Kasi Kugomezgeka Kuli na Phindu?
Kasi Kugomezgeka Kuli na Phindu?
KARL, bwana wa kamupani yinyake ya inshuwalansi a wakati: “Mukulipira ndarama zinandi comene kupwelelera umoyo winu. Usange mungamba ku kamupani yane, mbwenu muponoskenge $20 mwezi wuliwose, izo ni ndarama zinandi comene.”
Jens wakazgora kuti: “Panyake mukuneneska. Kweni ine nkhamba ni kale comene kupeleka inshuwalansi ku kamupani iyi. Yikanovwira comene kumanyuma uku, ntheura nkhukhumba kugomezgeka.”
Karl wakati: “Nchiwemi nadi kugomezgeka. Kweni mukumara ndarama zinandi comene!”
Karl wakaneneskanga. Kanandi para munthu wakukhumba kugomezgeka ku munyake wakumara ndarama. Kugomezgeka kukukhumbaso kujipeleka, nyengo, na nkhongono. Kasi kugomezgeka kuli na phindu?
Ŵanandi Ŵakuti Nchiwemi Kugomezgeka Kweni Iwo Ŵakugomezgeka Yayi
Wupu wa Allensbach Opinion Research Institute ku Germany ukafumba ŵanthu kuti ŵayowoyepo pa nkhani ya kugomezgeka. Pa ŵanthu 100 ŵaliwose awo ŵakafumbika, 96 ŵakati nchiwemi kugomezgeka. Wupu uwu ukafumbaso ŵawukirano ŵa vilimika vya pakati pa 18 na 24. Pa ŵawukirano ŵatatu ŵaliwose, ŵaŵiri ŵakati nchiwemi kugomezgeka.
Nangauli ŵanandi ŵakuti nchiwemi kugomezgeka, kweni iwo ŵakugomezgeka yayi. Mwaciyelezgero, mu vyaru vinandi ku Europe, ŵanthu ŵanandi ŵakugomezgeka yayi ku ŵawoli panji ŵafumu ŵawo nesi ku ŵa mu mbumba zawo. Kanandi ŵanthu awo ŵali paubwezi nawoso ŵakugomezgana yayi. Kale mabwana na ŵanchito ŵawo ŵakagomezgananga, ntheura pera ŵamalonda na makasitomara ghawo, kweni lero kulije. Cifukwa wuli?
Panyake nchifukwa cakuti ŵanthu mbakutangwanika comene. Ŵakuŵavya nyengo kuti ŵafiske ivyo ŵapangana na ŵanyawo. Panji awo ŵali kukhuŵazgikapo ŵakukhumba yayi kuŵa ŵakugomezgeka ku munthu waliyose. Ŵanyake ŵakukhumba yayi kugomezgeka, ŵakutemwa uryarya.
Nangauli ŵanthu ŵakuleka kugomezgeka pa vifukwa vyakupambanapambana, kweni fundo njakuti ŵanandi ŵakuyowoya waka pa mlomo kuti nkhuwemi kweni iwo ŵakugomezgeka yayi. Pa cifukwa ici, tiyeni tidumbiskane mafumbo agha: Kasi kugomezgeka nkhuwemi? Usange nkhuwemi, kasi tikwenera kugomezgeka kwa njani, ndipo mu nthowa wuli? Kasi kugomezgeka kuli na phindu wuli?
[Mazgu ghamusi]
a Mazina ghanyake ghasinthika mu nkhani yino na yakulondezgapo.
[Mazgu Ghakukhozgera pa peji 3]
Ŵanthu ŵanandi ŵakuti nchiwemi kugomezgeka kweni iwo ŵakugomezgeka yayi