Yehova Wakusungilira Awo Ŵakumulindilira

“Cisungusungu cinu na unenesko winu vindisungilire makoraghene mtatakuya!”—SALMO 40:11.

1. Kasi Fumu Davide yikalomba vici kwa Yehova, ndipo ico wakalomba cikupelekeka wuli lero?

 DAVIDE, Fumu ya Israyeli ‘wakalindilira Yehova na kuzika’ ndipo wakati Yehova ‘wakaŵerama [na] kutegherezga; wakapulika nkhuto yake.’ (Salmo 40:1) Wakajiwonera yekha kanandi waka umo Yehova wakasungira awo Ŵakamutemwanga. Lekani wakalomba Yehova kuti wamusungilire mtatakuya. (Salmo 40:11) Davide njumoza wa ŵanalume na ŵanakazi ŵa cipulikano awo ŵakulindilira “kuwuka kuwemi,” ndipo Yehova wakumukumbuka mwakuti wazakamupe njombe iyi. (Ŵahebere 11:32-35) Ipo nchakumanyikwa kuti kunthazi vizamuŵa makora kwa iyo. Zina lake liri kulembeka mu “buku la cikumbusko” la Yehova.—Malaki 3:16.

2. Kasi Malemba ghakutovwira wuli kupulikiska ng’anamuro la kusungika na Yehova?

² Ŵanthu ŵa cipulikano awo ŵakuzunurika mu Ŵahebere cipaturo 11 ŵakaŵako pambere Yesu Khristu wandize pa caru capasi. Kweni iwo ŵakacita ivyo wakasambizga apo wakati: “Uyo wakutemwa umoyo wake wakuwutaya; ndipo uyo wakutinkha umoyo wake mu caru cino wati wawusungilire ku umoyo wamuyirayira.” (Yohane 12:25) Ntheura munthu uyo wakusungika na Yehova nayo wangasuzgika na kuzikizgika. Kweni cikung’anamura kuti wakusungika mwauzimu mwakuti walutilire kucita uwemi pamaso pa Ciuta.

3. Kasi tikumanya wuli kuti Khristu Yesu wakasungika na Yehova, ndipo wakajura mwaŵi wuli?

³ Na Yesu wuwo wakazikizgika na kuhoyeka, nakuti paumaliro ŵalwani ŵake ŵakamukoma. Kweni ici cikung’anamura kuti Ciuta wakatondeka kuvikilira Mesiya yayi. (Yesaya 42:1-6) Yesu wakati wafwa nyifwa yakuŵinya, wakawuka pa zuŵa lacitatu, kulongora kuti Yehova wakapulika apo wakalomba wovwiri, umo wakamupulikira Davide. Yehova wakamuzgora na kumupa nkhongono Yesu kuti wagomezgeke. (Mateyu 26:39) Ntheura Yesu wakasungika na kupokera umoyo wambura kumara kucanya, ndipo ŵanthu ŵanandi comene awo ŵali na cipulikano mu sembe ŵazamupokera umoyo wamuyirayira.

4. Kasi Yehova wakuŵalayizga vici Ŵakhristu ŵakuphakazgika na “mberere zinyake”?

⁴ Tingagomezga kuti Yehova wakukhumba nipera kusungilira ŵateŵeti ŵake ndipo wangaŵasunga  nga ni Davide na Yesu. (Yakobe 1:17) Ŵabali ŵa Yesu ŵacoko waka awo ŵacali pa caru capasi ŵangagomezga Yehova apo wakuŵalayizga kuti: ‘Ciharo cambura kwanangika, na cambura kukazuzgika, na cambura kuvukupara, . . . cili kulimbikira imwe kucanya, mwaŵeneimwe mukusungika na nkhongono za Ciuta mu cipulikano ku ciponosko cakunozgekera kuvumbukwa mu nyengo yaumaliro.’ (1 Petros 1:4, 5) “Mberere zinyake” izo zikulindilira kuzakahara caru capasi nazo zingagomezga layizgo la Ciuta kwizira mwa mlembi wa salmo lakuti: ‘Mose imwe ŵakupatulikira Iye, temwani Yehova! Yehova wakusungilira ŵamagomezgeka.”—Yohane 10:16; Salmo 31:23.

Ŵakusungika Mwauzimu

5, 6. (a) Kasi ŵanthu ŵa Ciuta ŵasungika wuli lero? (b) Kasi ŵakuphakazgika ŵali na ubwezi wuli na Yehova, ndipo awo ŵazamukhala pa caru capasi ke?

⁵ Mazuŵa ghano, Yehova wanozga nthowa zakusungira ŵanthu ŵake mwauzimu. Nangauli wakuŵabisa yayi kuti ŵaleke kuzikizgika panji kuti masoka ghaleke kuŵawira, kweni wakuŵawovwira na kuŵakhozga kuti ŵalutilire kuŵa ŵabwezi ŵake. Iwo mbabwezi ŵa Ciuta cifukwa cakuti ŵali na cipulikano mu sembe iyo wakapeleka. Ŵakhristu ŵanyake ŵali kuphakazgika na mzimu utuŵa wa Ciuta kuti ŵakawuse pamoza na Khristu kucanya. Iwo ŵapimika ŵarunji na kuŵa ŵana ŵauzimu ŵa Ciuta, ntheura ŵakuti: “Ŵakatiponoska ku mazaza gha cisi, ndipo ŵakatambuskira ku ufumu wa Mwana wa kutemwa kwawo; mwa mweneuyo tili nako kuwombokwa kwithu, kugowokereka kwa zakwananga zithu.”—Ŵakolose 1:13, 14.

⁶ Paliso Ŵakhristu ŵanandi awo ŵakulayizgika kuti ŵangapindura na sembe iyo Ciuta wapeleka. Tikuŵazga kuti: “Mwana wa munthu nayo kuti wakiza kuteŵetereka cara, kweni kuteŵetera, na kupeleka umoyo wake thumba lakuwombora ŵanandi.” (Marko 10:45) Ŵakhristu aŵa ŵakulindilira kuzakakondwa na “ucindami wa ŵana ŵa Ciuta.” (Ŵaroma 8:21) Nyengo yasono ŵakuwona kuti ni mwaŵi kuŵa ŵabwezi ŵa Ciuta, ndipo ŵakulimbikira kuwuvikilira.

7. Kasi mazuŵa ghano Yehova wakuŵasunga wuli ŵanthu ŵake mwauzimu?

⁷ Nthowa yimoza iyo Yehova wakusungira ŵanthu ŵake njakuti wakuŵasambizga nyengo zose. Ntheura ŵakuwumanya makora unenesko. Kweniso Yehova wakuleka yayi kuŵalongozga na Mazgu ghake, gulu lake na mzimu wake utuŵa. Ŵanthu ŵa Ciuta ŵakulongozgeka na “muzga wa magomezgeko na wa vinjeru,” ndipo ŵakuŵa nga mbanthu ŵa mbumba yimoza pa caru cose. Gulu la muzga likupwelelera umoyo wauzimu wa mbumba iyi, kweniso likovwira ŵateŵeti ŵa Yehova para ŵasuzgika, kwambura kulaŵiska mtundu panji kuzirwa kwa munthu.—Mateyu 24:45.

8. Kasi Yehova wakuŵapa cigomezgo wuli ŵakugomezgeka, ndipo wakuŵalayizga vici?

 ⁸ Yehova wakamuvikilira yayi Yesu ku ŵalwani ŵake, ndipo wakuŵavikilira yayi Ŵakhristu lero. Ici cikulongora kuti Ciuta wakuleka kukondwa nawo cara. Kweni mbukaboni wakuti wakuŵagomezga, ndipo wakumanya kuti ŵakhozgerenge muwuso wake. (Job 1:8-12; Zintharika 27:11) Waŵatayenge yayi awo ŵakugomezgeka kwa iyo, ‘cifukwa Yehova wakutemwa urunji; kuti waŵasidenge ŵatuŵa ŵake cara. Ŵakunyoroka ŵasungirizgikenge muyirayira.’—Salmo 37:28.

Cisungusungu na Unenesko Vikuŵasunga

9, 10. (a) Kasi unenesko wa Yehova ukuŵasunga wuli ŵanthu ŵake? (b) Kasi Baibolo likulongora wuli kuti Yehova wakusungilira ŵakugomezgeka ŵake na cisungusungu?

⁹ Apo Davide wakalombanga ivyo vili mu Salmo 40, wakapempha Yehova kuti wamusungilire na cisungusungu na unenesko wake. Pakuti Yehova wakutemwa unenesko na urunji, nchakwenelera kuti watiphalirenge ivyo wakukhumba. Awo ŵakulondezga nthowa zake ŵakusungika ku vitima, wofi na masuzgo kuluska awo ŵakuzerezga. Mwaciyelezgero, tingajivikilira ku masuzgo ghakucitiska citima pamoza na ŵakutemweka ŵithu usange tikuleka kumwa munkhwara wakuloŵezga na kumwa moŵa mwakujumphizga, uzaghali na nkhaza. Awo ŵapuluka mu nthowa ya unenesko ya Yehova umo Davide wakacitiranga nyengo zinyake, nawo ŵangagomezga kuti Ciuta wacali ‘cakubisamamo’ ca awo ŵapera. Iwo ŵangacemerezga mwakukondwa kuti: ‘mundivikilirenge ku suzgo.’ (Salmo 32:7) Ici nchilongolero ciwemi cakuti Ciuta ngwacisungusungu!

¹⁰ Cinyake ico cikulongora kuti Ciuta ngwacisungusungu nchakuti wakuŵasoka ŵateŵeti ŵake kuti ŵajipature ku caru ciheni ico waparanyenge sonosono. Tikuŵazga kuti: “Mungatemwanga caru [cara], panji nesi vinthu ivyo vili mu caru. Usange munthu wakutemwa caru, kutemwa kwa Ŵawiske kulimo mwa iyo cara. Pakuti vyose ivyo vili mu caru, makhumbiro gha thupi, na makhumbiro gha maso, na kuthumbwa kwa umoyo uno, kuti nvyakufuma ku Ŵawiske cara, kweni ku caru.” Para tingapulikira ulongozgi uwu, tingasunga umoyo withu muyirayira, cifukwa lemba ili likusazgirapo kuti: “Caru cikuluta na makhumbiro ghake, kweni uyo wakucita khumbo la Ciuta, wakukhalilira muyirayira.”—1 Yohane 2:15-17.

Ŵakusungika na Mahara, Umanyi na Vinjeru

11, 12. Longosorani umo mahara, umanyi na vinjeru vikutisungira.

¹¹ Mwana wa Davide Solomoni wakawovwirika na mzimu kulembera awo ŵakukhumba kuŵa ŵabwezi ŵa Ciuta kuti: ‘Urungamiki ukuvikilirenge; umanyi ukusungilirenge.’  Kweniso wakaciska kuti: ‘Pokelera vinjeru; . . . Ungavilekanga; vikufighilirenge; uvitemwe, ndipo vikusungilirenge.’—Zintharika 2:11; 4:5, 6.

¹² Para tikughanaghanira ivyo tikusambira mu Mazgu gha Ciuta, tikulongora kuti tili na mahara. Para tikucita nthena, tikuŵanika makora vinthu kuti tiwone ivyo tikwenera kwamba kucita. Ici nchakuzirwa, cifukwa taŵanandi tikumanya kuti kanandi masuzgo ghakwamba cifukwa cakuti tikulekera dara kucita vinthu mu ndondomeko yake panji cifukwa ca ujira. Caru cakuwusika na Satana ici cikutiyezga kuti tipenje dankha usambazi, kumanyikwa na mazaza, kweni Yehova wakukhumba kuti ticitenge dankha vinthu vyauzimu ivyo ni vyakuzirwa comene. Para tingatondeka kucita vinthu mu ndondomeko yake, mbumba zingagaŵikana, ubwezi ungamara ndipo vinthu vyauzimu vingafumamo mwa ise. Ntheura munthu wangawona kuti Yesu wakaneneskanga apo wakati: “Kungamovwiraci munthu kwandula caru cose na kutaya umoyo wake?” (Marko 8:36) Para tili ŵavinjeru, tikwenera kupulikira ulongozgi wa Yesu wakuti: “Penjani nanga Ufumu wake, na urunji wake; ndipo vyose vyeneivi . . . visazgikirengeko kwa imwe.”—Mateyu 6:33.

Tingamba Kughanaghana vya Tekha Pera

13, 14. Kasi kughanaghana vya wekha pera cikung’anamuraci, ndipo cifukwa wuli nchambura mahara kucita nthena?

¹³ Taŵanthu tikutemwa kujighanaghanira. Kweni suzgo likuŵapo usange munthu wakughanaghanira makhumbiro ghake pera mu umoyo wake. Ntheura kuti tilutilire kuŵa ŵabwezi ŵa Yehova, iyo wakutiphalira kuti tileke kughanaghana vya tekha pera. Mazgu agha ghakung’anamura “kucita ivyo ukudokera, ivyo ukukhumba panji ivyo ukutemwa kwambura kughanaghanira ŵanyako.” Asi ndimo ŵanthu ŵanandi ŵakucitira lero? Baibolo likayowoya kale kuti “mu mazuŵa gha ku umaliro” wa caru ciheni ca Satana, ŵanthu “ŵaŵenge ŵakujitemwa,” panji ŵakujighanaghanira.—2 Timote 3:1, 2.

¹⁴ Ŵakhristu ŵakumanya kuti ni vinjeru kupulikira dango la Baibolo lakuti tighanaghanirenge vya ŵanyithu na kuŵatemwa umo tikujitemwera taŵene. (Luka 10:27; Ŵafilipi 2:4) Ŵanthu ŵanandi ŵangawona ngati ici nchambura kwenelera, kweni ndico tikwenera kucita usange tikukhumba kuti nthengwa zithu zendenge makora, kuti tiŵenge ŵakukondwa  mu mbumba kweniso kuti tiŵe na ŵabwezi ŵawemi. Ntheura, muteŵeti wa Yehova waleke kulongozgeka na mtima wa kughanaghanira vyake pera na kuluwako vinthu vyakuzirwa. Apa tikung’anamura kuluwa vinthu vyakuzirwa comene vyakukhwaskana na Yehova, Ciuta wake uyo wakumusopa.

15, 16. (a) Kasi nkharo ya kujighanaghanira yingacitiska vici, ndipo mbanjani awo ŵakacitanga nthena? (b) Kasi para munthu wakucimbilira kweruzga ŵanyake ndikuti wakucitaci?

¹⁵ Uyo wakughanaghana vya yekha pera, wangamba kujirunjiska na kuleka kupulika vya ŵanyake, ntheura wakusambizgika yayi ndipo wakuŵa wakujikuzga. Lekani Baibolo likuti: “Ulive mpandira, wa munthu ‘we, manyi ndiwe njani iwe ukweruzga; cifukwa mu ceneico ukweruzga munyako, ukujisuska wamwene; pakuti iwe ukweruzga nawe ukucita vyeneivyo.” (Ŵaroma 2:1; 14:4, 10) Apo Yesu wakaŵa pa caru capasi, ŵalara ŵa cisopo ŵakajiwonanga kuti ŵakaŵa ŵarunji, ndipo ŵakajitora kuti ŵakaŵa ŵakwenelera kucenya Yesu na ŵasambiri ŵake. Ntheura ŵakajizgora ŵeruzgi. Iwo ŵakajisuskanga, cifukwa ŵakawonanga yayi ivyo ŵakabudiskanga.

¹⁶ Yuda, musambiri wa Yesu uyo wakamupeleka wakajizgora mweruzgi pa ŵanyake. Nyengo yinyake ku Betaniya, apo Mariya mudumbu wa Lazaro wakamuphaka mafuta ghakununkhira Yesu, Yuda wakasuska comene. Wakakalipa, wakati: “Cifukwa nchici mafuta agha ghakuwura kusaskika ndarama makhumi pera makhumi ghatatu, na kupika ku ŵakavu?” Kweni nkhani iyi yikulongosora kuti: “Wakayowoya ceneici cifukwa wakapweleranga ŵakavu cara: kweni cifukwa wakaŵa munkhungu, ndipo wakayeghanga cibeta, ndipo wakibanga ivyo vikaŵikikamo.” (Yohane 12:1-6) Tileke kuŵa nga ni Yuda na ŵalara ŵa cisopo awo ŵakacimbiliranga kweruzga ŵanyawo na kujisuska ŵekha.

17. Yowoyani ciyelezgero kuti mulongore uheni wa kujitunthumura panji kujigomezga comene.

¹⁷ Nangauli Ŵakhristu ŵanyake ŵakale ŵakaŵa ŵankhungu nga ni Yuda yayi, nchacitima kuti ŵakamba kujikuzga na kujitukumura. Ŵanthu aŵa Yakobe wakaŵalembera kuti: ‘Mukuthumbwa mu kutunthumuka kwinu.’ Ndiposo wakati: “Kuthumbwa kose kwantheura nkhuheni.” (Yakobe 4:16) Usange tikujilumba cifukwa ca ivyo tili kucita panji mwaŵi wapadera uwo tili nawo pakuteŵetera Yehova ndikuti tikujinangiska tekha. (Zintharika 14:16) Tikukumbuka ico cikacitikira mpositole Petrosi uyo nyengo yinyake wakajigomezga comene, ndipo wakati: “Nanga wose ŵakukhuŵaliskika na imwe, ine kuti . . . ndikhuŵaliskike cara nadi. . . . Nanga kungaŵa kuti ndifwe namwe pamoza, kuti ndamkukana imwe cara.” Kwambura kubisa, tilije cilicose cakuti tijilumbe naco. Cilicose ico tili naco nchifukwa cakuti Yehova ngwacisungusungu. Para tikukumbuka fundo iyi tijitunthumurenge yayi.—Mateyu 26:33-35, 69-75.

18. Kasi Yehova wakukuwona wuli kujikuzga?

¹⁸ Tikuphalirika kuti: “Kujikuzga kukudangilira pharaniko, ndipo mzimu wa kujituntha ukudangilira kuwa.” Cifukwa wuli? Yehova wakuzgora kuti: “Kujikuzga na kujiwonya [kujilumba] . . . nkhuvitinkha.” (Zintharika 8:13; 16:18) Lekani Yehova wakakwiya na “kujikuzga . . . kwa fumu ya Assyria, na kujitumphuska kwake.” (Yesaya 10:12) Yehova wakayilanga fumu yira. Sonosono apa, caru cose ca Satana pamoza na ŵalongozgi ŵakujikuzga na ŵakujiŵikamo, ŵanthu na viŵanda wuwo, wose ŵazamulangika. Ntheura tileke kutolera  nkharo ya ŵalwani ŵa Yehova awo ŵakwendera makhumbiro ghawo!

19. Kasi ŵanthu ŵa Ciuta ŵakujikuzga na kujiyuyura mwauli?

¹⁹ Ŵakhristu ŵanadi ŵakujikuzga pakuŵa ŵateŵeti ŵa Yehova. (Yeremiya 9:24) Kweni ŵali na vifukwa vinandi ivyo ŵakujiyuyulira. Cifukwa wuli? Cifukwa wose “ŵali kwananga, ndipo ŵalive kufikapo pa ucindami wa Ciuta.” (Ŵaroma 3:23) Ntheura kuti tilutilire kuteŵetera Yehova, tikwenera kuŵa na maghanoghano gha mpositole Paulosi uyo wakati: “Yesu Khristu wakiza mu caru kwiza kaponoska ŵakwananga,” ndipo wakasazgirapo kuti: “Ŵeneaŵa ciŵinda [wawo] ndine.”—1 Timote 1:15.

20. Kasi Yehova wakuŵasunga wuli ŵanthu ŵake lero, ndipo wazamuŵasunga wuli kunthazi?

²⁰ Pakuti ŵanthu ŵa Yehova ŵakukondwa kusezgera pamphepete makhumbiro ghawo mwakuti ŵacite dankha ivyo Ciuta wakukhumba, tikukayika yayi kuti iyo walutilirenge kuŵasunga mwauzimu. Kweniso tingagomezga kuti para suzgo yikuru yafika Yehova wazamuŵasunga ŵanthu ŵake, mwauzimu pera yayi kweniso wazamuŵabisa ku ulwani. Para ŵazakanjira mu caru ciphya, ŵazamucemerezga kuti: “Wonani, uyu ndiye Ciuta withu; tamusimphilira kuti watiponoske. Uyu ndi Yehova; tamusimphilira; sono tiyeni tikondwe na kusekelera mu ciponosko cake.”—Yesaya 25:9.

Kasi Mukukumbuka?

• Kasi Fumu Davide na Yesu Khristu ŵakasungika wuli?

• Kasi ŵanthu ŵa Yehova ŵakusungika wuli lero?

• Cifukwa wuli tikwenera kughanaghanira vithu pera yayi?

• Cifukwa wuli tingaŵa ŵakujikuzga kweni ŵakujiyuyura?

[Mafumbo]

[Vithuzithuzi pa peji 19]

Kasi Yehova wakaŵasunga wuli Davide na Yesu?

[Vithuzithuzi pa peji 20, 21]

Kasi ni nthowa wuli izo Ciuta wakusungira ŵanthu ŵake mwauzimu?

[Vithuzithuzi pa peji 22]

Nangauli tikujikuzga pakuti tikuteŵetera Yehova, tingalekanga yayi kujiyuyura