Kupenja Ngale “ya Mtengo Wapatali” Lero

“Makani ghawemi gheneagha gha ufumu ghamupharazgika mu vyaru vyose ghaŵe cipanikizgo.”—MATEYU 24:14.

1, 2. (a) Kasi Ŵayuda ŵakaghanaghananga wuli za Ufumu wa Ciuta apo Yesu wakaŵa pa caru capasi? (b) Kasi Yesu wakaŵasambizga wuli ng’anamuro la Ufumu, ndipo ŵakacitapoci?

 UFUMU wa Ciuta ndiwo ukaŵa mutu wa nkhani iyo Ŵayuda ŵakatemwanga kudumbirana apo Yesu wakiza pa caru capasi. (Mateyu 3:1, 2; 4:23-25; Yohane 1:49) Kweni pakwamba ŵanandi ŵakamanyanga yayi ukuru na mazaza gha ufumu uwu; nakuti ŵakamanyanga yayi kuti lizamuŵa boma lakucanya. (Yohane 3:1-5) Nanga mbasambiri ŵa Yesu ŵakawumanya makora yayi Ufumu wa Ciuta, na ivyo ŵakenera kucita kuti ŵazakawuse pamoza na Khristu.—Mateyu 20:20-22; Luka 19:11; Milimo 1:6.

² Kweni Yesu wakasambizga ŵasambiri ŵake makora makora, ndiposo wakaŵaphalira ntharika ya ngale ya mtengo wapatali iyo tikapulika mu nkhani yakwamba. Wakalongora kuti ŵasambiri ŵakenera kujipeleka comene pakupenja Ufumu wa kucanya. (Mateyu 6:33; 13:45, 46; Luka 13:23, 24) Fundo iyi yikwenera kuti yikaŵacontha comene, cifukwa nyengo yeneyiyo ŵakayamba kupharazga makani ghawemi gha Ufumu na citatata kweniso mwacikanga. Iwo ŵakapharazga ku vyaru vya kutali, nga umo tikuwonera mu buku la Milimo.—Milimo 1:8; Ŵakolose 1:23.

3. Kasi Yesu wakati wuli za Ufumu pakulongosora vyakucitika vya lero?

³ Lero ke? Ŵanthu ŵanandi comene ŵakuphalirika vitumbiko ivyo vizamuŵa mu paradiso pa caru capasi. Apo Yesu wakalongosoranga za “umaliro wa mgonezi,” wakati: “Makani ghawemi gheneagha gha Ufumu ghamupharazgika mu vyaru vyose ghaŵe cipanikizgo ku mitundu yose; penepapo ndipo umaliro . . . wizenge.” (Mateyu 24:3, 14; Marko 13:10) Kweniso wakalongosora kuti nchito yakuzirwa iyi yikwenera kucitika nangauli pangaŵa vikhuŵazgo na masuzgo, nesi kuzikizgika. Ndipouli, wakayowoya mazgu ghakukhwimiska ghakuti: “Mweneuyo wakuzizipizga mupaka ku umaliro, ndiyo wamkuponoskeka.” (Mateyu 24:9-13) Kuti munthu wacite vyose ivi, wakwenera kujipata na kujipeleka comene nga ni munthu wamalonda uyo Yesu wakazunura mu ntharika. Kasi ŵaliko ŵanthu ŵanthena lero, ŵeneawo ŵali na cipulikano kweniso mwamphu pakupenja Ufumu?

Cimwemwe Cifukwa ca Kusanga Unenesko

4. Kasi unenesko wakulongosora za Ufumu ukuŵakhwaska wuli ŵanthu lero?

⁴ Wamalonda uyo Yesu wakazunura mu ntharika wakakondwa comene apo wakasanga ngale iyo wakamanya kuti yikaŵa “ya mtengo wapatali.” Cifukwa cakuti wakakondwa comene, wakalimbikira kuti mupaka wagure ngale yira. (Ŵahebere 12:1) Lero, unenesko wakulongosora za Ciuta na Ufumu wake ukukopa na kukhukiska ŵanthu ŵanandi. Fundo iyi yikutikumbuska ivyo wakalemba Mbali A. H. Macmillan, uyo wakalongosora umo wakapenjera Ciuta kweniso ico Ciuta wakalengera ŵanthu, mu buku la mutu wakuti Faith on the March. Iyo wakati: “Nawona kuti cilimika cilicose ŵanthu ŵanandi ŵacali kusanga ico ine nili kusanga kale. Nakuti ŵanthu aŵa ŵali nga ndimwe na ine, cifukwa ni ŵanthu ŵa mitundu yose, mafuko ghose kweniso misinkhu yose. Unenesko ukutemwera yayi. Ukukopa ŵanthu wose.”

5. Kasi ni vinthu wuli viwemi ivyo vikacitika mu cilimika ca uteŵeti ca 2004?

 ⁵ Mazgu agha ngaunenesko nadi, cifukwa cilimika cilicose, ŵanthu ŵanandi awo ŵakupenja nadi unenesko ŵakupulika makani ghawemi gha Ufumu wa Ciuta, ndipo ŵakujipeleka kwa Yehova na kucita khumbo lake. Ndimo vikaŵiraso mu cilimika ca uteŵeti ca 2004, ico cikayamba mu Seputemba 2003 mupaka mu Ogasiti 2004. Mu myezi 12 iyi, ŵanthu 262,416 ŵakabapatizika mu maji, kulongora pakweru kuti ŵali kujipeleka kwa Yehova. Ŵakacita ivi mu vyaru 235, nakuti sabata yiliyose Ŵakaboni ŵa Yehova mu vyaru ivi ŵakusambira Baibolo na ŵanthu 6,085,387 ŵa mitundu, mafuko na viyowoyero vinandi. Ŵakucita nthena kuti ŵawovwire ŵanthu aŵa kusanga unenesko wakufuma mu Mazgu gha Ciuta weneuwo ukupa umoyo.—Civumbuzi 7:9.

6. Kasi mbanjani ŵawovwira kuti ŵanandi ŵamanye Ciuta mu vilimika ivi?

⁶ Kasi nchivici cikawovwira kuti ivi vicitike? Tikukayika yayi kuti Yehova ndiyo wakuŵacema awo ŵakukhumba kucita khumbo lake. (Yohane 6:65; Milimo 13:48) Ndipouli, cinyake ico cawovwira ni mtima wa kujipeleka na citatata ca awo ŵakupenja Ufumu. Apo Mbali Macmillan wakaŵa na vilimika 79 wakalemba kuti: “Kwamba apo nkhamanyira ivyo Ciuta walayizga ŵanthu, ŵeneawo ŵali mu uzga wa matenda na nyifwa, nicali kugomezga uthenga uwu, weneuwo Baibolo lavumbura. Kufuma pa nyengo iyo, khumbo lane ndakuti nimanye vinandi ivyo Baibolo likusambizga mwakuti niwovwire ŵanyane awo ŵakukhumba kumanya Yehova, Ciuta Wankhongonozose, na ivyo wakukhumba kucitira ŵanthu.”

7. Longosorani umo ŵanthu awo ŵakusanga unenesko wa Baibolo ŵakuŵira ŵacimwemwe na ŵamwamphu.

⁷ Na lero wuwo ŵateŵeti ŵa Yehova mbamwamphu. Yumoza wawo ni Daniela wa ku Vienna, Austria. Iyo wakati: “Kwamba pa wanici, Ciuta ndiyo ni mubwezi wane wakuluska wose. Nyengo zose khumbo lane likaŵa lakuti nimanye zina lake, cifukwa zina lakuti ‘Ciuta’ likwimira munthu yumoza yayi. Kweni vikanitolera nyengo kuti nilimanye, mupaka apo nkhaŵa na vilimika 17 peneapo Ŵakaboni ŵa Yehova ŵakiza kwithu. Ŵakalongosora vyose ivyo nkhakhumbanga kumanya vyakukhwaskana na Ciuta. Panyengo iyo, nkhawusanga unenesko, ndipo ukaŵa wakukondweska comene! Nkhakondwa comene mwakuti nkhayamba kuphalirako waliyose.” Ŵanyake ku sukulu ŵakayamba kumunena cifukwa cakuti wakaŵa wamwamphu. Daniela wakalutizga kuti: “Kweni nkhawona kuti ivyo Baibolo likuyowoya vikafiskikanga, cifukwa nkhasambira mazgu gha Yesu ghakuti ŵasambiri ŵake ŵatinkhikenge na kusuzgika cifukwa ca zina lake. Nkhakondwa comene kuti ivi vikacitikanga.” Nakalinga, Daniela wakajipeleka kuti wateŵetere Yehova umoyo wake wose, ndipo wakabapatizika na kufwilirapo kuti wazakaŵe mishonale. Daniela wakati watengwa, iyo na mufumu wake Helmut ŵakayamba kupharazgira ŵanthu ŵakufuma ku Africa, China, Philippines na India awo ŵali mu Vienna. Lero, Daniela na Helmut mbamishonale mu caru cinyake kuno ku Africa.

Ŵakuleka Yayi

8. Kasi ni nthowa wuli yinyake iyo ŵanandi ŵakulongolera kuti ŵakutemwa Ciuta na kujilambika ku Ufumu wake?

⁸ Inya nadi, uteŵeti wa umishonale ni nthowa yimoza iyo ŵanthu ŵa Yehova ŵakulongolera kuti ŵakumutemwa, kweniso kuti ŵakujilambika ku Ufumu wake. Nga ni munthu wamalonda yura Yesu wakazunura mu ntharika, awo ŵakwamba uteŵeti uwu ŵakunozgeka kuya kutali cifukwa ca Ufumu. Ŵamishonale aŵa ŵakuya ku vyaru vinyake kuti ŵakapenje makani ghawemi gha Ufumu cara; iwo ndiwo ŵakuyegha makani ghawemi na kovwira ŵanthu mu vyaru vya kutali kuti ŵaŵe ŵasambiri ŵa Yesu Khristu. (Mateyu 28:19, 20) Mu vyaru vinandi, ŵamishonale ŵakuzizipizga masuzgo ghanandi. Kweni ŵakutumbikika comene.

9, 10. Kasi ŵamishonale ŵakukondwa na vinthu wuli ivyo ŵakuwona mu vyaru vya kutali, nga ni caru ca Central African Republic?

 ⁹ Pulikani ciyelezgero cimoza ca ku Central African Republic, uko ŵanthu 16,184 ŵakawungana pa Cikumbusko ca nyifwa ya Khristu, kuluska kankhondi na kaŵiri unandi wa ŵapharazgi mu caru ici. Pakuti mu vigaŵa vinandi vya caru ici mulije magesi, kanandi ŵanthu ŵakugwilira pawaro nchito zawo, pa mfwiri wa khuni. Ŵamishonale nawo ndimo ŵakucitira nchito yawo ya kupharazga, ŵakusambira na ŵanthu pa mfwiri wa khuni. Pawaro pakuŵa ungweru wakukwana na tumphepo tuwemi, kweni paliso uwemi unyake. Mu caru ici ŵanthu ŵakutemwa Baibolo, ndipo ŵakutemwa comene kudumbiskana nkhani za cisopo. Kanandi para ŵanthu ŵakujumpha mu nthowa ŵakuwona para sambiro likucitika, ndipo ŵakupatuka na kwamba kusambira.

¹⁰ Ntheura apo mishonale munyake wakacitanga sambiro la Baibolo pawaro, munyamata uyo wakakhalanga pa nyumba ya pafupi wakiza. Wakaphalira mishonale kuti walute wakamusambizge Baibolo, cifukwa wakaŵa kuti wandafikeko ku nyumba yake. Mishonale wakakondwa, ndipo wakacita ntheura, nakuti muwukirano yura wakulimbikira comene. Mu caru ici, kanandi ŵapolisi ŵakwimika Ŵakaboni pa msewu, kuti ŵaŵape mulandu yayi, kweni kuti ŵapemphe magazini ghaphya gha Gongwe la Mulinda na Galamukani!, panyake kuti ŵawonge cifukwa ca nkhani yakukondweska iyo ŵakaŵazga.

11. Kasi ŵamishonale awo ŵateŵetera nyengo yitali ŵakujipulika wuli nangauli pakuŵa viyezgo?

¹¹ Ŵanandi awo ŵakayamba umishonale vilimika 40 panji 50 ivyo vyajumpha ŵacali kuteŵetera mwakugomezgeka. Iwo nchakuwonerapo ciwemi comene ca cipulikano na citatata! Mbumba yinyake yacita umishonale vilimika vyakujumpha 42 mu vyaru vitatu. Mwanalume wakuti: “Masuzgo ghakaŵapo. Mwaciyelezgero, tikasuzgika na maleriya vilimika 35. Kweni tikadandaura yayi cifukwa ca kwamba umishonale.” Muwoli wake wakusazgirapo kuti: “Pali vinandi ivyo vikutikondweska nyengo zose. Uteŵeti wa m’munda ukunozga comene ndipo nchipusu kwamba masambiro gha Baibolo. Para tikuwona ŵasambiri ŵakwiza ku maungano ndipo ŵakumanyana na ŵanyawo, vikuŵa ngati nipara mbumba yikusangana pamoza.”

‘Ŵakupima Vyose Kuti Ni Vyautayisi’

12. Kasi munthu wakulongora wuli kuti Ufumu ngwakuzirwa kwa iyo?

¹² Apo wamalonda wakasanga ngale ya mtengo wapatali, ‘wakaluta wakasaska vinthu vyose ivyo wakaŵa navyo, ndipo wakayigura.’ (Mateyu 13:46) Awo ŵakumanya kuti Ufumu ngwakuzirwa, ŵakunozgeka kuleka vyose ivyo vingawoneka vyakuzirwa mu maso gha ŵanthu. Mpositole Paulosi, yumoza wa awo ŵazamuwusa pamoza na Khristu mu ucindami, wakati: ‘Inya nadi, nkhuvipima vyose kuti ni vyautayisi cifukwa ca kazirwiro ka kumumanya Khristu Yesu Fumu yane: cifukwa ca mweneuyo nkhataya vyose, ndipo nkhuvipima kuŵa vya ku cizara pera, mwakuti ndandule Khristu.’—Ŵafilipi 3:8.

13. Kasi munthu munyake ku Czech Republic wakalongora wuli kuti wakutemwa Ufumu?

¹³ Mwakuyana waka, lero ŵanthu ŵanandi ŵakulolera kusintha umoyo wawo mwakuti ŵasange vitumbiko vya Ufumu. Mwaciyelezgero, mu Okutoba 2003, musambizgi wa vilimika 60 pa sukulu yinyake ku Czech Republic, wakasanga buku lakovwira kusambira Baibolo la Cimanyisko Ceneico Cikurongozgera ku Umoyo Wamuyirayira. Wakati wamara kuliŵazga, nyengo yeneyiyo wakakumana na Ŵakaboni ŵa Yehova ŵa kwenekuko kuti wayambe kusambira Baibolo. Wakapindura comene mwauzimu, ndipo wakayamba kufika pa maungano ghose. Kweni munthu uyu wakakhumbanga kwima pa cisora kuti panji wangaŵa mulara wa msumba. Kasi wakacita wuli? Iyo wakasankha nchito yinyake, nchito ya kupharazga Ufumu. Iyo wakati, “Cikaniŵira cipusu kugaŵira mabuku ghanandi ku ŵana ŵa sukulu.” Mu Julayi 2004, wakabapatizika, kulongora pakweru kuti wali kujipeleka kwa Yehova.

14. (a) Kasi ŵanthu ŵanandi ŵacitaci cifukwa ca makani ghawemi gha Ufumu? (b) Kasi ni mafumbo wuli agho waliyose wakwenera kujifumba?

 ¹⁴ Ŵanthu ŵanandi pa caru cose capasi, nawo ŵapulika makani ghawemi gha Ufumu na kucitapo kanthu. Ŵafumako ku caru ciheni, ŵavura wunthu wakale, ŵaleka ŵabwezi ŵawo ŵakale na kuleka kupenja vyathupi. (Yohane 15:19; Ŵaefeso 4:22-24; Yakobe 4:4; 1 Yohane 2:15-17) Cifukwa wuli ŵakucita nthena? Cifukwa ŵakumanya kuti vitumbiko ivyo Ufumu uzamupeleka vikuluska cilicose ico caru ici cingapeleka. Kasi ndimo mukujipulikira para mukupulika makani ghawemi gha Ufumu? Kasi ghakumutumani kuti musinthe umoyo winu, nkharo na makhumbiro kuti vikolerane na khumbo la Yehova? Usange mungacita nthena, mungatumbikika comene, sono na munthazi wuwo.

Nchito ya Kuvuna Yaminya

15. Kasi ucimi ukati ŵanthu ŵa Ciuta ŵacitengeci mu mazuŵa ghaumaliro?

¹⁵ Wamasalmo wakalemba kuti: ‘Ŵanthu ŵako ŵajipelekenge na mtima [wose] mu zuŵa ilo ukulongozga nkhondo yako.’ Ŵanyake awo ŵajipeleka ni ‘ŵapungwe awo ŵali nga ni jumi’ na “wumba wa [“ŵanakazi,” NW] awo ŵakuthuwuska makani” ghawemi. (Salmo 68:11; 110:3) Kasi vinthu vili wuli mu mazuŵa ghaumaliro agha, pakuwona kuti ŵanthu ŵa Yehova, ŵanalume na ŵanakazi, ŵana na ŵalara ŵalimbikira na kujipata?

16. Yowoyanipo ivyo ŵateŵeti ŵa Ciuta ŵakucita kuti ŵasambizge ŵanthu za Ufumu.

¹⁶ Ku India, mupayiniya munyake, wakafipira mtima ŵanthu ŵakukwana mamiliyoni ghaŵiri ŵambura kuyowoya awo ŵali mu caru ico. Wakawona kuti nawo ŵangasambira za Ufumu. (Yesaya 35:5) Wakayamba sukulu iyo yikusambizga kuyowoya na mawoko. Ku sukulu, wakaphaliranga ŵanthu ŵambura kuyowoya ivyo Ufumu uzamucita, ndipo wakamba kuŵasambizga Baibolo mu magulu. Pakati pajumpha masabata ghacoko waka, ŵanthu ŵakujumpha 12 ŵakayamba kufika pa maungano pa Nyumba ya Ufumu. Nyengo yinyake, mupayiniya uyu wakakumana na munyamata wambura kuyowoya wa ku Calcutta pa ukwati. Munyamata uyu wakaŵa na mafumbo ghanandi, nakuti wakakhumbanga kumumanya makora Yehova. Kweni pakaŵa suzgo limoza. Munyamata uyu wakaŵa pafupi kuwelera ku Calcutta, mtunda wa makilomita 1,600 kuti wakayambe kusambira pa koleji. Kweni ku cigaŵa ici kukaŵavya Ŵakaboni ŵa Yehova awo ŵakumanya ciyowoyero ca mawoko. Munyamata uyu wakalimbikira kunyengelera awiske kuti wasambire ku Bangalore mwakuti walutizge kusambira Baibolo. Wakawovwirika comene mwauzimu,  ndipo pafupifupi cilimika cimoza pamanyuma pake, wakapatulira umoyo wake kwa Yehova. Nayo wakasambira Baibolo na ŵanthu ŵanandi ŵambura kuyowoya, kusazgapo mubwezi wake uyo ŵakakulira lumoza. Sono ofesi ya Ŵakaboni ŵa Yehova ku India yikunozgekera kusambizga ŵapayiniya ciyowoyero ca mawoko kuti ŵawovwire ŵanthu ŵambura kuyowoya.

17. Yowoyani ico camukhozgani comene pa lipoti la cilimika ca uteŵeti ca 2004 ilo liri pa mapeji 21 mupaka 24.

¹⁷ Pa mapeji 21 mupaka 24 gha magazini iyi, muwonenge lipoti lakulongora ivyo Ŵakaboni ŵa Yehova ŵakacita pa caru cose mu cilimika ca uteŵeti ca 2004. Fwasani na kusanda lipoti ili kuti mujiwonere mwekha ukaboni wakuti ŵanthu ŵa Yehova pa caru cose capasi ŵakulimbikira kupenja ngale “ya mtengo wapatali” lero.

Lutizgani ‘Kupenja Dankha Ufumu’

18. Kasi nchivici ico Yesu wakaleka kuyowoya mu ntharika ya munthu wamalonda, ndipo cifukwa wuli?

¹⁸ Para tawelera ku ntharika ya munthu wamalonda, tikuwona kuti Yesu wakayowoyapo yayi ico wamalonda wakenera kucita kuti wasange vyakukhumbikwira pa umoyo wake, wakati waguliska vyose ivyo wakaŵa navyo. Cingapulikikwa usange ŵanyake ŵangafumba kuti: ‘Kasi wamalonda wakenera kuvisanga wuli vyakurya, vyakuvwara na nyumba, pakuti sono wakaŵavya pakukora? Kasi ngale ya mtengo wapatali yikatenge yimovwirenge wuli?’ Mwakuyana na mahara gha taŵanthu, mafumbo agha ngakupulikikwa nadi. Kweni asi Yesu wakaciska ŵasambiri ŵake kuti: ‘Penjani dankha ufumu wake, na urunji wake; ndipo vyose vyeneivi visazgikirengeko kwa imwe’? (Mateyu 6:31-33) Comene ntharika iyi yikutilongora umoyo wa kujipeleka kwa Ciuta na mtima wose, na mwamphu pakupenja Ufumu. Kasi cilipo ico tikusambirapo lero?

19. Kasi tingatorapo fundo wuli yikuru pa ntharika ya Yesu ya ngale ya mtengo wapatali?

¹⁹ Kwali tasambira waka makani ghawemi panji tapenja Ufumu vilimika vinandi, na kuphalirako ŵanyithu vitumbiko ivyo Ufumu uzamupeleka, tiyeni tiŵike mahara ghithu ghose pa Ufumu. Tili mu nyengo zinonono, kweni pali vifukwa vyakukwana ivyo vikutikhorweska kuti tikupenja cinthu canadi ndiposo cakuzirwa kuluska cilicose, ico cikuyana na ngale iyo wamalonda wakasanga. Ivyo vikucitika pa caru, na ucimi wa Baibolo uwo wafiskika mbukaboni wakukhorweska wakuti tili ku “umaliro wa mgonezi.” (Mateyu 24:3) Tiyeni ticite nga ni munthu wamalonda yura, tiŵe ŵamwamphu pakupenja Ufumu wa Ciuta, ndipo tikondwenge na mwaŵi wa kupharazga makani ghawemi uwo tili nawo.—Salmo 9:1, 2.

Kasi Mukukumbuka?

• Kasi ni vici ivyo vyawovwira kuti ŵasopi ŵanadi ŵandane mu vilimika ivyo vyajumpha?

• Kasi ŵamishonale ŵakulongora mtima wuli?

• Kasi ŵanyake ŵasintha wuli cifukwa ca makani ghawemi gha Ufumu?

• Kasi ntharika ya Yesu ya ngale ya mtengo wapatali yingatisambizga vici?

[Mafumbo]

[Chati pa peji 19-22]

2004 LIPOTI LA CILIMIKA CA UTEŴETI CA XXXX LA ŴAKABONI ŴA YEHOVA PA CARU COSE

 (Mu magazini yakusindikizga ndimo vikuwoneka makora)

[Vithuzithuzi pa peji 25, 26]

Ŵamishonale ŵakutumbikika comene lero, nga ni munthu wamalonda

[Cithuzithuzi pa peji 27]

‘Ŵanthu ŵako ŵajipelekenge na mtima [wose]’