Yehova Wakupenda ‘Masisi gha ku Mitu Yinu’
Yehova Wakupenda ‘Masisi gha ku Mitu Yinu’
“Palije [kampheta] kamoza kakuwa pasi kwambura Ŵawiskemwe [kumanya]: kweni masisi nagho gha mitu yinu ghali kupendeka ghose.”—MATEYU 10:29, 30.
1, 2. (a) Cifukwa wuli Yobu wakaghanaghananga kuti Ciuta wamuleka? (b) Kasi ivyo Yobu wakayowoya vikung’anamura kuti wakagalukira Yehova? Longosorani.
“NKHULILIRA kwa Imwe ndipo kuti mukundipulika cara; nkhwimilira, kweni kuti mukundipwelelera cara. Mwazgoka wankhaza kwa ine; na nkhongono ya woko linu mukundisuzga.” Munthu uyo wakayowoya mazgu agha wakaŵa na citima comene, ndipo nchakuzizwiska yayi kuti wakaŵa na citima nthena! Iyo wakakavuka, ŵana ŵake ŵakafwa, ndipo pa nyengo iyi wakalwaranga nthenda yakuŵinya comene. Munthu uyu wakaŵa Yobu, ndipo nkhani yake yili kulembeka mu Baibolo kuti ise tipindure nayo.—Job 30:20, 21.
2 Ivyo Yobu wakayowoya vingapulikikwa nga ni para wakagalukira Ciuta, kweni yayi. Yobu wakayowoyanga nthena cifukwa ca kuŵinya mtima. (Job 6:2, 3) Wakamanya yayi kuti ni Satana uyo wakamuyezganga, lekani wakaghanaghananga kuti Ciuta wamuleka. Pa nyengo yinyake, Yobu wakaphalira Yehova kuti: “Mwabisiraci cisko cinu, kundipima ngati ndine mulwani winu?” a—Job 13:24.
3. Kasi tingamba kughanaghana vici para tikusuzgika?
3 Lero, ŵanthu ŵanandi ŵa Yehova ŵakusuzgika cifukwa ca nkhondo, vivulupi vya ndyali, masoka gha cilengiwa, ucekuru, ulwari, ukavu, ndipo nchito yawo yikukanizgika na boma. Namweso mukwenera kuti mukuyezgeka na vinthu vinyake. Nyengo zinyake mungaghanaghana kuti Yehova wamubisamani. Lemba la Yohane 3:16 mukulimanya makora, likuti: “Ciuta wakamancha kucitemwa caru, lekani wakapeleka Kananda wake.” Ndipouli, para mukusuzgika mungamba kughanaghana kuti: ‘Kasi Ciuta wakunitemwa nadi ine? Kasi wakuwona suzgo lane? Kasi wakunighanaghanira nthena?’
4. Kasi nchiyezgo wuli cambura kumara ico Paulosi wakenera kuzizipizga, ndipo ise vingatikhwaska wuli usange nase vingaticitikira?
4 Wonani ivyo vikacitikira mpositole Paulosi. Iyo wakalemba kuti: “Munga ukandipikira mu thupi lane, thenga la Satana lakundiŵapula.” Wakasazgirapo kuti: “Nkhayiŵeyelera Fumu katatu, kuti ciwukeko kwa ine.” Yehova wakapulika ŵeyelero lake. Kweni wakamuphalira kuti wamovwirenge mwa munthondwe yayi. M’malo mwake, Paulosi wakeneranga kugomezga nkhongono za Ciuta kuti wazizipizge ‘munga [uwo ukaŵa] mu thupi’ lake. b (2 Ŵakorinte 12:7-9) Nga ni Paulosi, nyengo zinyake namwe mukulimbana na ciyezgo ico cikumara yayi. Panyake mukughanaghana kuti: ‘Kasi apo Yehova wakuleka kunovwira, ndikuti wakumanya yayi suzgo lane panji wakunighanaghanira yayi?’ Zgoro ndakuti yayi! Ivyo Yesu wakaphalira ŵapositole ŵake wakati waŵasankha vikulongora kuti Yehova wakufipira mtima ŵateŵeti ŵake ŵakugomezgeka waliyose payekha. Tiyeni tiwone umo mazgu ghake ghangatikhozgera lero.
“Mungopanga” Cara—Cifukwa Wuli?
5, 6. (a) Kasi Yesu wakaŵawovwira wuli ŵapositole ŵake kuti ŵaleke kopa vya kunthazi? (b) Kasi Paulosi wakalongora wuli cigomezgo cakuti Yehova wakamughanaghaniranga?
5 Ŵapositole wakapokera nkhongono kufuma kwa Yesu, kusazgapo “mazaza pa mizimu ya ukazuzi, gha kuyifumya, na kucizga matenda ghose na maulwari ghose.” Kweni ici cikung’anamura kuti iwo ŵakaŵavya masuzgo yayi. M’malo mwake, Yesu wakalongosora vinthu vinyake ivyo vikenera kuŵacitikira. Ndipouli, wakaŵaphalira kuti: “Mungopanga awo ŵakukoma thupi [cara], kweni ŵalive kumanya kukoma mzimu: kweni Uyo wakumanya kukoma mzimu na thupi mu Gehena, ndiyo mumopenge.”—Mateyu 10:1, 16-22, 28.
6 Kuti ŵapositole ŵake ŵapulikiske cifukwa ico ŵakeneranga kopa yayi, Yesu wakaŵaphalira viyelezgero viŵiri. Wakati: “Asi tumpheta tuŵiri tukugulika kakopara? Ndipo palive kamoza kakuwa pasi kwambura Ŵawiskemwe [kumanya]: kweni masisi nagho gha mitu yinu ghali kupendeka ghose. Ntheura mungopanga [cara]; imwe muli ŵakuzirwa kwakuluska tumpheta tunandi.” (Mateyu 10:29-31) Wonani kuti Yesu wakayaniska kuleka kopa masuzgo na kugomezga kuti Yehova wakutighanaghanira waliyose payekha. Tikukayika yayi kuti mpositole Paulosi wakaŵa na cigomezgo ici. Wakalemba kuti: “Usange Ciuta wali kwa ise, ndi njani wakwimikana nase? Mweneuyo kuti wakamuleka Mwana wake cara, kweni wakamupeleka cifukwa ca ise tose, kasi wangalekaso uli kutipa vinthu vyose kwawanangwa?” (Ŵaroma 8:31, 32) Kwali muli na suzgo wuli, namwe mungagomezga kuti Yehova wakumughanaghanirani, cikuru mukugomezgeka kwa iyo. Para tingasanda ivyo Yesu wakaphalira ŵapositole ŵake, mbwenu tiŵenge ŵakusimikizga comene kuti Yehova wakutighanaghanira.
Kuzirwa kwa Mpheta
7, 8. (a) Kasi mpheta ŵakaziwonanga wuli mu nyengo ya Yesu? (b) Cifukwa wuli pa Mateyu 10:29 Yesu wakayowoya lizgu ilo mu Cigiriki likung’anamura tumpheta tucoko comene?
7 Ivyo Yesu wakayowoya vikulongora pakweru kuti Yehova wakufipira mtima ŵateŵeti ŵake waliyose payekha. Cakwamba, tiyeni tiwone ciyelezgero ca mpheta. Mu nyengo ya Yesu, mpheta cikaŵa cakurya, kweni ŵakazitinkhanga cifukwa cakuti zikananganga mbuto m’munda. Mpheta zikaŵa zinandi ndiposo zakuchipa comene mwakuti para munthu wakaŵa na kakopara kamoza, wakagulanga ziŵiri. Usange munthu wakaŵa na tumakopara tuŵiri wakagulanga mpheta zinayi yayi, kweni zinkhondi. Kayuni kanyake kakaŵanga nga ni bashera!—Luka 12:6.
8 Kweniso ghanaghanani ukuru wa tuyuni utu. Pakuyaniska na tuyuni tunyake, tumpheta nthucoko comene. Nanga yingaŵa yilara, mpheta njicoko. Ndipouli, lizgu la Cigiriki ilo lang’anamulika kuti “tumpheta” pa Mateyu 10:29 likung’anamura tumpheta tucoko comene. Panji Yesu wakakhumbanga kuti ŵapositole ŵake ŵaghanaghanire za kayuni kambura kuzirwa comene.
9. Kasi ni fundo wuli iyo Yesu wakayowoya mu ciyelezgero ca mpheta?
9 Fundo ya Yesu mu ciyelezgero ca mpheta yikupulikikwa makora comene: Ico ŵanthu ŵangaciwona nga nchambura nchito, kwa Yehova Ciuta nchakuzirwa. Yesu wakakhozgera fundo iyi mwa kusazgirapo kuti palije kampheta ako ‘kangawa pasi’ kwambura Yehova kumanya. c Apa sambiro likuwonekerathu. Usange Yehova wakuwona ivyo vikucitikira kayuni kacoko comene ndiposo kambura kuzirwa, kuli wuli munthu uyo wakumuteŵetera?
10. Kasi mazgu ghakuti: “Masisi nagho gha mitu yinu ghali kupendeka ghose” ghakung’anamuraci?
10 Padera pa ciyelezgero ca mpheta, Yesu wakati: “Masisi nagho gha mitu yinu ghali kupendeka ghose.” (Mateyu 10:30) Mazgu agha ngafupi kweni ngankhongono comene. Ghakukhozgera fundo ya Yesu ya ciyelezgero ca mpheta. Ghanaghanani ici: Munthu wali na masisi pafupifupi 100,000. Kanandi sisi lose likuyana waka, palije ilo likuwoneka lapadera kuluska linyake. Kweni Yehova Ciuta wakuwona na kupenda sisi lililose. Pakuti ndimo Yehova wakucitira na masisi ghithu, kasi cilipo ico wakuleka kumanya mu umoyo withu? Tikukayika yayi kuti Yehova wakumanya umo muteŵeti wake waliyose waliri. Enya nadi, “wakulaŵiska mu mtima.”—1 Samuel 16:7.
11. Kasi Davide wakalongora wuli kuti Yehova wakamughanaghaniranga?
11 Davide, uyo wakasuzgika comene mu umoyo wake, wakaŵa na cigomezgo kuti Yehova wakamuwonanga. Wakalemba kuti: “A Yehova mwandisanda, mwandimanya! Mukumanya para ndakhala pasi na para ndawuka; mukupulikiska patali maghanoghano ghane.” (Salmo 139:1, 2) Namwe mungaŵa na cigomezgo kuti Yehova wakumumanyani. (Yeremiya 17:10) Lekani kughanaghana kuti muli wambura nchito mwakuti Yehova uyo maso ghake ghakulaŵiska palipose wakumuwonani yayi!
“Masozi Ghane Mughaŵike mu Supa Yinu”
12. Kasi tikumanya wuli kuti Yehova wakumanya masuzgo gha ŵanthu ŵake?
12 Yehova wakumanya ŵateŵeti ŵake wose, kweniso wakumanya masuzgo ghawo ghose. Mwaciyelezgero, apo Ŵaisrayeli ŵakayuzgikanga ku wuzga, Yehova wakaphalira Mozesi kuti: “Nadi ndawona visuzgo vya ŵanthu ŵane ŵeneaŵa wali mu Eguputo, ndapulika kulira kwawo cifukwa ca ŵakuru ŵa milimo; pakuti nkhumanya vitima vyawo.” (Exodus 3:7) Nchakupembuzga comene kumanya kuti para tikuzizipizga viyezgo, Yehova wakuwona ivyo vikucitika ndipo wakupulika kulira kwithu! Wakuticitira citima nadi para tikusuzgika.
13. Kasi nchivici ico cikulongora kuti Yehova wakughanaghanira nadi ŵateŵeti ŵake?
13 Cinyake ico cikulongora kuti Yehova wakughanaghanira ŵabwezi ŵake ni lusungu ulo wakacitira Ŵaisrayeli. Nangauli kanandi ŵakasuzgikanga cifukwa ca mtafu wawo, kweni pakuyowoya za Yehova, Yesaya wakalemba kuti: “Mu visuzgo vyawo vyose nayeso wakasuzgika.” (Yesaya 63:9) Ipo pakuti ndimwe muteŵeti wakugomezgeka wa Yehova, mungaŵa na cigomezgo kuti para mukusuzgika, Yehova vikumuŵinya. Kasi fundo iyi yikumukhozgani yayi kuti mulimbane na masuzgo mwacikanga na kulutilira kucita ivyo mungafiska mu uteŵeti wake?—1 Petros 5:6, 7.
14. Kasi vinthu vikaŵa wuli apo Salmo 56 likalembekanga?
14 Mu Salmo 56, ilo Davide wakalemba apo wakacimbiranga Sauli uyo wakakhumbanga kumukoma, tikusangamo ukaboni wakuti Davide wakaŵa na cigomezgo kuti Yehova wakamughanaghaniranga ndiposo kuti vikamuŵinyanga apo wakasuzgikanga. Davide wakacimbilira ku Gath, kweni wakawopa kukoreka na Ŵafilisiti ŵakati ŵamumanya. Wakalemba kuti: “Vimphindikwa vyane vikundifyadulira pasi zuŵa lose, cifukwa mbanandi awo ŵakukomana nane mwakujikuzga.” Pakuti wakaŵa mu suzgo, Davide wakazgokera kwa Yehova. Wakati: “Zuŵa na zuŵa ŵakuzgolera panyake mazgu ghane; kughanaghana kose kwawo kuli pa ine kundicitira uheni.”—Salmo 56:2, 5.
15. (a) Kasi Davide wakang’anamurangaci apo wakalomba Yehova kuti waŵike masozi ghake mu supa panji kughalemba mu buku? (b) Kasi tingaŵa na cigomezgo wuli para tikuzizipizga viyezgo?
15 Ndipo umo tikuwonera pa Salmo 56:8, Davide wakayowoya mazgu ghakukondweska agha: ‘Mulikuŵanika mfundukutu [kuyingayinga kwane kose]; masozi ghane mughaŵike mu supa yinu! Asi ghali mu buku linu?’ Agha ni mazgu ghakucontha mtima comene, kulongora kuti Yehova wakutighanaghanira! Para tikwenjerwa, tingacemerezga na kulilira Yehova. Nanga ni Yesu munthu wambura kwananga ndimo wakacitira. (Ŵahebere 5:7) Davide wakaŵa na cigomezgo kuti Yehova wakawonanga ivyo vikamucitikiranga ndipo wakumbukenge masuzgo ghake, nga ni para kuti wakasunga masozi ghake mu supa panji kughalemba mu buku. d Panyake imwe mukughanaghana kuti masozi ghinu ghanganjiramo ghanandi mu supa iyi panji kutora mapeji ghanandi mu buku ili. Usange ni nthena, mungapembuzgika. Baibolo likutisimikizgira kuti: “Yehova wali pafupi na awo mbakuphyoka mu mtima, ndipo wakuponoska awo mbamzimu wakupera.”—Salmo 34:18.
Kuŵa Paubwezi na Ciuta
16, 17. (a) Kasi tikumanya wuli kuti Yehova wakulengera lusungu ŵanthu ŵake para ŵakusuzgika? (b) Kasi Yehova wacitaci kuti ŵanthu ŵaŵe ŵabwezi ŵake?
16 Pakuti Yehova wakupenda ‘masisi gha ku mutu withu,’ cikutilongora kuti tikusopa Ciuta uyo wakutiwona na kutighanaghanira. Nangauli vyakuŵinya na masuzgo ghose vizamumara para caru ciphya ciza, kweni Yehova wakucitira ŵanthu ŵake cinthu cinyake ciwemi comene nanga ni sono. Davide wakalemba kuti: “Yehova ndi bwezi la awo ŵakumopa; tiwaŵamanyiske vya phangano lake.”—Salmo 25:14.
17 Kuŵa ‘bwezi la Yehova.’ Ise ŵanthu ŵambura urunji tingawona nga ici cingacitika yayi! Kweni Yehova wakucema wose awo ŵakumopa kuti ŵize mu hema lake. (Salmo 15:1-5) Kasi Yehova wakuŵacitira vici ŵalendo ŵake? Davide wakati wakuŵamanyiska phangano lake. Yehova wakuŵaphalira vyakusingo, wakuvumbulira zinchimi “cakuubende cake” mwakuti ŵamanye vilato vyake na ivyo ŵakwenera kucita kuti umoyo wawo uyane na khumbo lake.—Amosi 3:7.
18. Kasi tikumanya wuli kuti Yehova wakukhumba kuti tiŵe ŵabwezi ŵake?
18 Nchakukhozga nadi kumanya kuti taŵanthu ŵakwananga tingaŵa paubwezi na Yehova, Ciuta Wapacanya Nkhanira. Nakuti wakuticiska kuti tikorane nayo ubwezi. Baibolo likuti: “Sendelerani kwa Ciuta, ndipo iyo wati wasendelere kwa imwe.” (Yakobe 4:8) Yehova wakukhumba kuti tiŵe ŵabwezi ŵake. Nakuti wali kucitapo kale kanthu kuti ise tiŵe ŵabwezi ŵake. Sembe ya Yesu yili kujura nthowa kuti ise tiŵe paubwezi na Ciuta Wankhongonozose. Baibolo likuti: “Ise tikutemwa cifukwa iye wakadanga wakatitemwa ise.”—1 Yohane 4:19.
19. Kasi kuzizipizga kungakhozga wuli ubwezi withu na Yehova?
19 Ubwezi uwu ukukhora para tikuzizipizga masuzgo. Musambiri Yakobe wakalemba kuti: “Uzizipizgo uŵe na mulimo wake wakufiskika, mwakuti muŵenge ŵakufiskika nkhanira nkhanira, ŵambura kupelera kanthu.” (Yakobe 1:4) Kasi ni “mulimo” wuli uwo ukufiskika para tikuzizipizga masuzgo? Kumbukani ‘munga [uwo ukaŵa] mu thupi’ la Paulosi. Kasi kuzizipizga kwa Paulosi kukafiska vici? Pakuyowoya za viyezgo, Paulosi wakati: “Ntheura ndithumbwirenge mbwenu na kukondwa kukuru mu maunthomboro ghane, kuti nkhongono za Khristu zindibenekelere. Ntheura nkhukondwa mu vyakutomboroka, mu vyakusunjizga, mu vyakusokweska, mu vyakuzikizga, mu vyakufinyirizga, cifukwa ca Khristu: cifukwa penepapo ndili wakutomboroka, apo ndipo ndili wankhongono.” (2 Ŵakorinte 12:9, 10) Ivyo vikacitikira Paulosi vikawovwira kuti Yehova wamupe nkhongono zakuluska za kawiro kuti wazizipizge. Ici cikamovwira kuti wasendelere comene kwa Khristu na Yehova Ciuta.—2 Ŵakorinte 4:7; Ŵafilipi 4:11-13.
20. Kasi tikumanya wuli kuti Yehova watovwirenge na kutipembuzga para tikusuzgika?
20 Panyake Yehova wazomerezga viyezgo vinu kuti vilutilire. Usange ni nthena, kumbukani ivyo walayizga awo ŵakumopa: ‘Ndikutayenge cara, panji nesi kukusida nakamo kose.’ (Ŵahebere 13:5) Namwe Yehova wangamovwirani na kumupembuzgani. Wakupenda nanga ni ‘masisi gha ku mutu winu.’ Wakuwona kuzizipizga kwinu. Vikumuŵinya para imwe mukusuzgika. Wakumughanaghanirani nadi. Ndipo ‘waluwenge [yayi] mulimo winu na kutemwa uko mukalongora ku zina lake.’—Ŵahebere 6:10.
[Mazgu ghamusi]
a Davide na ŵana ŵakugomezgeka ŵa Kora nawo ŵakayowoyapo nthena.—Salmo 10:1; 44:24.
b Baibolo likuyowoya yayi ‘munga [uwo ukaŵa] mu thupi’ la Paulosi. Panyake wakaŵa na suzgo la maso. Panji ‘munga mu thupi’ ŵakaŵa ŵapositole ŵatesi na ŵanji awo ŵakasuskanga upositole na uteŵeti wa Paulosi.—2 Ŵakorinte 11:6, 13-15; Ŵagalatiya 4:15; 6:11.
c Ŵanyake ŵakuti mazgu agha ghakuyowoya waka za kufwa kwa kampheta yayi. Iwo ŵakuti apo ŵakalembanga vesi ili mu Cigiriki, mazgu agha ghakayowoyanga kayuni ako kadeka pasi kuti kasore cakurya. Usange ni nthena, cikung’anamura kuti Ciuta wakuwona na kupwelelera vyose ivyo tuyuni tukucita zuŵa na zuŵa, para twafwa pera yayi.—Mateyu 6:26.
d Mu nyengo zakale, supa zikapangikanga kufuma ku vikumba vya mberere, mbuzi, na ng’ombe. Mu supa izi ŵakaŵikangamo mkaka, maji, na vinthu vinyake. Vikumba ivyo wakavinyukutanga makora ŵakasungangamo mafuta panji vinyo.
Kasi Mukukumbuka?
• Kasi ni vici ivyo vingapangiska munthu kughanaghana kuti Ciuta wamuleka?
• Kasi tikusambirapo vici pa ciyelezgero ca Yesu ca tumpheta na kupendeka kwa masisi gha ku mitu yithu?
• Kasi cikung’anamuraci kuti Yehova wakuŵika masozi mu “supa” panji kughalemba mu “buku” lake?
• Kasi tingaŵa wuli ‘bwezi la Yehova’?
[Mafumbo]
[Cithuzithuzi pa peji 19]
Kasi Yehova wakalekeraci kuwuskamo ‘munga mu thupi’ la Paulosi?
[Cithuzithuzi pa peji 20]
Kasi tingasambirapo vici pa ciyelezgero ca Yesu ca tumpheta?
[Kulongosora Cithuzithuzi]
© J. Heidecker/VIREO
[Cithuzithuzi pa peji 22]
Para tikuŵazga Baibolo nyengo zose, tingaŵa na cigomezgo kuti Yehova wakutighanaghanira