniso bokosi lakuti “Kusambizga Ŵanthu ŵa pa Nchito.”)

¹⁸ Mu vigaŵa vinyake, kupharazgira ŵanthu kulikose uko ŵangasangika ni nthowa yikuru yakusangira ŵasambiri. Awo ŵali na luso pakusambizga ŵakulimbikira comene pa kupharazga mu malo ghakupambanapambana. Padera pa kupharazga nyumba na nyumba, sono ŵapharazgi ŵakupharazga mu viŵanja vya ndege, maofesi, masitoro, malo ghakwimikapo galimoto, pakukwelera basi, mu msewu, ku nyanja, titi waka kulikose. Mu malo ghanthena agha ndimo ŵakasangika Ŵakaboni ŵanandi awo ŵabapatizika sono apa ku Hawaii. Kusinthasintha nthowa zakupharazgira kukutovwira kufiska mwakukwana languro la Yesu lakuti mukasambizge.—1 Ŵakorinte 9:22, 23.

19. Kasi mu nkhani yakulondezgapo tizamudumbiskana vici?

¹⁹ Nchito ya Yesu ya kusambizga yikulongosora cifukwa na uko yamucitikira pera yayi. Kweniso yikuyowoya za ivyo tikwenera kupharazga na apo tizamumalizgira kupharazga. Mu nkhani yakulondezgapo, tizamudumbiskana fundo ziŵiri izi.

[Mazgu ghamusi]

Kasi Mukukumbuka?

• Kasi tikupharazga Ufumu na kusambizga pa vifukwa wuli kweniso na cilato mbu?

• Kasi ŵateŵeti ŵa Yehova lero ŵafika mphani na nchito ya kusambizga ŵanthu ŵa mitundu yose iyo Yesu wakaŵatuma?

• Kasi tingasintha wuli ‘nthowa zakuŵejera,’ ndipo cifukwa wuli ndimo tikwenera kucitira?

[Mafumbo]

[Bokosi pa peji 21]

Mabuku gha Ŵanthu Ŵacibulumutira

Albert wa ku United States ni mulara Wacikhristu ndiposo muteŵeti wa nyengo zose. Iyo ngwacibulumutira. Mabuku ghakulongosora Baibolo gha ŵacibulumutira ghakumovwira comene mu uteŵeti wake, kusazgapo mu milimo yake pakuti ni mulaŵiliri wa uteŵeti. Kasi wakucita wuli milimo yake pa mpingo?

“Tindaŵepo na mulaŵiliri wa uteŵeti wakulimbikira nga ni Albert mu mpingo withu,” ndimo wakuyowoyera James, mulaŵiliri wakulongozga. Albert njumoza wa ŵanthu pafupifupi 5,000 awo mbacibulumutira mu United States. Vilimika vinandi, ŵapokera mabuku gha ŵacibulumutira ghakulongosora Baibolo mu Cingelezi na Cispanishi. Nakuti kwambira mu 1912, muzga wa magomezgeko wafumiska mabuku ghakupambapambana gha ŵacibulumutira ghakujumpha handiredi. Malinga na kusazgikira kwa maluso gha sayansi, panyengo yasono mashini ghakusindikizga mabuku gha Ŵakaboni ŵa Yehova ghakupanga mabuku ghanandi gha ŵanthu ŵacibulumutira mu viyowoyero vyakujumpha pa khumi. Mabuku agha ghakutumizgika mu vyaru vyakujumpha 70. Kasi mukumanyapo munthu munyake uyo wangapindula na mabuku ghakulongosora Baibolo ghakupangikira ŵacibulumutira?

[Bokosi pa peji 22]

Kusambizga na Ciyowoyero ca Mawoko

Ŵakaboni ŵanandi comene pa caru cose, kusazgapo ŵawukirano ŵamwamphu, ŵasambira ciyowoyero ca mawoko mwakuti ŵawovwire ŵanthu awo ŵali na suzgo la kupulika kuti ŵaŵe ŵasambiri ŵa Khristu. Pa cifukwa ici, mu Brazil mwekha, ŵanthu 63 ŵakabapatizika mu cilimika cinyake sonosono apa. Ndipo sono ku Brazil kuli Ŵakaboni ŵambura kupulika 35 awo ŵakuteŵetera mu uteŵeti wa nyengo zose. Pa caru cose, pali mipingo na magulu ghakujumpha 1,200 gha ciyowoyero ca mawoko. Ciyowoyero ca mawoko cili na dera limoza ilo liri ku Russia. Malo gha dera ili ngasani comene, nakuti ndilo ni dera likuru comene pa caru cose, cifukwa likutora caru cose ca Russia!

[Bokosi pa peji 23]

Kusambizga Ŵanthu ŵa pa Nchito

Apo wakenderanga ŵanthu ŵa pa nchito mu maofesi ghawo, Kaboni munyake ku Hawaii wakasangana na bwana wa kampani yinyake ya vya mendero. Nangauli bwana uyu wakaŵa wakutangwanika, kweni wakazomera kusambira Baibolo mu ofesi yake maminiti 30 sabata yiliyose. Mulenji wuliwose pa Citatu, wakuphalira ŵanchito ŵake kuti ŵangamutumiranga matelefoni yayi ndipo wakuŵika maghanaghano ghose pa sambiro. Kaboni munyakeso ku Hawaii kwenekuko wakusambira Baibolo na mweneco wa shopu yakugambikirapo skapato kamoza pa sabata. Sambiro likucitikira pa benci. Para kwiza kasitomala, Kaboni yura wakusezgekera ku mphepete. Ndipo para kasitomala waluta, mbwenu ŵakulutizga sambiro.

Bwana na mweneko wa shopu ŵakasangika cifukwa cakuti Ŵakaboni ndiwo ŵakamba kucitapo kanthu mwa kuponya “mikwawu” yawo mu malo ghakupambapambana. Kasi mungaghanaghanira malo mu cigaŵa cinu uko mungakumana na ŵanthu awo mbakusuzga kuŵasanga panyumba?

[Cithuzithuzi pa peji 23]

Kasi mungateŵetera mu cigaŵa ico ŵanthu ŵakuyowoya ciyowoyero cinyake?