Boma la Ufumu wa Ciuta Liliko Nadi

“Kasi vingacitika wuli kuti ŵanthu ŵakufuma mu vyaru vinandinandi kweniso vyakupambana kakhaliro ŵakolerane? Kukuyowoyeka kuti nkhondo yakufuma ku pulaneti linyake pera ndiyo yingacitiska kuti mitundu ya ŵanthu yikolerane.”—The Age, nyuzipepara ya ku Australia.

PARA ŵanthu ŵakufuma ku pulaneti linyake ŵawukira? Nangauli tikumanya yayi kuti kuwukira uku kungagumaniska nadi ŵanthu ŵa mitundu yose kwali yayi, kweni ico tikumanya nchakuti ucimi wa Baibolo ukuyowoyapo za soka ilo lakhala pacoko kwiza leneilo lizamugumaniska ŵanthu pamoza. Ndipo soka ili lizenge nadi na nkhongono za ŵasilikari ŵa kucanya.

Davide, Fumu yakale ya Israyeli yikacima umo caru ciliri mazuŵa ghano. Pakulongozgeka na mzimu wa Ciuta yikalemba kuti: “Mafumu gha caru ghakujimikira, ndipo ŵakuru ŵakukhalira wupu kwimikana na Yehova ndipo na wakuphakika wake, ŵakuti, Tiphwatulenge [malamba] ghawo, na kuwuskapo pa ise vikondo vyawo.” (Salmo 2:2, 3; Milimo 4:25, 26) Wonani kuti ŵalongozgi ŵa caru ŵawunganenge pamoza kwimikana na Yehova, Mlengi wa vyose, na wakuphakazgika wake, panji Fumu yakwimikika, Yesu Khristu. Kasi ivi vingacitika wuli?

Kuyana na mdauko wa Baibolo kweniso maucimi agho ghafiskika, Ufumu wa Ciuta ukimikika mu 1914 kucanya ndipo Yesu Khristu ndiyo Fumu yake. a Pa nyengo yira, mitundu  yose pa caru yikaŵa na fundo yimoza. M’malo mwa kujilambika ku Fumu ya Ufumu uphya wa Ciuta, iwo ŵakalimbananga mazaza mu Nkhondo Yikuru, panji Nkhondo Yakwamba ya Caru Cose.

Kasi Yehova Ciuta wakutipo wuli pa ivyo ŵalongozgi ŵa ŵanthu ŵakucita? “Yehova wakucanya ndiye tiwaseke; fumu tiyiŵelurenge. Tiyiyowoye nawo mu ukali wake, na kuŵayuzga mu kuceruka kwake.” Ndipo Yehova waphalirenge Mwana wake, Fumu yakuphakazgika ya Ufumu kuti: ‘Undirombe ndipo tindikupe ŵamitundu kuŵa ciharo cako, na mphelerekezgo za caru kuŵa ciŵeto cako. Uŵaphwamulenge na nthonga ya cisulo; Uŵang’anyenge nga nchiŵiya ca muwuvi.’—Salmo 2:4, 5, 8, 9.

Mitundu yizamuphwanyika kaumaliro na nthonga ya cisulo pa Haramagedoni. Civumbuzi, buku laumaliro mu Baibolo, likuzunura cakucitika ici kuti ni “nkhondo ya zuŵa likuru la Ciuta, Mwenenkhongonozose,” mu yeneiyo “ŵakaronga ŵa caru cose capasi,” ŵakuwunjikika pamoza. (Civumbuzi 16:14, 16) Mwakututuzgika na viŵanda, mitundu ya caru yizamukolerana kaumaliro na fundo yimoza yakuti yirwe nkhondo na Ciuta Mwenenkhongonozose.

Nyengo yakuti ŵanthu ŵawunjikane pamoza kwimikana na muwuso wa Ciuta yikuneng’enera comene. Kweni “kukolerana” kwawo kuzamuŵapindulira yayi. M’malo mwake, kuzamuŵa kwamba kwa mtende uwo ŵanthu ŵakamba kulindilira kale. Vizamuŵa wuli? Mu nkhondo yaumaliro iyi, Ufumu wa Ciuta “wamkuteketa mauthemba ghose agha [gha caru] na kughamara, kweni uwu tiwimilire muyirayira.” (Daniel 2:44) Ufumu wa Ciuta ndiwo wizenge na mtende uwo ŵanthu ŵakukhumba pa caru cose, wupu wa ŵanthu yayi.

Mulongozgi Mulara wa Boma la Ufumu

Uwu ndiwo ni Ufumu uwo ŵanthu ŵanandi ŵawemi mtima ŵakuromba, kuti: “Ufumu winu wize. Khumbo linu licitike pano pasi, nga nkhucanya.” (Mateyu 6:10) Ufumu wa Ciuta wuli mu mtima wa munthu yayi nga umo ŵanji ŵakuyowoyera. Iwo ni boma lanadi ilo lacita vinthu viwemi comene kufuma apo ukambiranga kucanya mu 1914. Tiyeni tiwone fundo zinyake izo zikulongora kuti Ufumu wa Ciuta uliko nadi ndipo ukugwira nchito yake lero.

Cakwamba, wuli na munthavi wankhongono uwo ukulongozgeka na Fumu yakwimikika, Yesu Khristu. Mu 33 C.E., Yehova Ciuta wakamwimika Yesu Khristu kuŵa Mutu wa mpingo Wacikhristu. (Ŵaefeso 1:22) Kufuma apo, Yesu wakuwusa, ndipo walongora kuti wakumanya kulongozga. Mwaciyelezgero, kale apo mu Yudeya mukaŵa njara yikuru, mpingo Wacikhristu ukacitapo kanthu mwaluŵiro kuti uwovwire ŵabali ŵawo. Nchito ya kuwunjika covwiro yikacitika, ndipo Barnaba na Saulosi ndiwo ŵakatumika kufuma ku Antiyoke kukapeleka wovwiri uwu.—Milimo 11:27-30.

Tingaŵa na cigomezgo kuti Yesu Khristu wacitengeso vinandi sono, pakuti boma la Ufumu likuwusa. Para kwawa masoka nga ni vindindindi, njara, kututuka kwa maji, kavuluvulu, na kuphulika kwa caru, mpingo Wacikhristu wa Ŵakaboni ŵa Yehova ukucitapo kanthu mwaluŵiro kuti wovwire ŵasopi ŵanyawo kweniso ŵanji uko kwacitika vinthu ivi. Mwaciyelezgero, apo ku El Salvador  kukaŵa cindindindi mu Janyuwale na Febuluwale 2001, wovwiri ukapelekeka mu vigaŵa vyose vya caru ici, ndipo Ŵakaboni ŵa Yehova kufuma ku Canada, Guatemala, na ku United States ŵakawovwirapo. Malo ghawo ghatatu ghakusoperamo kweniso nyumba zakujumpha 500 vikazengekaso mu nyengo yicoko waka.

Ŵanthu ŵa Boma la Ufumu wa Ciuta

Kufuma apo ukambiranga mu 1914, Ufumu wakucanya wa Ciuta wawunganya ŵanthu na kuŵalongozga kufuma mu mitundu yose pa caru. Ndipo ici cikufiska ucimi uwo ukalembeka na Yesaya wakuti: “Kwamkuti mu mazuwa gha umaliro kuti lupiri lwa nyumba ya Yehova [kusopa kwa unenesko] lwamkwimikika kughaluska mapiri ghose utali wake, . . . ndipo mitundu yose ya ŵanthu yamkuwungana kura.” Ucimi uwu ukulongora kuti “ŵanthu ŵanandi” ŵazamukwera pa phiri ili na kupokera visambizgo na malango gha Yehova.—Yesaya 2:2, 3.

Pa cifukwa ici, lero pali ubali wa pa caru cose wa Ŵakhristu ŵakujumpha mamiliyoni ghankhondi na limoza, awo ŵali mu vyaru vyakujumpha 230. Pa maungano gha mitundu yose gha Ŵakaboni ŵa Yehova, kanandi ŵanthu awo ŵakuwona ŵakutindikika na citemwa, mtende, na kukolerana kwa ŵanthu ŵanandi comene, ŵakufuma mu mitundu, kakhaliro, na viyowoyero ivi na ivi. (Milimo 10:34, 35) Kasi mungazomerezga yayi kuti likwenera kuŵa boma liwemi na lakukhazikika kweniso lanadi, ilo lingagumaniska pamoza ŵanthu ŵa mitundu iyi na iyi mu mtende ndiposo mwakukolerana?

Ufumu wa Ciuta na Masambiro

Boma lililose liri na malango agho ŵanthu ŵake ŵakwenera kulondezga. Ndipo waliyose uyo wakukhumba kulongozgeka na boma ilo wakwenera kupulikira malango agha. Ndimo uliri Ufumu wa Ciuta, uli na malango agho waliyose uyo wangenelera kuŵamo wakwenera kupulikira. Ndipouli, kuti ŵanthu ŵanandi comene kufuma uku na uku ŵapokere na kusunga malango ghamoza, nchipusu yayi. Ipo iyi ni fundo yinyake iyo yikukhozgera kuti Ufumu wa Ciuta ngwanadi—masambiro ghakucontha na kusintha maghanoghano pera yayi kweniso mtima.

Kasi boma la Ufumu likukwaniska wuli nchito yinonono iyi? Kwizira mu kupharazga “nyumba na nyumba” umo ŵakacitiranga ŵapositole, kweniso kusambizga Mazgu gha Ciuta kwa munthu payekha. (Milimo 5:42; 20:20) Kasi kasambizgiro aka nkhakovwira? Jacques Johnson, mupristi wa Chalichi la Katolika, wakalemba mu nyuzipepara ya ku Canada umo wakatondekera kugongoweska mwanakazi munyake kuti waleke kusambira na Ŵakaboni ŵa Yehova. Iyo wakati: “Nkhatindikika comene ndipo nkhamanya kuti ningaluska yayi. Nkhamba kumanya kuti myezi yinandi iyo yajumpha,  ŵanakazi ŵa mpingo wa Ŵakaboni ŵa Yehova aŵa ŵakakorana ubwezi wanadi na mama uyu mweneuyo wakatandalanga waka pa nyumba. Ŵakakolerana nayo mwa kumovwira, na kumutemwa kufuma pasi pa mtima. Nakalinga wakamba kucita mwamphu mu cisopo cawo ndipo pakaŵavya cakuti nicite kuti nimulekeske.” Mtima wa mama uyo wakaŵa wa Katolika ukakhozgeka cifukwa ca uthenga wa Baibolo uwo Ŵakaboni ŵa Yehova ŵakamusambizga, na nkharo yawo Yacikhristu. Mwakuyana waka, ŵanthu mamiliyoni ghanandi ŵakukhozgeka pa caru cose.

Masambiro gha Ufumu agha ghakufuma mu Baibolo, ndipo tikwenera kupulikira malango na fundo zake pa mikhaliro. Ŵanthu ŵakusambira kutemwana na kucindikana kwambura kujimana mukoka. (Yohane 13:34, 35) Ghakovwiraso ŵanthu kupulikira ulongozgi wakuti: “Mungalinganizgikanga na caru cino, kweni musanduke mu kuweleramo kuphya kwa mano ghinu, mwakuti mupimiske ico ndi khumbo la Ciuta, ciwemi na cakukondweska, na cakufikapo.” (Ŵaroma 12:2) Ŵanthu mamiliyoni ghanandi awo ŵaleka umoyo wawo wakale na kukolerana na malango ndiposo fundo za boma la Ufumu, ŵasanga mtende na kukondwa sono kweniso ŵakulindilira vinthu viwemi kunthazi.—Ŵakolose 3:9-11.

Ico cikovwira comene kuti paŵe kukolerana ntheura pa caru cose ni magazini gha Gongwe la Mulinda. Cifukwa ca nthowa ziwemi zakung’anamulira mabuku mu viyowoyero vinandinandi, nkhani zikuruzikuru mu Gongwe la Mulinda zikulembeka mu viyowoyero 135. Ndipo pa ŵanthu 100 awo ŵakuŵazga magazini agha pa caru cose, ŵanthu ŵakujumpha 95 ŵakusambira nkhani izi mu viyowoyero vyawo.

Mulembi wa chalichi la Mormon wakazunura vinthu vikuru ivyo mipingo yinyake yacita. Wakazunurapo Gongwe la Mulinda na Galamukani!, vyakupharazgika na Ŵakaboni ŵa Yehova, kuti ni magazini ghawemi comene ghakupharazgira, ndipo wakati: “Palije uyo wangayowoya kuti Gongwe la Mulinda panji Galamukani! vikupangiska ŵanthu kuŵa ŵakudemwera. Kweni, magazini agha ghakucenjezga ŵanthu kuti ŵaŵe maso, cinthu ico nindaciwonepo mu mabuku gha visopo vinyake. Magazini gha Gongwe la Mulinda na Galamukani! ngakovwira cifukwa ca fundo ziwemi, izo ŵakuzisanda makora, kweniso mukuŵa nkhani izo zikucitika nadi mu caru.”

Pali ukaboni unandi comene wakuti Ufumu wa Ciuta ukuwusa. Ŵakaboni ŵa Yehova mwakukondwa ndiposo mwamwamphu ŵakuphalirako ŵazengezgani ŵawo “makani ghawemi gheneagha gha Ufumu,” kuŵacema kuti nawo ŵaŵe ŵanthu ŵa Ufumu uwu. (Mateyu 24:14) Kasi imwe fundo iyi yikumukondweskani yayi? Mungatumbikika comene para mungakolerana na awo ŵakusambizgika malango gha Ufumu na kulimbikira kughalondezga. Ciwemiso nchakuti, mungalindilira kuzakaŵapo para Ufumu uzamuwusa mu caru ciphya cakulayizgika umo ‘muzamukhala urunji.’—2 Petros 3:13.

[Mazgu ghamusi]

[Cithuzithuzi pa peji 5]

Mu 1914, mitundu yikanjizgika mu nkhondo ya caru cose

[Vithuzithuzi pa peji 6]

Kupeleka wovwiri mbukaboni wakuti Ŵakhristu ŵakutemwana

[Cithuzithuzi pa peji 7]

Ŵakaboni ŵa Yehova pa caru cose ŵakusambira vinthu vyakuyana