Kasi Nchivici Cingamovwirani Kuti Mupulikiske Baibolo?

“CIFUKWA mukabisa vyeneivi ku ŵamahara na ŵakumanya, ndipo mukavivumbulira ŵabonda.” (Luka 10:21) Pakuyowoya mazgu agha kwa Ŵadada wake ŵa kucanya, Yesu wakalongora kuti tikwenera kuŵa na maghanoghano ghawemi para tikukhumba kupulikiska Baibolo. Yehova wavumbura mahara ghake kwizira mu buku, ilo ŵanthu awo mbakujiyuyura ndipo ŵakukhumba kusambizgika ŵangalipulikiska.

Taŵanandi vikutisuzga kujiyuyura. Cifukwa nchakuti tose tili kuhara nkharo ya kujikuzga. Kweniso tikukhala “mu mazuŵa gha ku umaliro” na ŵanthu “ŵakujitemwa, . . . ŵanonono, ŵakutukumuka.” (2 Timote 3:1-4) Nkharo izi ndizo zikutijandizga kuti tipulikiske Mazgu gha Ciuta. Nchakudandauliska, kuti tose tikukhwaskika na nkharo ya ŵanthu ŵakujikuzga. Kasi nkharo yiwemi mungayisanga wuli kuti mupulikiske Baibolo?

Kunozgekera Mtima na Maghanoghano

Ezra, mulongozgi wa ŵanthu ŵa Ciuta mu nyengo yakale “wakaŵikapo [wakanozga] mtima wake kupenjiska dango la Yehova.” (Ezra 7:10) Kasi pali nthowa izo tinganozgera mtima withu? Enya. Yakwamba njakuti tiwonenge Malemba mwakwenelera. Mpositole Paulosi wakalembera Ŵakhristu ŵanyake kuti: “Para mukapokelera kwa ise mazgu gha uthenga, ndigho mazgu gha Ciuta, kuti mukaghapokelera nga ndi mazgu gha ŵanthu cara, kweni nga umo ghaliri kwakuneneska, mazgu gha Ciuta.” (1 Ŵatesalonika 2:13) Nangauli Malemba ghakalembeka na ŵanthu, kweni ivyo ŵali kulemba vikafuma kwa Yehova. Kumanya fundo iyi kutovwirenge kuti tilondezge ivyo tikuŵazga.—2 Timote 3:16.

Nthowa yinyake yakunozgekera mtima withu nkhulomba. Pakuti Baibolo likalembeka na wovwiri wa mzimu utuŵa, uthenga wake tingaupulikiska na wovwiri wa mzimu utuŵa. Tikwenera kulomba wovwiri uwu. Wonani umo wamasalmo wakawonera nkhani iyi, wakati: “Mundipe mahara ghakumanyiska, tindisunge dango linu; enya, na kulipwelelera na mtima wane wose.” (Salmo 119:34) Tikukhumbikwira kulomba kuti tiŵe waka na mahara ghakumanyira ivyo vili kulembeka yayi, kweniso kuti tiŵe na mtima wa kulondezga. Kuti tipulikiske Baibolo, tikwenera kulondezga uwo mbunenesko.

Apo mukughanaghana umo mungaŵira na maghanoghano ghawemi, wonani umo kusambira Baibolo kungamovwilirani. Tili na vifukwa vinandi vyakusambilira Mazgu gha Ciuta, kweni cakuluska vyose, tikovwirika kusendelera kwa Ciuta. (Yakobe 4:8) Tikumanya wunthu  wa Ciuta para tikuŵazga umo wakucitira na awo ŵakumutemwa, na umo wakucitira na awo ŵakumugalukira. Nyengo zose tikwenera kusambira Baibolo kuti timumanye makora Ciuta ndiposo kukhozga ubwezi withu na iyo.

Ivyo Vikujandizga Nkharo Yiwemi

Kasi nchivici cingatijandizga kupulikiska Mazgu gha Ciuta? Cakujandizga cimoza nkhukhumba kugomezgeka kwa awo tikuŵapa nchindi. Mwaciyelezgero, mungagomezga visambizgo na maghanoghano gha awo mukuŵacindika comene. Kasi mungacita wuli usange ŵanthu awo ŵakukana panji ŵakucindika yayi unenesko wa Mazgu gha Ciuta? Para vili nthena, cingaŵa cakusuzga kuti mupulikire ivyo Baibolo likusambizga. Lekani Baibolo likutikhuŵirizga kuwoneseska makora ivyo tili kusambizgika.—1 Ŵatesalonika 5:21.

Vikaŵaso nthena kwa Mariya nyina wa Yesu. Mariya wakalereka mwakuyana na mitheto ya Ciyuda. Wakalondezganga comene Dango la Mozesi nakuti wakalutanga ku sunagoge. Pamanyuma pake Mariya wakamanya kuti Ciuta wakayikana nthowa yakusopera iyo wakasambizgika na ŵapapi ŵake. Ntheura, Mariya wakazomera visambizgo vya Yesu na kuŵa yumoza wa mpingo wakwambilira wa Cikhristu. (Milimo 1:13, 14) Apa cikalongora kuti wakayuyura ŵapapi ŵake panji mitheto yawo yayi; kweni wakalongora kuti wakutemwa Ciuta. Kuti tisange canduro na Baibolo, cakwamba tikwenera kugomezgeka kwa Ciuta umo wakacitira Mariya.

Nchakudandauliska kuti ŵanthu ŵanandi ŵakucindika viŵi yayi unenesko wa mu Baibolo. Ŵanji mbakukhorwa kulondezga maluso gha visopo vyautesi. Ŵanji ŵakucindika yayi unenesko mu kayowoyero na kacitiro kawo. Munthu wakwenera kujipata kuti wazomere unenesko wa mu Baibolo. Ici cingacitiska kuti muleke kupulikana na ŵabwezi, ŵazengezgani, ŵanyinu ku nchito, na ŵa pa mbumba yinu. (Yohane 17:14) Kweni Solomoni, mwanalume wavinjeru wakalemba kuti: “Gula unenesko, ungauguliskanga [cara].” (Zintharika 23:23) Para mukuwona kuti unenesko ngwakuzirwa, Yehova wamovwiraninge kuti mupulikiske Baibolo.

Cinyake ico cikujandizga kupulikiska Baibolo nkhukanira dala kucita ivyo likuyowoya. Yesu wakaphalira ŵasambiri ŵake kuti: “Kwa imwe kwapika kumanya vyamucindindi vya Ufumu wa kucanya; kweni kwa iwo kuti kwapika cara. Cifukwa mtima wa ŵanthu ŵeneaŵa uli kudindiŵara. Ndipo makutu ghawo ngacizitu pa kupulika.” (Mateyu 13:11, 15) Ŵanandi awo Yesu wakaŵapharazgira ŵakaŵa ŵa mitima yinonono, ŵakakhumbanga cara kusintha. Ŵakapambana na wamalonda uyo Yesu wakamuyowoya mu ntharika. Wamalonda wakati wasanga ngale yakuzirwa, mwaluŵiro wakaguliska vyose ivyo wakaŵa navyo kuti wagule ngale! Nase tikwenera kuwona kuti nchakuzirwa kupulikiska unenesko wa mu Baibolo.—Mateyu 13:45, 46.

Suzgo la Kukana Kusambizgika

Suzgo likuru pakupulikiska Baibolo nkhukana kusambizgika. Cingaŵa cakusuzga ku ŵanji kuzomera ulongozgi kwa munthu uyo ŵakumuwona kuti ngwapasi. Kweni ŵapositole ŵa Yesu ŵakaŵa “ŵambura kusambira na ŵalemwa.” (Milimo 4:13) Pakulongosora cifukwa cake, Paulosi wakati: “Awonani kacemekero kinu, mwa ŵabali, kuti ŵakucemeka ŵanandi ŵa vinjeru vya thupi cara, ŵanandi ŵa nkhongono cara, ŵanangwa ŵanandi cara: kweni Ciuta wali kusora vyakupusa vya caru, mwakuti walengeske ŵavinjeru.” (1 Ŵakorinte 1:26, 27) Usange imwe mukuwona kuti mungasambizgika yayi na munthu wapasi, manyani kuti munthu uyo ni nthowa iyo Ciuta wakumusambizgirani. Kasi ulipo mwaŵi wakuluska kusambizgika na Yehova “Musambizgi” withu Mulara?—Yesaya 30:20; 54:13.

Namani mulara wa ŵasilikari ŵa ku Siriya nayo cikamuŵira cakusuzga kuzomera ulongozgi kwa munthu wapasi. Pakukhumba kucizgika ku vyoni, wakaluta kwa Elisha, mprofeti wa Yehova. Kweni ulongozgi wa Ciuta wakucizgira, ukapelekeka kwa Namani kwizira  mwa muteŵeti wa Elisha. Namani vikamusuzga kuti wajiyuyure cifukwa ca umo uthenga ukaŵira na nthowa iyo ukapelekekera. Ndipo pakwamba wakakana kupulikira mazgu gha nchimi ya Ciuta. Kweni pamanyuma, wakajiyuyura ndipo wakacizgika. (2 Mathemba 5:9-14) Tingaŵa na suzgo lakuyana waka para tikusambira Baibolo. Nyengo zinyake tingasambira kuti tikukhumbikwira kulondezga umoyo uphya kuti ticizgike mwauzimu na kuŵa na nkharo yiwemi. Kasi tijiyuyurenge kuti munthu munyake watisambizge ivyo tingacita? Ŵekha awo ŵakukhumba kusambizgika ndiwo ŵangalipulikiska Baibolo.

Nkharo yiwemi ni iyo yikalongora nduna ya fumukazi Kandake ya ku Etiyopiya. Apo nduna iyi yikaweleranga ku Africa pa galeta lake, musambiri Filipu wakayicimbilira na kukumana nayo. Filipu wakayifumba nduna yira usange yikupulikiska ivyo yikuŵazga. Nduna yikazgora mwakujiyuyura yikati: “Ndingamanya uli, kwambura kuti munthu wandilongozge?” Yikati yapulikiska Mazgu gha Ciuta, yikabapatizika. Ndipo ‘yikaluta na cimwemwe.’—Milimo 8:27-39.

Ŵakaboni ŵa Yehova ŵanandi mbanthu ŵa lumbiri yayi. Sabata yiliyose ŵakusambizga Baibolo ŵanthu ŵakujumpha mamiliyoni ghankhondi na limoza. Pakuti Baibolo likusambizga nthowa yiwemi ya umoyo, likulongosora cigomezgo canadi ku mtundu wa ŵanthu, ndipo likulongora umo tingamumanyira Ciuta, ŵanthu ŵakukwana mamiliyoni ŵawona kuti kusambira Baibolo na kulipulikiska ni mwaŵi wambura kuyelezgera na cinthu cinyake. Mwaŵi ulipo kwa imwe.

[Cithuzithuzi pa peji 7]

Namani cikamuŵira cakusuzga kuzomera ulongozgi kufuma kwa munthu wapasi

[Cithuzithuzi pa peji 7]

Tikuŵa ŵacimwemwe para talipulikiska Baibolo