Kuponoskeka na Ucizi, na Milimo Pera Cara
Kuponoskeka na Ucizi, na Milimo Pera Cara
“Muli kuponoskeka na . . .cipulikano; . . . kuti nkhwa milimo cara, mzire munthu wajikuzge waka.”—ŴAEFESO 2:8, 9.
1. Kasi Ŵakhristu ŵakupambana wuli na ŵanthu ŵanandi pa ivyo ŵakucita, ndipo cifukwa wuli?
LERO ŵanthu ŵakujikuzga comene cifukwa ca ivyo ŵacita ndipo kanandi ŵakujilumba. Kweni Ŵakhristu ŵakucita nthena yayi. Ŵakujihaya yayi pa ivyo ŵakucita, nanga yingaŵa milimo yakukhwaskana na kusopa kwaunenesko. Nangauli ŵakukondwa na ivyo ŵanthu ŵa Yehova ŵakucita, kweni ŵakutemwa yayi kuyowoya ivyo iwo ŵakucita paŵekha. Ŵakumanya kuti pakuteŵetera Yehova, cilato ciwemi ndico nchakuzirwa comene kuluska milimo iyo munthu wangacita. Waliyose uyo wazamupokera cawanangwa ca umoyo wamuyirayira nchifukwa ca milimo yayi, kweni cipulikano na ucizi wa Ciuta.—Luka 17:10; Yohane 3:16.
2, 3. Kasi Paulosi wakakondwa na vici, ndipo cifukwa wuli?
2 Mpositole Paulosi wakayimanyanga makora fundo iyi. Wakati walomba katatu kuti wapumure ku ulwilwi wa “munga . . . mu thupi” lake, Yehova wakamuzgora kuti: “Ucizi wane ukukwanira iwe: cifukwa nkhongono zane zikufiskika mu kutomboroka.” Paulosi wakajiyuyura na kupulikira Yehova, ndipo wakati: ‘Ntheura ndithumbwenge mbwenu na kukondwa kukuru mu kutomboroka kwane, kuti nkhongono za Khristu zindibenekelere.’ Nase tikwenera kutolera mtima wa kujiyuyura wa Paulosi.—2 Ŵakorinte 12:7-9.
3 Nangauli Paulosi wakacita milimo yikuru Yacikhristu, wakamanya kuti wakayicita na nkhongono zake yayi. Iyo wakayowoya mwakujiyuyura kuti: “Cawanangwa ici cikaninkhika [cikapika] kwa ine, nda mucoko ku ŵacoko comene ŵa wose ŵatuŵa, cakuti ndipharazge ku ŵamitundu usambazi wambura mapenjeko wa Khristu.” (Ŵaefeso 3:8) Apa Paulosi wakajikuzganga yayi, nesi kujirunjiska. “Ciuta wakwimikana na ŵakujikuzga, kweni wakuŵapa ucizi ŵakujiyuyura.” (Yakobe 4:6; 1 Petros 5:5) Kasi tikujiyuyura na kujiwona kuti tili ŵapasi kuluska ŵabali ŵithu umo wakacitira Paulosi?
‘Kupima Ŵanyithu Kuti Mbakuru’
4. Cifukwa wuli cingaŵa cinonono kuwona ŵanyithu kuti mbakuru kuluska ise?
4 Mpositole Paulosi wakacenya Ŵakhristu kuti: “[Lekani] kucita kanthu mu mphindano panji mu kujikuzga, kweni na mtima wa kujiyuyura munthu yose wapime munyake [kuti] ndi mukuru wakuluska mwene.” (Ŵafilipi 2:3) Panji cingaŵa cinonono kuti ticite nthena, comene usange tili na udindo. Panji cingaŵa cinonono comene cifukwa cakuti tili kutorako mzimu wa kuphalizgana uwo wazara mu caru. Panyake apo tikaŵa ŵana tikasambizgika kuti tiluskenge ŵanyithu panyumba kweniso ku sukulu. Panji ŵakatikhuŵirizganga kuti titondenge pa maseŵero panji kuluska ŵasambiri wose pa sukulu. Nchiwemi kulimbikira kuti ticite makora comene pa cinthu cilicose cakwenelera. Ndipouli, Ŵakhristu ŵakucita nthena mwakuti ŵamanyikwe yayi, kweni kuti ŵapindure pa ivyo ŵakucita na kovwira ŵanyawo. Cingaŵa ciheni usange tingaŵa na mtima wakuti tiluskenge kuti ŵanthu ŵatilumbe. Mwauli?
5. Kasi nchivici cingacitika para tikuleka kucenjera na nkharo ya kuphalizgana?
5 Munthu uyo wakuleka kucenjera nayo nkharo ya kuphalizgana panji kujikuzga, wangamba mtafu na kuzgoka kajilange. Iyo wangamba kucitira sanji ŵanyake cifukwa ca maluso na mauteŵeti ghawo. Lemba la Zintharika 28:22 likuti: ‘Uyo wakudokera usambazi wakupusumphira cuma, walije kumanya kuti ukavu umuwirenge.’ Wangawunukira mazaza agho ghakumwenelera yayi. Wangamba kunyunyuta na kususka ŵanyake mwakuti wajikhungurufye. Ŵakhristu ŵakwenera kucenjera na nkharo iyi. (Yakobe 3:14-16) Usange munthu wakucita nthena ndikuti wayamba kughanaghana vyake pera.
6. Kasi Baibolo likucenjezga wuli za mzimu wa kuphalizgana?
6 Ntheura Baibolo likuciska Ŵakhristu kuti: “Tilekenge kujikuzga, kukalifyana, panji kucitirana sanji.” (Ŵagalatiya 5:26) Mpositole Yohane wakayowoya za Mkhristu uyo wakwenera kuti wakaŵa na mzimu uwu, wakati: ‘Nkhalembera ku Ekleziya: kweni Diotrefe, uyo wakutemwa kuŵa mukuru mwa iwo, wakukana kutipulika. Ntheura, usange nkhwiza, ndikumbuskenge milimo yake iyo wakuyicita, pakutiŵereŵetera na mazgu ghaheni.’ Cingaŵa cacitima comene usange Mkhristu wangamba nkharo iyi!—3 Yohane 9, 10.
7. Kasi nchivici ico Mkhristu wakucita yayi pa nchito mu caru cakutemwa ciphalizgano ici?
7 Vingacitika yayi kuti Mkhristu walekerethu kuphalizgana na ŵanyake mu vyakucita vyake vyose. Ku nchito wangakhumbikwira kuphalizgana na ŵanyake pa malonda panji na awo ŵakupanga katundu wakuyana na wake, panji awo ŵakucita nchito iyo nayo wakugwira. Nangauli viŵe nthena, Mkhristu wakwenera kucita bizinesi yake mwanchindi, mwacitemwa kweniso mwakughanaghanira ŵanyake. Waleke kucita uryarya na kujipangira lumbiri lwakuti wakuluska ŵanyake mu caru ici cakutemwa kuphalizgana na kujighanaghanira. Wakumanya kuti cakuzirwa comene mu umoyo wake nkhuluska ŵanyake pa cilicose yayi. Usange nchakwenelera kucita nthena pa nchito, ipo nchakuzirwa comene kuti ndimo ticitirenge mu mpingo!
Kujiyaniska na Munthu “Munyake Cara”
8, 9. (a) Cifukwa wuli ŵalara ŵakuphalizgana na ŵanyawo yayi? (b) Cifukwa wuli lemba la 1 Petros 4:10 ndakovwira kwa ŵateŵeti ŵa Ciuta wose?
8 Mazgu ghakulembeka na nkhongono ya mzimu ghakulongosora mtima uwo Ŵakhristu ŵakwenera kuŵa nawo pakusopa, ghakuti: “Munthu yose wapime mulimo wake na wake, apo ndipo . . . waŵenge na kuthumbwa mwa yekha pera, ndipo mu munyake cara.” (Ŵagalatiya 6:4) Ŵalara mu mpingo ŵakumanya kuti ŵakuphalizgana na ŵanyawo yayi, ntheura ŵakuteŵetera mwakukolerana. Ŵakukondwa na ivyo waliyose wakucita kuti mpingo wendenge makora. Ntheura ŵakukana nkharo ya kuphalizgana, ndipo ŵakulongora kuti mbakukolerana mwakuti mpingo utolereko.
9 Ŵalara ŵanyake ŵakucita makora kuluska ŵanyawo cifukwa cakuti ŵakababika ni kale, cifukwa ca kuzgoŵera panji cifukwa ca maluso agho ŵali nagho, panyake cifukwa cakuti ŵakuŵanika makora tunthu. Lekani ŵalara ŵakucita milimo yakupambana mu gulu la Yehova. Ŵakujiyaniska na ŵanyawo yayi, kweni ŵakukumbuka ulongozgi wakuti: “Kwakulingana na umo munthu na munthu wali kupokelera cawanangwa, muteŵeteranenge naco mwaŵene, nga mbalinda ŵalara ŵawemi ŵa ucizi wamtundu mtundu wa Ciuta.” (1 Petros 4:10) Lemba ili ndakovwira kwa ŵateŵeti ŵa Yehova wose, cifukwa wose ŵali kupokera cawanangwa ca kumanya vinthu kweniso mwaŵi wa kupharazga.
10. Kasi tingacita wuli kuti Yehova wakondwe na uteŵeti withu wakupatulika?
10 Ciuta wakukondwa na uteŵeti withu wakupatulika usange tikuwucita cifukwa ca citemwa na kujipeleka, cifukwa cakuti ŵanyithu ŵatiwone yayi. Ntheura tikwenera kucita milimo yakukhozgera kusopa kwanadi na vilato vyakwenelera. Nangauli palije uyo wangamanya ivyo vili mu mtima wa munyake, Yehova “wakupima mtima wa munthu.” (Zintharika 24:12; 1 Samuel 16:7) Ipo tijifumbenge kuti, ‘Cifukwa wuli nkhucita milimo ya cipulikano?’—Salmo 24:3, 4; Mateyu 5:8.
Kuwona Milimo Yithu Mwakwenelera
11. Ni mafumbo wuli ghakukhwaskana na uteŵeti agho tingaghanaghanirapo?
11 Usange cifukwa ico tikucitira uteŵeti ndico nchakuzirwa kuti Yehova watitemwe, ipo tikwenera kucita milimo ya cipulikano mupaka mpha? Kasi nchakwenelera nadi kulemba milimo iyo tikucita na unandi wake? Asi cakuzirwa nkhucita uteŵeti na cilato ciwemi? Agha ni mafumbo ghakupulikikwa nadi, cifukwa cakuzirwa comene ni lipoti yayi, kweni milimo iyo Mkhristu wakucita.
12, 13. (a) Kasi ni vifukwa wuli vinyake ivyo tikulembera lipoti para tapharazga? (b) Yowoyani vifukwa ivyo tikukondwera usange tikuwona lipoti lose la nchito yithu ya kupharazga.
12 Pulikani ivyo buku lakuti Ŵakunozgeka Kucita Khumbo la Yehova likuyowoya: “Ŵalondezgi ŵa Yesu Khristu mu nyengo zakale ŵakaŵa ŵakunweka kuti ŵamanye umo nchito ya kupharazga yikalutiranga panthazi. (Marko 6:30) Buku la Milimo likutiphalira kuti pakaŵa ŵanthu pafupifupi 120 awo ŵakaphakazgika na mzimu utuŵa pa Pentekoste. Mukuluta kwa nyengo, ciŵelengero ca ŵasambiri cikasazgikira ndipo cikafika pa 3,000, pamanyuma pake cikakwana 5,000. . . . (Milimo 1:15; 2:5-11, 41, 47; 4:4; 6:7) Lipoti la kusazgikira kwa ŵanthu aŵa likenera kuti likakhozga nadi ŵasambiri!” Lekani Ŵakaboni ŵa Yehova nawo ŵakulemba makora ivyo vikucitika pa caru cose capasi pakufiska mazgu gha Yesu ghakuti: “Makani ghawemi gheneagha gha ufumu ghamkupharazgika mu vyaru vyose ghaŵe cipanikizgo ku mitundu yose; penepapo ndipo umaliro uti wizenge.” (Mateyu 24:14) Malipoti agha ghakulongora ivyo vikucitika pa caru cose capasi. Ghakulongora uko wovwiri ukukhumbikwa na mtundu kweniso unandi wa mabuku agho ghakukhumbikwa kuti nchito ya kupharazga yende makora.
13 Ntheura usange tikulemba na kupeleka ivyo tikucita pakupharazga, vikovwira kuti ticitenge makora mulimo wa kupharazga makani ghawemi gha Ufumu. Nakuti kasi nkhongono zikukwera yayi para tikupulika umo ŵabali ŵithu ŵakucitira mu vyaru vinyake pa caru capasi? Para tikupulika umo nchito yikwendera makora na umo yikuthandazgikira pa caru cose, tikukondwa comene, ndipo tikukhuka na kumanya kuti Yehova wakutitumbika. Kweniso tikukondwa comene kumanya kuti ivyo waliyose wakacita ŵali kusazgapo pa lipoti la caru cose! Ivyo tikacita vikaŵa vicoko comene pakuyaniska na lipoti lose, kweni Yehova wakaviwona. (Marko 12:42, 43). Kumbukani kuti kwambura lipoti linu mphanyi lipoti la caru cose likapeleŵera.
14. Padera pa kupharazga na kusambizga, kasi tikucita milimo wuli yinyake pakusopa Yehova?
14 Kaboni waliyose wakucita vinandi cifukwa cakuti wali kujipeleka kuŵa muteŵeti wa Yehova, kweni milimo iyi yikulembeka yayi pa lipoti lake. Vinthu ivi vikuŵapo yayi pa lipoti: sambiro la Baibolo la ise taŵene, kuluta ku maungano na kuzgorapo, milimo ya mpingo, kovwira Ŵakhristu ŵanyithu para ŵasuzgika, kovwira pa nchito ya pa caru cose na vyawanangwa, na vinyake. Ntheura, nangauli lipoti lithu la uteŵeti wa m’munda likutovwira kuti tilutizge kupharazga na mwamphu kweniso kuti tileke kucita mphwayi, kweni tileke kuliwona kuŵa lakuzirwa kuluska vyose. Tileke kuliwona nga ni layisensi yakusangira umoyo wamuyirayira.
‘Kupamphukira Milimo Yiwemi’
15. Nangauli tingapona na milimo pera yayi, cifukwa wuli njakuzirwa?
15 Tawona kuti nangauli tingapona na milimo pera yayi, kweni njakukhumbikwa. Lekani Ŵakhristu ŵakucemeka “ŵanthu ŵakutuŵiskika kuti ŵaŵe ŵake, ŵakupamphukira milimo yiwemi,” kweniso lekani ŵakuciskika kuti ‘ŵaghanaghaniranenge na kukhuŵilizgirana ku kutemwa na ku milimo yiwemi.’ (Tito 2:14; Ŵahebere 10:24) Yakobe, mulembi munyake wa Baibolo wakayowoya fundo iyi mwakudunjika kuti: “Nga ndi umo thupi padera pa mzimu ndakufwa, ntheuraso nchakufwa cipulikano padera pa milimo.”—Yakobe 2:26.
16. Kasi nchivici cakuzirwa comene kuluska milimo, kweni tikwenera kucenjera na vici?
16 Nangauli milimo yiwemi njakuzirwa, kweni cakuzirwa comene ni vifukwa ivyo vikutituma kuti tiyicite. Ntheura nchamahara kuti tisandenge vilato vithu. Munthu wangamanya yayi ivyo vili mu mtima wa munyake, ntheura tikwenera kucenjera kuti tileke kweruzga ŵanyithu. Tikufumbika kuti: “Ndiwe njani ukweruzga mteŵeti waŵene?” Zgoro lake likumanyikwirathu: “Mweneco ku fumu yake na yake wakwima panji wakuwa.” (Ŵaroma 14:4) Tizamweruzgika na Yehova, Fumu ya ŵanthu wose kweniso Mweruzgi wakwimikika, Khristu Yesu. Tizamweruzgika cifukwa ca milimo yithu pera yayi kweniso mwakuyana na ivyo vili mu mitima yithu, mwaŵi uwo tapika, citemwa cithu na kujipeleka. Yehova na Khristu Yesu pera ndiwo ŵakumanya makora usange tikufiska ivyo Ŵakhristu ŵakuphalirika kucita mwakuyana na mazgu gha mpositole Paulosi, ghakuti: “Uŵe na mwamphu kujilongora wakulumbika kwa Ciuta, wanchito wambura kukhozgeka soni, wakurunjika makora mazgu gha unenesko.”—2 Timote 2:15; 2 Petros 1:10; 3:14.
17. Nangauli tikucita vinthu na mwamphu, cifukwa wuli tikwenera kukumbuka Yakobe 3:17?
17 Yehova wakukhumba vinandi comene yayi kwa ise. Fundo yinyake iyo tikuwona pa Yakobe 3:17 njakuti “vinjeru ivyo nvyakucanya . . . nvyakuzika.” Asi nchinthu camahara kuyezga Yehova pa fundo iyi? Ipo tileke kujipimira vinthu ivyo tingatondeka kufiska, panji kughanaghana kuti ndivyo ŵabali ŵithu ŵacitenge.
18. Kasi tingalindilira kuti viŵenge wuli para tikuyiwona mwakwenelera milimo yithu na ucizi wa Yehova?
18 Cikuru tikuyiwona mwakwenelera milimo ya cipulikano na ucizi wa Yehova, tiŵenge ŵakukondwa nyengo zose, kulongora kuti tili ŵateŵeti ŵa Yehova nadi. (Yesaya 65:13, 14) Nase tingatumbikika pamoza na ŵanthu ŵa Yehova, nangauli tikucita milimo mwakuyana na nkhongono zithu. Apo tikulutizga “kulomba na kuŵeya pamoza na kuwonga,” timupemphe Ciuta kuti watovwire kuŵa na mwamphu. Usange tacita nthena, tikukayika yayi kuti “mtende wa Ciuta, uwo ukuzungura kuwamo kose, . . . usungilirenge mitima [yithu] na maghanoghano [ghithu] mwa Khristu Yesu.” (Ŵafilipi 4:4-7) Inya, tingapembuzgika na kukhozgeka pakumanya kuti tingapona na milimo pera yayi, kweniso na ucizi wa Yehova!
Kasi Mungalongosora Ico Ŵakhristu
• ŵakulekera kujilumba pa ivyo ŵakucita?
• ŵakukanira mzimu wa kuphalizgana?
• ŵakupelekera malipoti gha uteŵeti wa m’munda?
• ŵakulekera kweruzga Ŵakhristu ŵanyawo?
[Mafumbo]
[Vithuzithuzi pa peji 26, 27]
Ŵalara ŵakukondwa na ivyo waliyose wakucita kuti mpingo wendenge makora