Londezgani Ciyelezgero ca Kugomezgeka ca Itai

“YIKURU na yakuzizwiska ni milimo yinu, Yehova Ciuta, Wankhongonozose. Zaurunji na zaunenesko ni nthowa zinu, Themba lamuyirayira. Ni njani walekenge kumopani, imwe Yehova, na kupeleka ucindami ku zina linu, cifukwa ndimwe pera ŵakugomezgeka?” Sumu iyi, iyo yikimbikanga kucanya na “awo ŵakatonda cikoko na cikozgo cake,” yikulongora kuti Ciuta ngwakugomezgeka. (Uvu. 15:2-4) Yehova wakukhumba kuti awo ŵakumusopa ŵamuyezgenge mwa kuŵa ŵakugomezgeka.—Efe. 4:24.

Ndipouli, Satana Dyabulosi wakufwilirapo kuti wapatuske ŵateŵeti ŵa Ciuta awo ŵali pa caru capasi ku citemwa ca Ciuta uyo ŵakumusopa. Kweni ŵanandi ŵaŵa ŵakugomezgeka kwa Ciuta nanga ni apo ŵakusuzgika comene. Tikuwonga Yehova cifukwa wakuzirwiska kugomezgeka kwantheura. Ndipo nadi, “Yehova wakutemwa urunji; kuti tiwaside ŵatuŵa ŵake cara.” (Sal. 37:28) Kuti watovwire kulutilira kuŵa ŵakugomezgeka, mu Mazgu ghake wali kulembamo mazina gha ŵanthu ŵanandi  ŵakugomezgeka. Yumoza wa ŵanthu aŵa ni Itai, Mugit.

“Ndiwe Mulendo, Ukafumiskika ku Caru Cako.”

Itai ŵakwenera kuti ŵakaŵa wa mu msumba wakumanyikwa comene wa Gati, kwawo kwa cinkhara cakucemeka Goliyati ndiposo ŵalwani ŵanji ŵa Israyeli. Malo ghakwamba agho Itai wakuzunulika mu Baibolo mphanyengo iyo Abisalomu wakagalukira Themba Davide. Panyengo iyi, Itai na ŵanthu 600 awo ŵakamulondezga ŵakakhalanga uko ŵakacimbilira, kufupi na Yerusalemu.

Ivyo vikacitikira Itai na ŵanthu ŵake vikwenera kuti vikakumbuska Davide nyengo iyo nayo wakacimbira mu caru cake lumoza na ŵanalume ŵankhondo 600 na kuluta ku caru ca Filisitiya. Caru ici cikawusikanga na Akishi themba la ku Gati. (1 Sam. 27:2, 3) Kasi Itai na ŵanthu ŵake ŵakatenge ŵacitengeci panyengo iyo Abisalomu wakagalukira Davide? Kasi mphanyi ŵakaŵa ku cigaŵa ca Abisalomu, kuleka kuŵa ku cigaŵa cilicose, panji kuŵa ku cigaŵa ca Davide na ŵanthu ŵake?

Davide, wakacimbira ku Yerusalemu, wakafika pa “Nyumba Yapaumaliro.” Iyi yikwenera kuti yikaŵa nyumba ya ku umaliro kwa Yerusalemu, para munthu wendera ku Lupiri lwa Maolive, pambere wandajumphe Cidika ca Kidroni. (2 Sam. 15:17) Pamalo agha, Davide wakasanda makora ŵasilikari ŵake, apo ŵakajumphanga yumozayumoza. Cakuzizika cikaŵa cakuti pa gulu la ŵasilikari ŵake pakaŵa Ŵaisrayeli pera yayi, kweniso pakaŵa Ŵakerete na Ŵapelete wose. Nakuti wose ŵakaŵa Ŵagiti, Itai na ŵasilikari ŵake ŵakukwana 600.—2 Sam. 15:18.

Mwalusungu, Davide wakati kwa Itai: “Kasi iweso ukulutiraci nase? Welera ku malo ghako, ukhale na fumu [kung’anamura Abisalomu] cifukwa ndiwe mulendo, ukafumiskika ku caru cako. Ukiza ngati ndi mayiro pera, kasi ine ndingakutora kwendakwenda nase apo ndamwene ntha nkhumanya uko nkhuluta? Welera iwe, uwezge na ŵabali ŵako; lusungu lwa Yehova na unenesko wake viŵenge na iwe.”—2 Sam. 15:19, 20.

Itai wakalongora kuti ngwakugomezgeka nadi. Wakazgora wakati: “Yehova wamoyo; na umoyo wa sekuru wane themba, ku malo manyi ngakuŵauli uko sekuru wane wamkuŵa, themba lane, mu nyifwa panji mu umoyo, kwenekuko ndiko muteŵeti winu wamkuŵa nayeso.” (2 Sam. 15:21) Ivyo wakayowoya Itai vikwenera kuti vikakumbuska Davide mazgu ghakuyana waka, agho abuya ŵake a Rute ŵakayowoya. (Ruth 1:16, 17) Cifukwa ca kukhorwa na ivyo Itai wakayowoya, Davide wakamuphalira kuti: “Luta!” Yambuka Cidika ca Kidroni. Pa nyengo yeneyiyo “Itai Mugiti wakaluta, iye na wose ŵake pamo na twana tucoko uto tukaŵa naye.”—2 Sam. 15:22.

“Vikalembekera Kutisambizga”

Lemba la Ŵaroma 15:4 likuti: “Vinthu vyose ivyo vikalembeka kale, vikalembekera kutisambizga.” Ntheura cingaŵa makora kujifumba kuti, Kasi ni vinthu wuli ivyo tingasambira kwa Itai? Wonani ivyo vikwenera kuti vikamucitiska kuti waŵe wakugomezgeka kwa Davide. Nangauli wakaŵa mulendo uyo wakacimbira ku Filisitiya, Itai wakamanya kuti Yehova ni Ciuta wamoyo ndiposo kuti Davide ngwakuphakazgika wake. Itai kuti wakawona waka ulwani uwo ukaŵa pakati pa Ŵafilisiti na Ŵaisrayeli yayi. Itai wakamuwonanga Davide kuŵa munthu wakuzirwa nangauli wakakoma ŵanthu ŵanandi ŵa mu caru cake ca Ŵafilisiti kusazgapo Goliyati cinkhara cawo ca nkhondo. (1 Sam. 18:6, 7) Itai wakawona kuti Davide wakatemwanga Yehova ndiposo wakaŵa na mikhaliro yiwemi. Ntheura Davide wakamucindika comene Itai. Nakuti panyengo iyo Davide wakalimbananga na Abisalomu, cigaŵa cacitatu ca ŵasilikari ŵa Davide cikaŵa “pasi pa Itai.”—2 Sam. 18:2.

Naseso tingawonanga waka mtundu wa munthu yayi nesi kulumba cisko, kweni tiwonenge mikhaliro yiwemi mu ŵanji. Citemwa ico cikaŵa pakati pa Davide na Itai cikutisambizga  kuti kumanya Yehova kungatovwira kuti tileke kulumba cisko.

Pakuwona ivyo Itai wakacita, tingajifumba kuti: ‘Kasi nane nili wakugomezgeka kwa Davide Mulara, uyo ni Khristu Yesu? Kasi nkhulongora kuti ndine wakugomezgeka mwa kulimbikira mulimo wa kupharazga Ufumu na kuzgora ŵanthu kuŵa ŵasambiri?’ (Mat. 24:14; 28:19, 20) ‘Kasi nkhugomezgeka mpaka mpha?’

Ŵafumu ŵakwenera kughanaghanirapo kugomezgeka kwa Itai. Ivyo wakacita pakukolerana na Davide ndiposo kuluta uko Davide wakalutanga, vikakhwaska ŵanthu awo ŵakaŵa nayo. Mwakuyana waka, ivyo ŵafumu ŵangadumura pakukhwaskana na kusopa kwaunenesko vingakhwaska mbumba zawo. Nyengo zinyake vingapangiska kuti mbumba zawo zisuzgike kwa kanyengo. Kweni tikuphalirika kuti: ‘Kwa awo mbamagomezgeka [Yehova] wakujiwonya wamagomezgeka.’—Sal. 18:25.

Nkhondo ya pakati pa Davide na Abisalomu yikati yamara, Malemba ghakuyowoyaposo vinandi yayi vyakukhwaskana na Itai. Kweni ivyo Baibolo likuyowoya kuti wakacita pa nyengo iyo Davide wakaŵa pa suzgo, vikulongora mikhaliro yiwemi iyo wakaŵa nayo. Pakuti ivyo wakacita vili kulemba mu Baibolo, mbukaboni wakuti Yehova wakutumbika ŵanthu ŵakugomezgeka.—Heb. 6:10.