Makani Ghawemi ku Ŵanthu ŵa Mitundu Yose
Makani Ghawemi ku Ŵanthu ŵa Mitundu Yose
“Muŵenge ŵapanikizgi ŵane . . . na ku vigoti vya caru wuwo.”—MILIMO 1:8.
1. Pakuti tikusambizga Baibolo, kasi tikuŵika mtima pa vici, ndipo cifukwa wuli?
AWO ŵakumanya kusambizga ŵakuŵika mtima pa ivyo ŵakuphalira ŵasambiri ŵawo pera yayi, kweniso umo ŵakuyowoyera. Ndimo nase tikucitira, pakuti tikusambizga unenesko wa mu Baibolo. Tikuŵika mtima pa uthenga uwo tikupharazga na umo tikupharazgira. Uthenga withu, uwo ni makani ghawemi gha Ufumu wa Ciuta, ukusintha yayi, kweni tikusintha nthowa izo tikupharazgira. Cifukwa wuli? Kuti tipharazgire ŵanthu ŵanandi.
2. Kasi tikulondezga ŵanjani para tikusintha nthowa zakupharazgira?
2 Para tikusintha nthowa zithu zakupharazgira, tikulondezga ŵateŵeti ŵakale ŵa Yehova. Mwaciyelezgero, awonani umo mpositole Paulosi wakacitiranga. Iyo wakati: “Ku Ŵayuda nkhaŵa nga ndi Muyuda . . . ku awo mbambura Malango nga nda wambura Malango . . . Ku ŵakutepwa nkhaŵa wakutepwa, mwakuti ndiŵandulire ŵakutepwa: ku ŵanthu wose nkhaŵira vyose, mwakuti ndiponoskepo ŵanji mu nthowa zose izi.” (1 Ŵakorinte 9:19-23) Uteŵeti wa Paulosi ukaŵanga wakucontha mtima cifukwa wakasinthanga nthowa zakupharazgira. Nase tingaŵa ŵakucontha mtima usange tikusintha nthowa zithu mwakuyana na ŵanthu awo tikuyowoya nawo.
Ku “Mphelerekezgo za Caru”
3. (a) Kasi ni suzgo wuli ilo tikusangana nalo pa nchito yithu ya kupharazga? (b) Kasi mazgu gha pa Yesaya 45:22 ghakufiskika wuli lero?
3 Suzgo likuru ilo awo ŵakupharazga makani ghawemi ŵakusangana nalo mbukuru wa cigaŵa cakupharazgako. Iwo ŵakwenera kupharazga “mu vyaru vyose.” (Mateyu 24:14) Mu vilimika 100 ivyo vyajumpha, ŵateŵeti ŵanandi ŵa Yehova ŵakafwilirapo comene kuluta ku vyaru ivyo kulije ŵapharazgi mwakuti ŵakathandazge makani ghawemi. Kasi nchivici ico cikacitika? Nchito ya kupharazga yikakura mwakuzizwiska pa caru cose. Kukwambilira kwa vilimika vya mu ma 1900, nchito yakupharazga yikacitikanga mu vyaru vicoko waka, kweni sono Ŵakaboni ŵa Yehova ŵakupharazga mu vyaru 235! Nadi, makani ghawemi gha Ufumu ghakupharazgika na ku “mphelerekezgo za caru” wuwo.—Yesaya 45:22.
4, 5. (a) Kasi mbanjani awo ŵawovwira comene kuthandazga makani ghawemi? (b) Kasi maofesi ghanyake gha Ŵakaboni ŵa Yehova ghayowoyaci za ŵabali na ŵadumbu ŵa ku vyaru vinyake awo ŵakuteŵetera mu caru cawo?
4 Kasi cifukwa wuli nchito yithu yikukura nthena? Pali vinthu vinandi ivyo vikucitiska. Ŵamishonale awo ŵakusambizgika ku Sukulu ya Gileadi, na ŵabali ŵakujumpha 20,000 awo ŵasambizgika mu Sukulu Yakusambizga Uteŵeti ndiwo ŵawovwira comene. Kweniso Ŵakaboni ŵanandi awo ŵakusamukira uko kulije ŵapharazgi ŵa Ufumu nawoso ŵawovwira comene. Ŵakhristu ŵakujipeleka aŵa: ŵanalume na ŵanakazi, ŵana na ŵalara, ŵakutora na ŵambura kutora, ŵakutengwa na ŵambura kutengwa, wose ŵakovwira comene pakupharazga uthenga wa Ufumu pa caru cose capasi. (Salmo 110:3; Ŵaroma 10:18) Iwo ŵakuwongeka comene. Pulikani ivyo maofesi ghanyake gha Ŵakaboni ghakalemba pakuyowoya za ŵabali na ŵadumbu ŵa ku vyaru vinyake awo ŵakuteŵetera uko wovwiri ukukhumbikwa.
5 “Ŵakaboni ŵakutemweka aŵa ŵakulongozga pakupharazga ku malo ghakusuzga kulutako na kovwira kupanga mipingo yiphya. Ŵakovwiraso kuti ŵabali na ŵadumbu ŵa ku malo agha ŵakure mwauzimu.” (Ecuador) “Usange ŵabali na ŵadumbu ŵa ku vyaru vinyake awo ŵakuteŵetera kuno ŵangawelera kukwawo, mbwenu mipingo yiŵenge yakukhora nga ni umo yiliri sono yayi. Ni thumbiko likuru comene kuŵa nawo.” (Dominican Republic) “Mu mipingo yinandi ŵanandi mbadumbu, ndipo nyengo zinyake pa ŵapharazgi 100, 70 ŵakuŵa ŵadumbu. (Salmo 68:11) Ŵanandi mwa ŵadumbu aŵa ŵamba sono unenesko, kweni ŵapayiniya ŵambura kutengwa ŵa ku vyaru vinyake ŵakovwira comene kuŵasambizga ŵadumbu aŵa. Ŵadumbu ŵa ku vyaru vinyake aŵa nchawanangwa nadi kwa ise!” (Caru cinyake kuvuma kwa Europe) Kasi muli kughanaghanapo za kukateŵetera ku caru cinyake? a—Milimo 16:9, 10.
‘Ŵanthu Khumi ŵa Viyowoyero Vyose’
6. Kasi lemba la Zekariya 8:23 likulongora wuli suzgo la viyowoyero ilo tikusangana nalo pakupharazga?
6 Suzgo linyake ilo ŵapharazgi ŵakusangana nalo mbunandi wa viyowoyero pa caru capasi. Mazgu gha Ciuta ghakayowoyerathu kuti: “Mu mazuŵa agho ŵanthu khumi ŵa mafuko gha kayowoyero kose ŵati ŵakore salu ya uyo ndi Muyuda na kuti, Mutizomerezge tilute tose, cifukwa tapulika kuti Ciuta wali namwe.” (Zekariya 8:23) Mu nyengo yasono, ŵanthu khumi ŵakwimira mzinda ukuru uwo ukuyowoyeka pa Civumbuzi 7:9. Kweni wonani kuti kuyana na ucimi wa Zekariya, “ŵanthu khumi” ŵafumenge mu mafuko ghose pera yayi, kweniso mu ‘viyowoyero vyose’ vya mafuko agha. Kasi tawona kufiskika kwa ucimi wakuzirwa uwu? Enya, tawona nadi.
7. Ni mafigara wuli agho ghakulongora kuti ŵanthu ŵa ‘viyowoyero vyose’ ŵakupokera makani ghawemi?
7 Wonani mafigara agha. Vilimika 50 ivyo vyajumpha, mabuku ghithu ghakapharazgikanga mu viyowoyero 90. Lero, nambara iyi yakura kujumpha pa 400. “Muzga wa magomezgeko na wa vinjeru” wacita vyose ivyo wangafiska kuti mabuku ghasangikenge mu viyowoyero vinandi nanga ni ivyo vikuyowoyeka na ŵanthu ŵacoko waka. (Mateyu 24:45) Mwaciyelezgero, mabuku ghakulongosora Baibolo sono ghakusangika mu ciyowoyero ca Greenlandic (ico cikuyowoyeka na ŵanthu 47,000), ciyowoyero ca Paluan (ico cikuyowoyeka na ŵanthu 15,000), na ciyowoyero ca Yapese (ico cikuyowoyeka na ŵanthu ŵambura kukwana 7,000).
“Mulyango Ukuru” Wajulika
8, 9. Kasi nchivici ico catijulira “mulyango ukuru,” ndipo Ŵakaboni ŵanandi ŵacitapo vici?
8 Kweni sono palije cifukwa ca kulutira ku caru cinyake kuti tikapharazgire ŵanthu ŵa viyowoyero vyose. Mu vilimika vya sonosono apa, ŵanthu ŵanandi ŵasamukira ku vyaru visambazi cifukwa ca ukavu panji pa vifukwa vinyake. Ici capangiska kuti mu vyaru ivi muŵe ŵanthu ŵa viyowoyero vinandi. Mwaciyelezgero, mu Msumba wa Paris, ku France, muli viyowoyero pafupifupi 100. Mu Msumba wa Toronto, ku Canada, muli viyowoyero 125; ndipo mu Msumba wa London, ku England, muli viyowoyero vyakujumpha 300! Ŵanthu ŵa vyaru vinyake awo ŵakusangika mu vigaŵa vya mipingo yinandi ŵajura “mulyango ukuru” wa kupharazga makani ghawemi ku ŵanthu ŵa mitundu yose.—1 Ŵakorinte 16:9.
9 Ŵakaboni ŵanandi ŵakucitapo kanthu pa suzgo ili mwa kusambira ciyowoyero cinyake. Ici nchakusuzga ku ŵanandi, kweni ŵakuŵa na cimwemwe cikuru comene cifukwa ca kovwira ŵanthu ŵakufuma ku vyaru vinyake kuti ŵamanye unenesko wa mu Mazgu gha Ciuta. Sonosono apa, pafupifupi hafu ya ŵanthu awo ŵakabapatizika pa maungano gha cigaŵa agho ghakacitika mu caru cinyake ku Europe, ŵakaŵa ŵakufuma ku caru cinyake.
10. Kasi mwagwiliskira wuli nchito kabuku ka Makani Ghawemi ku Ŵanthu ŵa Mitundu Yose? (Wonani bokosi lakuti “Ivyo Vili mu Kabuku ka Makani Ghawemi ku Ŵanthu ŵa Mitundu Yose,” pa peji 32.)
10 Mbunenesko kuti taŵanandi tingafiska yayi kusambira ciyowoyero cinyake. Ndipouli, nase tingawovwira ŵanthu ŵa vyaru vinyake mwa kugwiliskira nchito makora kabuku kaphya ka Makani Ghawemi ku Ŵanthu ŵa Mitundu Yose, b ako kali na uthenga wakukondweska wa mu Baibolo mu viyowoyero vinandi. (Yohane 4:37) Kasi mukugwiliskira nchito kabuku aka mu uteŵeti?
Para Ŵanthu Ŵakukana
11. Kasi ni suzgo wuli ilo likusangika mu vigaŵa vinyake?
11 Peneapo Satana wakuhaŵa comene mu caru, tikusangana na suzgo linyake nyengo na nyengo. Suzgo ili ndakuti mu vigaŵa vinyake ŵanthu ŵanandi ŵakukana kutegherezga. Ici cikutizizika yayi, cifukwa Yesu wakayowoyerathu kuti ivi vikwenera kucitika. Pakuyowoya za nyengo yithu, Yesu wakati: “Kutemwa kwa ŵanandi kuti kuzizimenge.” (Mateyu 24:12) Ndipo nadi, ŵanandi ŵaleka kugomezga kuti kuli Ciuta, ndipo ŵakulicindika yayi Baibolo. (2 Petros 3:3, 4) Lekani mu vigaŵa vinandi pa caru capasi, mbanthu ŵacoko waka awo ŵakuŵa ŵasambiri ŵaphya ŵa Khristu. Ndipouli, ici cikung’anamura kuti nchito iyo ŵabali na ŵadumbu ŵithu ŵakucita mu vyaru ivi njawaka yayi. (Ŵahebere 6:10) Cifukwa wuli? Awonani ivi.
12. Zunurani vifukwa viŵiri ivyo tikupharazgira.
12 Uthenga wa mu buku la Mateyu ukulongosora vifukwa viŵiri ivyo tikupharazgira. Cifukwa cimoza ‘nkhusambizga [ŵanthu ŵa] mitundu yose.’ (Mateyu 28:19) Cinyake nchakuti uthenga wa ufumu ukuŵa “cipanikizgo.” (Mateyu 24:14) Vifukwa vyose viŵiri ni vyakuzirwa, kweni caciŵiri ndico cakuzirwa comene. Cifukwa wuli?
13, 14. (a) Kasi cimanyikwiro cikuru ca kwiza kwa Khristu nchivici? (b) Kasi tikwenera kukumbukira vici, comene usange tikupharazga mu cigaŵa ico ŵanandi ŵakukana kutegherezga?
13 Mateyu wakalemba ivyo ŵapositole ŵakafumba Yesu, ŵakati: “Nchici cimanyikwiro ca kwiza kwinu, na ca umaliro wa mgonezi?” (Mateyu 24:3) Pakuzgora, Yesu wakati cimanyikwiro cimoza cikuru ni nchito ya kupharazga iyo yizamucitika pa caru cose. Kasi Yesu wakayowoyanga za kusambizga? Yayi. Iyo wakati: “Makani ghawemi gheneagha gha Ufumu ghamkupharazgika mu vyaru vyose ghaŵe cipanikizgo ku mitundu yose.” (Mateyu 24:14) Ntheura Yesu wakalongora kuti kupharazga ndico cizamuŵa cimanyikwiro cikuru.
14 Mwantheura, peneapo tikupharazga makani ghawemi gha Ufumu, tingaluwanga yayi kuti nanga ŵanthu ŵanyake ŵangakana kusambira, kweni “cipanikizgo” pera tikupeleka. Kwali ŵanthu ŵakane panji ŵazomere, iwo ŵakumanya ico tikucita, ntheura nase tikufiska ucimi wa Yesu. (Yesaya 52:7; Civumbuzi 14:6, 7) Jordy, Kaboni muwukirano wa ku Europe, wakati: “Nkhukondwa comene kumanya kuti Yehova wakunigwiliskira nchito kufiska Mateyu 24:14.” (2 Ŵakorinte 2:15-17) Tikukayika yayi kuti ndimo namwe mukujipulikira.
Para Ŵanji Ŵakususka Uthenga Withu
15. (a) Kasi Yesu wakaŵacenjezga vici ŵalondezgi ŵake? (b) Nchivici cikutovwira kupharazga nangauli ŵanthu ŵakutisuska?
15 Suzgo linyake ilo tikusanga para tikupharazga makani ghawemi gha Ufumu nkhususkika. Yesu wakacenjezga ŵalondezgi ŵake kuti: “Mwamkutinkhika na mitundu yose cifukwa ca zina lane.” (Mateyu 24:9) Nga ni umo vikaŵira na Ŵakhristu ŵakwambilira, ŵalondezgi ŵa Yesu lero ŵakutinkhika, kususkika, na kuzikizgika. (Milimo 5:17, 18, 40; 2 Timote 3:12; Civumbuzi 12:12, 17) Mu vyaru vinyake, ŵakukanizgika na boma. Ndipouli, pakuti ŵakukhumba kupulikira Ciuta, Ŵakhristu ŵaunenesko ŵakulutilira kupharazga makani ghawemi gha Ufumu mu vyaru ivi. (Amosi 3:8; Milimo 5:29; 1 Petros 2:21) Kasi nchivici ico cikovwira ŵabali na ŵadumbu mu vyaru ivi, na Ŵakaboni ŵanyake wose pa caru cose kuti ŵalutilire kupharazga? Yehova wakuŵapa nkhongono ya mzimu wake utuŵa.—Zekariya 4:6; Ŵaefeso 3:16; 2 Timote 4:17.
16. Kasi Yesu wakalongora wuli kukolerana pakati pa kupharazga na mzimu wa Ciuta?
16 Yesu wakalongora makora kukolerana pakati pa mzimu wa Ciuta na mulimo wa kupharazga apo wakaphalira ŵasambiri ŵake kuti: ‘Muti mupokere nkhongono, para mzimu utuŵa wiza pa imwe: ndipo muti muŵenge ŵapanikizgi ŵane . . . na ku vigoti vya caru wuwo.’ (Milimo 1:8; Civumbuzi 22:17) Ndondomeko ya umo vinthu vikacitikira mu lemba ili njakuzirwa comene. Cakwamba, ŵasambiri ŵakapokera mzimu utuŵa, pamanyuma pake ndipo ŵakamba kupharazga pa caru cose. Mzimu utuŵa ndiwo ukaŵawovwiranga kuti ŵaŵe na nkhongono zakuzizipizgira peneapo ‘ŵakapanikizgiranga mitundu yose.’ (Mateyu 24:13, 14; Yesaya 61:1, 2) Ipo lekani Yesu wakati mzimu utuŵa ni “msanguluski” panji movwiri. (Yohane 15:26) Iyo wakati mzimu wa Ciuta usambizgenge na kulongozga ŵasambiri ŵake.—Yohane 14:16, 26; 16:13.
17. Kasi mzimu utuŵa ukutovwira wuli para ŵanji ŵakutisuzga?
17 Kasi mzimu wa Ciuta ukutovwira wuli lero usange ŵanji ŵakutisuzga para tikupharazga makani ghawemi? Mzimu wa Ciuta ukutipa nkhongono, ndiposo ukwimikana na awo ŵakutisuzga. Mwaciyelezgero, wonani ico cikacitikira Themba Sauli.
Mzimu wa Ciuta Ukimikana Nayo
18. (a) Kasi Sauli wakasintha kuŵa munthu muheni wuli? (b) Kasi Sauli wakamutambuzga wuli Davide?
18 Sauli, Themba lakwamba la Israyeli, wakamba makora comene, kweni wakaleka kupulikira Yehova. (1 Samuel 10:1, 24; 11:14, 15; 15:17-23) Lekani mzimu wa Ciuta ukaleka kumovwira. Sauli wakakwiya comene na kwamba kumucitira nkhaza Davide, uyo wakaphakazgika kuti waŵe themba lakulondezgapo, ndiposo uyo pa nyengo iyi mzimu wa Ciuta ukamovwiranga. (1 Samuel 16:1, 13, 14) Vikawoneka nga Davide wangakomeka kwambura suzgo. Nakuti Davide wakaŵa na zeze pera mu mawoko ghake, peneapo Sauli wakaŵa na mkondo. Ntheura zuŵa linyake apo Davide wakalizganga zeze wake, “Sauli wakaponya mkondo, wakatenge, ‘Ndimulase Davide, kumunyekezga nawo ku cimati.’ Kweni Davide wakalewa kaŵiri.” (1 Samuel 18:10, 11) Pamanyuma pake, Sauli wakapulikira mwana wake Jonatani, mubwezi wa Davide, ndipo wakalapa kuti: ‘Yehova wamoyo, ntha wakomeke [Davide].’ Kweni Sauli ‘wakakhumbaso kumulasa kumunyekezgera Davide ku cimati na mkondo.’ Ndipouli, Davide ‘wakaceleŵara, Sauli wakalasa cimati.’ Davide wakacimbira, kweni Sauli wakamulondezga. Pa nyengo iyi, mzimu wa Ciuta ukimikana na Sauli. Mu nthowa wuli?—1 Samuel 19:6, 10.
19. Kasi mzimu wa Ciuta ukamuvikilira wuli Davide?
19 Davide wakacimbilira kwa nchimi Samuyeli, kweni Sauli wakatuma mathenga kuti ghakamukore. Ndipouli, ghakati ghafika uko Davide wakabisama, “mzimu wa Ciuta ukaghakhilira mathenga gha Sauli naghoso ghakacima.” Ghakatimbanizgika comene na mzimu wa Ciuta mwakuti ghakaluwa ivyo ghakapukwa. Sauli wakatuma mathenga ghanyake kuti ghakamutore Davide, ndipo nagho ghakamba kucima. Wakatumaso ghanyake kacitatu, kweni naghoso ghakacita vyakuyana waka. Paumaliro, Sauli wakaluta yekha kwa Davide, kweni nayo wakatondeka kucintha na nkhongono ya mzimu wa Ciuta. Nakuti mzimu utuŵa ukamugoneka pasi “muhanya wose wura na usiku wake.” Ici cikamupa mupata Davide kuti wacimbire.—1 Samuel 19:20-24.
20. Kasi tingasambirapo vici pa nkhani yakulongosora umo Sauli wakatambuzgira Davide?
20 Pa nkhani ya Sauli na Davide tikutorapo sambiro lakukhozga comene: Awo ŵakutambuzga ŵateŵeti ŵa Ciuta ŵangatonda yayi para mzimu wa Ciuta wakana. (Salmo 46:11; 125:2) Khumbo la Yehova likaŵa lakuti Davide waŵe themba la Israyeli. Pakaŵavya wakuti wangasintha. Mazuŵa ghano, Yehova wakukhumba kuti ‘makani ghawemi gha ufumu ghapharazgike.’ Palije uyo wangalekeska nchito iyi.—Milimo 5:40, 42.
21. (a) Kasi ŵanthu ŵanyake awo ŵakutisuska ŵakucita wuli nga ni umo wakacitira Sauli? (b) Kasi tili na cigomezgo wuli?
21 Ŵalongozgi ŵanyake ŵa visopo na ŵa ndyali ŵakutiyowoyera mautesi na kucita vivulupi kuti ŵatitondeske. Kweni nga ni umo Yehova wakasungira Davide mwauzimu, ndimo wacitirenge na ŵanthu ŵake lero. (Malaki 3:6) Lekani tikuyowoya na cigomezgo nga ni Davide kuti: “Mwa Ciuta ndimo ndaŵika cigomezgo kwambura kopa. Kasi munthu wangacitaci kwa ine?” (Salmo 56:11; 121:1-8; Ŵaroma 8:31) Na wovwiri wa Yehova, mphanyi nase tazizipizga masuzgo ghose agho tingasangana nagho peneapo tikucita nchito iyo Ciuta wali kutipa ya kupharazga makani ghawemi gha Ufumu ku ŵanthu ŵa mitundu yose.
[Mazgu ghamusi]
a Wonani bokosi lakuti “Ŵakukhorwa na Ivyo Ŵakucita,” pa peji 28.
b Kakupharazgika na Ŵakaboni ŵa Yehova.
Kasi Mungakumbuka?
• Cifukwa wuli tikusintha nthowa zithu zakupharazgira?
• Kasi ni mulyango wuli ukuru uwo wajurika?
• Kasi tikufiska vici para tikupharazga, nanga mungaŵa mu vigaŵa ivyo ŵanandi ŵakukana kupulika?
• Cifukwa wuli palije uyo wangalekeska nchito ya kupharazga makani ghawemi gha Ufumu?
[Mafumbo]
[Bokosi pa peji 28]
Ŵakukhorwa na Ivyo Ŵakucita
“Iwo ŵakusangwa kuteŵetera Yehova pamoza.” Umu ndimo vinthu viliri na mbumba yinyake ya ku Spain iyo yili kusamukira ku Bolivia. Mwana musepuka wa mbumba iyi wakaluta ku Bolivia kuti wakawovwire kagulu kakutali. Ŵapapi ŵa musepuka uyu ŵakakhwaskika comene na cimwemwe ico wakaŵa naco mwakuti mbumba yose, kusazgapo ŵana ŵasepuka ŵanayi ŵa vilimika vya pakati pa 14 na 25, ŵakasamukira kuko. Ŵatatu mwa ŵana ŵasepuka aŵa sono mbapayiniya, ndipo uyo wakamba kusamuka sonosono apa wakaluta ku Sukulu Yakusambizga Uteŵeti.
Angelica wa ku Canada wa vilimika 30, wakati: “Nkhusangana na masuzgo ghanandi. Kweni nkhukondwa para nkhovwira ŵanthu mu uteŵeti. Ndiposo nkhukhozgeka na ivyo ŵabali na ŵadumbu ŵakuyowoya. Kanandi iwo ŵakuniwonga kuti nili kwiza kuzakaŵawovwira.”
Ŵadumbu ŵaŵiri ŵa mbumba yimoza, ŵa vilimika vya pakati pa 27 na 29, ŵa ku United States, awo ŵakuteŵetera ku Dominican Republic, ŵakati: “Mitheto njinandi comene mwakuti cikaŵa cakusuzga kuyizgoŵera. Kweni tikazizipizga, ndipo pa ŵanthu awo tikasambiranga nawo Baibolo, ŵankhondi na ŵaŵiri ŵakuluta ku maungano.” Ŵadumbu aŵa ŵakawovwira comene kuti mu tawuni iyo mukaŵavya mpingo muŵe gulu la ŵapharazgi ŵa Ufumu.
Laura, mudumbu wa vilimika pafupifupi 30, wateŵetera ku caru cinyake vilimika vinayi. Iyo wakuti: “Nkhulekera dara kukhumba vinandi mu umoyo. Ici cikovwira ŵapharazgi kuwona kuti munthu wangakhumba yekha kuleka kuŵa na katundu munandi, cifukwa ca ukavu pera yayi. Nili wacimwemwe comene cifukwa ca kovwira ŵanji, comene ŵawukirano. Ndipo cimwemwe ici nchikuru comene pakuyaniska na masuzgo agho nkhusangana nagho. Palije ico cinilekeskenge uteŵeti wane kuno, ndipo nikhalenge kwenekuno mupaka apo Yehova wakhumbirenge.”
[Bokosi/Cithuzithuzi pa peji 32]
Ivyo Vili mu Kabuku ka Makani Ghawemi ku Ŵanthu ŵa Mitundu Yose
Kabuku aka kali na uthenga uwo walembeka mu viyowoyero 29. Pa peji lililose pali uthenga wa ciyowoyero cimoza. Uthenga uwu walembeka nga ni para imwe ndimwe mukuyowoya na munthu. Mwantheura, para munthu wakuŵazga uthenga uwu, cikuŵa nga kuti imwe mukuyowoya nayo.
Mukati mwa cikopi muli mapu gha caru cose. Gwiliskirani nchito mapu agha kuti mumanyane makora na munthu uyo mukudumbiskana nayo. Mungalongora uko mukukhala na kulongora kuti namwe mungatemwa kumanya uko iyo wakufumira. Mu nthowa iyi mungamupangiska kuti mufwatukirane.
Malonje gha kabuku aka ghakulongosora nthowa zinandi izo tingalondezga kuti tovwire awo ŵakuyowoya ciyowoyero ico tikucimanya yayi. Conde ŵazgani mwakupwelelera nthowa izi ndipo zilondezgani.
Pa peji lakulongora ivyo vili mukati mwa kabuku aka pali ndondomeko ya viyowoyero, kweniso vimanyikwiro vya ciyowoyero cilicose. Ici cimovwiraninge kuti mumanye vimanyikwiro ivyo vikulembeka mu mathirakiti ghithu na mabuku ghanyake gha viyowoyero vyakupambanapambana.
[Cithuzithuzi]
Kasi mukugwiliskira nchito kabuku aka mu uteŵeti?