Fundo Zikuru za m’Buku Lakwamba la Samuel
Mazgu gha Yehova Ngamoyo
Fundo Zikuru za m’Buku Lakwamba la Samuel
MUKAŴA mu cilimika ca 1117 B.C.E. Pakajumpha vilimika pafupifupi 300 kufuma apo Joshua wakamalizgira kupoka Caru ca Layizgano. Ŵanalume ŵalara ŵa mu Israyeli ŵakiza kwa nchimi ya Yehova kuzakapempha cinthu cinyake capadera comene. Nchimi yikafumba Yehova pa nkhani iyi, ndipo wakaŵazomerezga kuti ŵacite umo ŵakakhumbira. Uwu ndiwo ukaŵa umaliro wa nyengo ya Ŵeruzgi na kwamba kwa nyengo ya mathemba. Buku Lakwamba la Samuel likulongosora vinthu vyakukondweska ivyo vikacitika pa nyengo iyi mu Israyeli.
Buku Lakwamba la Samuel, ilo likalembeka na Samuyeli, Natani, na Gadi, likatora vilimika 102, kwamba mu 1180 mupaka mu 1078 B.C.E. (1 Midauko 29:29) Likulongosora za ŵalongozgi ŵanayi ŵa Israyeli. Ŵaŵiri ŵakaŵa ŵeruzgi, ŵaŵiri mathemba; ŵaŵiri ŵakaŵa ŵakupulikira Yehova, ŵaŵiri ŵambura kupulikira. Kweniso likulongosora za ŵanakazi ŵaŵiri ŵa nkharo yiwemi ndiposo cinkhara ca nkhondo kweni cakuzika. Ku ŵanthu aŵa tikusambirako za maghanoghano na vyakucita ivyo tikwenera kulondezga na kugega. Ntheura ivyo vili mu buku Lakwamba la Samuel vingaŵa vyankhongono pa maghanoghano na vyakucita vithu.—Ŵahebere 4:12.
SAMUYELI WAKWAMBA KWERUZGA M’MALO GHA ELI
Yikaŵa nyengo ya Ciphikiro ca Kulonga, ndipo Hana, uyo wakakhalanga ku Rama, wakaŵa wakukondwa comene. a Yehova wakazgora malurombo ghake, wakababa mwana musepuka. Kuti wafiske cilapo cake, Hana wakapeleka Samuyeli mwana wake kuti wateŵeterenge pa “nyumba ya Yehova.” Samuyeli “wakateŵetera Yehova pamaso pa Eli mupristi.” (1 Samuel 1: 24; 2:11) Samuyeli wacali mucoko, Yehova wakayowoya nayo, wakamuphalira kuti weruzgenge nyumba ya Eli. Apo Samuyeli wakakuranga, ŵanthu wose mu Israyeli ŵakamanya kuti ni nchimi ya Yehova.
Nyengo yikati yalutapo, Ŵafilisiti ŵakiza kuzakarwa nkhondo na Ŵaisrayeli. Ŵakapoka Likasa na kukoma ŵana ŵanalume ŵaŵiri ŵa Eli. Eli mucekuru wakafwa wakati wapulika nkhani iyi. Iyo ‘wakeruzga Israyeli vilimika makumi ghanayi.’ (1 Samuel 4:18) Ŵafilisiti ŵakasuzgika comene cifukwa ca kusunga Likasa, ntheura ŵakaliwezgera ku Ŵaisrayeli. Pa nyengo iyi Samuel wakeruzganga Israyeli, ndipo mu caru mukaŵa mtende.
Mafumbo gha m’Malemba Ghazgoleka:
2:10—Cifukwa wuli Hana wakalomba kuti Yehova ‘wamupe nkhongono karonga wake’ peneapo mu Israyeli mukaŵavya karonga? Vikayowoyeka kale mu Dango la Mozesi kuti Ŵaisrayeli ŵazamuŵa na themba panji karonga. (Duteronome 17:14-18) Mu ucimi uwo Yakobe wakayowoya wakati wakhala pacoko waka kuti wafwe, wakati: “Nthonga ya ufumu kuti yamkuwukako kwa Yuda cara.” (Genesis 49:10) Ndiposo, pakuyowoya za Sara, gogo wa Ŵaisrayeli, Yehova wakati: “Mafumu gha ŵanthu ghafumenge mwa iye.” (Genesis 17:16) Ipo Hana wakalombanga za karonga wa kunthazi.
3:3—Kasi Samuyeli wakagona nadi mu Malo Ghatuŵa Comene? Yayi, ndimo wakagona yayi. Samuyeli wakaŵa Mulevi wa mbumba ya Kohati iyo yikaŵa ya usofi yayi. (1 Midauko 6:33-38) Pa cifukwa ici, wakaŵa wakuzomerezgeka yayi kunjiramo na kuwona “vinthu vyakupatulika kwakuluska.” (Maŵazgo 4:17-20) Malo ghakupatulika agho Samuyeli wakazomerezgekanga kunjiramo lukaŵa luŵaza lwa cihema pera. Wakwenera kuti ndimo wakagona. Kwambura kukayika, Eli nayo wakagona mu luŵaza lwa cihema, kweni pataliko na apo wakagona Samuyeli. Mazgu ghakuti “para pakaŵa Likasa la Ciuta” ghakwenera kuti ghakung’anamura malo ghose agho pakaŵa cihema.
7:7-9, 17—Cifukwa wuli Samuyeli wakapeleka sembe yakocha na kuzenga jochero ku Rama, peneapo sembe zikeneranga kupelekeka pa malo agho Yehova wakasankha pera? (Duteronome 12:4-7, 13, 14; Joshua 22:19) Likasa lakupatulika likati latoreka pa cihema ku Shilo, Yehova wakaŵaso pa malo ghara yayi. Mwantheura, pakuti Samuyeli wakaŵa mwimiliri wa Ciuta, wakapeleka sembe yakocha pa Mizpa na kuzenga jochero ku Rama. Nakuti tikukayika yayi kuti Yehova wakazomerezga ivyo wakacita.
Ivyo Tikusambirapo:
1:11, 12, 21-23; 2:19. Cizgoŵi ca kutemwa kulomba ico Hana wakaŵa naco, kujiyuyura, kuwonga lusungu lwa Yehova, na citemwa ico wakaŵa naco, nchiyelezgero ciwemi kwa ŵanakazi wose ŵakopa Ciuta.
1:8. Elikana wali kutipa ciyelezgero ciwemi nadi ca umo tingacitira pakukhozga ŵanyithu na mazgu! (Job 16:5) Cakwamba wakafumba Hana makoramakora mwambura kumususka, wakati: ‘Kasi nchivici ico mtima wako ukuŵinya naco?’ Ici cikamovwira kuti wayowoye ivyo vikaŵa kusingo kwake. Pamanyuma pake Elikana wakamusimikizgira kuti wakumutemwa, wakati: “Kasi ine asi ndaluska ŵana ŵanalume khumi kwa iwe?”
2:26; 3:5-8, 15, 19. Para tikucita mulimo uwo Ciuta watipa na mtima wose, para tikupulikira masambiro ghauzimu agho tikupokera, na para tili ŵanchindi, ‘tikulumbika’ na Ciuta na ŵanthu wuwo.
4:3, 4, 10. Nanga lingaŵa likasa lakupatulika la phangano likatondeka kuŵa cinthumwa cakuti civikilire Ŵaisrayeli. Tikwenera ‘kujivikilira ku vikozgo.’—1 Yohane 5:21.
THEMBA LAKWAMBA LA ISRAYELI —KASI LIKACITA MAKORA PANJI LIKATONDEKA?
Samuyeli wakaŵa wakugomezgeka kwa Yehova umoyo wake wose, kweni ŵana ŵake ŵanalume ŵakenda mu nthowa za Ciuta cara. Ŵanalume ŵalara mu Israyeli ŵakati ŵalomba kuti ŵaŵe na themba, Yehova wakaŵazomerezga. Samuyeli wakalondezga ulongozgi wa Yehova na kuphakazga Sauli, mwanalume wakutowa wa fuko la Benjamini, kuŵa themba. Sauli wakakhozga ufumu wake mwa kuthereska Ŵaamoni.
Jonatani, mwana wacikanga wa Sauli, wakathereska gulu la ŵasilikari ŵa ku Filisiti. Ŵasilikari ŵanandi ŵa ku Filisiti ŵakiza kuti ŵazakatimbane na Ŵaisrayeli. Sauli wakawopa comene, wakajumpha dango na kupeleka yekha sembe. Jonatani na musepuka uyo wakayeghanga mahomwa ghake, wakaluta kukarwa na gulu linyake la ŵasilikari ŵa ku Filisiti. Ndipouli, cifukwa cakuti Sauli wakarapa kwambura kughanaghanira, ŵakatondeka kuthereskerathu Ŵafilisiti. Sauli wakarwa nkhondo na ŵalwani ŵake wose “madera ghose.” (1 Samuel 14:47) Kweni wakati wathereska Ŵaamaleki, wakatondeka kupulikira Yehova mwa kusidako ivyo ‘vikapelekeka kuti vikomeke.’ (Leviticus 27:28, 29) Lekani Yehova wakamukana Sauli kuŵa themba.
Mafumbo gha m’Malemba Ghazgoleka:
9:9—Kasi mazgu ghakuti ‘uyo lero wakucemeka nchimi kale wakacemekanga muwoni’ ghakung’anamuraci? Ng’anamuro la mazgu agha likwenera kuŵa lakuti apo nchimi zikamba kumanyikwa comene mu mazuŵa gha Samuyeli na mu nyengo ya mathemba mu Israyeli, lizgu lakuti “nchimi” likanjira m’malo mwa lizgu lakuti “muwoni.” Samuyeli wakuyowoyeka kuti ndiyo wakaŵa nchimi yakwamba.—Milimo 3:24.
14:24-32, 44, 45—Kasi Ciuta wakamukwiyira Jonatani cifukwa ca kurya uci mwakupambana na cirapo ca Sauli? Vikuwoneka kuti Ciuta wakamukwiyira yayi Jonatani cifukwa ca ico wakacita. Cakwamba, Jonatani wakamanya yayi za cirapo ca Awiske. Ndiposo cirapo ici, ico cikwenera kuti cikacitika cifukwa ca kukhumba waka kujilongora panji kulongora mazaza mwambura kwenelera, cikasuzga ŵanthu comene. Kasi Ciuta wangazomerezga wuli cirapo canthena ici? Nangauli Jonatani wakazomera kulangika cifukwa ca kuleka kusunga cirapo ici, kweni wakafwa yayi.
15:6—Cifukwa wuli Sauli wakacitira lusungu Ŵakeni? Ŵakeni ŵakaŵa ŵana ŵa wiskevyara wa Mozesi. Ŵakawovwira Ŵaisrayeli ŵakati ŵafuma pa Lupiri lwa Sinayi. (Maŵazgo 10:29-32) Kweniso Ŵakeni ŵakakhalapo lumoza na Ŵayuda mu caru ca Kenani. (Ŵeruzgi 1:16) Nangauli pamanyuma pake Ŵakeni ŵakakhala na Ŵaamaleki na mitundu yinyake yakupambanapambana, kweni ŵakalutilira kuŵa paubwezi na Ŵaisrayeli. Ipo lekani Sauli wakaŵaleka Ŵakeni kwambura kuŵakoma.
Ivyo Tikusambirapo:
9:21; 10:22, 27. Cifukwa cakuti Sauli wakaŵa wakujicepeska pambere wandaŵe themba, cikamovwira kuti waleke kucita vinthu mwamphuvya peneapo ŵanthu ŵanji “ŵawakawaka” ŵakati wangaŵa themba yayi. Mtima wanthena uwu nchivikiliro nadi kuti tileke kucita vinthu mwaucindere!
12:20, 21. Tileke kuzomerezga “vinthu vyawaka” nga nkhugomezga ŵanthu, kuthemba ŵasilikari, panji vikozgo, kuti vitipatuske pakuteŵetera Yehova.
12:24. Kuwona na ‘kughanaghanira [vinthu] vikuru ivyo [Yehova] wakacitira’ ŵanthu ŵake kale na sono wuwo ndico cingatovwira comene kuti tilutilire kopa Yehova na kumuteŵetera na mtima withu wose.
13:10-14; 15:22-25, 30. Tileke kujikuzga, kwali mwa kucita uheni panji kuŵa na mtima wakujiŵikamo.—Zintharika 11:2.
MULISKA MUSEPUKA WAKASANKHIKA KUŴA THEMBA
Samuyeli wakaphakazga Davide wa fuko la Yuda kuŵa themba la kunthazi. Pakati pajumpha nyengo yicoko waka, Davide wakakoma Goliyati, cinkhara ca nkhondo ca ku Filisiti, na libwe limoza la fyata. Davide na Jonatani ŵakaŵa paubwezi wa dyaka apa nane nidyakepo. Sauli wakasankha Davide kuŵa mulara wa ŵasilikari ŵake. Cifukwa cakuti Davide wakatonda nkhondo zinandi, ŵanakazi mu Israyeli ŵakimba kuti: “Sauli wakoma vikwi vyake; Davide wakoma vikwi vyake khumi.” (1 Samuel 18:7) Cifukwa ca sanji, Sauli wakakhumbanga kukoma Davide. Sauli wakati wayezga katatu kuti wamukome, Davide wakacimbira na kwamba kwendendeka.
Pa nyengo iyo wakendendekanga, Davide wakamuleka kaŵiri Sauli kwambura kumukoma. Nyengo iyi, wakakumana na mwanakazi wakutowa Abigelu, ndipo wakamutora kuŵa muwoli wake. Ŵafilisiti ŵakati ŵiza kuzakatimbana na Israyeli, Sauli wakafumba Yehova. Kweni Yehova wakamuleka. Samuyeli wakaŵa kuti wafwa. Cifukwa cakuti cakucita cikamusoŵa, Sauli wakafumba wa maula uyo wakamuphalira kuti wamukomeka na Ŵafilisiti ku nkhondo. Sauli wakapwetekeka comene pa nkhondo iyi, ndipo ŵana ŵake ŵanalume ŵakakomeka. Paumaliro Sauli wakafwa, wakatondeka. Pa nyengo iyi Davide wakaŵa wacali kubisama.
Mafumbo gha m’Malemba Ghazgoleka:
16:14—Kasi mzimu uheni uwo ukasuzga Sauli ni vici? Mzimu uheni uwo ukasuzga Sauli ghakaŵa maghanoghano gha mtima wake, panji ico cikamutumanga kucita uheni. Yehova wakati wawuskamo mzimu wake utuŵa, Sauli wakaleka kulongozgeka na mzimu uwu ndipo wakamba kulongozgeka na mzimu wake uheni. Pakuti Ciuta wakazomerezga mzimu uwu kutora malo gha mzimu Wake utuŵa, lekani mzimu uheni uwu ukucemeka “mzimu uheni wakufumira kwa Yehova.”
17:55-58—Pakuwona ivyo vili pa 1 Samuel 16:17-23, cifukwa wuli Sauli wakafumba kuti Davide wakaŵa mwana wanjani? Apa Sauli wakafumbanga waka zina la awiske ŵa Davide yayi. Iyo wakwenera kuti wakakhumbanga kumanya umo wakaŵira wiske wa musepuka uyo wakacita mulimo wakuzizwiska wa kukoma cinkhara ca nkhondo.
Ivyo Tikusambirapo:
16:6, 7. M’malo mwa kukhorwa waka na kawonekero ka munthu panji kweruzga luŵiro ŵanyithu, tikwenera kuŵawona umo Yehova wakuŵawonera.
17:47-50. Na cikanga, tingatonda awo ŵakutisuska panji ŵalwani ŵankhongono nga ni Goliyati awo ŵakutisuzga cifukwa “nkhondo nja Yehova.”
18:1, 3; 20:41, 42. Tingasanga mabwezi gheneco pakati pa awo ŵakutemwa Yehova.
21:12, 13. Yehova wakukhumba kuti tigwiliskirenge nchito mahara na maluso ghithu para tili mu suzgo. Wali kutipa Mazgu ghake, agho ghakutipa vinjeru, kutovwira kumanya vinthu, na kughanaghana. (Zintharika 1:4) Ndiposo tili na ŵalara Ŵacikhristu kuti ŵatovwire.
24:6; 26:11. Davide nchiyelezgero ciwemi comene ca umo tikwenera kucindikira ŵakuphakazgika ŵa Yehova!
25:23-33. Mahara gha Abigelu nchiyelezgero ciwemi comene.
28:8-19. Mizimu yiheni yikujiyaniska na ŵanthu awo ŵalikufwa kuti yipuluske panji kupweteka ŵanthu. Tikwenera kugega kugomezga mizimu kwa mtundu wuliwose.—Duteronome 18:10-12.
30:23, 24. Fundo iyi yafuma pa Maŵazgo 31:27, ndipo yikulongora kuti Yehova wakuzirwiska comene awo ŵakucita milimo yicokoyicoko mu mpingo. Ipo cilicose ico tikucita, tiyeni ‘ticite na mtima wose, nga ndi para nkhu Fumu [Yehova], ku ŵanthu cara.’—Ŵakolose 3:23.
Kasi ‘Ciwemi Kuluska Sembe’ Nchivici?
Kasi ni fundo wuli yikuru iyo tikusambirapo pa ivyo vikacitikira Eli, Samuyeli, Sauli, na Davide? Ni iyi: “Kupulikira nkhuwemi kwakuluska sembe zakuwombora, kutegherezga kwakuluska mafuta gha ŵathondoti. Pakuti kugaluka kuli nga mbuheni wa ufwiti, mtafu uli nga nkhwananga na kusopa vikozgo.”—1 Samuel 15:22, 23.
Kupharazga na kupanga ŵasambiri ni nchito yakuzirwa comene! Peneapo tikupeleka sembe ya “vipasi vya milomo yithu” kwa Yehova, tikwenera kuyezgayezga comene kupulikira ulongozgi uwo wakutipa kwizira mu Mazgu ghake na gulu lake pa caru capasi.—Hoseya 14:2; Ŵahebere 13:15.
[Mazgu ghamusi]
a Kuti mumanye uko kuli malo agho ghakuzunulika mu buku Lakwamba la Samuel, wonani burosha la “Wonani Caru Ciweme,” pa peji 18-19, lakupharazgika na Ŵakaboni ŵa Yehova.
[Cithuzithuzi pa peji 31]
Themba lakwamba la Israyeli likaŵa lakujicepeska, kweni likasintha na kwamba kujikuzgara
[Cithuzithuzi pa peji 32]
Kasi tingaŵa na cigomezgo wuli para ŵalwani ŵankhongono nga ni Goliyati ŵakutisuska?