Kupenja Mtende wa mu Mtima

ALBERT wakaŵa na nthengwa yiwemi, ndipo wakaŵa na ŵana ŵaŵiri, msepuka na msungwana. Kweni wakawona kuti wakusoŵa kanthu kanyake mu umoyo wake. Nchito yikati yamusoŵa, wakamba kucita ndyali. Ndipo wakaŵa membara wa cipani ca Communist mu cikaya cake.

Kweni nyengo yicoko waka, Albert wakawona kuti ndyali zikumovwira yayi. Wakaleka ndyali ndipo wakamba kutangwanika na kupwelelera mbumba yake. Wakakhumbanga kuti nyengo zose mbumba yake yiŵenge yakukondwa. Ndipouli, Albert wakajipulika nipera kuti wakusoŵa kanthu kanyake mu umoyo wake; wakasoŵanga mtende weneco wa mu mtima.

Ivyo vikacitikira Albert vikucitikira ŵanthu ŵanandi. Ŵanthu ŵanandi ŵayezga nthowa izi na izi, visambizgo, na visopo kuti ŵasange umoyo wakukhorweska. Ku vyaru vya ŵazungu, mu ma 1960 kukaŵa gulu la ŵanyamata ilo likagalukiranga malango gha kakhaliro, kavwaliro na kacitiro ka vinthu. Ŵawukirano ŵakamwanga minkhwara yakuloŵezga na kulondezga ivyo ŵalongozgi ŵawo ŵakaŵasambizganga kuti ŵasange cimwemwe na umoyo wakukhorweska. Kweni gulu lawo likatondeka kuŵasangira cimwemwe ceneco. M’malo mwake, ŵawukirano ŵakamba kumwa comene minkhwara ndipo ŵakacitanga uzaghali, nakuti nkharo yikanangika mu caru.

Kwamba kale comene, ŵanthu ŵanandi ŵayezga kupenja cimwemwe mu cuma, mazaza, panji masambiro. Kweni umaliro wake nchitima pera. Yesu wakati: “Umoyo wa munthu kuti uli mu unandi wa vinthu ivyo wakuŵeta cara.”  (Luka 12:15) Kanandi para munthu wakujipenjera usambazi wakujipweteka na vitima. Baibolo likuti: “Awo ŵakukhumba kusambazgika ŵakuwa mu lwavyo na cipingo na makhumbiro ghanandi ghakupusa na ghakupweteka, agho ghakubizga ŵanthu mu paraniko na mu kutayika. Cifukwa kutemwa ndarama ndukorozi lwa mitundu yose ya viheni: izo ŵanji pa kuzipenjiska ŵali . . . kujilasa na vitima vinandi.”—1 Timote 6:9, 10.

Ipo kasi munthu wangawusanga wuli mtende wa mu mtima kweniso umoyo uwemi? Kasi tikwenera kuyezga bweka? Yayi nadi. Umo tiwonerenge mu nkhani iyo yili panthazi apa, zgoro lagona pa kufiska cinthu ico nchakuzirwa kwa munthu.

[Cithuzithuzi pa peji 3]

Kasi kupenja usambazi, mazaza, panji masambiro vingamovwirani kusanga mtende wa mu mtima?