Kutinkhika Kwambura Cifukwa
Kutinkhika Kwambura Cifukwa
“Ŵakanditinkha kwambura cifukwa.”—YOHANE 15:25.
1, 2. (a) Cifukwa wuli ŵanthu ŵanyake ŵakutindikika para Ŵakhristu ŵakuneneka, kweni cifukwa wuli ise tikuzizwa yayi? (b) Kasi ni ng’anamuro wuli la lizgu lakuti “kutinkha” ilo tidumbiskanenge mu nkhani yino? (Wonani futunoti.)
ŴAKABONI ŴA YEHOVA ŵakuyezgayezga kukhala mwakuyana na fundo za mu Mazgu gha Ciuta. Pa cifukwa ici, mu vyaru vinandi ŵakumanyikwa na lumbiri luwemi. Kweni nyengo zinyake, ŵanthu ŵakuŵapusikizgira. Mwaciyelezgero, mulara wa boma mu msumba wa St. Petersburg, ku Russia, wakati: “Ŵanthu ŵakatiphaliranga kuti Ŵakaboni ŵa Yehova nkhagulu ka ŵanthu awo ŵakucita vinthu mwakabisira ndipo ŵakukoma ŵana kweniso ŵakujikoma ŵekha.” Kweni wakati wagwira nchito pamoza na Ŵakaboni ŵa Yehova, pakunozgekera ungano wa mitundu yose, munthu uyu wakati: “Sono nkhuwona kuti mbanthu ŵamahara ghawo, na ŵakukondwa . . . Mbanthu ŵakutemwa bata na mtende, ndipo ŵakutemwana comene.” Wakalutilira kuti: “Nkhumanya yayi ico ŵanthu ŵakuŵapusikizgira nthena.”—1 Petros 3:16.
2 Ŵateŵeti ŵa Ciuta ŵakukondwa yayi para ŵanthu ŵakuŵanena kuti mbaheni. Ndipouli, ŵakuzizwa cara para ŵanthu ŵakuŵacitira nthena. Yesu wakacenjezgerathu ŵalondezgi ŵake kuti: ‘Usange caru cikumutinkhani imwe, mukumanya kuti cadanga catinkha ine, cikaŵa cindamutinkhani imwe. . . Kweni ici cikucitika, mwakuti mazgu ghafiskike gheneagho ghakulembeka mu Dango lawo, Ŵakanditinkha kwambura cifukwa.’ a (Yohane 15:18-20, 25; Salmo 35:19; 69:4) Pakwambilira, wakaphalira ŵasambiri ŵake kuti: ‘Usange mwenenyumba ŵamucema Belezebule, asi kwakuluska awo mba mu nyumba yake.’ (Mateyu 10:25) Ŵakhristu ŵakumanya kuti kukhomezga para ŵakutombozgeka nchigaŵa ca “khuni lakusuzgikirapo” NW, ilo ŵakazomera apo ŵakazgoka ŵalondezgi ŵa Khristu.—Mateyu 16:24.
3. Kasi ŵasopi ŵaunenesko ŵasuzgika wuli?
3 Ŵasopi ŵaunenesko ŵakamba kusuzgika ni kale comene, kwambira pa “Abelu wakunyoroka.” (Mateyu 23:34, 35) Ŵasopi ŵaunenesko ŵakusuzgika na ŵanthu ŵacoko waka yayi. Yesu wakati ŵalondezgi ŵake ‘ŵamutinkhika na ŵanthu wose’ cifukwa ca zina lake. (Mateyu 10:22) Kweniso, mpositole Paulosi wakalemba kuti ŵateŵeti wose ŵa Ciuta, na ise wuwo, tizikizgikenge. (2 Timote 3:12) Pa cifukwa wuli?
Uyo Wakupangiska Kuti Titinkhikenge Kwambura Cifukwa
4. Kasi Baibolo likuvumbura wuli uyo wakupangiska kuti titinkhikenge kwambura cifukwa?
4 Mazgu gha Ciuta ghakuvumbura kuti kufuma ku mtendeko, pali munthu wambura kuwoneka uyo wakupangiska kuti ŵasopi ŵaunenesko ŵatinkhikenge. Wonani umo Abelu, munthu wakwamba wa cipulikano wakakomekera mwankhaza. Baibolo likuti mukuru wake Kayini uyo wakamukoma, “wakaŵa wa muheni,” Satana Dyabulosi. (1 Yohane 3:12) Kayini wakatolera nkharo ya Satana, ndipo Dyabulosi wakafiska milimo yake yiheni kwizira mwa iyo. Baibolo likuvumburaso kuti Satana ndiyo wakapangiska kuti Yobu na Yesu Khristu ŵasuzgike. (Job 1:12; 2:6, 7; Yohane 8:37, 44; 13:27) Buku la Civumbuzi likutifiskira pakweru uyo wakusuzga ŵalondezgi ŵa Yesu, likuti: “Satana waneng’enera kuponya ŵanji ŵa imwe mu nyumba ya vikondo mwakuti muyezgeke.” (Civumbuzi 2:10) Inya, Satana ndiyo wakupangiska kuti ŵanthu ŵa Ciuta ŵatinkhikenge kwambura cifukwa.
5. Cifukwa wuli Satana wakutinkha ŵasopi ŵaunenesko?
5 Cifukwa wuli Satana wakutinkha ŵasopi ŵaunenesko? Cifukwa ca kujiŵikamo, Satana wakapanga ciŵembu na kwamba kwimikana na “Karonga wakukhalilira swi,” Yehova Ciuta. (1 Timote 1:17; 3:6) Satana wakuyowoya kuti Ciuta wakukhwimiska comene malango pakuwusa vilengiwa vyake. Ndiposo wakuti palije munthu uyo wakuteŵetera Yehova cifukwa cakuti wakumutemwa, kweni kuti wasangepo waka phindu. Satana wakuti para wangapika mwaŵi wakuti wayezge ŵanthu, wangaŵapatuska wose kwa Ciuta. (Genesis 3:1-6; Job 1:6-12; 2:1-7) Pakumupusikizgira Yehova kuti ngwankhaza, mutesi, ndiposo wakutondeka, Satana wakukhumba kujilongora kuti nayo wali na wenelero wa kuwusa caru cose. Ntheura wakukhumba kuti ŵanthu ŵamusopenge, lekani ukali wake ukugolera comene pa awo ŵakuteŵetera Ciuta.—Mateyu 4:8, 9.
6. (a) Kasi tikunjilamo wuli mu nkhani ya muwuso wa Yehova? (b) Kasi kumanya makora nkhani iyi kukutovwira wuli kuti tilutilire kugomezgeka? (Wonani bokosi pa peji 12.)
6 Kasi mukuwona umo namwe mukunjiliramo mu nkhani iyi? Pakuŵa muteŵeti wa Yehova, namwe mwawona kuti nangauli kuteŵetera Ciuta kukukhumbikwira citatata, kweni vitumbiko vyake ni vinandi. Ndipouli, kasi mungacita wuli usange vyakucitika mu umoyo winu, vikacitiska kuti cimuŵirani cinonono kupulikira malango na ulongozgi wa Yehova? Wuli usange mukuwona ngati mukwandulapo kanthu yayi pakuteŵetera Yehova? Kasi mungati nchiwemi waka kuleka kuteŵetera Yehova? Panji kasi kutemwa Yehova na kumuwonga pa mikhaliro yake yiwemi kumutumaninge kuti mulutilire kwenda mu nthowa zake zose? (Duteronome 10:12, 13) Mwa kuzomerezga Satana kuti watinyekezge pacoko waka, Yehova watipa mwaŵi wakuti tizgore tekha pa ivyo Satana wakuyowoya.—Zintharika 27:11.
‘Para Ŵanthu Ŵakumunenani’
7. Kasi nthowa yimoza iyo Dyabulosi wakucita kuti watipatuske kwa Yehova ni nji?
7 Sono tiyeni tiwone mwakupwelelera nthowa yimoza iyo Satana wakucita pakukhumba kukhozgera ivyo wakuyowoyera Yehova na ŵateŵeti ŵake—utesi. Yesu wakati Satana ni “wiske wa utesi.” (Yohane 8:44) Dyabulosi, zina ilo likung’anamura “Wakusesa,” likulongora kuti iyo ni munthu wakwamba kusesa Ciuta, mazgu ghake ghawemi, na kubinkhiska zina lake lakupatulika. Dyabulosi wakwimikana na muwuso wa Yehova kwizira mu mazgu ghawakawaka, maupusikizgi, na mautesi. Ndipo nthowa zenezizi ndizo wakususkira ŵateŵeti ŵakugomezgeka ŵa Ciuta. Pakuŵabatikira Ŵakaboni vinthu ivi, wakumanya kuti cingaŵa ciyezgo cikuru ico cingaŵa cinonono kukhomezga.
8. Kasi Satana wakamutambuzga wuli Yobu, ndipo vikacitika ni vici?
8 Pulikani ivyo vikamuwira Yobu, uyo zina lake likung’anamura “Munthu Wakutinkhika.” Padera pa kumutayiska usambazi wake, ŵana, na kumulwariska, Satana wakapangiska Yobu kuwoneka nga ni munthu wakwananga uyo Ciuta wakumulanga. Nangauli Yobu wakaŵa wakucindikika comene, kweni ŵanthu ŵakamba kumwelura, kusazgapo ŵabali na ŵabwezi ŵake. (Job 19:13-19; 29:1, 2, 7-11) Kweniso, kwizira mu ŵapembuzgi ŵatesi, Satana ‘wakamuphyoraphyora Yobu na mazgu.’ Cakwamba, ŵakamutundura Yobu kuti wakacita kwananga kukuru, ndipo ŵakayowoyaso pakweru kuti Yobu ni munthu wakwananga. (Job 4:6-9; 19:2; 22:5-10) Ici cikwenera kuti cikamukwenyerezga comene Yobu!
9. Kasi ŵakacita nayo wuli Yesu mwakuti wawoneke nga ni munthu wakwananga?
9 Pa wose awo ŵakukhozgera muwuso wa Yehova, Mwana wa Ciuta ndiyo wakatinkhika comene na Satana. Apo Yesu wakiza pa caru capasi, Satana wakakhumba kumunangiska mwauzimu, umo wakacitira na Yobu, kumuzgora Yesu kuti wawoneke nga ni munthu wakwananga. (Yesaya 53:2-4; Yohane 9:24) Ŵanthu ŵakamunenanga kuti wakaŵa muloŵevu na muryezi kweniso kuti ‘wakaŵa na mzimu uheni.’ (Mateyu 11:18, 19; Yohane 7:20; 8:48; 10:20) Ŵakamupusikizgira kuti wakutuka. (Mateyu 9:2, 3; 26:63-66; Yohane 10:33-36) Ici cikamukwenyerezga Yesu, pakumanya kuti cikapangiska Ŵawiske kutukika kwambura cifukwa. (Luka 22:41-44) Paumaliro, ŵakamupayika Yesu nga nchigeŵenga cakutembeka. (Mateyu 27:38-44) Pakuŵa wakugomezgeka, Yesu wakazizipizga para ‘ŵakwananga ŵakapindananga nayo.’—Ŵahebere 12:2, 3.
10. Kasi lero Satana wakuŵawukira wuli Ŵakhristu ŵakuphakazgika awo ŵacali pano pasi?
10 Lero napo, maso gha Dyabulosi ghali pa ŵalondezgi ŵakuphakazgika ŵa Khristu awo ŵacali pano pasi. Satana wakucemeka “mutunduli wa ŵabali [ŵa Khristu] . . . , mweneuyo wakuŵatundula pamaso pa Ciuta withu muhanya na usiku.” (Civumbuzi 12:9, 10) Kufuma apo wakacimbizgika kucanya na kujalirika pano pa caru capasi, Satana wasazgirako mautesi ghake mwakuti wabinkhiske ŵabali ŵa Khristu na kuŵazgora nga vichwapi. (1 Ŵakorinte 4:13) Mu vyaru vinyake, ŵanthu ŵakuŵatetera utesi kuti nkhagulu kaheni, nga umo vikaŵira na Ŵakhristu mu nyengo yakale. (Milimo 24:5, 14; 28:22) Umo tanguwonera pakwamba, ŵakuŵapusikizgira kwizira mu nkhani zautesi. Ndipouli, “na ucindami ndipo na kuyuyuka, na mbiri yiheni ndipo na mbiri yiwemi,” ŵabali ŵakuphakazgika ŵa Khristu, mwakovwirika na ŵanyawo ŵa “mberere zinyake,” ŵalimbikira ‘kusungilira malango gha Ciuta, na kukoreska cipanikizgo ca Yesu.’—2 Ŵakorinte 6:8; Yohane 10:16; Civumbuzi 12:17.
11, 12. (a) Kasi nyengo zinyake Ŵakhristu ŵangasuzgika cifukwa ca vici? (b) Kasi Mkhristu wangasuzgika kwambura mulandu cifukwa ca cipulikano cake mu nthowa wuli?
11 Mbunenesko kuti muteŵeti waliyose wa Ciuta, nyengo zose wakusuzgika “cifukwa ca urunji” yayi. (Mateyu 5:10) Nyengo zinyake tingasuzgika cifukwa ca kupeleŵera kwithu. Palije phindu usange ‘tikuzizipizga pa kupamanthika para tananga.’ Ndipouli, ‘nchamapokelereko pamaso pa Yehova usange Mkhristu, uku njuŵi yake yikujintha pa Ciuta, wakukunthirapo vitima, pa kuvimyantha kwambura mulandu.’ (1 Petros 2:19, 20) Kasi ivi vingacitika pa nthena mphani?
12 Ŵanyake ŵanyozeka cifukwa ca kukana kulondezga mitheto ya nyifwa iyo yikususkana na Malemba. (Duteronome 14:1) Ŵawukirano awo Mbakaboni ŵakuhoyeka comene na ŵanyawo cifukwa ca kusungilira malango gha Yehova gha kakhaliro. (1 Petros 4:4) Ŵapapi ŵanyake Ŵacikhristu ŵakuneneka kuti “ŵakuleka kupwelelera ŵana” panji “mbankhaza” cifukwa cakuti ŵakukana kuti ŵana ŵawo ŵapokere ndopa para ŵalwara. (Milimo 15:29) Ŵakhristu ŵanyake ŵacimbizgika pa cikaya na ŵabali panji ŵazengezgani ŵawo cifukwa cakuti ŵazgoka ŵateŵeti ŵa Yehova. (Mateyu 10:34-37) Wose aŵa ŵakulondezga ciyelezgero ca ŵaprofeti na Yesu mweneko pakusuzgika kwambura mulandu.—Mateyu 5:11, 12; Yakobe 5:10; 1 Petros 2:21.
Kukhomezga Para Ŵakutihoya
13. Kasi nchivici cingatovwira kuti tilutilire kuwona makora vinthu vyauzimu para ŵanthu ŵakutiyowoyera uheni?
13 Para ŵanthu ŵakutihoya cifukwa ca cipulikano cithu, tingagongowa, na kughanaghana kuti tileke waka kuteŵetera Ciuta, umo wakacitira mprofeti Yeremiya. (Yeremiya 20:7-9) Kasi nchivici cingatovwira kuti tilutilire kuwona makora vinthu vyauzimu? Yezgani kuwona nkhani iyo umo Yehova wakuyiwonera. Yehova wakuwona awo ŵakugomezgeka mu nyengo ya kuyezgeka kuti mbakutonda, ŵakutondeka yayi. (Ŵaroma 8:37) Yezgani kughanaghanira ŵanthu awo ŵakakhozgera muwuso wa Yehova mu suzgo yiliyose iyo Dyabulosi wakaŵacitira. Pali ŵanalume na ŵanakazi ŵakugomezgeka nga ni Abelu, Yobu, Mariya nyina wa Yesu, na ŵanyake mu nyengo yakale, kweniso ŵateŵeti ŵanyithu lero. (Ŵahebere 11:35-37; 12:1) Ghanaghanirani za kugomezgeka kwawo. Bingo likuru la ŵanthu ŵakugomezgeka ili likutipempha kuti tikolerane nalo pakutonda caru na cipulikano.—1 Yohane 5:4.
14. Kasi lurombo lungatikhozga wuli kuti tilutilire kugomezgeka?
14 Usange ‘kukweŵeka kwa mtima withu kwaŵa kukuru,’ tingazgokera kwa Yehova na kumuŵeyelera, ndipo watisanguluskenge na kutikhozga. (Salmo 50:15; 94:19) Watipenge vinjeru ivyo tikukhumba kuti tilimbane na viyezgo na kutovwira kumanya kuti ŵateŵeti ŵake ŵakutinkhika kwambura mulandu cifukwa ca muwuso wake. (Yakobe 1:5) Yehova wangatipaso “mtende wa Ciuta, uwo ukuzungura kuwamo kose.” (Ŵafilipi 4:6, 7) Mtende uwo Ciuta watipa ukutovwira kuti tileke kukayika nesi kopa, kweni kuti tiŵe ŵakungangamika para tili mu suzgo. Na mzimu wake, Yehova wangatovwira mu cilicose ico wazomerezga kuti citiwire.—1 Ŵakorinte 10:13.
15. Nchivici cingatovwira kuti tileke kukwiya para tikusuzgika?
15 Nchivici cingatovwira kuti tileke kufingira awo ŵakutitinkha kwambura cifukwa? Kumbukani kuti ŵalwani ŵithu ŵakuru ni Satana na viŵanda. (Ŵaefeso 6:12) Uku ŵanthu ŵanyake ŵakutinyozera dala, kweni ŵanandi awo ŵakunyoza ŵanthu ŵa Ciuta ŵakucitira mu ulemwa panji ŵakupusikika na ŵanyawo. (Daniel 6:4-16; 1 Timote 1:12, 13) Yehova wakukhumba kuti “ŵanthu wose” ŵaŵe na mwaŵi wa ‘kuzakaponoskeka, na kufikapo pa kumanya unenesko.’ (1 Timote 2:4) Inya, ŵanandi awo kale ŵakatinyozanga sono mbabali ŵithu, cifukwa ca kuwona mikhaliro yithu yiwemi. (1 Petros 2:12) Kweniso, tingasambirapo kanthu kufuma kwa Yosefe mwana Yakobe. Nangauli Yosefe wakakomwa comene cifukwa ca ŵakulu ŵake, iyo wakaŵafingira yayi. Cifukwa? Cifukwa wakamanya kuti Yehova wakanjilirapo pa nkhani iyi, na kunozga vyose mwakuti wafiske cilato Cake. (Genesis 45:4-8) Mwakuyana waka, Yehova wangazomerezga kuti tikomwe kwambura mulandu mwakuti zina lake licindikike.—1 Petros 4:16.
16, 17. Cifukwa wuli tingafipanga mtima comene yayi para ŵanthu ŵakunyoza ŵakujandizga nchito yithu ya kupharazga?
16 Tingafipanga mtima comene yayi para nyengo zinyake awo ŵakutinyoza ŵakuwoneka ngati ŵakutonda pakukanizga kupharazgika kwa makani ghawemi. Na nchito ya kupharazga pa caru cose, Yehova wakusunkhunya mitundu, ndipo vyuma vikunjira mu nyumba yake. (Hagai 2:7) Khristu Yesu, Muliska Muwemi, wakati: “Mberere zane zikupulika mazgu ghane, ndipo ine nkhuzimanya, ndipo zikundilondezga; nkhuzipa umoyo wamuyirayira: . . . ndipo palive munthu wati wazikwapulenge mu woko lane.” (Yohane 10:27-29) Ŵangelo nawo ŵakucitako nchito yikuru iyi ya kuvuna mwauzimu. (Mateyu 13:39, 41; Civumbuzi 14:6, 7) Ntheura, palije ico ŵanthu ŵakunyoza ŵangayowoya panji kucita ico cingatondeska khumbo la Ciuta.—Yesaya 54:17; Milimo 5:38, 39.
17 Kanandi ivyo ŵanthu ŵakunyoza ŵakucita vikuŵawelera ŵekha. Mu cikaya cinyake kuno ku Africa, ŵanthu ŵakateta utesi kuti Ŵakaboni ŵa Yehova ŵakusopa Dyabulosi. Pa cifukwa ici, nyengo yiliyose para wawona Ŵakaboni ŵakwiza ku nyumba yake, Grace wakabisamanga kuseri mupaka ŵalute. Zuŵa linyake, muliska wa chalichi lake wakalongora limoza mwa mabuku ghithu na kuphalira wose awo ŵakaŵapo kuti ŵangaliŵazganga yayi cifukwa lingaŵatayiska cipulikano cawo. Ici cikamupangiska Grace kukhumba kumanya cifukwa cake. Ŵakaboni ŵakati ŵiza ulendo unyake, m’malo mwakubisama, wakamba kudumbiskana nawo ndipo wakapokera buku lake na lake. Ŵakambapo sambiro la Baibolo, ndipo mu 1996 wakabapatizika. Pa nyengo yasono, Grace wakumalira nyengo yake kupenja ŵanyake awo mutepanji ŵakapusikika pakuyowoya za Ŵakaboni ŵa Yehova.
Khozgani Cipulikano Cinu Sono
18. Cifukwa wuli nchakwenelera kuti tikhozge cipulikano cithu pambere viyezgo vindize, ndipo tingacita wuli?
18 Pakuti Satana wangatiwukira nyengo yiliyose kwambura cifukwa, nchakuzirwa kuti tikhozge cipulikano cithu sono nthena. Kasi tingacikhozga wuli? Lipoti lakufuma ku caru cinyake uko Ŵakaboni ŵa Yehova ŵakanyozekanga likuti: “Cinthu cimoza camanyikwa: Awo ŵakutemwa vinthu vyauzimu ndipo ŵakuwukora makora unenesko wa mu Baibolo, ŵakukhwima comene para viyezgo vyafika. Kweni awo mu ‘nyengo ziwemi’ ŵakukhala ku maungano, ŵakucita uteŵeti wa m’munda mwa apa na apo, ndiposo ŵakuthera mu tunthu tucoko, kanandi ŵakukaŵa yayi kuwa para ŵasangana na ciyezgo ‘cakofya.’” (2 Timote 4:2) Usange mukuwona kuti pa cigaŵa cinyake pakukhumba kunozgeka, limbikirani kucita ntheura kwambura kucedwa.—Salmo 119:60.
19. Kasi cikulongoraci usange ŵateŵeti ŵa Ciuta ŵakuŵa ŵakugomezgeka para ŵakutinkhika?
19 Usange ŵasopi ŵaunenesko ŵakuŵa ŵakugomezgeka para ŵakutinkhika na Satana, cikulongora kuti muwuso wa Yehova nguwemi, ngwakwenelera, ndiposo ngwaurunji. Ciuta wakusekelera mu mtima cifukwa ca kugomezgeka kwawo. Nangauli ŵanthu ŵakuŵacitira misinjiro, kweni uyo ngwakukwezgeka kucanya na pasi “wali nawo na soni cara kucemeka Ciuta wawo.” Inya nadi, kuyana na ŵakugomezgeka wose aŵa, tingati: “Caru kuti cikaŵenelera cara.”—Ŵahebere 11:16, 38.
[Mazgu ghamusi]
a Mu Malemba, lizgu lakuti “kutinkha” likung’anamura vinandi comene. Nyengo zinyake likung’anamura kutemwa pacoko waka. (Duteronome 21:15, 16) “Kutinkha” kungang’anamuraso kuseluka na cinthu cinyake kweni kuti ukukhumba kucinanga yayi, m’malo mwake ukucigega cifukwa cakuti nchakuseluska. Ndipouli, lizgu lakuti “kutinkha” lingang’anamuraso kususka kuheni, na kuŵinya mtima cifukwa ca bina. Ng’anamuro ili la lizgu lakuti kutinkha ndilo tidumbiskanenge mu nkhani yino.
Kasi Mungalongosora?
• Cifukwa wuli ŵasopi ŵaunenesko ŵakutinkhika kwambura mulandu?
• Kasi Satana wakayowoya mazgu wuli kuti watondeske kugomezgeka kwa Yobu na Yesu?
• Kasi Yehova wakutikhozga wuli kuti tikhomezge para tikutinkhika na Satana?
[Mafumbo]
[Bokosi/Cithuzithuzi pa peji 12]
Ŵakamanya Nkhani Yeneko
Ku Ukraine, uko nchito ya kupharazga Ufumu yikakanizgika kwa vilimika vyakujumpha 50, Kaboni yumoza wa Yehova wakati: “Tileke kuwona kusuzgika kwa Ŵakaboni ŵa Yehova kuti ni khumbo la ŵanthu. . . . Maofesala ghanandi ghakacitanga waka nchito yawo. Boma likati lasintha, nawoso ŵakasintha, kweni ise tikasintha yayi. Tikamanya kuti uyo wakutisuzga wavumbukwa mu Baibolo.
“Tikajiwonanga ngati tikukomwa waka cifukwa ca ŵanthu ŵankhaza yayi. Ico cikatovwira kuti tizizipizge ndico kupulikiska makora nkhani iyo yikambika mu munda wa Edeni—nkhani ya wenelero wa Ciuta wa kuwusa. . . . Tikakhozgera nkhani iyo yikukhwaska ŵanthu pera cara, kweniso Fumu ya cilengiwa cose. Tikapulikiska makora comene nkhani yeneko iyo yilipo. Ici cikatikhozga ndipo cikatovwiranga kuti tigomezgeke nanga ni para vinthu vyafika pakofya.”
[Cithuzithuzi]
Victor Popovych, wakakakika mu 1970
[Cithuzithuzi pa peji 9]
Ni njani uyo wakacitiska kuti Yesu watambuzgike?
[Cithuzithuzi pa peji 11]
Yobu, Mariya, na ŵateŵeti ŵa Ciuta lero, nga ni Stanley Jones, ŵakhozgera muwuso wa Yehova