Ŵakuvuka Kweni Ŵakuwa Nkhumbi Cara
Ŵakuvuka Kweni Ŵakuwa Nkhumbi Cara
‘Yehova ndi Ciuta wamuyirayira, Mlengi wa mphelerekezgo za caru. . . . Ndiye wakupa nkhongono ŵakulopwa, ndipo ku mweneuyo walije wakumusazgirako.’—YESAYA 40:28, 29.
1, 2. (a) Ni nchemo wuli iyo yikupharazgika kwa wose awo ŵakukhumba kusopa mwaunenesko? (b) Nchivici ico cingatimbanizga umoyo withu wauzimu?
PAKUŴA ŵasambiri ŵa Yesu, tikuyimanya makora nchemo yake yakuti: ‘Zani kwa ine mose imwe mukulemerwa na kuzotofyeka, ndipo ine ndimupumuzganinge. . . . Cifukwa goliwoli lane ndipusu, na katundu wane ndi muyuyu.’ (Mateyu 11:28-30) Kweniso Ŵakhristu ŵakulayizgika “nyengo zakuwezgeramo mtima kufuma ku cisko ca Fumu [Yehova].” (Milimo 3:19) Mwajiwonera mwekha umo mwapumuzgikira cifukwa ca kusambira unenesko wakusangika mu Baibolo. Mukulindilira viwemi munthazi, ndipo mukulongozgeka na khumbo la Yehova mu umoyo winu.
2 Ndipouli, ŵateŵeti ŵanyake ŵa Yehova ŵakuvuka na maghanoghano. Nyengo zinyake ŵakugongowa kwa nyengo yicoko, kweni nyengo zinyake kwa nyengo yitali. Pamanyuma pake ŵangamba kughanaghana kuti milimo yawo Yacikhristu ni mphingo, m’malo mwa kuyiwona kuti ni katundu wakupumuzga, umo Yesu wakalayizgira. Maghanoghano agha ghangatimbanizga ubwezi wa Mkhristu na Yehova.
3. Cifukwa wuli Yesu wakayowoya ulongozgi uwo wuli pa Yohane 14:1?
3 Nyengo yicoko waka pambere Yesu wandakoreke na kweruzgika, wakaphalira ŵasambiri ŵake kuti: “Ungakweŵekanga [cara] mtima winu: mukupulikana na Ciuta, pulikanani na ine wuwo.” (Yohane 14:1) Yesu wakayowoya mazgu agha apo ŵapositole ŵakaŵa pafupi kukomwa. Kufuma apo, ŵakenera kusuzgika lutaluta. Yesu wakamanya kuti ŵasambiri ŵake ŵangagongowa. (Yohane 16:1) Usange ŵalekenge kucitapo kanthu, ŵangalopwa mwauzimu cifukwa ca citima, ndipo ŵangaleka kuthemba Yehova. Ndimo viliri kwa Ŵakhristu lero. Usange tingalutilira kugongowa, tingakweŵeka comene ndipo mitima yithu yingalopwa. (Yeremiya 8:18) Wunthu withu wa mukati wungalopwa. Usange ndimo vyaŵira, tingazilara mu maghanoghano ndiposo mwauzimu, nakuti tingawona ngati nchiwemi kuleka waka kusopa Yehova.
4. Kasi nchivici ico cingatovwira kuti mitima yithu yileke kuvuka?
4 Ulongozgi wa Baibolo ngwakwenelera nadi: “Vikilira mtima wako kwakuruska vyose; cifukwa mkati mwake muli cisimi ca umoyo.” (Zintharika 4:23) Baibolo likutipa ulongozgi wamahara uwo ungatovwira kuvikilira mtima withu kuti uleke kugongowa nesi kuvuka mwauzimu. Kweni cakwamba tikwenera kumanya ico cikwambiska vyakulema.
Cikhristu Nchakuvuska Yayi
5. Pa nkhani ya kuŵa musambiri, kasi tingawona ngati pali mphambano wuli?
5 Mbunenesko, pakuti tili Ŵakhristu, tikwenera kulimbikira comene. (Luka 13:24) Nakuti Yesu wakati: “Uyo yose wakuleka kuyegha [“khuni lake lakusuzgikirapo,” NW], na kundilondezga walive kumanya kuŵa musambiri wane.” (Luka 14:27) Para tingapulikira mphuvya, tingawona ngati mazgu agha ghakususkana na mazgu ghanyake gha Yesu ghakuti goliwoli lake ndiyuyu ndiposo ndakupumuzga, kweni ghakususkana yayi.
6, 7. Cifukwa wuli tingayowoya kuti cisopo cithu nchakuvuska yayi?
6 Para tikujipeleka na kufwilirapo pa nchito yinonono na cilato ciwemi, tingaŵa ŵakukhorwa kweniso tingapumuzgika nangauli tingavuka. (Mupharazgi 3:13, 22) Kasi yilipo nchito yinyake yiwemi kuluska kuphalirako ŵanyithu unenesko wakukondweska wa m’Baibolo? Nakuti nkhondo iyo tikurwa mwakuti tilondezge ivyo Ciuta wakukhumba nkhanthu yayi para tikuyezgelera na vitumbiko ivyo tikusanga cifukwa ca kucita ntheura. (Zintharika 2:10-20) Nanga tisuzgike, tikuwona kuti ni mwaŵi ukuru kukomwa cifukwa ca Ufumu wa Ciuta.—1 Petros 4:14.
7 Goliwoli la Yesu likupumuzga nadi, comene para tikuyaniska na cisi cauzimu ico ŵalimo awo ŵakukanilira mu goliwoli la cisopo cautesi. Ciuta wakutitemwa ndipo wakukhumba kuti ticite ivyo tingafiska. “Malango gha [Yehova] kuti ngazitu cara.” (1 Yohane 5:3) Cikhristu caunenesko, nga umo Malemba ghakulongolera, nchakuvuska yayi. Ntheura kusopa kukwambiska vyakulema yayi, nesi kugongowa.
‘Tisezgere Kumphepete Uzitu Wose’
8. Kanandi nchivici ico cikwambiska vyakulema pa umoyo wauzimu?
8 Kanandi vyakulema vilivyose vyauzimu ivyo tikupulika vikwiza cifukwa ca uzitu wakusazgikira uwo caru ciheni ici cikutinyekezga nawo. Cifukwa cakuti “caru cose cikugona mu nkhongono za muheni,” tili pakati pa vinthu vyakugongoweska ivyo vingativuska na kutijandizga pa umoyo withu Wacikhristu. (1 Yohane 5:19) Vinthu vyambura kuzirwa vingapilingizga na kutimbanizga milimo yithu Yacikhristu. Katundu wakusazgikira uyu wangatinyekezgera pasi, kweniso wangatikweŵeska mtima. Lekani Baibolo likuticiska kuti ‘tisezgere kumphepete uzitu wose.’—Ŵahebere 12:1-3.
9. Kasi tinganyekezgeka wuli na kupenja cuma?
9 Mwaciyelezgero, ŵanthu mu caru ŵakulimbana na kujipangira lumbiri, kupenja ndarama, vyakusekereska, kwenda maulendo na cilato ca kujikondweska na vinyake vya thupi ivyo nase tingamba kuvighanaghanira. (1 Yohane 2:15-17) Ŵakhristu ŵanyake kale ŵakapenjanga usambazi, ndipo ŵakajicemera masuzgo. Mpositole Paulosi wakulongosora kuti: “Awo ŵakukhumba kusambazgika ŵakuwa mu lwavyo na cipingo na makhumbiro ghanandi ghakupusa na ghakupweteka, agho ghakubizga ŵanthu mu pharaniko na mu kutayika. Cifukwa kutemwa ndarama ndukorozi lwa mitundu yose ya viheni: izo ŵanji pakuzipenjiska ŵali kupuluskikako ku cipulikano, ndipo ŵali kujilasa na vitima vinandi.”—1 Timote 6:9, 10.
10. Kasi tikusambiramo vici mu ntharika ya Yesu ya mumiji pa nkhani ya usambazi?
10 Para vyalema ndipo tayamba kugongowa pakuteŵetera Ciuta, kasi cingaŵa cifukwa cakuti umoyo withu wauzimu ukujandizgika na kupenja vya thupi? Ici cingacitika nadi, nga umo Yesu wakalongolera mu ntharika yake ya mumiji. ‘Vyakwenjerwa vya nyengo yino, na upusikizgi wa usambazi, na kukhumbiska vinthu vinyake,’ Yesu wakaviyaniska na minga izo ‘zikufyolonganiska’ mbuto ya mazgu gha Ciuta mu mitima yithu. (Marko 4:18, 19) Ntheura Baibolo likutilongozga kuti: ‘Ng’anamukaniko ku kutemwa ndarama: mukhorwenge na ivyo muli navyo; cifukwa mweneco wakati, Kuti ndikutayenge cara, panji nesi kukusida nakamo kose.’—Ŵahebere 13:5.
11. Kasi tingawuskapo wuli vinthu ivyo vikutinyekezgera pasi?
11 Nyengo zinyake, ico cikucitiska masuzgo pa umoyo withu nkhupenja vinandi yayi, kweni ivyo tikucita na vinthu ivyo tili navyo kale. Ŵanandi ŵakusuzgika na maghanoghano cifukwa ca ulwari kweniso nyifwa ya ŵakutemweka ŵawo, panji masuzgo ghakuru. Iwo ŵawona kuti nchiwemi kusintha vinthu nyengo zinyake. Mwanalume munyake na muwoli wake ŵali kuleka kucita vinthu vinyake ivyo ŵakatemwanga kucita para ŵasanga nyengo, kweniso nchito za iwo ŵene. Ŵakapalasura katundu wawo yose, na kubisa vyose ivyo ŵakagwiliskiranga nchito. Cingatovwira kuti nyengo zinyake tighanaghanirenge ivyo tikutemwa kucita kweniso kusanda katundu withu, na kuwuskapo uzitu wambura kwenelera mwakuti tileke kuvuka na kuwa nkhumbi.
Kuzika na Kujiyuyura Ni Vyakuzirwa
12. Kasi nchivici ico tikwenera kumanya pa nkhani ya maubudi ghithu?
12 Maubudi ghithu, nanga ghangaŵa ghacoko wuli, ghangaticemera suzgo. Mazgu gha Davide ngaunenesko pa nkhani iyi: “Maubendezi ghane ghandibizga mutu wane; nkhuzotopa nagho nga ndi katundu muzitu.” (Salmo 38:4) Kanandi, ico cikukhumbikwa nkhusintha tunthu tucoko waka mwakuti tipepuskike.
13. Kasi mtima wa kuzika ungatovwira wuli kuwona uteŵeti withu mwakwenelera?
13 Baibolo likuticiska kuti tiŵe na “vinjeru viwemi na ulungamiki.” (Zintharika 3:21, 22) Baibolo likuti: ‘Vinjeru ivyo ni vyakucanya . . . ni vyakuzika.’ (Yakobe 3:17) Ŵanyake ŵakudokera comene kuti ŵaphalizganenge na ŵanyawo mu uteŵeti Wacikhristu. Ndipouli, Baibolo likutilongozga kuti: “Munthu yose wapime mulimo wake na wake, apo ndipo wati waŵenge na kuthumbwa mwa yekha pera, ndipo mu munyake cara. Cifukwa munthu yose wati wayeghenge mphingo yake.” (Ŵagalatiya 6:4, 5) Mbunenesko, usange Ŵakhristu ŵanyithu ŵakucita makora, nase tikukhuŵirizgika kuti titeŵetere Yehova na mtima wose, kweni vinjeru na mtima wa kuzika vitovwirenge kuti ticitenge ivyo tingafiska kuyana na nkhongono zithu.
14, 15. Kasi tingacita wuli mwavinjeru pakupwelelera thupi na maghanoghano ghithu?
14 Para tili ŵakujikora nanga paŵe pa vinthu ivyo vikuwoneka kuti ni vyakuzirwa pacoko, tingacheŵa vyakulema. Mwaciyelezgero, kasi tili kuzgoŵera kucita vinthu ivyo vingakhozga thupi lithu? Wonani umo ŵakucitira ŵanthu ŵaŵiri ŵakutorana awo ŵakuteŵetera pa ofesi yinyake ya Ŵakaboni ŵa Yehova. Iwo ŵali kuwona kuti nchamahara kucheŵa vyakulema. Mwanakazi wakuti: “Nanga tingaŵa na nchito yinandi comene yakuti ticite, tikuyezga kugona pa nyengo ya mazuŵa ghose. Kweniso tikuseŵera nyengo zose. Ici catovwira comene. Tamanya ivyo tingatondeka kufiska, ndipo tikucita vinthu mwakuyana na nkhongono zithu. Tikukhumba yayi kujiyaniska na awo ŵakuŵa ngati ŵali na nkhongono zambura kumara.” Kasi tikurya cakurya ciwemi na kupumura mwakukwana? Usange tingapwelelera makora umoyo withu kwambura kutalulira, tingacepeska maghanoghano na vyakulema pa umoyo wauzimu.
15 Taŵanyake tikukhumbikwira vinthu vyapadera. Mwaciyelezgero, mudumbu munyake Wacikhristu wacita milimo yinonono comene mu uteŵeti wa nyengo zose. Wali na suzgo likuru muthupi, kusazgapo kansa. Kasi nchivici cikumovwira kuti wazizipizge vinthu ivi? Iyo wakuti: “Nchakuzirwa comene kuti nikhalenge panekha nyengo zinyake, pa malo ghambura ciwawa. Para maghanoghano ghaniŵira ghanandi ndipo vyalema, nyengo yeneyiyo nkhupenja malo gha bata mwakuti niŵazge na kupumura.” Vinjeru na kughanaghana mwamahara vikutovwira kumanya ivyo tikukhumba na kucitapo kanthu mwakuti tileke kuwa nkhumbi mwauzimu.
Yehova Wakutisazgirako Nkhongono
16, 17. (a) Cifukwa wuli nchakuzirwa comene kupwelelera umoyo withu wauzimu? (b) Nchivici ico tikwenera kusazgapo pa vyakucita vithu zuŵa lililose?
16 Kupwelelera umoyo withu wauzimu nchinthu cakuzirwa comene. Para tili paubwezi uwemi na Yehova Ciuta, nanga thupi lingavuka, tiwenge nkhumbi yayi kuti tileke kumusopa. Yehova ndiyo ‘wakupa nkhongono ŵakulopwa, ndipo ku mweneuyo walije wakumusazgirako.’ (Yesaya 40:28, 29) Mpositole Paulosi, uyo wakajiwonera yekha kuti mazgu agha ngaunenesko, wakalemba kuti: “Tikuvuka cara; kweni nanga wunthu withu wa kuwaro ukuvukupara, ndipouli wunthu withu wa mukati ukuzgokaso uphya zuŵa na zuŵa.”—2 Ŵakorinte 4:16.
17 Wonani, mazgu agha ghakuti “zuŵa na zuŵa.” Ici cikung’anamura kupokera ivyo Yehova wakupeleka zuŵa lililose. Mwanakazi munyake uyo wakateŵetera mwakugomezgeka kwa vilimika 43, nyengo zinyake wakavukanga na kugongowa. Kweni wakawa nkhumbi yayi. Iyo wakuti: “Nili kuzgoŵera kuwuka usikusiku kuti pambere nindayambe kucita cilicose, nirombe kwa Yehova na kuŵazga Mazgu ghake. Ici canovwira kuzizipizga mupaka sono.” Ipo tingathemba nkhongono izo Yehova wakutipa nyengo zose, inya, “zuŵa na zuŵa” tirombenge kwa iyo na kughanaghanira mikhaliro yake yapacanya ndiposo ivyo walayizga.
18. Kasi Baibolo likuŵapembuzga wuli ŵateŵeti ŵakugomezgeka awo mbacekuru panji mbalwari?
18 Nchakovwira comene kucita nthena, comene kwa awo ŵakugongowa cifukwa ca ucekuru panji ulwari. Ŵanthu aŵa ŵangataya mtima, cifukwa cakuti ŵakujiyaniska na ŵanyawo yayi, kweni cifukwa cakuti ŵakukumbuka umo ŵakacitiranga kale. Nchakupembuzga comene kumanya kuti Yehova wakuŵacindika ŵacekuru! Baibolo likuti: “Mbuha ndizo mphumpu ya ucindami, zili nga ndi njombe ya umoyo wa urunji.” (Zintharika 16:31) Yehova wakumanya kuti tili ŵakupeleŵera ndipo wakuwonga para tikumuteŵetera na mtima wose nanga tingaŵa ŵakulopwa. Ndipo Ciuta wakukumbuka viwemi ivyo tacita kale nga ni para vili kulembeka. Malemba ghakutipanikizgira: “Ciuta kuti ngwambura urunji cara, kuti waluwe mulimo winu na kutemwa uko mukalongora ku zina lake, apo mukaŵateŵetera ŵatuŵa, ndipo mucali kuŵateŵetera.” (Ŵahebere 6:10) Tose tili ŵakukondwa comene kuti pakati pithu tili na ŵanthu awo ŵagomezgeka kwa Yehova vilimika vinandi comene!
Lekani Kuwa Nkhumbi
19. Kasi tikwandura wuli para tikutangwanika na kucita uwemi?
19 Ŵanandi ŵakugomezga kuti vyakulema vingacepa mwa kugwira nchito yinonono nyengo zose. Mwakuyana waka, maghanoghano na vyakulema vyauzimu vikucepa mwa kucita milimo yauzimu nyengo zose. Baibolo likuti: ‘Tingavukanga [yayi] pakucita uwemi: cifukwa tivunenge mu nyengo yakwenelera, usange taleka kuwa nkhumbi. Ipo ntheura nga ndi umo tiliri na mwaŵi, tiŵacitirenge wose uwemi, comenecomene awo mba mbumba ya cipulikano.” (Ŵagalatiya 6:9, 10) Wonani, mazgu ghakuti “pakucita uwemi,” kweniso “tiŵacitirenge wose uwemi.” Igho ghakulongora kuti tikwenera kucitapo kanthu. Para tikuŵacitira viwemi ŵanyithu, citovwirenge kuti tileke kuwa nkhumbi apo tikuteŵetera Yehova.
20. Kuti tileke kugongowa, mbanjani awo tikwenera kucheŵa?
20 Kweni cingaŵa cakuvuska kwendezgana kweniso kucita vinthu pamoza na awo ŵakupepura malango gha Ciuta. Baibolo likuticenjezga kuti: “Libwe ndizitu, mcenga nawo ngwakuzotopa, kweni kusosomora kwa cindere kukuluska viŵiri wuwo.” (Zintharika 27:3) Kuti tileke kugongowa na kuvuka, tikwenera kucheŵa ŵanthu awo ŵakutemwa kwavya na kususka ŵanyawo.
21. Kasi tingaŵakhozga wuli ŵanyithu pa maungano Ghacikhristu?
21 Yehova wali kupeleka maungano Ghacikhristu mwakuti wawezgerengemo nkhongono zithu zauzimu. Pa maungano tikuŵa na mwaŵi wa kukhozgana, kovwirana maghanoghano kweniso kucezga. (Ŵahebere 10:25) Wose mu mpingo ŵakwenera kulimbikira kuti ŵakhozgenge ŵanyawo para ŵakuzgora pa maungano panji para ŵakuyowoya nkhani pa pulatifomu. Awo ŵakulongozga pakusambizga ŵali na mulimo ukuru wa kukhozga ŵanyawo. (Yesaya 32:1, 2) Nangauli nyengo zinyake ŵangakhumbikwira kuciska panji kucenya, mazgu ghawo pakupeleka ulongozgi ghakwenera kuŵa ghalusungu. (Ŵagalatiya 6:1, 2) Para tikutemwa ŵanyithu, cizamutovwira kuti titeŵetere Yehova kwambura kuwa nkhumbi.—Salmo 133:1; Yohane 13:35.
22. Nangauli tili ŵakupeleŵera, cifukwa wuli tingaŵa ŵakukhwima?
22 Ni nchito yikuru kuteŵetera Yehova mu nyengo yaumaliro yino. Ndipo Ŵakhristu nawo ŵakuphyoka na maghanoghano, ŵakukweŵeka kweniso ŵakukwenyelera na vinthu vinyake. Taŵanthu tili ŵakupeleŵera, tili nga ni viŵiya vya dongo. Kweni Baibolo likuti: “Tili na usambazi weneuwu mu viŵiya vya dongo, mwakuti kaluskiro ka nkhongono kaŵe ka Ciuta, ka ise tekha cara.” (2 Ŵakorinte 4:7) Inya, tivukenge nadi, kweni tiwenge nkhumbi yayi panji kuleka. M’malo mwake, tiyeni tiŵe “na mtima wakukhwima” ndipo tiyowoye kuti: “Fumu [Yehova] ndi movwiri wane.”—Ŵahebere 13:6.
Kuweleramo Mwakudumura
• Ni uzitu wuli uwo tingasezgera pamphepete?
• Kasi nase tingaŵacitira wuli “uwemi” Ŵakhristu ŵanyithu?
• Kasi Yehova wakutovwira wuli para tavuka panji para tagongowa?
[Mafumbo]
[Cithuzithuzi pa peji 19]
Yesu wakamanya kuti ŵapositole ŵangagongowa nyengo zinyake
[Cithuzithuzi pa peji 20]
Ŵanyake ŵaleka ivyo ŵakatemwanga na nchito zambura kuzirwa
[Cithuzithuzi pa peji 22]
Nangauli tili ŵakupeleŵera, Yehova wakuwonga para tikumusopa na mtima wose