Mboniwoni ya Muzgezge wa Ufumu Yafiskika
Mboniwoni ya Muzgezge wa Ufumu Yafiskika
‘Mukucita makora kutegherezga [mazgu gha ucimi] nga nkhu muliko uwo ukuŵala mu malo gha mdima.’—2 PETROS 1:19.
1. Kasi ni mphambano wuli iyo yili mu caru mazuŵa ghano?
MASUZGO ghakukata yayi mazuŵa ghano. Thondo na vyamoyo ivyo vikukhalamo vikumara, ndipo ucigaŵenga wazara comene. Nanga ni visopo vyatondeka kovwira. Nakuti visopo ndivyo vikupangiska vinthu kuhenipa comene mwa kukhuŵilizga mzimu wa kuleka kupulika vya ŵanji, thinkho, na kujikuzga pakati pa vyaru. Ŵanthu ŵagaŵikana cifukwa ca kujikuzga kwa mtundu uwu. Inya, nga umo kukayowoyekera, “mdima wa minkhorwe” wabenekelera “ŵanthu ŵa mitundu yose.” (Yesaya 60:2) Ndipouli, ŵanthu ŵanandi ŵali na cigomezgo cakuti kunthazi vinthu vizamuŵa makora. Cifukwa wuli? Cifukwa ŵakulaŵiska comene ku mazgu gha ucimi gha Ciuta “nga nkhu muliko uwo ukuŵala mu malo gha mdima.” Iwo ŵakulongozgeka na “mazgu” gha Ciuta, agho sono ghakusangika mu Baibolo.—2 Petros 1:19.
2. Mwakuyana na ucimi wa Daniyeli wa “nyengo ya umaliro,” mbanjani awo ŵakupulikiska vinthu vyauzimu?
2 Pakuyowoya za “nyengo ya umaliro,” nchimi Daniyeli yikalemba kuti: “Ŵanandi ŵamucimbira uku na uko, na mahara ghamkwandana. Ŵanandi ŵati ŵajitoweske, na kujituŵiska, ndipo ŵamkuŵa ŵakutozgeka; kweni ŵaheni tiŵacite uheni; kulije yumoza wa ŵaheni wamkumanyiska, kweni ŵavinjeru ndiwo ŵamkumanyiska.” (Daniel 12:4, 10) Ŵekha awo ‘ŵakucimbira,’ panji kuti kufwilirapo kusambira Mazgu gha Ciuta, kulondezga malango ghake, na kuyezgayezga kucita khumbo lake ndiwo wakupulikiska vinthu vyauzimu.—Mateyu 13:11-15; 1 Yohane 5:20.
3. Mu ma 1870, kasi ŵasambiri ŵa Baibolo ŵakamanya unenesko wuli?
3 Mu ma 1870, pambere “mazuŵa gha ku umaliro ghandayambe, Yehova wakamba kupeleka ungweru wa “vyamucindindi vya Ufumu wa kucanya.” (2 Timote 3:1-5; Mateyu 13:11) Pa nyengo yira, ŵasambiri ŵa Baibolo ŵakamanya kuti Khristu wizenge kwambura kuwoneka, mwakupambana na umo ŵanthu ŵanandi ŵakughanaghanira. Yesu wakati wakhala pa citengo ca ufumu kucanya, wakizaso mu fundo yakuti wakamba kucitapo kanthu pa caru capasi. Vyakucitika pa caru capasi ndivyo vikawovwira ŵasambiri ŵake kumanya kuti Yesu wiza kwambura kuwoneka.—Mateyu 24:3-14.
Para Mboniwoni ya Ufumu Yafiskika
4. Kasi Yehova wakhozga wuli cipulikano ca ŵateŵeti ŵake mazuŵa ghano?
4 Mboniwoni ya kusanduka kwa Yesu ukaŵa muzgezge uwemi comene wa ucindami wa Khristu para wayamba kuwusa. (Mateyu 17:1-9) Mboniwoni iyi yikakhozga cipulikano ca Petrosi, Yakobe, na Yohane pa nyengo iyo ŵanandi ŵakaleka kulondezga Yesu cifukwa cakuti ivyo ŵakalindiliranga vikacitika yayi. Mwakuyana waka, mu nyengo ya umaliro yino, Yehova wakhozga cipulikano ca ŵateŵeti ŵake mwa kuŵapa ungweru unandi wa kufiskika kwa mboniwoni yakuzizwiska iyi na maucimi ghanyake ghanandi. Sono tiyeni tiwone vinthu vinyake vyakukhozga cipulikano ivyo vyafiskika.
5. Kasi Thondwe ni njani, ‘wakawuka’ wuli ndipo pauli?
5 Pakuyowoya za kusanduka kwa Yesu, mpositole Petrosi wakalemba kuti: “Tili na mazgu gha uprofeti agha ghakukhora comene; gheneagho mukucita makora pa kughategherezga nga nkhu muliko uwo ukuŵala mu malo gha mdima, kusuke [mupaka] kuce, ndipo thondwe liwuke mu mitima yinu.” (2 Petros 1:19) Thondwe, panji kuti nyenyezi ya mulenji iyi, ni Yesu Khristu mu ucindami wake. (Civumbuzi 22:16) ‘Wakawuka’ mu 1914 apo Ufumu wa Ciuta ukayamba kuwusa kucanya. Uku ndiko kukaŵa kwamba kwa muwuso uphya. (Civumbuzi 11:15) Mu mboniwoni ya kusanduka kwa Yesu, Mozesi na Eliya ŵakawoneka pamoza na Yesu, ŵakadumbiskananga nayo. Kasi iwo ŵakwimira ŵanjani?
6, 7. Kasi Mozesi na Eliya ŵakwimira ŵanjani mu mboniwoni ya kusanduka kwa Yesu, ndipo ni fundo wuli izo Malemba ghakuvumbura pakuyowoya za ŵanthu aŵa?
6 Cifukwa cakuti Mozesi na Eliya ŵakaŵa na Khristu mu ucindami wake, ŵakaboni ŵakugomezgeka aŵa ŵakwenera kuti ŵakwimira awo ŵazamuwusa pamoza na Yesu mu Ufumu wake. Fundo iyi yakuti pali ŵanji awo ŵazamuwusa pamoza na Yesu yikuyana na mboniwoni iyo Daniyeli wakawona apo Mesiya ŵakapikanga ufumu. Daniyeli wakawona “Yumoza ngati mwana wa munthu” wakupokera muwuso wamuyirayira kufuma kwa “Mulara wa Mwaka,” Yehova Ciuta. Kweni wonani ivyo Daniyeli wakawona pamanyuma pake. Iye wakalemba kuti: ‘Ufumu na kuwusa na ukuru wa maufumu kusi ku mtambo viti vipike ku ŵanthu ŵatuŵa ŵa Wapacanya pa vyose.’ (Daniel 7:13, 14, 27) Enya, vilimika vyakujumpha 500 pambere kusanduka kwa Yesu kundacitike, Ciuta wakavumbura kuti ŵanthu ŵanyake “ŵatuŵa” ŵazamuwusa pamoza na Khristu.
7 Kasi ŵanthu ŵatuŵa mu mboniwoni ya Daniyeli mbanjani? Paulosi wakayowoyanga za ŵanthu aŵa apo wakati: ‘Mzimu ukupanikizga pamoza na mizimu yithu, kuti tili ŵana ŵa Ciuta; ndipo usange tili ŵana, tiliso ŵahaliri; ŵahaliri ŵa Ciuta, na ŵakuhalira pamoza na Khristu; usange nadi tikukomwera pamoza na iyo, mwakuti ticindikikeso pamoza na iyo.’ (Ŵaroma 8:16, 17) Ŵanthu ŵatuŵa aŵa mbasambiri ŵa Yesu ŵakuphakazgika na mzimu. Mu Civumbuzi, Yesu wakati: ‘Mweneuyo wakutonda, nditi ndimupe kuti wakhale na ine pa cizumbe cane, nga ni umo naneso ndili kutondera, ndipo ndili kukhala nawo Ŵadada pa cizumbe cawo.’ Ŵanthu ‘ŵakutonda’ aŵa, ŵakukwana 144,000, ŵazamuwusa caru capasi pamoza na Yesu.—Civumbuzi 3:21; 5:9, 10; 14:1, 3, 4; 1 Ŵakorinte 15:53.
8. Kasi ŵasambiri ŵakuphakazgika ŵa Yesu ŵakucita wuli nchito yakuyana na iyo Mozesi na Eliya ŵakacitanga, ndipo paŵa vipambi wuli?
8 Kweni kasi nchifukwa wuli Mozesi na Eliya ŵakwimira Ŵakhristu ŵakuphakazgika? Cifukwa nchakuti para Ŵakhristu aŵa ŵali pa caru capasi, ŵakucita nchito yakuyana na iyo Mozesi na Eliya ŵakacitanga. Mwaciyelezgero, ŵakuteŵetera nga Mbakaboni ŵa Yehova nanga ni apo ŵakutambuzgika. (Yesaya 43:10; Milimo 8:1-8; Civumbuzi 11:2-12) Nga ni umo Mozesi na Eliya ŵakacitira, iwo ŵakuvumbura pakweru cisopo cautesi mwacikanga na kuciska ŵanthu kuti ŵasopenge Ciuta pera. (Exodus 32:19, 20; Duteronome 4:22-24; 1 Mathemba 18:18-40) Kasi nchito yawo yapambika vipambi? Comene! Padera pa kumalizga kuwunganya ŵakuphakazgika, ŵawovwiraso ŵa “mberere zinyake” ŵakukwana mamiliyoni ghanandi kuti ŵajilambike na mtima wose kwa Yesu Khristu.—Yohane 10:16; Civumbuzi 7:4.
Khristu Wakutonda Kaumaliro
9. Kasi lemba la Civumbuzi 6:2 likumulongosora wuli Yesu umo waliri mazuŵa ghano?
9 Yesu sono ni munthu uyo wakwera pa mbunda yayi, kweni ni Themba la mazaza. Wakulongosoreka kuti wakwera pa kavalo. Mu Baibolo, kavalo wakwimira nkhondo. (Zintharika 21:31) Lemba la Civumbuzi 6:2 likuti: “Ndipo nkhawona, ndipo yura, kavalo mutuŵa, ndipo uyo wakakhalapo wakaŵa na uta; ndipo kukapika kwa iyo mphumphu: ndipo wakafuma wakutonda, na kuti watondenge.” Ndiposo, pakuyowoya za Yesu, Davide wakalemba kuti: ‘Yehova tiwatume nthonga ya uthemba wako kufumira ku Ziyoni. Wusa mukati mwa ŵalwani ŵako!’—Salmo 110:2.
10. (a) Kasi Yesu wakamba wuli kutonda mwaucindami? (b) Kasi ŵanthu wakakhwaskika wuli apo Khristu wakatonda kakwamba?
10 Nkhondo yakwamba iyo Yesu wakatonda yikaŵa ya kwimikana na ŵalwani ŵake ŵankhongono, Satana na viŵanda vyake. Wakaŵacimbizga kucanya na kuŵaponya pa caru capasi. Pakumanya kuti nyengo yaŵamalira, mizimu yiheni iyi yalongora ukali wawo pa ŵanthu, kucema soka likuru. Mu Civumbuzi, ŵanalume ŵatatu awo ŵakwera pa ŵakavalo ndiwo ŵakwimira soka ili. (Civumbuzi 6:3-8; 12:7-12) Mwakuyana na ucimi wa Yesu wa ‘cimanyikwiro ca kwiza [kwake] na umaliro wa mgonezi,’ ŵanalume aŵa ŵakwera pa ŵakavalo, lekani kuli nkhondo, njara, na matenda ghakofya. (Mateyu 24:3, 7; Luka 21:7-11) Nga nkhuŵinya uko mwanakazi wakupulika para wakubaba mwana, “mihero” iyi yikwenera kuti yizamusazgikira mupaka apo Khristu ‘wazamutondera kaumaliro’ mwa kupalanya cilicose ca gulu la Satana. a—Mateyu 24:8.
11. Kasi mdauko wa mpingo Wacikhristu ukulongora wuli kuti Khristu wakuwusa?
11 Ukaboni unyake wakuti Yesu wakuwusa ni ico wacita pakuvikilira mpingo Wacikhristu mwakuti ufiske mulimo wake wa kupharazga uthenga wa Ufumu pa caru cose. Nangauli Babulone Mukuru, uwo ni ufumu wa caru cose wa cisopo cautesi, na maboma ghankhaza ŵakususka, kweni mulimo wa kupharazga walutilira ndipo ukucitika mu vyaru vinandi kuluska kale. (Civumbuzi 17:5, 6) Uwu mbukaboni ukuru nadi wakuti Khristu wakuwusa!—Salmo 110:3.
12. Cifukwa wuli ŵanthu ŵanandi ŵakumanya yayi kuti Khristu wali kwiza kwambura kuwoneka?
12 Kweni nchacitima kuti ŵanthu ŵanandi, nanga ni awo ŵakuti Mbakhristu, ŵakutondeka kumanya kuti vinthu ivyo vikucitika pa caru sono mbukaboni wakuti Yesu wali kwiza kwambura kuwoneka. Nakuti ŵakunyoza awo ŵakupharazga Ufumu wa Ciuta. (2 Petros 3:3, 4) Cifukwa wuli? Cifukwa cakuti Satana wabulumutizga maghanoghano ghawo na mdima wauzimu. (2 Ŵakorinte 4:3, 4) Nakuti wakamba kale comene kuŵabulumutizga mwauzimu awo ŵakuti Mbakhristu, kweniso wakuŵapangiska kuti ŵaluweko za Ufumu.
Ŵaluwako za Ufumu
13. Kasi nchivici ico cacitika cifukwa ca mdima wauzimu?
13 Yesu wakati nga ni duru lakupandika mu munda wa tirigu, ŵacigaruka ŵanjirenge mu mpingo Wacikhristu na kupuluska ŵanthu ŵanandi. (Mateyu 13:24-30, 36-43; Milimo 20:29-31; Yuda 4) Pamanyuma pake, ŵanthu awo ŵakuti Mbakhristu aŵa ŵakatolera viphikiro, maluso, na visambizgo vya kuwaro kwa Cikhristu, nanga nkhuyowoya kuti ni vya “Cikhristu.” Mwaciyelezgero, Khisimasi ŵakatolera maluso agho ghakacitikanga pakusopa ŵaciuta ŵautesi, Mithra (ciuta zuŵa) na Saturn. Kweni kasi nchivici ico cikapangiska awo ŵakuti Mbakhristu kutolera viphikiro vyambura kukolerana na Cikhristu ivi? Buku la New Encyclopædia Britannica (1974) likuti: Khisimasi, ciphikiro ca kukondwelera kubabika kwa Yesu Khristu, yikambika cifukwa cakuti ŵakaleka kugomezga kuti Yesu wizengeso.”
14. Kasi Origen na Augustine ŵakabendezga wuli unenesko wakukhwaskana na Ufumu na visambizgo vyawo?
14 Wonaniso umo ŵabendezgera ng’anamuro la lizgu lakuti “ufumu.” Buku lakuti The Kingdom of God in 20th-Century Interpretation likuti: “Origen [munthu wakumanya vya cisopo] ndiyo wakamba kusambizga kuti ‘ufumu’ wa Ciuta wuli mu mtima.” Kasi Origen wakacitora nkhu cisambizgo ici? Wakacitora mu Malemba yayi, kweni ni “maghanoghano na mahara gha caru, ivyo ni vyakupambana comene na maghanoghano gha Yesu na chalichi lakwambilira.” Mu buku lake lakuti De Civitate Dei (Msumba wa Ciuta), Augustine wa ku Hippo (uyo wakaŵako pakati pa 354 na 430 C.E.) wakati chalichi ndilo ni Ufumu wa Ciuta. Maghanoghano ghakupambana na malemba agha ndigho ghakapangiska ŵalara ŵa machalichi kuzomera maudindo mu boma. Ŵakawusa vilimika vinandi, ndipo kanandi mwankhaza.—Civumbuzi 17:5, 18.
15. Kasi ivyo lemba la Ŵagalatiya 6:7 likuyowoya vyafiskika wuli mu machalichi ghanandi agho ghakuti nga Cikhristu?
15 Ndipouli, mazuŵa ghano machalichi ghakuvuna ivyo ghakamija. (Ŵagalatiya 6:7) Ghanandi ghakucepa nkhongono, ndipo ŵanthu ŵanandi ŵakughaleka. Ici cikucitika comene ku Europe. Mwakuyana na magazini gha Christianity Today, “lero machalichi ghakurughakuru ku Europe ni nyumba zakusoperamo yayi kweni ni malo waka ghakuti ŵalendo ŵakaghawonenge.” Ndimo viliri na mu vyaru vinyake. Kasi ivi vikung’anamuraci pakuyowoya za cisopo cautesi? Kasi vikung’anamura kuti cimarenge cifukwa ca kusoŵa ndarama na ŵanthu? Kasi ici cikhwaskenge wuli kusopa kwaunenesko?
Nozgekerani Zuŵa Likuru la Ciuta
16. Kasi ivyo vikucitikira Babulone Mukuru vikulongora vici?
16 Nga ni umo josi na vyoto mu phiri ilo lakhala nyengo yitali kwambura kuphuntha vingalongolera kuti kwakhala pacoko waka kuti liphunthe, nkhaza izo zikucitikira cisopo mu vyaru vinandi zikulongora kuti kwakhala pacoko kuti cisopo cautesi cimare. Sonosono apa, Yehova wazamupangiska ŵandyali pa caru capasi kuti ŵakolerane na kupalanya mwanakazi muzaghali, Babulone Mukuru. (Civumbuzi 17:15-17; 18:21) Kasi Ŵakhristu ŵaunenesko ŵakwenera kopa cakucitika ici na vinthu vinyake ivyo vizamucitika pa “suzgo yikuru”? (Mateyu 24:21) Cara nadi! M’malo mwake iwo ŵazamusekelera para Ciuta wayamba kwimikana na ŵaheni. (Civumbuzi 18:20; 19:1, 2) Kumbukirani ivyo vikacitikira Yerusalemu na Ŵakhristu awo ŵakakhalangamo mu vilimika vya mu handiredi lakwamba.
17. Cifukwa wuli ŵateŵeti ŵakugomezgeka ŵa Yehova ŵakopa yayi peneapo umaliro wa mgonezi wuno ukuneng’enera?
17 Ŵasilikari ŵa ku Roma ŵakati ŵazingilizga Yerusalemu mu 66 C.E., Ŵakhristu awo ŵakaŵa maso mwauzimu ŵakazizwa yayi panji kopa. Cifukwa cakuti ŵakalimbikiranga kusambira Mazgu gha Ciuta, ŵakamanya “kuti kupankhuka kwake kwaneng’enera.” (Luka 21:20) Ŵakamanyaso kuti Ciuta waŵapenge mupata kuti ŵacimbire. Mupata ukati wajurika, Ŵakhristu ŵakacimbira. (Daniel 9:26; Mateyu 24:15-19; Luka 21:21) Lero napo, awo ŵakumanya Ciuta na kupulikira Mwana wake, ŵakopa yayi peneapo umaliro wa mgonezi wuno ukuneng’enera. (2 Ŵatesalonika 1:6-9) Nakuti para suzgo yikuru yayamba, ŵazamusekelera na ‘kulaŵiska kucanya, kwinuska mitu yawo; pakuti ŵazamumanya kuti kuwombokwa kwawo kwanengenera.’—Luka 21:28.
18. Kasi nchivici ico cizamucitika apo Gogi wazamuwukira ŵateŵeti ŵa Yehova?
18 Para Babulone Mukuru waparanyika, Satana, pakuŵa Gogi wa Magogi, wazamuwukira Ŵakaboni ŵa Yehova ŵakutemwa mtende. Pakwiza “ngati ni bingu kubenekelera caru,” ŵasilikari ŵa Gogi ŵazamuwona nga ŵatonda kale. Iwo ŵazamutindikika comene! (Ezekiel 38:14-16, 18-23) Mpositole Yohane wakalemba kuti: “Nkhawona kucanya kukajurika; ndipo ehena, kavalo mutuŵa, ndipo mweneuyo wakagarapo wakacemeka Wakugomezgeka na Wakuneneska . . . Mu mlomo wake mukafuma lupanga lwakuthwa, kuti na ulo wahetere mitundu.” “Karonga wa ŵakaronga” uyu, mweneuyu palije uyo wangamuthereska, wazamuponoska ŵateŵeti ŵakugomezgeka ŵa Yehova na kupalanya ŵalwani ŵawo wose. (Civumbuzi 19:11-21) Mboniwoni ya kusanduka kwa Yesu yizamufiskika makora comene!
19. Kasi ŵasambiri ŵakugomezgeka ŵa Khristu ŵazamukhwaskika wuli para watonda, ndipo iwo ŵakwenera kucitaci sono?
19 Pa ‘zuŵa [ili] wose awo ŵakapulikana ŵazamuzukuma’ na Yesu. (2 Ŵatesalonika 1:10) Kasi mukukhumba kuzakaŵa yumoza wa awo ŵazamuzukuma na kutonda kwa Mwana wa Ciuta? Usange ni nthena, mbwenu lutizgani kukhozga cipulikano cinu mwakuti muŵe ŵakunozgeka, cifukwa mu ora ilo mulije kughanaghana ndilo Mwana wa Munthu wakwiza.—Mateyu 24:43, 44.
Ŵani Maso
20. (a) Kasi tingamuwonga wuli “muzga wa magomezgeko na wa vinjeru” uyo Ciuta wali kutipa? (b) Kasi tikwenera kujifumba mafumbo wuli?
20 Nyengo na nyengo, “muzga wa magomezgeko na wa vinjeru” wakuciska ŵanthu ŵa Ciuta kuti ŵawe maso mwauzimu na kumanya cilicose ico cikucitika. (Mateyu 24:45, 46; 1 Ŵatesalonika 5:6) Kasi mukuwonga vikumbusko ivi? Kasi mukulondezga vikumbusko ivi pakusankha ivyo mucitenge mu umoyo? Mwalekeraci kujifumba kuti: ‘Kasi nili na maso ghauzimu agho ghakunovwira kuwona kuti Mwana wa Ciuta wakuwusa kucanya? Kasi nkhumanya kuti ngwakunozgeka kweruzga Babulone Mukuru na caru cose ca Satana?’
21. Nchifukwa wuli ŵanji ŵangamba kugona mwauzimu, ndipo nchivici ico ŵakwenera kucita mwaluŵiro?
21 Ŵanji awo sono ŵakuwungana na ŵanthu ŵa Yehova ŵayamba kugona mwauzimu. Kasi cingaŵa cifukwa ca kutondeka kuzizipizga, nga ni umo ŵakacitira ŵasambiri ŵanyake ŵakwambilira ŵa Yesu? Kasi cingaŵa cifukwa ca vyenjezgo vya umoyo, kutemwa usambazi, panji nthambuzgo? (Mateyu 13:3-8, 18-23; Luka 21:34-36) Panyake ŵanji ŵakutondeka kupulikiska fundo zinyake izo “muzga wa magomezgeko na wa vinjeru” wakulemba. Usange cimoza mwa ivi camucitikirani, tikumupemphani kuti mufwilirepo comene kuŵazga Mazgu gha Ciuta na kuŵeyelera Yehova kuti waŵeso mubwezi winu wa pa mtima.—2 Petros 3:11-15.
22. Kasi kudumbiskana mboniwoni ya kusanduka kwa Yesu na maucimi ghanyake kwamukhwaskani wuli?
22 Mboniwoni ya kusanduka kwa Yesu yikalongoreka ku ŵasambiri ŵake apo ŵakakhumbikwiranga kukhozgeka. Mazuŵa ghano, tili na cinthu cinyake cakuluska apa ico cikutikhozga, kufiskika kwa mboniwoni iyi na maucimi ghanyake ghanandi. Peneapo tikulanguruka pa vinthu vya ucindami ivi, na ivyo vicitikenge munthazi, mphanyi nase tacemerezga na mtima wose nga umo mpositole Yohane wakacitira apo wakati: ‘Ameni! zaninge, Fumu Yesu.’—Civumbuzi 22:20.
[Mazgu ghamusi]
a Mu Cigiriki cakwambilira, lizgu ilo lang’anamurika kuti “mihero” likung’anamura “vyakuŵinya ivyo mwanakazi wakupulika para wakubaba mwana.” (Mateyu 24:8, Kingdom Interlinear) Ici cikung’anamura kuti nga ni vyakuŵinya vya mwanakazi uyo wakubaba mwana, masuzgo pa caru capasi ghazamwandana, ndipo ghazamuzganga comene pa suzgo yikuru.
Kasi Mukukumbuka?
• Kasi nchivici ico kagulu ka ŵasambiri ŵa Baibolo kakapulikiska mu ma 1870, pakuyowoya za kwizaso kwa Khristu?
• Kasi mboniwoni ya kusanduka kwa Yesu yafiskika wuli?
• Kasi kutonda kwa Yesu kwakhwaska wuli caru na mpingo Wacikhristu?
• Kasi tikwenera kucitaci kuti nase tizakapone para Yesu wakutonda kaumaliro?
[Mafumbo]
[Vithuzithuzi pa peji 8, 9]
Mboniwoni ya kusanduka kwa Yesu yafiskika
[Vithuzithuzi pa peji 10]
Kasi mukumanya ico cikacitika Khristu wakati wayamba kutonda?