Kasi Tizamuŵapo Ŵakuvikilirika?

ŴANA ŵakuseŵera na ŵapapi ŵawo mwakukondwa. Kasi walipo uyo vikumunozgera yayi kuwonelera cinthu ca mtundu uwu? Ŵana ŵakujiwona kuti mbakuvikilirika comene para ŵali pamoza na ŵapapi ŵacitemwa. Ndipouli, ŵana ŵanandi ŵalijirethu nyengo yacimwemwe yanthena iyi. M’malo mwake, zuŵa lililose ŵakufipa mtima na uko ŵagonenge zuŵa ilo. Kasi vinthu vizamuŵayenderapo makora ŵana ŵambura kwakukhala aŵa, na ŵanthu ŵanyake awo ŵakusoŵa civikiliro?

Nangauli ŵangawona nga pa caru palije cawo, kweni Mazgu gha Ciuta ghakupeleka cilindizga ciwemi. Nchimi Yesaya yikayowoyerathu kuti nyengo yizenge apo ŵanthu wose ŵazamuŵa ŵakuvikilirika. Wakalemba kuti: “Tiŵazenge nyumba na kukhalamo; tiŵapande mpheska na kurya vipasi. Kuti ŵazengenge cara munyake ndiye wakhalengemo; ntha tiŵapande munyake warye.”—Yesaya 65:21, 22.

Kweni kasi cilindizga ici nchakugomezgeka? Nakuti mazgu ghakuti “cilindizga,” nyengo zose ghakung’anamura kuti cinthu ico cizamucitika nadi yayi. Mwaciyelezgero, ku Brazil, ŵanthu ŵakutemwa kuyowoya mazgu ghakuti, “Cilindizga ndico cikuŵa caumaliro kufwa.” Mazgu agha ghakung’anamura kuti ŵanthu ŵanandi ŵakulindizga nipera cinthu, nanga ni para palije cifukwa cakukwana cakugomezgera kuti cinthu ico cizamucitika nadi. Ndipouli, cilindizga ico Ciuta wamoyo wakutipa cikupambana na cilindizga ca mtundu uwu. Mpositole Paulosi wakalemba kuti: “Yose uyo wakupulikana nayo kuti wati wakhozgekenge soni cara.” (Ŵaroma 10:11) Maucimi gha mu Baibolo agho ghafiskika kale ghakutipa nkhongono kuti vinthu vinyakeso ivyo Yehova Ciuta walayizga, navyo vizamufiskika. Para malayizgo agha ghazakafiskika, mikhaliro iyo yikucicizga ŵana kukhala mu misewu yizamumalira penepapo.

Nanga kuŵe sono nthena, ulongozgi wakufuma mu Baibolo ungawovwira awo ŵakusuzgika kuti ŵaŵe na umoyo uwemi na kuŵa ŵakuvikilirika. Kasi ici cingacitika wuli? Ŵakaboni ŵa Yehova mu cikaya cinu ŵazamuŵa ŵakukondwa kumovwirani kuti musange zgoro la fumbo ili.