Yehova ‘Wakuŵapa Njombe Awo Ŵakumupenja’
Yehova ‘Wakuŵapa Njombe Awo Ŵakumupenja’
“Uyo wakusendelera kwa Ciuta wakwenera kupulikana kuti waliko, ndipo kuti ngwakuŵalambula [wakuŵapa njombe] ŵeneawo ŵakumupenja.”—ŴAHEBERE 11:6.
1, 2. Cifukwa wuli ŵateŵeti ŵanyake ŵa Yehova ŵangaghanaghana kuti mbambura kwenelera?
“BARBARA a wakati: “Naŵa Kaboni wa Yehova vilimika 30, kweni nkhuwona nga nili wakwenelera yayi. Nangauli nacitapo upayiniya na milimo yinyake yinandi yapadera, vyose ivi vindanikhorweske kuti nili wakwenelera kucemeka Kaboni wa Yehova.” Keith nayo wakayowoya maghanoghano ghakuyana waka. Wakati: “Ŵateŵeti ŵa Yehova ŵali na vifukwa vinandi vyakuŵira ŵacimwemwe, kweni ine nkhaŵavya cimwemwe. Lekani nyengo zinyake nkhajiwonanga nga nili wambura kwenelera. Nkhamba kujiwona nga nili wakwananga, ico cikapangiska kuti vinthu vihenipirethu.”
2 Ŵakaboni ŵa Yehova ŵanandi ŵasuzgika na maghanoghano agha kwambira kale. Kasi ndimo namwe mukughanaghanira nyengo zinyake? Panyake masuzgo ghakukata yayi, peneapo ŵanyinu ŵakuwoneka kuti ŵakusangwa na umoyo, palije cilicose ico ŵakwenjerwa naco. Pa cifukwa ici, mungawona nga Yehova wakumutemwani yayi panji kuti muli wambura wakwenelera kuti wamughanaghanireni. Lekani kughanaghana nthena. Baibolo likutipanikizgira kuti: “[Yehova] walije kwelura nanga nkhutinkha suzgo la ŵakusuzgika, nesi kumubisira cisko; kweni para wakalilira wakapulika.” (Salmo 22:24) Mazgu agha, agho ghakuyowoya za Mesiya ghakulongora kuti Yehova wakupulika ŵanthu ŵake ŵakugomezgeka kweniso ŵakuŵapa njombe.
3. Cifukwa wuli nase tikusuzgika?
3 Palije uyo wakuleka kusuzgika, na ŵanthu ŵa Yehova wuwo. Tikukhala mu caru ico cikuwusika na mulwani mukuru wa Yehova, Satana Dyabulosi. (2 Ŵakorinte 4:4; 1 Yohane 5:19) Ŵateŵeti ŵa Yehova mbakuvikilirika yayi, nakuti ndiwo Satana wakulimbana nawo comene. (Job 1:7-12; Civumbuzi 2:10) Mwantheura, mupaka pa nyengo yakuŵikika ya Ciuta, tikwenera ‘kuzizipizga mu suzgo,’ ‘kufwilirapo mu kulomba,’ na kugomezga kuti Yehova wakutighanaghanira. (Ŵaroma 12:12) Para tikusuzgika, tileke kughanaghana kuti Yehova Ciuta withu wakutitinkha!
Ŵanthu Ŵakale Awo Ŵakazizipizga
4. Zunurani ŵateŵeti ŵakugomezgeka ŵa Yehova awo ŵakazizipizga viyezgo.
4 Kale ŵanthu ŵa Yehova ŵanandi ŵakazizipizga viyezgo. Mwaciyelezgero, Hana “wakaŵa mu citima cikuru” cifukwa cakuti wakaŵavya mwana. Iyo wakaghanaghananga kuti Ciuta wamuluwa. (1 Samuel 1:9-11) Apo Fumukazi Yezebeli yikakhumbanga kumukoma, Eliya wakawopa ndipo wakalomba Yehova kuti: “Kwakwana; wuskanimo sono umoyo wane, Yehova, pakuti ntha ndili muwemi kwakuluska ŵasekuru ŵane.” (1 Mathemba 19:4) Citima cikwenera kuti cikamukora mpositole Paulosi cifukwa ca zakwananga zake apo wakati: “Para ine nkhukhumba kucita uwemi, uheni uli nane.” Wakasazgirapo kuti: “Ndamunthu wakusokwa ine!”—Ŵaroma 7:21-24.
5. (a) Kasi Hana, Eliya, na Paulosi ŵakatumbikika wuli? (b) Kasi tingapembuzgika wuli na Mazgu gha Ciuta usange tikughanaghana kuti tili ŵambura kwenelera?
5 Tikumanya kuti Hana, Eliya, na Paulosi wose ŵakazizipizga mu uteŵeti wa Yehova, ndipo wakaŵatumbika comene. (1 Samuel 1:20; 2:21; 1 Mathemba 19:5-18; 2 Timote 4:8) Ndipouli, ŵakasuzgika na citima, kwenjerwa, na wofi. Ipo tingazizwanga yayi usange nase nyengo zinyake tikughanaghana kuti tili ŵambura kwenelera. Kweni kasi mungacita wuli usange mukukayika kuti Yehova wakumutemwani nadi para muli mu masuzgo? Mungapembuzgika na Mazgu gha Ciuta. Mwaciyelezgero, mu nkhani ya pamanyuma tikadumbiskana mazgu gha Yesu ghakuti Yehova wakupenda ‘masisi gha ku mutu winu.’ (Mateyu 10:30) Mazgu ghakukhozga agha ghakulongora kuti Yehova wakughanaghanira comene muteŵeti wake waliyose. Kumbukani ciyelezgero ca Yesu ca tumpheta. Usange palije kamoza ka tuyuni tucoko utu ako kakuwa pasi kwambura Yehova kumanya, kasi wangazerezga wuli masuzgo ghinu?
6. Kasi Baibolo lingaŵapembuzga wuli awo ŵakughanaghana kuti mbambura kwenelera?
6 Kasi ise taŵanthu ŵambura urunji tingaŵa nadi ŵakuzirwa pamaso pa Yehova Ciuta, Mlengi wankhongono zose? Enya! Nakuti mu Baibolo muli mavesi ghanandi agho ghakupanikizgira fundo iyi. Para tikulanguruka pa mavesi agha, tingayowoya nga ni wamasalmo uyo wakati: “Para kukweŵeka kwa mtima wane kukaŵa kukuru, visangulusko vinu vikakondwereska mzimu wane.” (Salmo 94:19) Tiyeni tidumbiskane ghanyake mwa mavesi agha, agho ghatovwirenge kuti tipulikiske kuti tili ŵakuzirwa pamaso pa Ciuta ndiposo kuti wazamutipa njombe para tikulutilira kucita khumbo lake.
‘Cuma Capadera’ ca Yehova
7. Kasi ni ucimi wuli wakukhozga uwo Yehova wakayowoya ku caru cakuzura na uheni kwizira mwa Malaki?
7 Ŵayuda ŵakacitanga vinthu viheni comene mu ma 400 B.C.E. Ŵasofi ŵakapokeleranga nyama zambura kwenelera na kuzipeleka pa jochero la Yehova. Ŵeruzgi ŵakatemweranga pakweruzga. Kuwukwa, utesi, uryarya, na uleŵi vikathandazgika. (Malaki 1:8; 2:9; 3:5) Malaki wakayowoya ucimi wakuzizwiska comene ku caru cakuzura na uheni ici. Wakati Yehova wazamuwezga ŵanthu ŵake kuti ŵazakaŵeso ŵakuzomerezgeka pamaso pake. Tikuŵazga kuti: “Ŵati ŵaŵenge ŵane, wakuti Yehova wa mipingo, cuma cane capadera mu zuŵa ilo nkhufiska, ndipo ndiŵalengere lusungu nga ndi wiske wakulengera lusungu mwana wake uyo wakumuteŵetera.”—Malaki 3:17.
8. Kasi lemba la Malaki 3:17 lingaŵakhwaska wuli ŵa mzinda ukuru?
8 Ucimi wa Malaki ukufiskika na sono wuwo ku Ŵakhristu ŵakuphakazgika, awo ŵakupanga mtundu wauzimu wa 144,000. Uwu ni mtundu wa Yehova, ‘cuma capadera’ panji ‘ŵanthu ŵake na ŵake.’ (1 Petros 2:9) Ucimi wa Malaki ungaŵaso wakukhozga kwa ŵa “mzinda ukuru,” awo “ŵakwimilira panthazi pa cizumbe na pa maso pa Mwana mberere, ŵakuvwarikika minjilira yituŵa.” (Civumbuzi 7:4, 9) Ŵa mzinda ukuru aŵa ŵakuŵa mskambo umoza na ŵakuphakazgika, pasi pa muliska yumoza, Yesu Khristu.—Yohane 10:16.
9. Cifukwa wuli ŵanthu ŵa Yehova ni ‘cuma capadera’ kwa iyo?
9 Kasi Yehova wakuŵawona wuli awo ŵasankha kumuteŵetera? Kuyana na Malaki 3:17, wakuŵawona nga ni umo wiske wakuwonera mwana wake. Ndipo wonani mazgu agho Ciuta wakayowoya kulongora umo wakuwonera ŵanthu ŵake. Wakati ni ‘cuma capadera.’ Mabaibolo ghanyake ghakung’anamura mazgu agha kuti “ŵane na ŵane,” “cuma cane cakuzirwa comene,” ndiposo “majuda ghane.” Kasi cifukwa wuli Yehova wakuwona awo ŵakumuteŵetera kuŵa ŵapadera nthena? Cifukwa cimoza nchakuti ni Ciuta wakuwonga. (Ŵahebere 6:10) Wakusendelera kwa awo ŵakumuteŵetera na mtima wose ndipo wakuŵawona kuŵa ŵapadera.
10. Kasi Yehova wakuŵavikilira wuli ŵanthu ŵake?
10 Kasi muli na cinthu cinyake ico mukuciwona kuŵa cuma capadera? Kasi mukuyezgayezga yayi kuti mucivikilire? Ndimo Yehova wakucitira na ‘cuma cake capadera.’ Mbunenesko kuti wakuŵavikilira yayi ŵanthu ŵake ku viyezgo vyose panji ku ngozi. (Mupharazgi 9:11) Kweni Yehova wakuŵavikilira mwauzimu ŵateŵeti ŵake ŵakugomezgeka. Wakuŵapa nkhongono kuti ŵazizipizge viyezgo. (1 Ŵakorinte 10:13) Lekani Mozesi wakaphalira Ŵaisrayeli, ŵanthu ŵa Ciuta, kuti: “Muŵe ŵankhongono na kukhwima mtima, . . . Yehova Ciuta winu ndiye wakwenda namwe, Iye ntha tiwamulekelereni, panji kumusidani.” (Duteronome 31:6) Yehova wakuŵatumbika ŵanthu ŵake. Iyo wakuŵawona kuŵa ‘cuma capadera.’
Yehova ‘Wakuŵapa Njombe’
11, 12. Kasi para tamanya kuti Yehova wakupeleka njombe cingatovwira wuli kuti tileke kukayika?
11 Ukaboni unyake wakuti ŵateŵeti ŵa Yehova mbakuzirwa kwa iyo ngwakuti wakuŵapa njombe. Wakaphalira Ŵaisrayeli kuti: ‘Niyezgani, wakuti Yehova wa mipingo, usange ndileke kumujulirani vidangazi vyakucanya na kumupungulirani citumbiko cakufuluka.’ (Malaki 3:10) Paumaliro Yehova wazamuŵapa umoyo wamuyirayira ŵateŵeti ŵake. (Yohane 5:24; Civumbuzi 21:4) Njombe iyi yikulongora kuti Yehova wakutitemwa comene ndiposo kuti wali na mtima wa kupa. Yikulongoraso kuti ŵateŵeti ŵake mbakuzirwa kwa iyo. Para tamanya kuti Yehova wakupeleka njombe cingatovwira kuti tileke kukayika kuti wakutighanaghanira nadi. Nakuti Yehova wakutipempha kuti ndimo timuwonerenge, kuti wakutipa njombe! Paulosi wakalemba kuti: “Uyo wakusendelera kwa Ciuta wakwenera kupulikana kuti waliko, ndipo kuti ngwakuŵalambula [wakuŵapa njombe] ŵeneawo ŵakumupenja.”—Ŵahebere 11:6.
12 Mbunenesko kuti tikuteŵetera Yehova pakuti tikumutemwa, cifukwa ca ivyo wakutilayizga pera yayi. Kweni nkhwananga yayi kulindilira njombe. (Ŵakolose 3:23, 24) Cifukwa cakuti wakutemwa na kuzirwiska awo ŵakumupenja na mtima wose, Yehova wakuŵapa njombe.
13. Cifukwa wuli sembe ya Yesu mbukaboni ukuru wakuti Yehova wakutitemwa?
13 Ukaboni ukuru wakuti ŵanthu mbakuzirwa comene pamaso pa Yehova ngwakuti wakapeleka mwana wake kuŵa sembe. Mpositole Yohane wakalemba kuti: “Ciuta wakamancha kucitemwa caru, lekani wakapeleka Kananda wake, mwakuti yose uyo wakupulikana nayo waleke kutayika, kweni waŵenge na umoyo wamuyirayira.” (Yohane 3:16) Sembe ya Yesu Khristu yikulongora kuti mbutesi kuti Yehova wakutitemwa yayi panji kuti tili ŵambura kwenelera pamaso pake. Usange Yehova wakapeleka Mwana wake yumoza pera cifukwa ca ise, ipo wakwenera kuti wakutitemwa nadi.
14. Kasi nchivici ico cikulongora umo Paulosi wakawoneranga sembe ya Yesu?
14 Mwantheura, para mwayamba kughanaghana kuti muli ŵambura kwenelera, mukwenera kukumbukira sembe ya Yesu. Mukwenera kuwona sembe iyi kuti nchawanangwa ico Yehova wali kumupani imwe pamwekha. Ndimo mpositole Paulosi wakacitira. Kumbukani ivyo wakayowoya, wakati: “Ndamunthu wakusokwa ine!” Kweni wakalutirizga kuti: “Nkhuwonga Ciuta mwa Khristu Yesu Fumu yithu,” uyo “wakanditemwa, ndipo wakajipeleka cifukwa ca ine.” (Ŵaroma 7:24, 25; Ŵagalatiya 2:20) Apa Paulosi wakajikuzganga yayi. Iyo wakalongoranga waka cigomezgo cake cakuti ngwakuzirwa pamaso pa Yehova. Namweso mukwenera kuwona sembe ya Yesu kuti nchawanangwa ico Ciuta wakamupani. Yehova wakuponoska pera yayi kweniso wakupeleka njombe.
Cenjerani na “Mauryarya gha Satana”
15-17. (a) Kasi Dyabulosi wakucita wuli kuti ŵanthu ŵambe kughanaghana kuti mbambura kwenelera? (b) Kasi tingakhozgeka wuli na ivyo vikacitikira Yobu?
15 Ndipouli, nyengo zinyake cingamusuzgani kugomezga kuti fundo zakupembuzga izo zili mu Mazgu gha Ciuta zikumukhwaskani. Mungaghanaghana kuti umoyo wamuyirayira mu caru ciphya ngwa awo mbakwenelera pera, imwe yayi. Usange ndimo mukughanaghanira, kasi mungacita wuli?
16 Mukwenera kuti mukumanya ivyo Paulosi wakaphalira Ŵaefeso, wakati: “Vwarani mahomwa ghose gha Ciuta, kuti muŵenge na nkhongono kwimikana na mauryarya gha Satana.” (Ŵaefeso 6:11) Para tikughanaghana nthowa izo Satana wakupusikira ŵanthu, ivyo vingiza mu maghanoghano mwaluŵiro ni kutemwa cuma na uzaghali. Uwu mbunenesko nadi. Viyezgo ivi vyapuluska ŵanthu ŵanandi ŵa Ciuta kwambira kale. Kweni pali uryarya unyake wa Satana uwo tikwenera kuwudelera yayi. Wakuyezgayezga kupangiska ŵanthu kughanaghana kuti Yehova Ciuta wakuŵatemwa yayi.
17 Dyabulosi ngwaluso comene pa nkhani iyi kuti wafiske khumbo lake lakuti wapatuske ŵanthu kwa Ciuta. Kumbukani ivyo Bilidadi wakaphalira Yobu, wakati: “Munthu wangaŵa uli wakunyoroka kwa Ciuta? Kasi wangaŵa uli mutuŵa uyo walikubabika na mwanakazi? Wona, nanga ndi mwezi kuti ukuŵala cara, na nyenyezi kuti nzituŵa cara mu maso ghake; kasi kucepa kwa munthu kuŵenge uli apo iye ndi mphorozi, na mwana wa munthu apo iye ndi munyororo?” (Job 25:4-6; Yohane 8:44) Kasi mungawona umo mazgu agha ghakwenera kuti ghakamugongoweskera Yobu? Ntheura lekani kuzomerezga Satana kuti wamugongoweskani. M’malo mwake, manyani maucenjezi gha Satana mwakuti muŵe na cikanga ndiposo nkhongono zakucitira ico nchiwemi. (2 Ŵakorinte 2:11) Nangauli Yehova wakenera kumuwezga Yobu, kweni wakamutumbika cifukwa ca kuzizipizga kwake. Wakamuwezgerapo kaŵiri kuluska ivyo wakaŵa navyo pakudankha.—Job 42:10.
Yehova “Ndi Mukuru Wakuluska Mtima Withu”
18, 19. Kasi Ciuta ni “mukuru wakuluska mtima withu” mwauli, ndipo “wakumanya vyose” mu nthowa wuli?
18 Mbunenesko kuti cingaŵa cakusuzga kuti tileke kujikayikira usange maghanoghano agha ghali kunjira comene. Kweni mzimu wa Yehova ungamovwirani kuti pacokopacoko mupankhule ‘maghanoghano [agho] . . . ghakwimikana na umanyi wa Ciuta.’ (2 Ŵakorinte 10:4, 5) Para mwayamba kughanaghana kuti muli ŵambura kwenelera, langurukani pa ivyo mpositole Yohane wakayowoya, wakati: “Na ceneici titi timanyenge kuti tili ŵa unenesko, ndipo panthazi pake titi tikhomeske mtima withu, mu vyeneivyo mtima withu ukutisuska; cifukwa Ciuta ndi mukuru wakuluska mtima withu, ndipo wakumanya vyose.”—1 Yohane 3:19, 20.
19 Kasi mazgu ghakuti “Ciuta ndi mukuru wakuluska mtima withu” ghakung’anamuraci? Nyengo zinyake, mtima withu ungatisuska na kughanaghana kuti tili ŵambura kwenelera, comene usange tamanya maubudi ghithu. Panji cifukwa ca umo tikakulira, tikujiwona nga ndise ŵambura kwenelera ndipo Yehova wangazomera yayi vyose ivyo tingacita. Mazgu gha mpositole Yohane ghakutipanikizgira kuti Yehova ni mukuru kuluska ivyo ise tikughanaghana. Iye wakuwona vinandi kuluska maubudi ghithu ndipo wakumanya kuti tingacita makora. Wakumanyaso ivyo tikukhumba. Davide wakalemba kuti: “Cifukwa wakumanya kalengekero kithu, wakukumbuka kuti tili fuvu ise.” (Salmo 103:14) Enya, Yehova wakutimanya makora kuluska umo tikujimanyira taŵene!
‘Mphumphu Yakutowa Ndiposo ya Uthemba’
20. Kasi ucimi wa Yesaya wakuyowoya za kuwezgera vinthu pakale ukulongora kuti Yehova wakuŵawona wuli ŵateŵeti ŵake?
20 Kwizira mwa nchimi Yesaya, Yehova wakaphalira ŵanthu ŵake kuti vinthu vizamuweleraso pakale. Mazgu ghakupembuzga agha ndigho Ŵaisrayeli ŵakakhumbanga apo ŵakaŵa ŵazga ku Babulone. Yehova wakayowoyerathu kuti ŵazamuwelera kukwawo, wakati: “Tiuŵenge nga ndi mphumphu yakutowa mu woko la Yehova, mphumphu ya uthemba mu woko la Ciuta wako.” (Yesaya 62:3) Na mazgu agha, Yehova wakaŵacindika comene ŵanthu ŵake. Ndimo wacitira na mtundu wake wa Israyeli wauzimu lero. Vili nga ni para waŵakwezga pacanya kuti wose ŵadokere.
21. Kasi mukwenera kucitaci kuti muŵe na cigomezgo kuti Yehova watumbikenge kuzizipizga na kugomezgeka kwinu?
21 Nangauli ucimi uwu ukufiskika comene pa ŵakuphakazgika, kweni ukulongora umo Yehova wakucindikira wose awo ŵakumuteŵetera. Ntheura, usange mwayamba kukayika, kumbukani kuti nangauli muli ŵambura urunji, kweni mungaŵa wakuzirwa nga ni “mphumphu yakutowa” ndiposo nga ni “mphumphu ya uthemba” pamaso pa Yehova. Ntheura lutilirani kumukondweska mwa kucita khumbo lake na mtima wose. (Zintharika 27:11) Usange ndimo mucitirenge, mungaŵa na cigomezgo kuti Yehova watumbikenge kuzizipizga na kugomezgeka kwinu!
[Mazgu ghamusi]
a Mazina ghanyake ghasinthika.
Kasi Mukukumbuka?
• Kasi tili ‘cuma capadera’ kwa Yehova mu nthowa wuli?
• Cifukwa wuli nchakuzirwa kumanya kuti Yehova wakupeleka njombe?
• Kasi ni ‘mauryarya’ wuli gha Satana agho tikwenera kuŵa nagho maso?
• Kasi Ciuta ni “mukuru wakuluska mtima withu” mu nthowa wuli?
[Mafumbo]
[Cithuzithuzi pa peji 23]
Paulosi
[Cithuzithuzi pa peji 23]
Eliya
[Cithuzithuzi pa peji 23]
Hana
[Cithuzithuzi pa peji 24]
Mu Mazgu gha Ciuta muli fundo zinandi zakupembuzga