Kasi Haramagedoni Mbumaliro Wakofya wa Caru?
Kasi Haramagedoni Mbumaliro Wakofya wa Caru?
HARAMAGEDONI! Kasi para mwapulika lizgu ili mukughanaghana za pharaniko lakofya panji kuti caru cizamugolera na moto? Mu vyaru vinandi, ŵanthu ŵakutemwa comene kuzunura lizgu la mu Baibolo lakuti “Haramagedoni.” Lizgu ili likuyowoyeka comene pakulongosora vinthu vyakofya ivyo vizamucitikira ŵanthu munthazi. Mafilimu, ma TV, na mavidiyo vyazuzga maghanoghano gha ŵanthu na vithuzithuzi vyakofya vya “Haramagedoni” iyo yikwiza. Ntheura, ng’anamuro la lizgu ili likumanyikwa makora yayi ndipo ŵanthu ŵakutimbanizgika. Nangauli pali maghanoghano ghanandi pa nkhani ya ng’anamuro la Haramagedoni, kweni ghakukolerana yayi na ivyo Baibolo, buku ilo mukusangika lizgu ili, likusambizga.
Pakuti Baibolo likutazga Haramagedoni na “umaliro wa caru,” kasi mungazomerezga yayi kuti nchakuzirwa kumanya makora ivyo lizgu ili likung’anamura? (Mateyu 24:3, Phangano Liphya) Ndipo kasi cingaŵa camahara yayi kuti tiwone mu Mazgu gha Ciuta, agho mbunenesko, mwakuti tisange mazgoro gha ng’anamuro la Haramagedoni kweniso umo yizamukhwaskira imwe na mbumba yinu?
Kusanda uku kutovwirenge kuwona kuti m’malo mwa kuŵa umaliro wakofya, Haramagedoni yizenge na vinthu vyakukondweska kwa ŵanthu awo ŵakukhumba kukhala na kusakata mu caru ciphya caurunji. Mutumbikikenge comene na kupulikiska fundo yakuzirwa iyi ya mu Malemba peneapo mukuŵazga ng’anamuro leneco la Haramagedoni mu nkhani ya panthazi apa.
[Bokosi/Cithuzithuzi pa peji 3]
KASI MUKUTI HARAMAGEDONI NI VICI?
• Nkhondo ya nyukiliya
• Kwanangika kwa cilengiwa
• Kubwanyana kwa caru capasi na vinthu vinyake vya mu mtambo
• Pharaniko la Ciuta pa ŵanthu ŵaheni