Yehova Ni ‘Linga Lithu mu Nyengo ya Suzgo’
Yehova Ni ‘Linga Lithu mu Nyengo ya Suzgo’
“Ciponosko ca ŵarunji cikufuma kwa Yehova; ndiye linga lawo mu nyengo ya suzgo.”—SALMO 37:39.
1, 2. (a) Kasi Yesu wakaŵapemphelera vici ŵasambiri ŵake? (b) Kasi khumbo la Ciuta ndakuti wuli kuyana na ŵanthu ŵake?
YEHOVA wali na nkhongono zikuru kwakuluska. Wali na nkhongono za kuvikilira ŵateŵeti ŵake ŵakugomezgeka umo wakhumbira. Waliso na nkhongono za kupatura ŵanthu ŵake na kukaŵaŵika ku malo ghanyake ghawemi na ghamtende. Ndipouli, Yesu wakaŵapemphelera ŵasambiri ŵake kwa Awiske ŵakucanya, wakati: “Nkhuromba . . . kuti muŵafumyemo mu caru [cara], kweni kuti muŵasungilire ku muheni.”—Yohane 17:15.
2 Yehova wawona kuti nchiwemi kuleka ‘kutifumyamo mu caru.’ Ni khumbo lake kuti tikhale pamoza na ŵanthu wose mu caru mwakuti tipharazge uthenga wake wa cipulikano na cipembuzgo kwa iwo. (Ŵaroma 10:13-15) Kweni nga umo Yesu wakayowoyera mu lurombo, pakuti tikukhala mu caru, “muheni” wali nase nipera. Masuzgo ghakucitika cifukwa ca ŵanthu ŵamtonyolo kweniso mizimu yiheni, Ŵakhristu nawo ŵakukomwa.—1 Petros 5:9.
3. Kasi ŵateŵeti ŵakugomezgeka ŵa Yehova ŵangakomwa na vici, kweni Mazgu gha Ciuta ghakutipembuzga wuli?
3 Kanandi para tikuyezgeka nkhongono zikuguluruka. (Zintharika 24:10) Baibolo liri na nkhani zinandi za ŵanthu ŵakugomezgeka awo masuzgo ghakaŵawira. Wamasalmo wakati: “Viphyo vya murunji ni vinandi, kweni Yehova wakumusutula ku vyose.” (Salmo 34:19) Enya, masuzgo ghakuwira na munthu “murunji” wuwo. Umo Davide wakajipulikira, nyengo zinyake nase ‘tingarombotoka na kuteketeka comene.’ (Salmo 38:8) Ndipo mbu, tikupembuzgika pakumanya kuti “Yehova wali pafupi na awo mbakuphyoka mu mtima, ndipo wakuponoska awo mbamzimu [wakuteketeka, NW].”—Salmo 34:18; 94:19.
4, 5. (a) Kuyana na Zintharika 18:10, kasi tikwenera kucitaci kuti Ciuta wativikilire? (b) Ni vinthu mbu ivyo tikwenera kucita kuti Ciuta watovwire?
4 Kuyana na ivyo Yesu wakaromba, Yehova wakutisungilira nadi. Iyo ni “linga [lithu] mu nyengo ya suzgo.” (Salmo 37:39) Buku la Zintharika nalo likuyowoya mwakuyana waka, likuti: “Zina la Yehova ndi cigongwe cakukhora, murunji wakucimbilira kwenekuko na kuphokwa.” (Zintharika 18:10) Lemba ili likuvumbura kuti Yehova wakupwelelera nadi vilengiwa vyake. Ciuta wakuvikilira ŵarunji awo ŵakumupenja, nga ni para ŵakucimbilira ku cigongwe cakukhora kuti ŵabisame.
5 Kasi tingacimbilira wuli kwa Yehova kuti tibisame para masuzgo ghatifyenya? Tiyeni tiwone vinthu vyakuzirwa vitatu ivyo tingacita kuti Yehova watovwire. Cakwamba, tikwenera kuromba kwa Dada withu wakucanya. Caciŵiri, tikwenera kucita mwakukolerana na mzimu wake utuŵa. Ndipo cacitatu, tikwenera kupulikira ivyo Yehova wakuyowoya kuti tiwunganenge pamoza na Ŵakhristu ŵanyithu awo ŵangacepeskako kuŵinya kwa suzgo yithu.
Nkhongono ya Lurombo
6. Kasi Ŵakhristu ŵanadi ŵakuwona lurombo kuti ni vici?
6 Ŵadokotara ŵakuti lurombo ndwakovwira kwa munthu uyo waphyoka na maghanoghano. Uku mbunenesko kuti maghanoghano ghangacepako usange munthu wakhala pa malo gha yii, ndimo vingaŵiraso para wakupulika tumazgu twakunozga twa vilengiwa kweniso kumunyenyenkha pa msana. Ŵakhristu ŵanadi ŵakudelera yayi lurombo, nesi kuluwona nga ni munkhwara wakutuniska waka suzgo. Kweni tikuluwona kuti ni nthowa yakuzirwa yakuyowoyera na Mlengi. Lurombo lukusazgapo kusopa na kuthemba Ciuta. Enya, para tikuromba ndikuti tikusopa.
7. Kasi cikung’anamuraci kuromba na cikanga, ndipo kungatovwira wuli kuti tizizipizge masuzgo?
7 Tikwenera kuŵa na cikanga kweniso kugomezga Yehova para tikuromba. Mpositole Yohane wakalemba kuti: “Ici nchikanga ico tili naco panthazi pake, cakuti usange tikuromba kanthu kwakuyana na khumbo lake, wakutipulika.” (1 Yohane 5:14) Yehova, ni Mukuru, waunenesko yekha na wankhongono, wakutegherezga malurombo gha ŵateŵeti ŵake. Nchakupembuzga nadi kumanya kuti Ciuta withu wakupulika para tikumuthulira maghanoghano na masuzgo ghithu.—Ŵafilipi 4:6.
8. Para Ŵakhristu ŵakugomezgeka ŵakuromba kwa Yehova, cifukwa wuli ŵakwenera kuŵa na soni yayi, nesi kujiwona nga mbawakawaka?
8 Ŵakhristu ŵakugomezgeka ŵangaŵanga na soni yayi, nesi kujiwona nga mbawakawaka, panji kuŵa na wofi pakuromba kwa Yehova. Mbunenesko kuti para takhuŵara panji masuzgo ghatifyenya, tingamba kughanaghana kuti tileke waka kuromba kwa Yehova. Kweni tikwenera kukumbuka kuti Yehova ‘wali na lusungu pa ŵakusuzgika ŵake’ ndipo “wakusanguluska ŵakuyuyulika.” (Yesaya 49:13; 2 Ŵakorinte 7:6) Mu visuzgo ndiyo nyengo yiwemi yakuti tirombenge na cikanga kwa Dada withu wakucanya pakuti ni linga lithu.
9. Kasi cipulikano cikugwira nchito wuli para tikuromba kwa Ciuta?
9 Kuti tovwirike mwakukwana na cawanangwa ca lurombo, tikwenera kuŵa na cipulikano. Baibolo likuti ‘uyo wakusendelera kwa Ciuta wakwenera kupulikana kuti waliko, ndipo kuti [wakupeleka njombe, NW] kwa awo ŵakumupenja.’ (Ŵahebere 11:6) Cipulikano cikusazgapo vinandi kuluska kugomezga waka “kuti [Ciuta] waliko.” Cipulikano canadi cikusazgapo kugomezga nkhanira fikepo kuti Ciuta wakumanya ndipo wakukhumba kutipa njombe para timupulikirenge mu vinthu vyose. “Maso gha Fumu [Yehova] ghali pa ŵarunji, ndipo makutu ghake ghakutegherezga kuŵeya kwawo.” (1 Petros 3:12) Kumanya kuti Yehova wakutighanaghanira kukovwira kuti malurombo ghithu ghaŵe ghanadi.
10. Usange tikukhumba kuti Yehova watovwire, kasi malurombo ghithu ghakwenera kuŵa wuli?
10 Yehova wakuzgora para tikumuromba na mtima wose. Wamasalmo wakimba kuti: “Na mtima wane wose nkhulira; ndizgorani, A Yehova!” (Salmo 119:145) Malurombo ghithu ghakupambana na gha visopo vinandi, ghithu ghakuŵa gha dango waka yayi, nesi gha pamlomo pera. Para tikuromba Yehova na ‘mtima withu wose,’ tikumanya ivyo tikuromba na ivyo tikukhumba. Usange tikuromba kufumira mu mtima, tiwonenge kuti tikupepuka cifukwa tamuthulira ‘katundu withu Yehova.’ Baibolo likulayizga kuti ‘watifighilirenge’—enya, watovwirenge.—Salmo 55:22; 1 Petros 5:6, 7.
Mzimu wa Ciuta Ukutovwira
11. Kasi Yehova wakutizgora wuli para ‘tikuromba’ kuti watovwire?
11 Yehova wakupulika waka yayi malurombo ghithu, kweni wakuzgora. (Salmo 65:2) Davide wakalemba kuti: “Mu zuŵa la suzgo lane nkhumucemani, cifukwa mukundizgora.” (Salmo 86:7) Yesu nayo wakaphalira ŵasambiri ŵake kuti ‘ŵarombenge’ kwa Yehova kuti waŵawovwire, pakuti ‘Dada wakucanya wakupeleka mzimu utuŵa kwa awo ŵakumuromba.’ (Luka 11:9-13) Enya, mzimu wa Ciuta ukovwira na kusanguluska ŵanthu ŵake.—Yohane 14:16.
12. Kasi mzimu wa Ciuta ungatovwira wuli para masuzgo ngakuru?
12 Nanga ni para tili mu viyezgo, mzimu wa Ciuta ungatipa ‘nkhongono zakuluska.’ (2 Ŵakorinte 4:7) Mpositole Paulosi uyo wakakhomezga visuzgo vinandi, wakayowoya na nkhongono zose kuti: “Ndingamanya kucita vyose mwa mweneuyo wakundikhomeska.” (Ŵafilipi 4:13) Ndimo viliri na lero wuwo, Ŵakhristu ŵanandi ŵawona kuti nkhongono zauzimu zaweleramo pamanyuma pakuti ŵazgoreka maŵeyelero ghawo. Kanandi para mzimu wa Ciuta watovwira, masuzgo ghakupepukako. Cifukwa ca nkhongono izo Ciuta wakutipa, tingayowoya nga umo mpositole Paulosi wakayowoyera kuti: “Kosekose tikuzingizgika, kweni kuti tikufinyirizgika cara; tikuzizikika, kweni . . . kuwa nkhumbi cara; tikuzikizgika, kweni kuti tikusidika cara; tikutitimizgikira pasi, kweni kuti tikuparanyika cara.”—2 Ŵakorinte 4:8, 9.
13, 14. (a) Kwizira mu Mazgu ghake, kasi Yehova walongora wuli kuti ni linga lithu? (b) Kasi kupulikira ivyo Baibolo likuyowoya kwamovwirani wuli imwe?
13 Mzimu utuŵa ukagwiraso nchito yikuru pakulemba na kusunga Mazgu gha Ciuta mwakuti ghatovwire. Kwizira mu Mazgu ghake, kasi Yehova waŵa wuli linga lithu mu nyengo ya suzgo? Nthowa yimoza ndiyo kutipa vinjeru na mahara. (Zintharika 3:21-24) Baibolo likutisambizga kuti tighanaghanenge mwamahara. (Ŵaroma 12:1) Usange tiŵazgenge na kusambira Mazgu gha Ciuta, na kulondezga ivyo tikusambira, mbwenu ‘tizoŵezgenge kamanyiro kithu kuti tipatule uwemi na uheni.’ (Ŵahebere 5:14) Panji namwe mwajiwonera kuti fundo za mu Baibolo zikamovwirani kucita mwamahara apo masuzgo ghakamufyenyani. Baibolo likutipa vinjeru ivyo vingatovwira kumazga makora masuzgo.—Zintharika 1:4.
14 Mazgu gha Ciuta ghakutipaso cinthu cinyake ico cikupeleka nkhongono, ici ni cigomezgo ca ciponosko. (Ŵaroma 15:4) Baibolo likutiphalira kuti viheni vikhalilirenge muyirayira yayi. Suzgo yiliyose iyo tikukomwa nayo nja kanyengo. (2 Ŵakorinte 4:16-18) Tili na ‘cigomezgo ca umoyo wamuyirayira, weneuwo Ciuta, uyo walije kumanya kuteta, wakalayizga kale, . . . zindayambe nyengo za ciyamwaka.’ (Tito 1:2) Usange tikukondwa na cigomezgo ici, uku tikukumbuka viwemi ivyo Yehova walayizga, mbwenu tikhomezgenge visuzgo.—Ŵaroma 12:12; 1 Ŵatesalonika 1:3.
Mpingo—Cilongolero ca Citemwa ca Ciuta
15. Kasi Ŵakhristu ŵangawovwirana wuli?
15 Cawanangwa cinyake ico Yehova watipa kuti citovwire mu nyengo ya visuzgo ni ubwezi uwemi uwo ukuŵa mu mpingo Wacikhristu. Baibolo likuti: “Mwanase wakutemwa nyengo zose, ndipo mwanamunyako wakubabiwira kovwira mu suzgo.” (Zintharika 17:17) Mazgu gha Ciuta ghakuciska wose mu mpingo kuti ŵatemwanenge na kucindikana. (Ŵaroma 12:10) Mpositole Paulosi wakalemba kuti: “Paŵavye munthu wajipenjere ico ncha yekha, kweni [na] ca munyake.” (1 Ŵakorinte 10:24) Mtima uwu utovwirenge kuti tighanaghanirenge ŵanyithu m’malo mwa kufipira mtima viyezgo vithu pera. Para tikovwira ŵanyithu, tikuŵa na cimwemwe ico cikupepuskako masuzgo ghithu.—Milimo 20:35.
16. Kasi Mkhristu waliyose wangakhwimiska wuli ŵanyake?
16 Ŵanalume na ŵanakazi ŵakukhwima mwauzimu ŵangacita nchito yikuru kuti ŵakhwimiske ŵanyawo. Kuti ŵacite ici, iwo ŵeneko ŵakwenera kuŵa ŵamasangulusko na ŵakufwatuka. (2 Ŵakorinte 6:11-13) Mpingo ukupindula comene usange wose ŵakulumba ŵana ŵacoko, kukhozga awo ŵakusambira sono unenesko, na kusanguluska awo mbakusweka mtima. (Ŵaroma 15:7) Kutemwa ŵabali kutovwirenge kuŵambara mzimu wa kukayikirana. Tileke kweruzga luŵiro kuti masuzgo gha munthu nchimanyikwiro cakuti ni mulwari kuuzimu. Lekani Paulosi wakuciska Ŵakhristu kuti ‘ŵakhwimiskenge ŵakudonda mtima.’ (1 Ŵatesalonika 5:14) Baibolo likulongora kuti nanga Mbakhristu ŵakugomezgeka nawo masuzgo ghakuŵawira.—Milimo 14:15.
17. Kasi tili na mwaŵi wuli wakuti tikhozge ŵabali Ŵacikhristu?
17 Maungano Ghacikhristu ghakupeleka mwaŵi wa kusanguluskana na kukhuŵirizgana. (Ŵahebere 10:24, 25) Mpha maungano gha mpingo pera yayi apo pakuŵa kucezga kwacitemwa. Ŵanthu ŵa Ciuta ŵakuŵaso na nyengo yakuseŵelera na yakucezgera. Para visuzgo vyacitika, ticedwenge yayi kovwirana cifukwa tapanga kale ubwezi wambura kudumuka. Mpositole Paulosi wakalemba kuti: “Muŵavye swekano mu thupi; kweni . . . viŵaro vipwelerane . . . Ndipo usange ciŵaro cimoza cikupwetekeka, viŵaro vyose vikupwetekeka naco pamoza; panji ciŵaro cimoza cikucindikika, viŵaro vyose vikusekelera naco pamoza.”—1 Ŵakorinte 12:25, 26.
18. Ni maghanoghano wuli agho tikwenera kughacimbizga para takweŵeka mtima?
18 Cifukwa ca kukweŵeka mtima, nyengo zinyake tingaghanaghana kuti tileke waka kucezga na Ŵakhristu ŵanyithu. Tikwenera kughacimbizga maghanoghano agha mwakuti wovwiri na cisangulusko ivyo ŵanyithu ŵangatipa vileke kutipamba. Baibolo likucenjezga kuti: “Uyo wakujipatula wakupenja khumbo la yekha, ndipo wakugalukira vinjeru vyose.” (Zintharika 18:1) Ŵabali na ŵadumbu ŵithu mu mpingo nchilongolero cakuti Ciuta wakutitemwa. Usange tikumanya fundo iyi, tisanguluskikenge mu nyengo ya visuzgo.
Mujikhwimiskenge
19, 20. Kasi Malemba ghakutovwira wuli kukana maghanoghano ghakugongoweska?
19 Para munthu wali na citima, nchipusu kutaya mtima. Mwaciyelezgero, para masuzgo ghaŵafyenya, ŵanyake ŵangamba kughanaghana kuti panji ŵali kubuda cinthu cinyake, nakuti suzgo yawo nchimanyikwiro cakuti Ciuta waŵataya. Kweni kumbukani kuti Yehova wakuyezga munthu na “uheni” yayi. (Yakobe 1:13) Baibolo likuti: “[Ciuta] kuti wakusuzga panji kucitiska citima ŵana ŵa ŵanthu . . . cara.” (Citengero ca Yeremiya 3:33) M’malo mwake, citima cikumukora comene Yehova para ŵateŵeti ŵake ŵakukomwa.—Yesaya 63:8, 9; Zekariya 2:8.
20 Yehova ni ‘Dada walusungu, Ciuta wa cisangulusko cose.’ (2 Ŵakorinte 1:3) Wakutipwelelera, nakuti wazamutikwezga mu nyengo yakwenelera. (1 Petros 5:6, 7) Nyengo zose kumanya kuti Ciuta wakutitemwa kutovwirenge kuti tijikhwimiskenge na kukondwera. Yakobe wakati: “Mupime kuti nchimwemwe pera, mwa ŵabali ŵane, para mukuwa mu viyezgo vyakupambanapambana.” (Yakobe 1:2) Cifukwa? Wakazgora kuti: “Pakuti para walumbika, wati wapokere mphumphu ya umoyo, yeneiyo Fumu yikalayizga kuŵapa awo ŵakuyitemwa.”—Yakobe 1:12.
21. Nangauli tingakomwa na masuzgo, kweni Ciuta wakulayizga vici kwa awo mbakugomezgeka kwa iyo?
21 Kuyana na umo Yesu wakacenjezgera, suzgo tiŵenge nayo nipera mu caru. (Yohane 16:33) Kweni Baibolo likulayizga kuti ‘suzgo, urwirwi, kuzikizgika, njara, nkhuli, panji ulwani’ vingatipatura yayi ku citemwa ca Yehova na ca Mwana wake. (Ŵaroma 8:35, 39) Tikupembuzgika kumanya kuti suzgo iyo yikutiwira nja kanyengo. Pa nyengo yasono, apo tikulindilira kuti visuzgo vizakamare, Yehova, Dada withu wakutemwa, wakutisungilira. Usange tikucimbilira kwa iyo kuti tibisame, iyo waŵenge ‘cigongwe ca ŵakuyuzgika, [na] cigongwe mu nyengo ya suzgo.’—Salmo 9:9.
Kasi Tasambira Vici?
• Ni vici ivyo vingawira Ŵakhristu mu caru ciheni ici?
• Kasi malurombo ghithu ghangatikhozga wuli para tikuyezgeka?
• Kasi mzimu wa Ciuta ukovwira wuli?
• Kasi tingacita wuli kuti tovwiranenge?
[Mafumbo]
[Cithuzithuzi pa peji 15]
Tikwenera kupenja Yehova nga ni para tikucimbilira ku cigongwe
[Cithuzithuzi pa peji 16]
Ŵakhristu ŵakukhwima mwauzimu ŵakupenja mupata wakuti ŵalumbe na kusanguluska ŵanyawo