Kuvikilira Ukhristu Withu

“‘Ndimwe ŵakaboni ŵane,’ wakuti Yehova.”—YESAYA 43:10.

1. Kasi Yehova wakucema ŵanthu wuli?

 USANGE muli pa Nyumba ya Ufumu, laŵiskani comene. Kasi mukuwonapo njani pa malo ghakusoperapo agha? Mungawona ŵawukirano awo ŵakuŵikapo mtima kusambira vinjeru vya mu Malemba. (Salmo 148:12, 13) Mukwenera kuti mukuwonaso mitu ya mbumba iyo yikulimbikira kukondweska Ciuta, nangauli ŵanandi lero ŵakusurako mbumba zawo. Panyake mungawona ŵacekuru awo ŵacali kucita ivyo ŵakapangana na Yehova apo ŵakajipeleka kwa iyo, nangauli sono ŵalije nkhongono. (Zintharika 16:31) Wose ŵakumutemwa comene Yehova. Nakuti iyo wakawona kuti nchiwemi kuŵacema mwakuti ŵaŵe ŵabwezi ŵake. Yesu wakakhozgera kuti: “Palije munthu wakumanya kwiza kwa ine, kwambura kuti Ŵadada awo ŵakandituma ŵamuguze.”—Yohane 6:37, 44, 65.

2, 3. Cifukwa wuli cingaŵa cakusuzga kusungilira Ukhristu withu?

² Kasi tikukondwa yayi kuti tili pakati pa ŵanthu awo Yehova wakuŵatemwa na kuŵatumbika? Kweni nchipusu yayi kusunga Ukhristu withu mu “nyengo zinonono” izi. (2 Timote 3:1) Awo ŵakusuzgika comene kucita ntheura mbawukirano awo ŵapapi ŵawo Mbakhristu. Muwukirano munyake uyo ŵapapi ŵake Mbakhristu wakati: “Nangauli nkhalutanga ku maungano, nkhamanyanga yayi ico nkhapenjanga, ndipo kuyowoya unenesko, nkhakhumbanga yayi kuteŵetera Yehova.”

³ Nangauli ŵanyake ŵakukhumba kuteŵetera Yehova, ŵangatimbanizgika na ŵanyawo,  kutemwa vya caru na makhumbiro gha kwananga. Para tikuyezgeka, tingataya Ukhristu withu pacokopacoko. Mwaciyelezgero, ŵanandi mu caru ŵakuti dango la mikhaliro yiwemi ilo Baibolo likusambizga lilije nchito lero, panji kuti palije uyo wangafiska kulilondezga. (1 Petros 4:4) Ŵanyake ŵakughanaghana kuti nchakuzirwa yayi kusopa Ciuta umo iyo wakukhumbira. (Yohane 4:24) Mu kalata iyo Paulosi wakalembera Ŵaefeso, wakayowoya kuti caru cili na “mzimu” panji nkharo iyo cikumanyikwa nayo. (Ŵaefeso 2:2) Mzimu uwu ukukoserezga ŵanthu kuti ŵapulikire maghanoghano gha ŵanthu ŵambura kumanya Yehova.

4. Kasi Yesu wakati wuli kulongora kuti nchakuzirwa comene kwa ise kusungilira Ukhristu?

⁴ Ndipouli, pakuti tili ŵateŵeti ŵa Yehova ŵakujipatulira kwa iyo, tikumanya kuti cingaŵa ciheni comene usange yumoza pakati pithu, mwana panji mulara wangataya Ukhristu wake. Kuti tiŵe ŵakukondwa pakuŵa Ŵakhristu, tikwenera kuthemba dango la Yehova na kucita ivyo wakukhumba kwa ise. Nakuti tingafiska kucita ntheura, cifukwa tili kulengeka mu cikozgo cake. (Genesis 1:26; Mika 6:8) Baibolo likuyaniska Ukhristu withu na malaya agho tikuvwara kuti waliyose waghawonenge. Yesu wakacenjezga za nyengo izo tilimo kuti: ‘Ehena, nkhwiza nga ndi munkhungu. Ngwamwaŵi uyo wakuŵa maso, na kusungilira minjilira yake, mzire wende nkhuli, ndipo ŵawone soni zake.’ a (Civumbuzi 16:15) Tikukhumba yayi kuvura mikhaliro iyo Cikhristu cikutisambizga kweniso nkharo yithu kuti tilongozgeke na caru ca Satana. Usange ici cingacitika ndikuti “minjilira” yithu yingavulika, nakuti cingaŵa cakudandauliska kweniso cakukhozga soni.

5, 6. Cifukwa wuli nchakuzirwa kuziza pa vinthu vyauzimu?

⁵ Usange munthu wakumanya kuti Ukhristu ngwakuzirwa, wakumanyikwa na umo wakukhalira. Mwauli? Para munthu uyo wakusopa Yehova wayamba kuyuyura mwaŵi wa kuŵa Mkhristu, wakutimbanizgika, ndipo wakumanya cara ivyo wakupenja. Baibolo likucenjezga kanandi waka pa fundo iyi. Yakobe wakati: ‘Uyo wakukanganya [kukayika] wali nga ndi jigha la nyanja, ilo likuputwa na mphepo, ndipo likusefukira uko na uko. Munthu wantheura waleke kughanaghana kuti wapokerenge kanthu ku Fumu, ndi munthu wa mitima yiŵiri, wakuzgokazgoka mu nthowa zake zose.’—Yakobe 1:6-8; Ŵaefeso 4:14; Ŵahebere 13:9.

⁶ Kasi tingavikilira wuli Ukhristu withu? Nchivici cingatovwira kuti tileke kusurako mwaŵi withu wa kusopa Ciuta Wapacanya Nkhanira? Conde, tiyeni tiwone nthowa izi.

Khozgani Comene Ukhristu Winu

7. Cifukwa wuli nchakovwira kuŵeya Yehova kuti watisande?

⁷ Khozgani ubwezi winu na Yehova nyengo zose. Cinthu cakuzirwa comene ico Mkhristu waliyose wali naco ni ubwezi, pakati pa iyo na Ciuta. (Salmo 25:14; Zintharika 3:32) Para tawona  kuti tayamba kukayikira usange kuŵa Mkhristu nchakuzirwa nadi, tikwenera kujisanda usange tili pa wene na wene nadi na Yehova. Wamasalmo wakaŵeya kuti: “Mundisande, A Yehova, mundiyezge; pimani mtima wane na vinjeru vyane.” (Salmo 26:2) Cifukwa wuli nchakuzirwa kujisanda ntheura? Nchifukwa cakuti ise patekha tikutondeka kumanya makora apo pali mtima withu na makhumbiro ghithu. Yehova pera ndiyo wakumanya makora wunthu withu wa mukati, makhumbiro ghithu, vilato vithu, na maghanoghano ghithu.—Yeremiya 17:9, 10.

8. (a) Kasi tingapindura wuli usange Yehova wangatiyezga? (b) Kasi mwawovwirika wuli kukura mu umoyo winu Wacikhristu?

⁸ Para tapempha Yehova kuti watisande, ndikuti tikumucema kuti watiyezge. Wangazomerezga kuti viyezgo vitiwire mwakuti timanye ivyo vili mu mtima withu. (Ŵahebere 4:12, 13; Yakobe 1:22-25) Tikwenera kuzomera kuti tiyezgeke, cifukwa ni mwaŵi wakuti tilongore usange tili ŵakugomezgeka nadi kwa Yehova. Viyezgo vingalongora usange tili “ŵakufiskika nkhanirankhanira, ŵambura kupelera kanthu.” (Yakobe 1:2-4) Nakuti para tikuyezgeka, tingakura mu umoyo withu wauzimu.—Ŵaefeso 4:22-24.

9. Cifukwa wuli waliyose wakwenera kujiwonera yekha kuti Baibolo likuyowoya unenesko? Longosorani.

⁹ Khorwani pamwekha kuti Baibolo likuyowoya unenesko. Usange tikuleka kughamanya makora Malemba, tingayamba kuwona ngati nchambura kuzirwa kuŵa ŵateŵeti ŵa Yehova. (Ŵafilipi 1:9, 10) Mkhristu waliyose, kwali ni mwana panji mulara, wakwenera kukhorwa pa iyo yekha kuti ivyo wakugomezga mbunenesko uwo wuli mu Baibolo. Paulosi wakaciska Ŵakhristu ŵanyake kuti: “Pimani vinthu vyose; koreskani ico nchiwemi.” (1 Ŵatesalonika 5:21) Ŵakhristu ŵawukirano awo ŵapapi ŵawo ŵakopa Ciuta ŵakwenera kumanya kuti ŵangaŵa Ŵakhristu ŵaunenesko cifukwa ca ŵapapi ŵawo cara. Davide, wakaciska mwana wake Solomoni kuti: “Mumanye Ciuta wa ŵauso, umuteŵetere na mtima wakufikapo.” (1 Midauko 28:9) Solomoni wakawona umo ŵawiske ŵakaŵira na cipulikano mwa Yehova, kweni vikenera kumalira papo yayi. Wakenera kumanya Yehova pa iyo yekha, nakuti ndivyo wakacita. Wakaŵeyelera Ciuta kuti: “Mundipe sono vinjeru na mahara, kuti ndifume na kunjira pamaso pa ŵanthu aŵa.”—2 Midauko 1:10.

10. Cifukwa wuli nkhwananga yayi kufumba mafumbo pa vifukwa viwemi?

¹⁰ Kuti munthu waŵe na cipulikano, wakwenera kumanya vinthu. Paulosi wakati: “Cipulikano cikufuma mu kupulika.” (Ŵaroma 10:17) Kasi wakang’anamuranga vici? Wakang’anamuranga kuti usange tikusambira Mazgu gha Ciuta, tikukhozga cipulikano cithu, tikugomezga ivyo Yehova walayizga, kweniso tikugomezga gulu lake. Tisangenge mazgoro ghakukhorweska para tikufumba mafumbo ghakukhwaskana na Baibolo mwakuti timanye. Kweniso, pa Ŵaroma 12:2, tikusanga ulongozgi wa Paulosi wakuti: “Mupimiske ico ndi khumbo la Ciuta, ciwemi na cakukondweska, na cakufikapo.” Kasi tingacita wuli nthena? Tikwenera “kumanya . . . unenesko.” (Tito 1:1) Mzimu wa Yehova ungatovwira kupulikiska nkhani, nanga zingaŵa zinonono. (1 Ŵakorinte 2:11, 12) Usange tikutondeka kupulikiska, tikwenera kulomba Ciuta kuti watovwire. (Salmo 119:10, 11, 27) Yehova wakukhumba kuti tipulikiske Mazgu ghake, tighagomezge na  kughacita. Iyo wakukondwa usange ŵanthu ŵakufumba mafumbo pa vifukwa viwemi.

Mukondweske Ciuta

11. (a) Kasi ni khumbo wuli la kawiro ilo lingatiziyamo? (b) Kasi tingazisanga wuli nkhongono zakutondera viyezgo?

¹¹ Mukondweske Ciuta, munthu cara. Mwakawiro, taŵanthu tikukhumba kumanyikwa mwa kwendezgana na gulu linyake. Tose tikukhumba ŵabwezi, ndipo tikujipulika makora para ŵanyithu ŵakutitemwa. Para tili ŵasepuka panji ŵasungwana, kweniso para takura, tikudokera comene kuti ticitenge vinthu nga mbanyithu. Kweni nyengo zinyake ŵabwezi ŵithu ŵakutikhumbira nadi viwemi yayi. Iwo ŵakukhumba waka kuti ticitire lumoza viheni. (Zintharika 1:11-19) Para Mkhristu wakulondezga makhumbiro ghaheni gha ŵanyake, kanandi wakujibisa. (Salmo 26:4) Mpositole Paulosi wakacenjezga kuti: “Mungatoleranga makhaliro gha ŵanthu ŵa caru ici [yayi].” (Ŵaroma 12:2, Phangano Liphya) Yehova wakupeleka nkhongono izo tikukhumba kuti titonde viyezgo.—Ŵahebere 13:6.

12. Ni fundo wuli iyo yingatovwira, ndipo tingayezga njani kuti tileke kuyegheka para tikuyezgeka kuti tileke kugomezga Ciuta?

¹² Para tikuyezgeka kuti tiyambe kuyuyura mwaŵi withu wa kuŵa Ŵakhristu, tikumbuke kuti nchakuzirwa kugomezgeka kwa Ciuta kuluska ivyo ŵanandi ŵakughanaghana panji ivyo ŵakutemwa. Mazgu agho ghali pa Exodus 23:2 ghangatovwira comene: “Ungalondezganga unandi wa ŵanthu [cara] kucita uheni.” Apo Ŵaisrayeli ŵanandi ŵakakayikanga kuti Yehova wangafiska ivyo wakalayizga, Kalebi wakakanirathu kukolerana nawo. Iyo wakakhorwa kuti ivyo Ciuta wakalayizga vikaŵa vyaunenesko, ndipo wakatumbikika comene cifukwa ca kucita nthena. (Maŵazgo 13:30; Joshua 14:6-11) Kasi namwe mungakana maghanoghano gha ŵanthu ŵanandi mwakuti muvikilire ubwezi winu na Ciuta?

13. Cifukwa wuli nchamahara kujiphara kuti ndise Ŵakhristu?

¹³ Ŵanthu ŵamanye kuti muli Ŵakhristu. Nthowa yiwemi iyo tingacita kuti tivikilire Ukhristu withu, njakuti tiyambe kucitapo kanthu. Mu nyengo ya Ezra, apo Ŵaisrayeli ŵakugomezgeka ŵakajandizgikanga kucita khumbo la Ciuta, ŵakati: “Tili ŵateŵeti ŵa Ciuta wa kucanya na caru capasi.” (Ezra 5:11) Vyakucita na mazgu ghakususka gha ŵalwani vingatofya. Usange tingaŵa na mtima wakuti tikondweske waliyose mbwenu titondekenge. Ntheura lekani kopa. Nyengo zose nchiwemi kuŵaphalira ŵanthu kuti ndimwe Kaboni wa Yehova. Mungalongosora mwanchindi kweni mwakusimikizga za nkharo yinu, vigomezgo vinu, ndiposo kuti ndimwe Ŵakhristu. Ŵaphalirani ŵanyinu kuti mukukhumba kulondezga mikhaliro yiwemi iyo Yehova wakukhumba. Longosorani kuti mulekenge yayi kugomezgeka na kamoza wuwo. Longorani kuti mukukondwa na nkharo yinu yiwemi. (Salmo 64:10) Usange mukulongora kuti muli Ŵakhristu ŵambura kuleghalegha, mungaŵa ŵakuvikilirika, nakuti ŵanthu  ŵangakhumba kumanya za Yehova na ŵanthu ŵake.

14. Kasi tikwenera kugongowa para tikuhoyeka na kususkika? Longosorani.

¹⁴ Mbunenesko kuti ŵanyake ŵangamuhoyani na kumususkani. (Yuda 18) Para mukuŵalongosolera malango agho mukulondezga ndipo ŵakusurako, lekani kugongowa. (Ezekiel 3:7, 8) Nanga mungayezga wuli, mungaŵagoda yayi ŵanthu awo ŵandakhumbe kupulika. Kumbukani umo wakacitira Faro. Wakakana kugomezga muliri panji munthondwe wuliwose, kusazgapo nyifwa ya mwana wake wakwamba. Wakazomera yayi kuti Mozesi wakatumika na Yehova. Ntheura lekani kopa ŵanthu. Kuti titonde wofi, tiyeni tigomezge Ciuta, ndipo tiŵe na cipulikano mwa iyo.—Zintharika 3:5, 6; 29:25.

Sambirani vya Kale, Nozgekerani vya Munthazi

15, 16. (a) Kasi ciharo cithu cauzimu nchivici? (b) Kasi tingapindura wuli pakughanaghanira ciharo cithu cauzimu mu Mazgu gha Ciuta?

¹⁵ Koleskani ciharo cinu cauzimu. Ŵakhristu ŵazamupindura para ŵakughanaghanira ciharo cawo cauzimu mu Mazgu gha Ciuta. Ciharo ici ni Mazgu ghaunenesko gha Yehova, umoyo wamuyirayira uwo tikulindilira na mwaŵi wa kwimira Ciuta pa nchito ya kupharazga makani ghawemi. Kasi imwe mukuwona kuti ni mwaŵi ukuru kuŵa pakati pa Ŵakaboni ŵake, ŵanthu awo ŵatumika kuponoska ŵanthu na nchito ya kupharazga Ufumu? Kumbukani, Yehova ndiyo wakutipanikizgira kuti: “Ndimwe ŵakaboni ŵane.”—Yesaya 43:10.

 ¹⁶ Mungajifumba mafumbo agha: ‘Kasi ciharo cauzimu ici nchakuzirwa wuli kwa ine? Kasi nchakuzirwa comene mwakuti pa vinthu vyose nkhucita dankha khumbo la Ciuta mu umoyo wane? Kasi nkhuwonga comene cifukwa ca ciharo ici na kutonda viyezgo mwakuti nileke kucitaya?’ Kweniso ciharo cithu cauzimu cingatovwira kuwona kuti tili ŵakuvikilirika, ndipo uwu ni mwaŵi uwo ukusangika na ŵanthu awo ŵali mu gulu la Yehova pera. (Salmo 91:1, 2) Usange tingawona ivyo vyacitika mu gulu la Yehova mazuŵa ghano, tingakhorwa kuti palije munthu na yumoza wuwo uyo wangamara ŵanthu ŵa Ciuta pa caru capasi.—Yesaya 54:17; Yeremiya 1:19.

17. Nchivici cinyake ico cikukhumbikwa kuluska kugomezga waka ciharo cithu cauzimu?

¹⁷ Tingagomezga ciharo cauzimu pera yayi. Waliyose wakwenera kuŵa mubwezi wa Ciuta. Paulosi wakalimbikira kukhozga cipulikano ca Ŵakhristu ŵanyake ku Filipi, ndipo wakaŵalembera mazgu ghakuti: “Ntheura, mwa ŵakutemweka ŵane, nga ndi umo mwaŵira ŵakupulikira mazuŵa ghose, para ndilipo pera cara, kweni sono comenecomene para ine kuti ndilipo cara, fiskani ciponosko ca mwaŵene na wofi na citenthe.” (Ŵafilipi 2:12) Tingathemba munyithu yayi kuti ndiyo watiponoske.

18. Kasi milimo Yacikhristu yingakhozgera wuli kuti tili Ŵakhristu?

¹⁸ Tangwanikani na milimo Yacikhristu. Kwawoneka kuti “munthu wakumanyikwa na nchito zake.” Lero Ŵakhristu ŵatumika kuti ŵacite nchito yakuzirwa comene ya kupharazga makani ghawemi gha Ufumu wa Ciuta. Paulosi wakati: “Apo ine ndili mpositole wa ŵamitundu, nkhucindika uteŵeti wane.” (Ŵaroma 11:13) Nchito yithu ya kupharazga yikutipatura ku caru, ndipo para tikucitako nchito iyi, tikulongora kuti tili Ŵakhristu nadi. Para tikutangwanika comene na milimo ya mpingo, nga ni maungano, kuzenga malo ghakusoperapo, kovwira awo ŵakusuzgika na milimo yinyake, tingajipulika kuti tili Ŵakhristu nadi.—Ŵagalatiya 6:9, 10; Ŵahebere 10:23, 24.

Vyandulo vya Kumanyikwa

19, 20. (a) Kasi ise pa tekha tasanga vyandulo wuli cifukwa ca kuŵa Ŵakhristu? (b) Kasi nchivici cikutovwira kujimanya makora?

¹⁹ Ghanaghanani vyandulo ivyo tasanga cifukwa cakuti ndise Ŵakhristu ŵanadi. Tili na mwaŵi ukuru wakuti Yehova wakutimanya. Mprofeti Malaki wakati: “Awo ŵakumopa Ciuta ŵakayowoyanga, munthu uyu ku munyake; Yehova wakategherezga, wakapulika, ndipo buku la cikumbusko likasimbika [likalembeka] pamaso pake na awo ŵakumopa Yehova na kulanguruka pa zina lake.” (Malaki 3:16) Ciuta wangatiwona kuti tili ŵabwezi ŵake. (Yakobe 2:23) Tikumanya cifukwa ico tiliri ŵamoyo, tikumanya uko tikuya ndipo tikukhumba kucita vinthu vyakwenelera. Kweniso tikulindilira umoyo wambura kumara kunthazi.—Salmo 37:9.

²⁰ Kumbukani kuti Ciuta ndiyo wakumumanyani makora, wakumanya usange muli ŵakuzirwa panji yayi, ivyo ŵanthu ŵakumughanaghanirani vilije nchito. Ŵanyake ŵangatipima mwakuyana na ivyo ŵanthu ŵakuwona kuti ni vyakuzirwa. Kweni kwa ise cakuzirwa nchakuti Ciuta wakutitemwa na kutighanaghanira, tili ŵake. (Mateyu 10:29-31) Ndipo cifukwa cakuti nase tikumutemwa Ciuta, tikukhorwa na umo tiliri, nakuti tikumanya makora ivyo tikwenera kucita mu umoyo withu. “Usange munthu wakutemwa Ciuta, uyo ndiyo wakumanyikwa na iyo.”—1 Ŵakorinte 8:3.

[Mazgu ghamusi]

Kasi Mukukumbuka?

• Cifukwa wuli nchakuzirwa kuti Ŵakhristu ŵavikilirenge Ukhristu wawo?

• Kasi tingakhozga wuli Ukhristu withu?

• Usange tikukhumba kumanya uyo tikwenera kukondweska, kasi ni vinthu wuli ivyo vingatovwira kucita mwamahara?

• Pakuŵa Ŵakhristu, kasi tingazakasanga vici munthazi para tajimanya makora?

[Mafumbo]

[Vithuzithuzi pa peji 21]

Usange tikutangwanika na milimo Yacikhristu, tingakhozga Ukhristu withu