Kumanya Vimanyikwiro Nkhwakuzirwa!

“Pakwamba nkhaghanaghananga kuti mwana withu Andireya walwara waka mutu. Kweni wakaleka kurya ndiposo wakambwambwanthanga comene. Matenda ghakakura ndipo nkhafipa mtima. Afumu ŵane ŵakati ŵafika pa nyumba, tikaluta nayo Andireya kwa dokotara. Dokotara wakati wawona vimanyikwiro mwaluŵiro wakatiphalira kuti tilute nayo ku cipatara. Kuti ukaŵa mutu waka cara. Andireya wakalwara nthenda ya meninjayitisi. Wati wapokera waka wovwiri wakaŵaso makora.”—Gertrud, mama wa ku Germany.

IVYO vikacitikira Gertrud, ŵapapi ŵanandi vyaŵacitikiraso. Ŵakuwona vimanyikwiro ivyo vikulongora kuti panji mwana wawo walwara. Kuti ni ulwari wose yayi uwo ngwakofya, kweni ŵapapi kuti ŵangadelera vimanyikwiro vya ulwari wa ŵana ŵawo cara. Kuwona vimanyikwiro na kucitapo kanthu kukovwira comene. Kumanya vimanyikwiro nkhwakuzirwa comene.

Kuti ni nkhani ya ulwari pera yayi iyo yikukhwaskika na vimanyikwiro. Cakuwonerapo ni soka la tsunami ilo likacitika ku vyaru vya kufupi na Nyanja ya India mu Disemba 2004. Mawupu gha mu vyaru vya Australia na Hawaii ghakamanya za cindindindi cakofya ici, na umo soka lizamuŵira ku mpoto kwa Sumatra. Kwa soka, pakaŵavya nthowa ya kuŵacenjezgera awo ŵakaŵa mu malo gha soka kuti ŵacitepo kanthu. Pa cifukwa ici, ŵanthu ŵakujumpha 220,000 ŵakafwa.

Vimanyikwiro Ivyo Ni Vyakuzirwa Comene

Apo Yesu Khristu wakaŵa pa caru, wakasambizga ŵategherezgi ŵake kuti ŵamanyenge vimanyikwiro na kucitapo kanthu. Yesu wakayowoyanga za vimanyikwiro ivyo ni vyakuzirwa comene. Baibolo likulongosora kuti: “Ndipo ŵakiza Ŵafarisi na Ŵasaduki kwiza kamuyezga, ŵakalomba kuti waŵalongore cimanyikwiro cakufuma kucanya. Kweni Iye wakazgora wakanena nawo, Na mise mukuti, Kuti kucenge makora, cifukwa mtambo nguswesi. Ndipo na mlenji mukuti, Lero kuti kucenge uheni: cifukwa mtambo wachesama  ndiposo wabinkhika. Mukumanya kupima cisko ca mtambo; kweni vimanyikwiro vya zinyengo mulive kuvimanya.”—Mateyu 16:1-3.

Pakuzunura “vimanyikwiro vya zinyengo,” Yesu wakalongoranga ŵategherezgi ŵake Ŵaciyuda mu nyengo yira kuzirwa kwa kumanya zinyengo izo ŵakakhalangamo. Mgonezi wa Ciyuda ukaŵa pafupi kukumana na soka lakofya ilo likati liwirenge wose. Mazuŵa ghacoko waka pambere wandafwe, Yesu wakayowoya na ŵasambiri ŵake za cimanyikwiro cinyake, cimanyikwiro ca kuŵapo kwake. Ivyo Yesu wakayowoya panyengo iyo ni vyakuzirwa kwa waliyose lero.