‘Lutaninge Mukaŵasambizge na Kuŵabapatiza’

“Ntheura lutaninge mukasambizge mitundu yose, mukaŵabapatize . . . , muŵasambizge kukoreska vyose ivyo ndamulangulirani.”—Mateyu 28:19, 20.

1. Kasi apo Ŵaisrayeli ŵakaŵa musi mwa Phiri la Sinayi ŵakazomera kucitaci?

VILIMIKA pafupifupi 3,500 ivyo vyajumpha, mtundu wose wa Israyeli ukacita cilapo kwa Ciuta. Ŵakati ŵawungana musi mwa Phiri la Sinayi, ŵanthu aŵa ŵakazomera pakweru kuti: “Vyose ivyo Yehova wayowoya titicitenge.” Kufuma nyengo yira, Ŵaisrayeli ŵakazgoka ŵanthu ŵakupatulika kwa Ciuta, “usambazi [wake] wapadera.” (Exodus 19:5, 8; 24:3) Ŵakaŵa na cigomezgo cakuti Ciuta waŵavikilirenge ndipo ŵakhalenge mu caru ico ‘mukwenda mkaka na uci’ miwiro na miwiro.—Leviticus 20:24.

2. Kasi lero ŵanthu ŵangaŵa paubwezi wuli na Ciuta?

² Ndipouli, Ŵaisrayeli “ŵakasunga cara phangano na Ciuta, kweni ŵakakana kwenda mu dango lake,” nga umo wakayowoyera Asafu, mulembi wa salmo. (Salmo 78:10) Ŵakatondeka kusunga cilapo ico ŵasekuru ŵawo ŵakacita na Yehova. Paumaliro, ubwezi pakati pa Ciuta na mtundu uwu ukamara. (Mupharazgi 5:4; Mateyu 23:37, 38) Ntheura Ciuta wakazgokera ku “ŵamitundu, kuti mwa iwo watolere fuko la zina lake.” (Milimo 15:14) Ndipo mu mazuŵa ghano ghaumaliro, Ciuta wakuwunganya ‘mzinda ukuru, uwo palije munthu wangamanya kupenda, kufuma ku mtundu wose, na ku mafuko na ku ŵanthu na ku malulimi,’ uwo ukucemerezga na cimwemwe kuti: “Ciponosko kwa Ciuta withu Mweneuyo wakukhala pa cizumbe, na ku Mwanamberere!”—Civumbuzi 7:9, 10.

3. Kasi munthu wakwenera kucitaci kuti waŵe paubwezi na Ciuta?

³ Para munthu wakukhumba kuŵa paubwezi wakuzirwa uwu na Ciuta, wakwenera  kujipeleka kwa iyo na kulongora pakweru kuti wajipeleka mwa kubapatizika. Ici nchakukolerana na ivyo Yesu wakalangulira ŵasambiri ŵake kuti: ‘Ntheura lutaninge mukasambizge mitundu yose, mukaŵabapatize mu zina la Ŵawiske na la Mwana na la mzimu utuŵa: muŵasambizge kukoreska vyose ivyo ndamulangulirani.’ (Mateyu 28:19, 20) Ŵaisrayeli ŵakapulikizganga apo “buku la phangano” likaŵazgikanga. (Exodus 24:3, 7, 8) Ntheura, ŵakamanya ivyo ŵakenera kucitira Yehova. Lero napo, nchakuzirwa kuti pambere munthu wandafike pa kubapatizika wamanye makora khumbo la Ciuta ilo likusangika mu Mazgu ghake, Baibolo.

4. Kasi munthu wakwenera kucitaci kuti waŵe wakwenelera kubapatizika? (Wonaniso bokosi pacanya.)

⁴ Yesu wakakhumbanga kuti pambere ŵasambiri ŵake ŵandabapatizike ŵamanyenge makora ivyo ŵakugomezga. Wakaphalira ŵalondezgi ŵake kuluta na kuzgora ŵanthu kuŵa ŵasambiri pera yayi kweniso kuti ŵakaŵasambizge ‘kukoleska vyose ivyo iyo wakalangura.’ (Mateyu 7:24, 25; Ŵaefeso 3:17-19) Ntheura kanandi awo ŵakukhumba kubapatizika ŵakusambira dankha Baibolo myezi, cilimika cimoza panji viŵiri, mwakuti ŵaleke kubapatizikiramo bweka. Pa zuŵa la kubapatizikira, awo ŵamubapatizika ŵakuzgora mafumbo ghaŵiri kuti inya. Pakuti Yesu wakayowoyapo comene kuti ‘Inya withu waŵe Inya, Cara withu, Cara, ipo cingaŵa ciwemi kuti tose tiwoneso makora kuzirwa kwa mafumbo ghaŵiri gha ubapatizo agha.—Mateyu 5:37.

Kung’anamuka Mtima na Kujipeleka

5. Kasi fumbo lakwamba la ubapatizo likukonkhoska vinthu viŵiri vini?

⁵ Fumbo lakwamba la ubapatizo likufumba uyo wakukhumba kubapatizika usange wang’anamuka ku umoyo wake wakale nakuti wajipeleka kwa Yehova kuti wacite khumbo lake. Fumbo ili likukonkhoska vinthu viŵiri ivyo munthu wakwenera kucita pambere wandabapatizike, wakwenera kung’anamuka mtima na kujipeleka.

6, 7. (a) Cifukwa wuli nchakwenelera kuti wose awo ŵakukhumba kubapatizika ŵang’anamuke mtima? (b) Kasi para munthu wang’anamuka mtima wakwenera kusintha vici?

⁶ Cifukwa wuli munthu wakwenera kung’anamuka mtima pambere wandabapatizike? Mpositole Paulosi wakulongosora kuti: “Ise nase tose kale tikendangamo mu makhumbiro gha mathupi ghithu.” (Ŵaefeso 2:3) Apo tikaŵa tindalimanye khumbo la Ciuta, tikakhalanga kuyana na caru, kwakulingana na malango na kendero kake. Umoyo withu ukalongozgekanga na ciuta wa caru cino, Satana. (2 Ŵakorinte 4:4) Kweni tati tamanya khumbo la Ciuta, tasankha ‘kuleka kukhalira mu makhumbiro gha ŵanthu, kweni mu khumbo la Ciuta.’—1 Petros 4:2.

⁷ Umoyo uphya uwu wuli na vyandulo vinandi. Candulo cikuru comene nchakuti munthu wangaŵa paubwezi wakuzirwa na Yehova, uwo Davide wakawuyaniska na kucemekera ku “hema” la Ciuta na “phiri  [lake] lakupatulika,” uwo ni mwaŵi ukuru nadi. (Salmo 15:1) Nchakumanyamanya kuti Yehova wangacema ŵanthu bweka kuko yayi, kweni ŵekha awo ‘ŵakwenda kwakukongora [mwakunyoroka] na kucita urunji, awo ŵakuyowoya vyaunenesko mu mtima wawo.’ (Salmo 15:2) Malinga na umo tikacitiranga pambere tindasambire unenesko, tingakhumbikwira kusintha nkharo na wunthu mwakuti tikwaniske ivyo vyayowoyeka apa. (1 Ŵakorinte 6:9-11; Ŵakolose 3:5-10) Tingasintha usange tang’anamuka mtima, kuŵa na citima pa ivyo tikacitanga kale na kuŵikapo mtima comene kuti tikondweske Yehova. Para tacita nthena tiwereko, tileke umoyo wa caru wakujikondweska wekha na kucita ico nchakukondweska Ciuta.—Milimo 3:10.

8. Kasi tikucita wuli pa kujipeleka, ndipo kujipeleka na ubapatizo vikukolerana wuli?

⁸ Cigaŵa caciŵiri ca fumbo lakwamba la ubapatizo cikufumba awo ŵakukhumba kubapatizika usange ŵajipeleka kwa Yehova kuti ŵacite khumbo lake. Kujipeleka nchinthu cakuzirwa comene ico munthu wakwenera kucita pambere wandabapatizike. Pa kujipeleka tikulomba kwa Yehova kwizira mwa Khristu, kumuphalira kufuma pasi pa mtima kuti tikupeleka umoyo withu kwa iyo. (Ŵaroma 14:7, 8; 2 Ŵakorinte 5:15) Ntheura Yehova wakuŵa Fumu yithu na Dada, ndipo tikukondwa kucita khumbo lake, umo wakacitira Yesu. (Salmo 40:8; Ŵaefeso 6:6) Phangano ili na Yehova likucitika kamoza pera. Ndipouli, pakuti para tikujipeleka kwa Yehova tikuŵa kwatekha, ntheura para tikuzomera pakweru pa zuŵa la ubapatizo tikuŵa nga tikumanyiska waliyose kuti tajipeleka kwa Ŵadada ŵithu ŵakucanya.—Ŵaroma 10:10.

9, 10. (a) Kasi nchivici cikukhumbikwa pakucita khumbo la Ciuta? (b) Kasi ŵalaraŵalara ŵa Nazi ŵakamanya wuli za kujipeleka kwithu?

⁹ Nchivici cikukhumbikwira pakucita khumbo la Ciuta mwakuyana na umo Yesu wakacitira? Yesu wakati kwa ŵasambiri ŵake: ‘Usange munthu wakukhumba kundilondezga, wajipate, wanyamule [“khuni lake lakusuzgikirapo,” NW], ndipo wandilondezge.’ (Mateyu 16:24) Apa Yesu wakazunura vinthu vitatu ivyo tikwenera kucita. Cakwamba, tikwenera ‘kujipata.’ Panyake titi, tikwenera kuleka kujikondweska, makhumbiro ghaheni, ndipo tipulikirenge fundo na ulongozgi wa Ciuta. Caciŵiri, tikwenera kuyegha ‘khuni lithu lakusuzgikirapo.’ Mu nyengo ya Yesu, khuni lakusuzgikirapo cikaŵa cimanyikwiro ca soni na nthombozgo. Pakuti ndise Ŵakhristu, tikumanya kuti nyengo zinyake tisuzgikenge cifukwa ca makani ghawemi. (2 Timote 1:8) Nangauli caru cingatigoska panji kutinyoza, kweni nga ni Yesu ‘tikwelura soni,’ tikukondwa pakumanya kuti tikukondweska Ciuta. (Ŵahebere 12:2) Caumaliro, tikwenera ‘kulondezga’ Yesu nyengo zose.—Salmo 73:26; 119:44; 145:2.

¹⁰ Cakukondweska nchakuti nanga mbakususka ŵanyake ŵakumanya kuti Ŵakaboni ŵa Yehova ŵali kujipeleka kwa Ciuta kuti ŵamuteŵetere iyo pera. Mwaciyelezgero, mu msasa wa Buchenwald mu nyengo ya Nazi ku Germany, Ŵakaboni awo ŵakakana kuthera pa cipulikano cawo ŵakenera kusayina cikalata cakuti: “Nicali Musambiri wa Baibolo wakujipeleka, ndipo ningaswa yayi cilapo ico nkhalapa kwa Yehova.” Nadi, ici cikulongora umo ŵateŵeti ŵa Ciuta wose ŵakujipeleka na ŵakugomezgeka ŵakucitira.—Milimo 5:32.

 Kumanyikwa nga Yumoza wa Ŵakaboni ŵa Yehova

11. Kasi uyo wabapatizika wakuŵa na mwaŵi wuli?

¹¹ Fumbo laciŵiri la ubapatizo cakwamba likufumba uyo wakukhumba kubapatizika usange wakumanya kuti para wabapatizika wamanyikwenge kuti njumoza wa Ŵakaboni ŵa Yehova. Para wabizgika, wakuzgoka muteŵeti wakwimikika uyo wakumanyikwa na zina la Yehova. Uwu ni mwaŵi ukuru comene kweniso nchito ya maseŵera yayi. Nakuti munthu uyo wabapatizika wakulindilira ciponosko camuyirayira, cikuru walutilira kugomezgeka kwa Yehova.—Mateyu 24:13.

12. Ni mulimo wuli uwo ukuŵapo cifukwa ca kumanyikwa na zina la Yehova?

¹² Nadi, ni mwaŵi wapadera comene kumanyikwa na zina la Ciuta wankhongonozose, Yehova. Nchimi Mika yikati: “Mitundu yose ya ŵanthu yikwenda wose mu zina la ciuta wake na wake, kweni ise tendenge mu zina la Yehova Ciuta withu muyaya na muyaya.” (Mika 4:5) Ndipouli, mwaŵi uwu ukwiza na mulimo. Tikwenera kulimbikira kuti kakhaliro kithu kapelekenge nchindi ku zina ilo tikuyimira. Usange yunji wakuleka kucita ivyo wakupharazga, zina la Ciuta “likutukika” panji kunyozeka, nga umo Paulosi wakakumbuskira Ŵakhristu ŵa mu Roma.—Ŵaroma 2:21-24.

13. Cifukwa wuli ŵateŵeti ŵakujipeleka ŵa Yehova ŵali na mulimo wa kupanikizgira za Ciuta wawo?

¹³ Para munthu wazgoka Kaboni wa Yehova, wakuzomera mulimo wa kupanikizgira za Ciuta wake. Yehova wakapempha mtundu wakupatulika wa Israyeli kuŵa kaboni wake mwakuti upanikizgire kuti iyo ndiyo Ciuta. (Yesaya 43:10-12, 21) Kweni mtundu wura ukatondeka kufiska mulimo uwu, ndipo paumaliro Yehova wakawukana. Lero Ŵakhristu ŵanadi mbakukondwa pakuŵa na mwaŵi wa kupanikizgira za Yehova. Tikucita nthena cifukwa cakuti tikumutemwa ndipo tikukhumba kuti zina lake lituŵiskike. Kasi tingakhala wuli cete uku tikuŵamanya makora Ŵadada ŵithu ŵakucanya na khumbo lawo? Tikujipulika nga ni mpositole Paulosi uyo wakati: “Nkhukhuŵirizgika kupharazga; soka kwa ine usange nkhuleka kupharazga ivangeli!”—1 Ŵakorinte 9:16.

14, 15. (a) Kasi gulu la Yehova likutovwira wuli kuti tikure mwauzimu? (b) Kasi tapika vici kuti vitovwire mwauzimu?

¹⁴ Fumbo laciŵiri likukumbuskaso uyo wakukhumba kubapatizika za kukhumbikwa kwa kukolerana na gulu la Yehova lakulongozgeka na mzimu. Tingateŵetera Ciuta patekha yayi, tikukhumbikwira wovwiri, kukhozgeka na kukolerana na ŵabali wose. (1 Petros 2:17; 1 Ŵakorinte 12:12, 13) Gulu la Ciuta likutovwira comene kuti tikure mwauzimu. Likutipa mabuku ghakulongosora Baibolo ghanandi agho ghakutovwira kuti tifikepo pakumanya unenesko, kucita vinthu mwamahara para tili mu suzgo, ndiposo kuŵa na ubwezi weneco na Ciuta. Nga ni mama uyo wakuwoneseska kuti mwana wake wakurya makora na kupwelelereka, “muzga wa magomezgeko na wa vinjeru” wakutipa cakurya cinandi pa nyengo yake mwakuti tikurenge mwauzimu.—Mateyu 24:45-47; 1 Ŵatesalonika 2:7, 8.

¹⁵ Ŵanthu ŵa Yehova ŵakusambizgika na kukhozgeka pa maungano gha sabata na sabata, mwakuti ŵaŵe Ŵakaboni ŵakugomezgeka. (Ŵahebere 10:24, 25) Sukulu ya Uteŵeti wa Ciuta yikutisambizga kuyowoya pa wumba, ndipo Ungano wa Uteŵeti ukutisambizga umo tingapharazgira makora uthenga withu. Tingawona kuti mzimu wa Yehova ukugwira nchito ndipo  ukulongozga gulu lake kwizira mu maungano na para tikusambira patekha mabuku ghakulongosora Baibolo. Mu vinthu ivi, Ciuta wakuticenjezga za maulwani, kutisambizga kuti tiŵe ŵateŵeti ŵaluso, na kutovwira kuti tiŵenge maso mwauzimu.—Salmo 19:7, 8, 11; 1 Ŵatesalonika 5:6, 11; 1 Timote 4:13.

Ico Cikutituma Kuti Tibapatizike

16. Nchivici cikutituma kuti tijipeleke kwa Yehova?

¹⁶ Ntheura mafumbo ghaŵiri gha ubapatizo ghakukumbuska awo ŵakukhumba kubapatizika za kuzirwa kwa ubapatizo na ivyo ŵakwenera kucita mwakuyana na ubapatizo. Ipo nchivici cikwenera kuŵatuma kuti ŵabapatizike? Tikubapatizika kuŵa ŵasambiri cifukwa cakuti munthu munyake waticicizga yayi, kweni cifukwa cakuti Yehova ndiyo ‘wakutiguza.’ (Yohane 6:44) Pakuti “Ciuta nkhutemwa,” iyo wakuwusa caru cose mwacitemwa, wakucicizga yayi. (1 Yohane 4:8) Tikusendelera kwa Yehova cifukwa ca lusungu lwake kweniso umo wakucitira nase. Yehova wakapeleka Kananda wake cifukwa ca ise, ndipo wakutilayizga vinthu viwemi comene munthazi. (Yohane 3:16) Ntheura nase tikuciskika kuti tipeleke umoyo withu kwa iyo.—Zintharika 3:9; 2 Ŵakorinte 5:14, 15.

17. Kasi tindajipeleke ku vici?

¹⁷ Tikujipeleka kwa Yehova mweneco, ku cinthu panji mulimo unyake cara. Mulimo uwo Yehova wakukhumba kuti ŵanthu ŵake ŵacite ungasintha, kweni kujipeleka kwawo kungasintha yayi. Mwaciyelezgero, ivyo Yehova wakaphalira Abrahamu kuti wacite vikapambana comene na ivyo wakatuma Yeremiya. (Genesis 13:17, 18; Yeremiya 1:6, 7) Ndipouli, wose ŵakacita nchito iyo Ciuta wakaŵapa cifukwa cakuti ŵakamutemwa Yehova ndipo ŵakadoka kucita khumbo lake mwakugomezgeka. Mu nyengo yino yaumaliro, ŵalondezgi ŵa Khristu wose awo mbakubapatizika ŵakulimbikira kufiska languro lake la kupharazga makani ghawemi gha Ufumu na kuzgora ŵanthu kuŵa ŵasambiri. (Mateyu 24:14; 28:19, 20) Nthowa yiwemi iyo tingalongolera kuti tikutemwa Ŵadada ŵithu ŵakucanya nakuti tili kujipeleka nadi kwa iwo nkhucita mulimo uwu na mtima wose.—1 Yohane 5:3.

18, 19. (a) Kasi para tikubapatizika tikuzomera pakweru fundo nji? (b) Kasi mu nkhani yakulondezgapo tizamuwona vici?

¹⁸ Tikukayika yayi kuti ubapatizo ukutijulira vitumbiko vinandi, kweni nchinthu cakuti tingacitoleranga maseŵera yayi. (Luka 14:26-33) Nchinthu cakuzirwa comene kuluska vyose. (Luka 9:62) Para tikubapatizika, tikuŵa nga tikuzomerezga pakweru mazgu ghakuti: “Ciuta uyu ndiye Ciuta withu muyaya. Ndiye tiwaŵenge cilongozi withu mpaka na ku nyifwa.”—Salmo 48:14.

¹⁹ Nkhani yakulondezgapo yizamuzgora mafumbo ghanyake agho ghangaŵapo pakukhwaskana na ubapatizo wa mu maji. Kasi cingaŵapo cifukwa cakupulikikwa ico cingatondeska munthu kubapatizika? Panyake vilimika? Kasi wose ŵangacita wuli kuti nyengo ya ubapatizo yiŵe yakucindikika?

Kasi Mungalongosora?

• Cifukwa wuli Mkhristu waliyose wakwenera kung’anamuka mtima pambere wandabapatizike?

• Kasi nchivici cikukhumbikwa pa kujipeleka kwa Ciuta?

• Kasi ni milimo wuli iyo yikuŵapo cifukwa ca kumanyikwa na zina la Yehova?

• Nchivici cikwenera kutituma kuti tibapatizike?

[Mafumbo]

[Bokosi pa peji 20]

Mafumbo Ghaŵiri gha Ubapatizo

Pa lufura lwa sembe ya Yesu Khristu, kasi mwalapa zakwananga zinu na kujipatulira kuti mucite khumbo la Yehova?

Kasi mukumanya kuti kujipatulira kwinu na ubapatizo nchilongolero cakuti ndimwe yumoza wa Ŵakaboni ŵa Yehova ŵakukolerana na gulu lakulongozgeka na mzimu wa Ciuta?

[Cithuzithuzi pa peji 21]

Kujipeleka ni phangano ilo tikucita na Yehova mu lurombo

[Cithuzithuzi pa peji 23]

Mulimo withu wa kupharazga nchilongolero cakuti tajipeleka kwa Ciuta