Ŵakupharazga Makani Ghawemi ku Ŵakumangwa

“ŴAKUMOVWIRANI kuti muŵe ŵanthu ŵauzimu!” Ndimo wakayowoyera mulaŵiliri wa cikaya ca ŵanthu ŵacekuru ku Navalcarnero, Madrid, Spain. Iyo wakalongosoranga za Ŵakaboni ŵa Yehova awo ŵakwendera cikaya ici. Kasi wakayowoyeraci nthena?

Ŵanandi awo ŵakukhala pa cikaya ca Rosas del Camino mbakumangwa. Kweni Ŵakaboni ŵa Yehova ŵakucezga na ŵanthu aŵa cifukwa cakuti ŵali kusambira ciyowoyero ca mawoko ca ku Spain. Mulaŵiliri wa pa cikaya ici wakalumba Ŵakaboni cifukwa ca kujipeleka kusambizga vinthu vyauzimu ŵanthu ŵakusoŵerwa. Wakawona kuti ŵanthu awo ŵakukhala pa cikaya ici ŵakupindura comene na makani ghawemi gha Ufumu. Nakuti ŵanthu aŵa, comene awo ŵakutondeka kulaŵiska panji kupulika makora, ŵakukondwa comene para Ŵakaboni ŵiza.

Eulogio, yumoza wa awo ŵakukhala pa cikaya ici uyo ngwacibulumutira kweniso wakumangwa, sono wakusambira Baibolo na Ŵakaboni ŵa Yehova. Zuŵa limoza apo sambiro likacitikanga, mudara munyake wakiza na kupeleka kasumu kwa Kaboni, ako ŵanthu aŵa ŵakalemba cifukwa ca kuwonga. Sumu iyi yikaŵa na mutu wakuti “Kuŵa Kaboni.” Mazgu ghanyake gha sumu ghakuti: “Ŵali na nkharo na umoyo uwemi, ndipo Yehova wakuŵapa vinjeru. Ŵakwenda nyumba na nyumba cifukwa ŵakutamira mwa Yehova.”

Cifukwa cakuti ŵakutamira mwa Yehova, lekani Ŵakaboni ŵanandi pa caru cose ŵasambira ciyowoyero ca mawoko ca ŵakumangwa mu vyaru vyawo. Ntheura ŵakukhozga ŵakumangwa na uthenga wakupa cilindizga uwo wuli mu Baibolo.