Ŵateŵeti ŵa Yehova Mbacimwemwe
Ŵateŵeti ŵa Yehova Mbacimwemwe
“Mbamwaŵi [mbacimwemwe] ŵakavu mu mzimu.”—MATEYU 5:3.
1. Kasi cimwemwe ceneko cikung’anamuraci, ndipo cikulongoraci?
ŴANTHU ŵa Yehova ŵakuwona kuti cimwemwe nchakuzirwa comene. Wamasalmo Davide wakati: “Mbamwaŵi [mbacimwemwe] awo Ciuta wawo ndi Yehova!” (Salmo 144:15) Cimwemwe cikung’anamura kusangwa mu mtima. Tikuŵa na cimwemwe ceneko mu mtima, cifukwa ca kumanya kuti Yehova wakutitumbika. (Zintharika 10:22) Cimwemwe ici cikulongora kuti tili paubwezi uwemi na Dada withu wakucanya kweniso cifukwa ca kumanya kuti tikucita khumbo lake. (Salmo 112:1; 119:1, 2) Wonani kuti Yesu wakazunura vifukwa vinkhondi na vinayi ivyo tingaŵira ŵacimwemwe. Kuwona vifukwa ivi mu nkhani iyi na yakulondezgapo, kutovwirenge kuti timanye umo tingaŵira ŵacimwemwe pakuteŵetera Yehova, ‘Ciuta wacimwemwe.’—1 Timote 1:11, NW.
Kumanya Ukavu Withu Wauzimu
2. Mphauli apo Yesu wakayowoya za cimwemwe, ndipo wakamba na mazgu wuli?
2 Mu 31 C.E., Yesu wakayowoya nkhani yakumanyikwa comene kuluska zose. Uwu ni Upharazgi wa pa Phiri cifukwa ukacitikira musi mu Phiri pafupi na Nyanja ya Galileya. Uthenga wa Mateyu ukuti: ‘[Yesu] pakuti wawone mizinda, wakakwelera mu lupiri: ndipo wakati wakhala pasi, ŵasambiri ŵake ŵakiza kwa iyo: ndipo wakabanula mlomo wake, wakaŵasambizga, wakati, Mbacimwemwe ŵakavu mu mzimu: pakuti ngwawo ufumu wa kucanya.’—Mateyu 5:1-3.
3. Kasi kujicepeska kukovwira wuli kuti tiŵe ŵacimwemwe?
3 Apo wakaphalazgiranga ŵanthu pa Phiri, Yesu wakalongora kuti munthu wakuŵa wacimwemwe usange wakumanya kuti wakukhumba kanthu kanyake mu umoyo wake wauzimu. Ŵakhristu awo mbakujicepeska, pakumanya kuti mbakwananga, ŵakupempha Yehova kuti waŵagowokere cifukwa ca sembe ya Khristu. (1 Yohane 1:9) Apo ndipo ŵakuŵa na mtende mu mtima, na cimwemwe ceneko. ‘Ngwacimwemwe uyo majuvyo ghake ghagowokereka ndipo kwananga kwake kwawundika.’—Salmo 32:1; 119:165.
4. (a) Kasi tingalongora wuli kuti tikukhumba kanthu kanyake mu umoyo withu wauzimu kweniso wa ŵanyithu? (b) Kasi tikuŵa ŵacimwemwe comene cifukwa ca vici apo tikumanya ukavu withu wauzimu?
4 Pakuti tikumanya kuti tikukhumba kanthu kanyake mu umoyo withu wauzimu, lekani tikuŵazga Baibolo dazi lililose, kurya mwakukwana cakurya ico “muzga wa magomezgeko na wa vinjeru” wakunozga pa “nyengo yakwenelera.” Kweniso tikuluta ku maungano Ghacikhristu nyengo zose. (Mateyu 24:45; Salmo 1:1, 2; 119:111; Ŵahebere 10:25) Cifukwa cakuti tikutemwa ŵanyithu, tikumanya kuti nawo ŵakukhumba kanthu kanyake mu umoyo wawo wauzimu, lekani tikufukafuka kuti tiŵasambizge na kuŵaphalazgira makani ghawemi gha Ufumu. (Marko 13:10; Ŵaroma 1:14-16) Tikuŵa ŵacimwemwe para tikupharazga unenesko wa mu Baibolo ku ŵanyithu. (Milimo 20:20, 35) Tikuŵaso ŵacimwemwe comene para tikughanaghanira vinthu viwemi ivyo Ufumu wizenge navyo. Ŵa “kamskambo kacoko,” awo Mbakhristu ŵakuphakazgika, ŵakulindilira umoyo wamuyirayira kucanya mu Ufumu wa Khristu. (Luka 12:32; 1 Ŵakorinte 15:50, 54) Awo ni “mberere zinyake” ŵakulindilira umoyo wamuyirayira mu paradiso pa caru capasi mu Ufumu uwu.—Yohane 10:16; Salmo 37:11; Mateyu 25:34, 46.
Umo Ŵakutengera Ŵangakondwera
5. (a) Kasi mazgu ghakuti “awo ŵakutengera” ghakung’anamuraci? (b) Kasi awo ŵakutengera ŵakupembuzgika wuli?
5 Mazgu ghanyake agho Yesu wakayowoya pa nkhani ya cimwemwe ghakuŵa nga kuti ghakupulikikwa yayi. Wakati: ‘Mbacimwemwe awo ŵakutengera: pakuti ndiwo ŵati ŵasanguluskikenge.’ (Mateyu 5:4) Kasi munthu wangakondwa wuli uku wakutengera? Kuti tipulikiske ivyo Yesu wakang’anamuranga, ipo timanye dankha citengero ico wakanenanga. Musambiri Yakobe wakuti nchakupulikikwa kulira cifukwa tili ŵanthu ŵakwananga. Wakalemba kuti: “Tozgani mawoko ghinu, mwa ŵakwananga; photorani mitima yinu, imwe mwa ŵa mitima yiŵiri. Musuzgike, ndipo mutengere, ndipo mulire masozi: seko zinu zizgoke kutengera, ndipo cimwemwe cinu cizgoke citima. Jiyuyurani pamaso pa Fumu [Yehova], ndipo yiti yimukuzganinge.” (Yakobe 4:8-10) Awo mbacitima nadi cifukwa cakuti mbakwananga ŵakupembuzgika para ŵamanya kuti zakwananga zawo zingagowokereka usange ŵali na cipulikano mu sembe ya Khristu na kulapa, na kucita khumbo la Yehova. (Yohane 3:16; 2 Ŵakorinte 7:9, 10) Apo ndipo ŵakuŵa paubwezi uwemi na Yehova na kulindilira kuzakamuteŵetera na kumulumba muyirayira swii. Pakumanya fundo iyi, ŵakukondwa comene mu mtima wawo.—Ŵaroma 4:7, 8.
6. Kasi ŵanyake ŵakulira mu nthowa wuli, ndipo ŵakupembuzgika wuli?
6 Mazgu gha Yesu ghakusazgaposo awo ŵakulira cifukwa ca viheni ivyo vyandana mu caru. Yesu wakalongosora kuti ucimi wa pa Yesaya 61:1, 2 ukunena iyo. Ucimi uwu ukuti: “Mzimu wa Yehova uli pa ine, cifukwa Yehova wandiphakazga kupharazga makani ghawemi ku ŵakuzika; wandituma kuyakakurunga ŵakuphyoka mtima, . . . kusanguluska wose awo ŵakutengera.” Nchito iyi ndiyo ŵakucita Ŵakhristu ŵakuphakazgika awo ŵacali pano pasi mwakovwirika na “mberere zinyake.” Wose ŵakuŵa ngati ŵakucita nchito ya kulemba cimanyikwiro pa visko vya “ŵanthu awo ŵakucinchima na kulira cifukwa ca maunyankhasi ghose agho ghakucitika mukati mwake [Yerusalemu wakugaruka, uyo wakuyimira Cikhristu cautesi].” (Ezekiel 9:4) Ŵanthu aŵa ŵakupembuzgika na “makani ghawemi . . . gha Ufumu.” (Mateyu 24:14) Iwo mbakukondwa kumanya kuti caru ciheni ca Satana cimarenge sonosono apa ndipo caru ca Yehova caurunji cizenge.
Mbacimwemwe Ŵakuzika
7. Kasi lizgu lakuti kuzika likung’anamuraci?
7 Yesu wakalutilira kuphalazgira ŵanthu pa Phiri, wakati: ‘Mbacimwemwe ŵakuzika: pakuti ndiwo ŵati ŵaharenge caru.’ (Mateyu 5:5) Para munthu ngwakuzika, kanandi ŵanthu ŵakuti ngwatulo. Kweni ndimo viliri yayi. Pakulongosora ivyo lizgu lakuti “kuzika” likung’anamura, munthu munyake wakusanda Baibolo wakuti: “Cikuru comene mwa munthu uyo ngwakuzika nchakuti wakumanya kujikora. Cikung’anamura kuti munthu ngwakupusa yayi, panji wakuzomera vilivyose, nesi wakugotomara. Kweni cikung’anamura kuti wakuwezgako nkhongono zake.” Pakulongosora za iyo mweneko, Yesu wakati: “Ndine wakuzika na wakujipepura mu mtima.” (Mateyu 11:29) Ndipo mbu, Yesu wakaŵa wacikanga pakuyowoya visambizgo vyaurunji.—Mateyu 21:12, 13; 23:13-33.
8. Kasi kuzika kukwendezgana na vici, ndipo cifukwa wuli tikwenera kuŵa na mukhaliro uwu pakukhala na ŵanyithu?
8 Kuzika kukwendezgana na kujikora. Apo Paulosi wakazunuranga “vipambi vya mzimu,” kuzika na kujikora vili kulondezgana. (Ŵagalatiya 5:22, 23) Nkhongono ya mzimu utuŵa ndiyo yikutovwira kuti tiŵe ŵakuzika. Ni mukhaliro wa Ŵakhristu uwo ukovwira kuti ŵakhale makora na ŵanthu ŵambura cipulikano kweniso ŵanyawo mu mpingo. Paulosi wakalemba kuti: “Vwarani mtima wa cisungusungu, wezi, kujiyuyura, kuzika, kukunthirapo; pa kuzizipizgirana, na kugowokerana.”—Ŵakolose 3:12, 13.
9. (a) Cifukwa wuli tikulongora kuti tili ŵakuzika ku ŵanthu pera yayi? (b) Kasi ŵakuzika ‘ŵakuhara wuli caru’?
9 Tikwenera kuŵa ŵakuzika ku ŵanthu pera yayi. Para tikupulikira Yehova, ndikuti tikulongora kuti tili ŵakuzika. Yesu wakacita makora comene pa nkhani iyi apo wakaŵa pano pasi, wakalongora kuzika na kujilambika pakucita khumbo la Awiske. (Yohane 5:19, 30) Yesu wali kuhara caru, cifukwa ndiyo ni Fumu iyo yili kusankhika. (Salmo 2:6-8; Daniel 7:13, 14) Iyo wali kupokera ciharo ici pamoza na ‘ŵahaliri’ 144,000, ŵakufuma “mu ŵanthu” kuti ‘ŵawuse caru.’ (Ŵaroma 8:17; Civumbuzi 5:9, 10; 14:1, 3, 4; Daniel 7:27) Khristu na awo wazamuwusa nawo lumoza ŵazamulongozga ŵanthu ŵanandi, ŵanalume na ŵanakazi. Ndipo mazgu gha wamasalmo ghazamufiskika pa iwo: “Ŵakuzika ndiwo tiŵaharenge caru, tiŵakondwenge na kusakata comene.”—Salmo 37:11; Mateyu 25:33, 34, 46.
Mbacimwemwe Awo Ŵali na Njara ya Urunji
10. Kasi awo ŵakupulika njara na nyota ya urunji ŵangakhuta mu nthowa wuli?
10 Wacali pa Phiri la Galileya, Yesu wakayowoya cifukwa cinyake ico munthu wangaŵira wacimwemwe, wakati: ‘Mbacimwemwe awo ŵali na njara na nyota ya urunji: pakuti ŵati ŵakhutenge.’ (Mateyu 5:6) Yehova wali kupeleka muyeso wa urunji kwa Ŵakhristu. Ntheura, ŵanthu awo ŵakupulika njara na nyota ya urunji, ŵakuŵa nga kuti ŵali na njara na nyota yakuti ŵalongozgeke na Ciuta. Ŵanthu ŵanthena ŵakumanya zakwananga zawo ndipo ŵakunweka comene kuti ŵaŵe ŵatuŵa pamaso pa Yehova. Ŵakukondwa nkhanira para ŵasambira mu Baibolo kuti usange ŵalapa, na kuromba cigowokero mu sembe ya Khristu, ŵaŵenge ŵakwenelera pamaso pa Ciuta.—Milimo 2:38; 10:43; 13:38, 39; Ŵaroma 5:19.
11, 12. (a) Kasi Ŵakhristu ŵakuphakazgika ŵakurunjiskika wuli? (b) Kasi awo ŵakovwira Ŵakhristu ŵakuphakazgika nyota yawo ya urunji yikumara wuli?
11 Yesu wakati ŵanthu ŵanthena mbamwaŵi, panji mbacimwemwe, pakuti “ŵakhutenge.” (Mateyu 5:6) Ŵakhristu ŵakuphakazgika awo ‘ŵamuwusa’ na Khristu kucanya ŵali ‘kurunjiskika’ kale kuti ŵapokere umoyo. (Ŵaroma 5:1, 9, 16-18) Yehova wakuŵatora nga mbana ŵake ŵauzimu. Iwo mbahaliri ŵamoza na Khristu, ndipo ŵaŵenge mafumu na ŵasofi mu Ufumu wake kucanya.—Yohane 3:3; 1 Petros 2:9.
12 Awo ŵakovwirana na Ŵakhristu ŵakuphakazgika ŵacali ŵandarunjiskike kuti ŵapokere umoyo. Ndipouli, Yehova wakuŵawona kuti mbarunji pacoko waka cifukwa cakuti ŵali na cipulikano mu ndopa za Khristu. (Yakobe 2:22-25; Civumbuzi 7:9, 10) Yehova wakuŵawona kuti mbarunji ndiposo mbabwezi Ŵake, ŵeneawo ŵazamupona pa “cisuzgo cikuru.” (Civumbuzi 7:14) Nyota yawo ya urunji yizamumara apo ŵazamuwusika na “macanya ghaphya,” apo ŵazamuŵa mu caru ciphya mwenemumo ‘muzamukhala urunji.’—2 Petros 3:13; Salmo 37:29.
Mbacimwemwe Ŵalusungu
13, 14. Kasi tingalongora lusungu mu nthowa wuli, ndipo tipindulenge wuli?
13 Wacali kuphalazgira ŵanthu pa Phiri para, Yesu wakati: ‘Mbacimwemwe ŵalusungu: pakuti ndiwo ŵati ŵacitikirenge lusungu.’ (Mateyu 5:7) Pa mulandu, lusungu lukung’anamura kuti mweruzgi wacepeska cilango ca uyo wananga kuti waleke kupika cilango cikuru mwakuyana na dango. Ndipouli, mu Baibolo, lizgu la Cigiriki cakale lakuti “lusungu” comene likung’anamura kulengera citima ŵanthu awo mbakusuzgika. Ntheura, awo mbalusungu ŵakufipira mtima ŵanyawo. Ntharika ya Yesu ya Musamariya muwemi yikulongora makora munthu uyo ‘wakalengera lusungu’ munyake uyo wakasuzgika.—Luka 10:29-37.
14 Kuti tiŵe ŵacimwemwe cifukwa ca kulongora lusungu, tikwenera kucitira ŵanyithu awo mbakusuzgika milimo ya lusungu. (Ŵagalatiya 6:10) Yesu wakafipiranga mtima ŵanthu. “Wakaŵalengera lusungu, cifukwa ŵakaŵa nga ndi mberere zambura mliska; ndipo wakamba kuŵasambizga vinandi.” (Marko 6:34) Yesu wakamanya kuti umoyo wauzimu wa ŵanthu ndiwo ngwakuzirwa comene. Nase tingalongora kuti tili ŵalusungu para tikuŵaphalazgira “makani ghawemi . . . gha ufumu” agho ŵakughakhumba comene. (Mateyu 24:14) Kweniso tingawovwira Ŵakhristu ŵanyithu awo mbacekuru, vyokoro, na ŵalanda, na ‘kukhwimiska ŵakudonda mtima.’ (1 Ŵatesalonika 5:14; Zintharika 12:25; Yakobe 1:27) Tiŵenge ŵakukondwa para ticitenge nthena kweniso Yehova waticitirenge lusungu.—Milimo 20:35; Yakobe 2:13.
Ŵakutowa mu Mtima na Ŵamtende
15. Kasi tingaŵa wuli ŵakutowa mu mtima na ŵamtende?
15 Yesu wakayowoyaso cifukwa ca nambara 6 na 7 ico munthu wangaŵira wacimwemwe, wakati: ‘Mbacimwemwe ŵakutowa mu mtima: pakuti ndiwo ŵati ŵawonenge Ciuta. Mbacimwemwe awo ŵakutuniska [ŵamtende]: pakuti ŵati ŵacemekenge ŵana ŵa Ciuta.’ (Mateyu 5:8, 9) Mtima wakutowa ni uwo ukutemwa viwemi, uwo ulije kabanga, na wambura kugaŵikana pakusopa Yehova. (1 Midauko 28:9; Salmo 86:11) Ŵanthu awo mbamtende ŵakukhala makora na Ŵakhristu ŵanyawo, kweniso ŵakuyezga kukhala mwamtende na ŵazengezgani ŵawo. (Ŵaroma 12:17-21) ‘Ŵakupenja mtende na kuwulondezga.’—1 Petros 3:11.
16, 17. (a) Cifukwa wuli Ŵakhristu ŵakuphakazgika ŵakucemeka “ŵana ŵa Ciuta” ndipo ‘ŵakumuwona wuli Ciuta’? (b) Kasi “mberere zinyake” ‘zikumuwona wuli Ciuta’? (c) Ni mwauli umo ŵa “mberere zinyake” ŵazamuŵira “ŵana ŵa Ciuta,” ndipo pawuli?
16 Ŵanthu awo mbamtende na ŵakutowa mu mtima ŵakulayizgika kuti “ŵacemekenge ŵana ŵa Ciuta” nakuti “ŵawonenge Ciuta.” Ŵakhristu ŵakuphakazgika ŵakuŵa ŵana ŵauzimu ŵa Yehova apo ŵacali pano pasi. (Ŵaroma 8:14-17) Para ŵawuka na kuluta kucanya kukaŵa na Khristu, iwo ŵakuteŵetera pamaso pa Yehova na kumuwona nadi.—1 Yohane 3:1, 2; Civumbuzi 4:9-11.
17 “Mberere zinyake” za mtende zikuteŵetera Yehova mwakulongozgeka na Muliska Muwemi, Yesu Khristu, ‘Dada wawo Wamuyirayira.’ (Yohane 10:14, 16; Yesaya 9:6) Awo ŵazamutonda ciyezgo caumaliro pamanyuma pa Vilimika 1000 ivyo Khristu wazamuwusa, ŵazamucemeka ŵana ŵa Yehova ŵa pano pasi ndipo ŵazamunjira mu “wanangwa wa ucindami wa ŵana ŵa Ciuta.” (Ŵaroma 8:21; Civumbuzi 20:7, 9) Apo ŵakulindilira wanangwa uwu, ŵakuwona Yehova kuti ni Dada wawo, ndipo ŵapatulira umoyo wawo kwa iyo, pakumanya kuti ndiyo wakuŵapa. (Yesaya 64:8) Nga umo wakacitira Yobu na Mozesi mu nyengo yakale, iwo ‘ŵakuwona Ciuta’ na maso gha cipulikano. (Job 42:5; Ŵahebere 11:27) Na ‘maso gha mtima wawo,’ kweniso cifukwa ca kumumanya makora Ciuta, ŵawona mikhaliro yiwemi ya Yehova ndipo ŵakuyezga kumulondezga pakucita khumbo lake.—Ŵaefeso 1:18; Ŵaroma 1:19, 20; 3 Yohane 11.
18. Pa vifukwa vinkhondi na viŵiri ivyo Yesu wakadankha kuyowoya, kasi mbanjani awo ŵakusanga cimwemwe lero?
18 Tawona kuti awo ŵakumanya kuti mbakavu mwauzimu, awo ŵakutengera, awo mbakuzika, awo ŵali na njara na nyota ya urunji, ŵalusungu, ŵakutowa mu mtima, na awo mbamtende, ŵakusanga cimwemwe pakuteŵetera Yehova. Ndipo mbu, ŵanthu aŵa ndiwo kanandi ŵasuskika nanga nkhuzikizgika. Kasi ŵakuŵavya cimwemwe cifukwa ca kuzikizgika? Fumbo ili lizgorekenge mu nkhani yapanthazi apa.
Kuweleramo
• Kasi awo ŵakumanya kuti mbakavu mwauzimu ŵakuŵa na cimwemwe wuli?
• Kasi awo ŵakutengera ŵakupembuzgika wuli?
• Kasi tikulongora wuli kuti tili ŵakuzika?
• Cifukwa wuli tikwenera kuŵa ŵalusungu, ŵakutowa mu mtima, na ŵamtende?
[Mafumbo]
[Cithuzithuzi pa peji 23]
‘Mbacimwemwe ŵakavu mu mzimu’
[Cithuzithuzi pa peji 23]
‘Mbacimwemwe ŵalusungu’
[Cithuzithuzi pa peji 23]
‘Mbacimwemwe awo ŵali na njara na nyota ya urunji’