Ulendo Utali Ukatumbikika

PULIKANI nkhani ya ŵadumbu ŵaŵiri ŵa ku Democratic Republic of Congo. Ŵadumbu aŵa ŵakaŵa pa ukuru na unung’una. Iwo ŵakapangana kuti ŵalute ku Ungano wa Cigaŵa wakuti “Perekani Ucindami kwa Ciuta” uwo ukacitikira ku Lisala, mtunda utali comene kufuma kukwawo kweniso kujumpha mu malo agho mukacitikanga nkhondo. Ŵadumbu aŵa ŵakaŵa ŵakunweka kuti ŵakakhozgeke mwauzimu, kukacezga na Ŵakhristu ŵanyawo kweniso ŵakakhumbanga kukakumana na ŵimiliri ŵa ofesi ya Ŵakaboni ŵa Yehova ŵakufuma ku Kinshasa. Nyengo yitali yikajumphapo kwambura kuwonana na waliyose wa ku ofesi cifukwa ca nkhondo mu caru ici. Ntheura ŵakawona kuti ni mwaŵi wawo wakuti ŵakawonane nawo.

Ŵadumbu aŵa ŵakenda pa wato kufuma kukwawo ku Basankusu kuya ku Lisala, mtunda wa makilomita 300 kusorota mu mayiyi na milonga yiŵiri. Ŵakenda sabata zitatu. Wose ŵaŵiri mbateŵeti ŵa nyengo zose, munyake wakaŵa mupayiniya vilimika vitatu ndipo munyake vilimika 19. Ntheura ŵakasangirapo mwaŵi pa ulendo utali uwu kundakapharazga makani ghawemi gha Ufumu mu nthowa. Ŵakamalira maora 110 kupharazgira awo ŵakasangana nawo, ndipo ŵakagaŵira mathirakiti 200 na magazini 300.

Mu mlonga uwo ŵakendanga mukaŵa vigwere na ng’wina zinandi. Usiku ŵakendanga yayi mu mlonga, cifukwa kukaŵa kwakofya comene para kwafipa. Kweniso ŵakajumphanga mu malo ghanandi umo ŵasilikari ŵakaŵasecanga.

Nangauli ulendo uwu ukaŵa utali na wakuvuska, kweni ŵadumbu ŵara ŵakaŵa ŵakukondwa. Ŵakaŵa ŵakuwonga kweniso ŵacimwemwe cifukwa ca kuŵapo pa ungano ku Lisala. Ŵakakhuka comene ndipo ŵakakhozgeka nadi pakuwungana na ŵabali na ŵadumbu ŵakukwana 7,000. Ungano ukati wamara, ŵakambaso ulendo wawo kuwelera kukwawo, ndipo ŵakasanga mbumba zawo zili makora.