Nkhondo ya Mazgu—Cifukwa Wuli Njakupweteka?

‘Zikufumankhu zinkhondo na zawe mwa imwe?’—YAKOBE 4:1.

APA Yakobe wakafumbanga ŵasilikari Ŵaciroma yayi, awo panyengo iyo ŵakarwanga nkhondo kuti ŵapoke malo, nesi gulu la vigeŵenga la Ŵayuda lakucemeka Sicarii ilo likaŵako mu nyengo iyo. Yakobe wakayowoyanga za mphindano pakati pa ŵanthu ŵaŵiri. Cifukwa wuli? Cifukwa cakuti mphindano zikunanga vinthu nga ni nkhondo. Wonani nkhani za mu Baibolo izi.

Ŵana ŵa Yakobe ŵakamutinkha comene munung’una wawo Yosefe mwakuti ŵakamuguliska ku wuzga. (Genesis 37:4-28) Sauli, Themba la Israyeli, likayezgayezga kuti likome Davide. Cifukwa wuli? Cifukwa ca sanji. (1 Samuel 18: 7-11; 23:14, 15) Yuodiya na Suntuke ŵakatimbanizga mtende wa mpingo wose cifukwa ca mphindano yawo.—Ŵafilipi 4:2.

Mu vilimika vya sonosono apa, ŵanthu ŵakatimbananga na mikondo panji futi kuti ŵamazge mphindano. Kanandi yumoza wa iwo wakakomekanga panji kulemara umoyo wake wose. Mazuŵa ghano, awo ŵambana kanandi ŵakutimbana na mazgu m’malo mwa vilwero. Nangauli pakuŵavya kuthiska ndopa, kweni nkhondo za mazgu zikupwetekeska mtima na kunanga lumbiri lwa munthu. Kanandi ŵanthu ŵambura kwananga ndiwo ŵakupwetekeka mu ‘nkhondo’ izi.

Pulikani ico cikacitika vilimika ivyo vyajumpha: Wasembe munyake wa Anglican wakacombora munyake kuti wasakaza ndarama za chalichi. Ŵanthu ŵanandi ŵakamanya mphindano iyi, ndipo mpingo wawo ukagaŵikana. Ŵanthu ŵanyake mu mpingo ŵakakananga kuŵapo pa visopa para wasembe uyo ŵakamutinkhanga ndiyo wamusopeska. Ŵakatinkhana comene mwakuti ŵakayowoyeskananga yayi para ŵali mu chalichi. Wasembe uyo wakacombora munyake kuti wasakaza ndarama nayo wakati wacomboleka kuti wacita uzaghali, apo ndipo vinthu vikanangikirathu.

Bishopu mulara wa ku Canterbury wakapempha ŵasembe ŵaŵiri aŵa kuti ŵamazge mphindano yawo. Wakayowoya kuti mbembe yawo  yikaŵa nga ni matenda gha “kansa.” Kweniso wakati “nchinthu cakukhozga soni ico cikutukiska zina la Fumu Yithu.” Mu 1997 wasembe yumoza wakazomera kupumura pa nchito yake. Munyake wakalutilira na nchito yake mupaka wakakwaniska vilimika ivyo munthu wakupumulira. Kweni wakalutilira nipera mupaka pa ciphikiro ca kukumbukira zuŵa ilo wakababikira wakati wakwaniska vilimika 70, pa Ogasiti 7, 2001. Nyuzipepara ya Church of England yikati wakapumura pa zuŵa ilo ŵakakumbukiranga Victricius “Mutuŵa.” Kasi Victricius “Mutuŵa” wakaŵa njani? Wakaŵa Bishopu mu vilimika vya mu 400 C.E., uyo ŵakuti wakathyapulika cifukwa wakakana kurwa nkhondo. Pakuyowoya za kupambana mitima pakati pa Victricius “Mutuŵa” na wasembe uyu, nyuzipepara iyi yikati: “Wasembe uyu wakakana yayi kurwa nkhondo” na wasembe munyake.

Ŵasembe aŵa ŵalondezgenge ulongozgi uwo wuli pa Ŵaroma 12:17, 18, mphanyi ŵakajipweteka panji kupweteka ŵanyawo yayi. Lemba ili likuti: ‘Mungawezgeranga munthu uheni pa uheni. Mughanaghanirenge ivyo ni viwemi mu maso gha ŵanthu wose. Usange ndimo kungaŵira, muŵe na mtende na ŵanthu wose.’

Imwe mukucita wuli? Usange munyinu wamubudirani, kasi mukwamba kumutuka na kumunyoza cifukwa ca ukali? Panji kasi mukujikora kuti muleke kuyowoya mazgu agho ghangamupweteka na kuwezgerapo mtende? Usange imwe mwabudira munyinu, kasi mukumugega na kughanaghana kuti vimarenge para pajumpha nyengo? Panji kasi mukuphepiska mwaluŵiro? Kwali mukuphepiska kuti munyinu wamugowokerani panji mukugowokera, muŵenge na umoyo uwemi usange mukuyezgayezga kuti muwezgerepo mtende. Nanga tingapambana na munyithu nyengo yitali, ulongozgi uwo wuli mu Baibolo ungatovwira kumazga mphindano, nga ni umo nkhani yakulondezgapo yikulongosolera.