Zuwa Lililose Citani Vinthu Ivyo Vingapeleka Ucindami kwa Ciuta

DAVIDE wakalomba kwa Yehova kuti: “Zomerani kuti ndipulike vya cifundu cinu mulenji na mulenji cifukwa nkhutamira mwa Imwe; mundimanyiske nthowa iyo nkhwenera kwendamo.” (Sal. 143:8) Para mwawuka mulenji, kasi mukuwonga Yehova cifukwa ca kumuwuskani? Nga ni Davide, kasi mukulomba Yehova kuti wamovwirani kusankha vyakucita kweniso kuti muvicite makora? Mukwenera kuti ndimo mukucitira.

Pakuŵa ŵateŵeti ŵakujipatulira ŵa Yehova, tikuyezgayezga kucita “vinthu vyose kuti Ciuta wapike ucindami,” ‘kwali tikurya panji kumwa panji kucita cinthu cinyake cilicose.’ (1 Kor. 10:31) Tikumanya kuti ivyo tikucita vingacindika panji kuyuyura Yehova. Tikukumbukaso kuti Baibolo likuyowoya kuti Satana wakutundura ŵabali ŵa Khristu, nakuti wakutundura ŵateŵeti ŵa Ciuta wose awo ŵali pa caru capasi, “muhanya na usiku.” (Uvu. 12:10) Ntheura tili mucanya kulongora kuti Satana ni mutesi na kukondweska Yehova, Ŵadada ŵithu ŵakucanya mwa kucita uteŵeti wakupatulika “muhanya na usiku.”—Uvu. 7:15; Zinth. 27:11.

Tiyeni tiwone nthowa ziŵiri zakuzirwa izo tingapelekera ucindami kwa Ciuta zuŵa lililose. Nthowa yakwamba nkhusankha vinthu vyakwenelera, ndipo yaciŵiri nkhughanaghanira ŵanji.

Citani Vinthu Mwakukolerana na Kujipatulira Kwinu

Mwa kujipatulira kwa Yehova, tikalongora kuti tikukhumba kumuteŵetera kufumira pasi pa mtima. Tikalayizga Yehova kuti tendenge mu nthowa zake “zuŵa na zuŵa,” enya kwamuyirayira. (Sal. 61:5, 8) Kweni kasi tikucita ivyo tikalayizga? Kasi tikulongora wuli kuti tikutemwa Yehova na mtima wose?

Baibolo likutiphalira ivyo Yehova wakukhumba kuti ticitenge. (Dute. 10:12, 13) Vinyake mwa vinthu ivi vyalembeka mu bokosi la mutu wakuti:  “Ivyo Ciuta Wakukhumba Kuti Ticitenge,” pa peji 22. Vyose ivyo Ciuta wakukhumba kuti ticitenge ni vyakuzirwa. Kasi tikucita wuli kuti tisankhe ico tikwenera kucita para pali vinthu viŵiri panji vinandi ivyo vikukhumbikwira kuti ticite pa nyengo yimoza?

Tikwamba dankha kucita vinthu vyakukhwaskana na uteŵeti withu wakupatulika, nga nkhusambira Baibolo, kulomba, kusangika pa maungano ndiposo kupharazga. (Mat. 6:33; Yoh. 4:34; 1 Pet. 2:9) Kweni vinthu vyauzimu vingatora zuŵa lose yayi. Vili nthena cifukwa tikweneraso kugwira nchito, kuluta ku sukulu para tili pa sukulu ndiposo kucita milimo yinyake ya pa nyumba. Nangauli vili nthena, tikuwoneseska kuti milimo yithu yakuthupi yileke kutimbanizga vinthu vyauzimu nga nkhusangika pa maungano. Mwaciyelezgero, para tikunozgekera kuluta ku holide, tikuwoneseska kuti holide yileke kuŵa pa mazuŵa gha ungano wapadera, wa dera, wa cigaŵa ndiposo mu sabata iyo mulaŵiliri wa dera wiza pa mpingo withu. Nyengo zinyake tingasazga milimo yinyake. Mwaciyelezgero, tingasankha kutozga Nyumba ya Ufumu na mbumba yithu panji kupharazgira ŵanthu pa nyengo yakupumura kwali nkhu sukulu panji ku nchito. Ndipo nadi, nyengo zose para tikukhumba kucita cinthu kwali nkhupenja nchito, masambiro, kusankha ŵabwezi, tikughanaghanira comene umo vinthu ivi vikhwaskirenge kusopa Yehova Ciuta, Ŵadada ŵithu ŵacitemwa. Vili nthena cifukwa kusopa Yehova nkhwakuzirwa comene mu umoyo withu.—Muph. 12:13.

 Ghanaghanirani Ŵanji

Yehova wakukhumba kuti tighanaghanirenge ŵanji na kuŵacitira viwemi. Kweni Satana wakukhuŵilizga ŵanthu kuti ŵaŵenge ŵakujighanaghanira ŵekha. Caru cake nchakuzura na ŵanthu “ŵakujitemwa,” “ŵakutemwa vyakusanguluska” ndiposo awo ‘ŵakuseŵa ku thupi.’ (2 Tim. 3:1-5; Gal. 6:8) Ŵanandi ŵakughanaghanirapo viŵi yayi umo ŵanji ŵakukhwaskikira na ivyo ŵakucita. “Milimo ya thupi” yili palipose.—Gal. 5:19-21.

Ŵanthu aŵa ŵakupambana comene na awo ŵakulongozgeka na mzimu utuŵa wa Yehova, ŵeneawo mbacitemwa, mbalusungu, ndipo mbawemi cifukwa ŵakughanaghanira ŵanji pakucita vinthu. (Gal. 5:22) Mazgu gha Ciuta ghakutiphalira kuti tikwenera kudangizga vyakukhumba vya ŵanyithu, vithu cara. Ntheura tikucita vinthu mwakughanaghanira ŵanji, nangauli tikuwoneseska kuleka kunjilirapo pa vinthu ivyo vikuleka kutikhwaska. (1 Kor. 10:24, 33; Fil. 2:3, 4; 1 Pet. 4:15) Tikughanaghanira comene awo tikusopa nawo. Ndipouli tikovwiraso awo Mbakhristu ŵanyithu yayi. (Gal. 6:10) Kasi mungayezgayezga kuti mulongore lusungu kwa munthu uyo mungakumana nayo muhanya wuno?—Wonani bokosi lakuti, “ Longorani Kuti Mukuŵaghanaghanira,” pa peji 23.

 Tikwenera kulongora kuti tikughanaghanira ŵanji nyengo zose. (Gal. 6:2; Efe. 5:2; 1 Tes. 4:9, 10) Zuŵa lililose tikuyezgayezga kuti timanyenge vinthu ivyo vikusuzga ŵanyithu ndipo tikuŵawovwira, nanga tingasuzgika cifukwa ca kucita nthena. Tikukhumbisiska kuti tipengeko ŵanji ivyo tili navyo, kwali ni nyengo, vinthu vyakuthupi, maluso ndiposo vinjeru. Tikukumbuka ivyo Yehova wali kutilayizga, kuti usange tikovwira ŵanji nayo watovwirenge.—Zinth. 11:25; Luka 6:38.

Citani Uteŵeti Wakupatulika “Muhanya na Usiku”

Kasi nchamacitiko kuteŵetera Yehova “muhanya na usiku”? Enya, usange nyengo zose tikucita na mtima wose milimo yose yakukhwaskana na kusopa kwithu. (Mil. 20:31) Tingalongora kuti tikucita uteŵeti withu wakupatulika na mtima wose usange zuŵa lililose tikuŵazga na kulanguruka pa Mazgu gha Ciuta, kulomba na mtima wose, kusangika pa maungano ghose, ndiposo kupharazgira ŵanji.—Sal. 1:2; Luka 2:37; Mil. 4:20; 1 Tes. 3:10; 5:17.

Kasi nase tikucita mauteŵeti ghakupatulika agha? Usange ni nthena, khumbo lithu lakuti tikondweske Yehova na kulongora kuti Satana ni mutesi liwonekenge kwizira mu ivyo tikucita zuŵa na zuŵa. Tikuyezgayezga kupeleka ucindami kwa Yehova nyengo zose ndiposo mu vyose ivyo tikucita. Tikulondezga fundo zake mu kayowoyero, umo tikucitira vinthu ndiposo mu ivyo tikukhumba kucita. Para tikugomezga Yehova na kumuteŵetera na nkhongono zithu zose tikulongora kuti tikuwonga kuti wakutipwelelera ndiposo kutovwira. Para tabuda, cifukwa cakuti tili ŵambura kufikapo, tikupokera ulongozgi wake na nchenyo.—Sal. 32:5; 119:97; Zinth. 3:25, 26; Kol. 3:17; Heb. 6:11, 12.

Tiyeni tilutilire kupeleka ucindami kwa Ciuta zuŵa lililose. Para tikupeleka ucindami kwa Ciuta zuŵa lililose, tisamphuskikenge mu umoyo withu ndipo Ŵadada ŵithu ŵakucanya ŵatipwelelerenge kwamuyirayira.—Mat. 11:29; Uvu. 7:16, 17.

[Bokosi/Vithuzithuzi pa peji 22]

 Ivyo Ciuta Wakukhumba Kuti Ticitenge

• Tilombenge nyengo na nyengo.—Rom. 12:12.

• Tiŵazgenge na kusambira Baibolo ndiposo kulondezga ivyo taŵazga.—Sal. 1:2; 1 Tim. 4:15.

• Tiwunganenge na mpingo.—Sal. 35:18; Heb. 10:24, 25.

• Tipwelelerenge ŵamumbumba yithu mwauzimu na mwakuthupi.—1 Tim. 5:8.

• Tipharazgenge makani ghawemi gha Ufumu, na kuzgora ŵanthu kuŵa ŵasambiri.—Mat. 24:14; 28:19, 20.

• Tijipwelelerenge mwauzimu ndiposo mwakuthupi, ico cikusazgapo vyakusanguluska viwemi.—Mrk. 6:31; 2 Kor. 7:1; 1 Tim. 4:8, 16.

• Ticitenge milimo iyo tili nayo mu mpingo.—Mil. 20:28; 1 Tim. 3:1.

• Tipwelelerenge nyumba zithu na Nyumba ya Ufumu.—1 Kor. 10:32.

[Bokosi/Cithuzithuzi pa peji 23]

 Longorani Kuti Mukuŵaghanaghanira

• Ŵabali na ŵadumbu awo mbacekuru.—Lev. 19:32.

• Ŵalwari.—Zinth. 14:21.

• Ŵabali na ŵadumbu awo ŵakukhumbikwira wovwiri waluŵiro, uwo imwe mungawovwirapo.—Rom. 12:13.

• Ŵa mu mbumba yinu.—1 Tim. 5:4, 8.

• Ŵakhristu ŵanyinu awo ŵafumu panji ŵawoli ŵawo ŵali kufwa.—1 Tim. 5:9.

• Ŵalara awo ŵakucita makora milimo ya mpingo.—1 Tes. 5:12, 13; 1 Tim. 5:17.