Ŵabali, Seŵani ku Mzimu Ndipo Nwekerani Mauteŵeti Ghakusazgikira!

“Uyo wakuseŵa ku mzimu wazamuvuna umoyo wamuyirayira.”—GAL. 6:8.

1, 2. Kasi lemba la Mateyu 9:37, 38 likufiskika wuli, ndipo ni vici ivyo vikukhumbikwa mu mipingo?

VINTHU ivyo mukuwona sono, vizamuluwika yayi. Mulimo uwo Yesu Khristu wakayowoya sono ukuya panthazi comene. Yesu wakati: “Vuna njinandi, kweni ŵanchito mbacoko. Ntheura lombani Mweneco wa vuna kuti watume ŵanchito ku vuna yake.” (Mat. 9:37, 38) Yehova Ciuta wakuzgora malurombo agha munthowa yapadera comene. Mwaciyelezgero, mu cilimika ca uteŵeti ca 2009, pa caru cose pali kusazgikira mipingo ya Ŵakaboni ŵa Yehova yakukwana 2,031, mwakuti sono pali mipingo 105,298. Mu cilimika ici, ŵanthu pafupifupi 757 ŵakabapatizikanga zuŵa lililose.

² Cifukwa ca unandi wa mipingo iyi, pakukhumbikwira ŵabali ŵakwenelera, ŵakuti ŵasambizgenge na kuliska. (Efe. 4:11) Yehova wimika ŵabali ŵakwenelera kuti ŵapwelelere mberere zake, ndipo tili na cigomezgo kuti walutilirenge kucita nthena. Ucimi uwo uli pa Mika 5:5 ukuti mu mazuŵa ghaumaliro, ŵanthu ŵa Yehova ŵazamuŵa na “ŵaliska ŵankhondi na ŵaŵiri” ndiposo “ŵakaronga ŵankhondi na ŵatatu.” Ucimi uwu ukuyowoya za ŵanalume awo ŵakwimikika kuti ŵalongozge ŵanthu ŵa Ciuta.

3. Longosorani ico ‘kuseŵa ku mzimu’ kukung’anamura.

³ Usange ndimwe mbali ndipo muli kubapatizika, kasi nchivici cingamovwirani kuti munwekere milimo yakusazgikira mu mpingo? Cakukhumbikwa comene nchakuti ‘museŵenge ku mzimu.’ (Gal. 6:8) Kuseŵa ku mzimu kukung’anamura kuzomerezga kuti mzimu utuŵa ugwirenge makora nchito pa imwe. Ŵikanipo mtima kuti muleke ‘kuseŵa ku thupi.’ Lekani kuzomerezga kuti vinthu vyakuthupi nga ni vyakusanguluska vimutondeskani kuteŵetera Ciuta mwakukwana. Ŵakhristu wose ŵakwenera ‘kuseŵa ku mzimu,’ ndipo ŵabali awo ŵakucita nthena mukuluta kwa nyengo ŵakuŵa ŵakwenelera kucita mauteŵeti ghakusazgikira mu mpingo. Cifukwa cakuti pakukhumbikwira ŵalara ndiposo ŵateŵeti ŵakovwira ŵanandi, nkhani iyi comene yalembekera ŵabali. Ntheura, ŵabali tikumuciskani kuti mughanaghanirepo comene pa nkhani iyi, na kulomba kwa Yehova.

Nwekerani Mulimo Uwemi

4, 5. (a) Kasi ŵabali awo ŵali kubapatizika ŵakuciskika kuti ŵanwekere vici? (b) Kasi mbali wangalongora wuli kuti wakunwekera mulimo uwemi?

⁴ Ŵabali ŵakwenera kumanya kuti mulimo wa kulaŵilira ukwiza wekha yayi. Mbali wakwenera kunwekera “mulimo uwemi” uwu. (1 Tim. 3:1) Wakwenera kuteŵetera ŵabali kufumira pasi pa mtima. (Ŵazgani Yesaya 32:1, 2.) Para mbali wakunwekera mulimo uwu na cilato ciwemi wakunanga yayi. M’malo mwake wakukhumba kovwira ŵanji.

⁵ Mbali wakulongora kuti wakukhumba kuŵa muteŵeti wakovwira panji mulara usange wakuyezgayezga kufiska ivyo vikukhumbikwa kuti wacite mulimo uwu, vyeneivyo vili mu Malemba. (1 Tim. 3:1-10, 12, 13;  Tito 1:5-9) Usange ndimwe mbali ndipo muli kubapatizika, jifumbani kuti: ‘Kasi nkhupharazga mwakukwana, ndiposo kovwira ŵanji kuti ŵacitenge mwakuyana waka? Kasi nkhukhozga ŵabali na ŵadumbu mwa kuŵa na mtima wakukhumba kuŵawovwira? Kasi nkhumanyikwa kuti ndine msambiri muwemi wa Mazgu gha Ciuta? Kasi nkhuyezgayezga kuti mazgoro ghane pa maungano ghaŵenge ghakucontha mtima? Kasi nkhucita na mtima wose milimo iyo nkhupika na ŵalara?’ (2 Tim. 4:5) Mafumbo agha ngakuzirwa comene.

6. Nchivici comene ico cikukhumbikwa kuti mbali waŵe mulara panji muteŵeti wakovwira?

⁶ Mungaŵaso ŵakwenelera kucita milimo yakusazgikira mu mpingo, usange ‘mukukhozga wunthu winu wa mukati na mzimu’ wa Ciuta. (Efe. 3:16) Kuŵa muteŵeti wakovwira panji mulara ni nkhani yakuti munthu waŵe waka na udindo yayi. Munthu wakusanga mulimo uwu pekha para wakura mwauzimu. Kasi mungacita wuli kuti mukure mwauzimu? Mukwenera kulutilira “kwenda mwa mzimu” na kuŵa na cipambi cake. (Gal. 5:16, 22, 23) Apo mukulutilira kulongora mikhaliro yauzimu iyo yikukhumbikwa pakucita milimo iyi, ndiposo kulondezga ulongozgi uliwose uwo mungapika, ‘ŵanthu wose ŵawonenge umo mukukulira.’—1 Tim. 4:15.

Mzimu wa Kujipata Ukukhumbikwa

7. Kasi kuteŵetera ŵanji kukukhumba vici?

⁷ Kuteŵetera ŵanji kukukhumba mzimu wa kujipata. Pakuti ŵalara mbaliska ŵauzimu, ŵakufipa mtima comene para ŵabali ŵakusuzgika. Wonani umo mpositole Paulosi wakacitiranga mulimo wa uliska. Wakaphalira Ŵakhristu ŵa mu Korinte kuti: “Cifukwa ca suzgo yikuru na kukweŵeka mu mtima nkhamulemberani na masozi ghanandi, kuti mucite citima cara, kweni kuti mumanye citemwa ico nili naco, comenecomene pa imwe.” (2 Kor. 2:4) Nchakuwonekerathu kuti Paulosi  wakaŵikangapo mtima comene pa mulimo wa uliska uwo wakapika.

8, 9. Zunurani ŵanalume ŵa mu nyengo yakale awo ŵakajipeleka kovwira ŵanji.

⁸ Kwamba kale, ŵanalume awo ŵakulongozga ŵanthu ŵa Yehova ŵakuŵa na mzimu wa kujipata. Mwaciyelezgero, Nowa wakaŵaphalirapo yayi ŵamumbumba yake kuti: ‘Para mwamara kukhoma cingalaŵa munimanyiske kuti nane ninjiremo.’ Mozesi wakaŵaphalirapo yayi Ŵaisrayeli apo ŵakaŵa pafupi kufuma mu Eguputo kuti: ‘Dangiraningiko, namumusangani pa Nyanja Yiswesi. Muwonenge mwekha umo mwenderenge.’ Joshua wakaŵaphalirapo yayi Ŵaisrayeli kuti: ‘Munimanyiske para linga la Yeriko lawa.’ Kweniso Yesaya wakayowoyapo yayi kuti: ‘Yura ndiyo mumutume.’—Yes. 6:8.

⁹ Yesu Khristu nchiyelezgero ciwemi comene ca ŵanalume awo ŵakazomera kulongozgeka na mzimu wa Ciuta. Wakajipeleka kuti wawombore ŵanthu. (Yoh. 3:16) Asi cingaŵa ciwemi kuti nase tiŵe ŵakujipata nga umo wakacitira Yesu? Wati wafumbika umo wakuwonera mskambo, mbali munyake uyo waŵa mulara mu mpingo kwa vilimika vinandi wakati: “Mazgu ghakuti liskanga tumberere twane, agho Yesu wakaphalira Petrosi ghakuniciska comene. Mu vilimika vyose ivi, nawona kuti ŵabali na ŵadumbu ŵakukhozgeka comene nanga ni para ungayowoya waka nawo mwalusungu panji kuŵacitira cinthu cinyake. Mulimo wa uliska nkhusangwa nawo comene.”—Yoh. 21:16.

10. Nchivici cingakhuŵilizga ŵabali kuti ŵateŵeterenge ŵanji nga umo Yesu wakacitira?

¹⁰ Ŵabali awo ŵali na mzimu wa kujipata ŵakuwona mskambo wa Ciuta nga umo Yesu wakuwuwonera. Iyo wakati: “Nimusamphuskaninge.” (Mat. 11:28) Cifukwa ca kuŵa na cipulikano mwa Ciuta ndiposo kutemwa mpingo, ŵabali aŵa ŵakuwona kuti nchiwemi kunwekera mulimo uwemi uwu. Iwo ŵalije maghanoghano ghakuti mulimo uwu ngwakusuzga comene mwakuti ŵangafiska yayi. Kweni wuli usange mbali munyake wakunwekera yayi mulimo uwu? Kasi wangacita wuli kuti waŵe na khumbo la kuteŵetera mpingo?

Ŵani na Khumbo la Kuteŵetera

11. Kasi mbali wangacitaci kuti waŵe na khumbo la kuteŵetera?

¹¹ Usange mulije khumbo la kuteŵetera cifukwa ca kujiwona kuti ndimwe ŵambura kwenelera, ipo lombani mzimu utuŵa. (Luka 11:13) Khumbo la kuteŵetera likufuma kwa Yehova, cifukwa mzimu wake ndiwo ukuciska mbali kuti wanwekere ndiposo kumupa nkhongono zakucitira uteŵeti wakupatulika. (Fil. 2:13; 4:13) Ntheura, nchakwenelera kulomba Yehova kuti wamovwirani kuti muŵe na khumbo la kuteŵetera.—Ŵazgani Salmo 25:4, 5.

12. Kasi mbali wangacitaci kuti waŵe na vinjeru mwakuti wacite makora mauteŵeti mu mpingo?

¹² Mbali wangatondeka kunwekera milimo yakusazgikira mu mpingo cifukwa ca kuwona kuti kupwelelera mskambo nkhwakusuzga comene. Nyengo zinyake wangawona kuti walije vinjeru vyakucitira mauteŵeti ghakusazgikira. Para ni nthena, wangacita makora kufwilirapo kusambira Baibolo payekha ndiposo mabuku gha muzga, mwakuti wasange vinjeru. Kweniso wangajifumba kuti: ‘Kasi nkhusambira Baibolo mwakukhazikika na kulomba Ciuta kuti wanipe vinjeru?’ Msambiri Yakobe wakalemba kuti: “Usange yumoza wa imwe wakupeleŵera mu vinjeru, walombenge Ciuta, pakuti iyo wakupeleka mwawanangwa ku wose, nakuti wakutombozga cara; ndipo vipikenge kwa iyo.” (Yak. 1:5) Kasi fundo ya mu lemba ili mukuyigomezga? Solomoni wakati walomba vinjeru, Ciuta wakamupa “mtima wa vinjeru na wakumanyiska makora,” uwo ukamovwira kuti weruzgenge makora. (1 Mathe. 3:7-14) Mbunenesko kuti nkhani ya Solomoni yikaŵa yapadera. Kweni tili na cigomezgo cose kuti Ciuta ngwakunozgeka kupeleka vinjeru ku ŵabali awo ŵapika milimo yakusazgikira mwakuti ŵapwelelere makora mberere zake.—Zinth. 2:6.

13, 14. (a) Longosorani umo Paulosi wakacitiranga vinthu cifukwa ca ‘citemwa ca Khristu.’ (b) Kasi tikwenera kucitaci cifukwa ca ‘citemwa ca Khristu’?

 ¹³ Cinyake ico cingatovwira kuti tiŵe na khumbo la kucita mauteŵeti ghakusazgikira nkhughanaghanira viwemi ivyo Yehova na Mwana wake ŵaticitira. Mwaciyelezgero, ghanaghanirani fundo iyo yili pa 2 Ŵakorinte 5:14, 15. (Ŵazgani.) Kasi “citemwa ico Khristu wali naco cikuticicizga” wuli? Citemwa ico Khristu wali kulongora mwakukolerana na khumbo la Ciuta pa kupeleka umoyo wake cifukwa ca ise nchapadera comene, ndipo cikuticicizga kuti timuwongenge kufumira pasi pa mtima. Paulosi wakacitanga vinthu mwakukhuŵilizgika na citemwa ca Khristu. Cifukwa ca citemwa ici, wakacitanga mwauryezi yayi, ndipo cikamovwira kuteŵetera Ciuta ndiposo ŵanji mu mpingo na kuwaro kwa mpingo.

¹⁴ Para tikughanaghanira citemwa ca Khristu, tikukhuŵilizgika kuti timuwongenge comene. Pa cifukwa ici tikuwona kuti cingaŵa cambura kwenelera ‘kuseŵa ku thupi,’ mwa kuŵa waka na vilato vya kujikondweska taŵene. M’malo mwake, tikusintha vinthu pa umoyo withu mwakuti cilato cithu cikuru ciŵenge ca kucita mulimo uwo Ciuta wali kutipa. Cifukwa ca citemwa, tikuŵa ŵakunweka ‘kuteŵetera’ ŵabali ŵithu. (Ŵazgani Ŵagalatiya 5:13.) Para tikujiwona kuŵa ŵazga ŵa ŵabali ŵithu, mbwenu tiŵacindikenge. Tiŵavyenge mtima wa kweruzga ŵabali ŵithu nga uwo wuli na Satana.—Uvu. 12:10.

Ŵamumbumba Nawo Ŵangawovwira

15, 16. Kuti mbali waŵe muteŵeti wakovwira panji mulara, kasi ŵamumbumba yake ŵangamovwira wuli?

¹⁵ Mbali uyo wali kutora ndipo wali na ŵana kuti wimikike kuŵa mulara panji muteŵeti wakovwira, vikuthembaso umo mbumba yake yikucitira mwauzimu. Wangimikika kuŵa muteŵeti wakovwira panji mulara usange mbumba yake yikucita makora mwauzimu ndipo yili na lumbiri luwemi. Fundo iyi yikulongora kuti ŵamumbumba ŵangawovwira dada panji mfumu uyo wakukhumba kuŵa muteŵeti wakovwira panji mulara mu mpingo.—Ŵazgani 1 Timote 3:4, 5, 12.

¹⁶ Yehova wakukondwa comene para mbumba za Ŵakhristu zikukolerana. (Efe. 3:14, 15) Kuti dada walongozge “makora” ŵamunyumba yake na kucita makora mauteŵeti gha mpingo, wakwenera kucita vinthu mwamahara. Ipo nchakuzirwa comene kuti dada uyo ni mulara panji muteŵeti wakovwira, sabata yiliyose wasambirenge Baibolo lumoza na muwoli wake kweniso ŵana mwakuti wose ŵasangenge candulo na Nyengo Yakusopera ya Mbumba. Nyengo na nyengo wakwenera kuluta nawo mu uteŵeti wa m’munda. Kweniso, ŵamumbumba ŵakwenera kovwira dada kufiska vilato vyake.

Kasi Mungateŵeteraso?

17, 18. (a) Kasi mbali uyo wakaŵapo muteŵeti wakovwira panji mulara wangakhumbikwira kucitaci? (b) Kasi mbali uyu wakwenera kuwona wuli vinthu?

¹⁷ Mutepanji mukaŵapo mulara panji muteŵeti wakovwira. Mukumutemwa Yehova ndipo muli na cigomezgo cose kuti wacali kumupwelelerani. (1 Pet. 5: 6, 7) Kasi mukaphalirika kuti mukwenera kusintha vinthu vinyake? Zomerezgani kuti mukacitanga makora yayi ndipo sinthani ivyo ŵakati musinthe, uku mukulomba Ciuta kuti wamovwirani. Lekani kukwiya. Citani vinthu mwamahara ndipo wonani vinthu mwakwenelera. Mbali munyake uyo  wakalekapo ulara, wakati: “Nkhawoneseskanga kuti nifikenge pa maungano mwakukhazikika, kupharazga, ndiposo kuŵazga Baibolo nga umo nkhacitiranga apo nkhaŵa mulara. Nkhasambira kuŵa na mtima wa kulindilira, cifukwa nkhaghanaghananga kuti pajumphenge waka cilimika cimoza panji viŵiri kuti niŵeso mulara, kweni pakatora vilimika pafupifupi vinkhondi na viŵiri. Pa nyengo iyi nkhakhuŵilizgika kuti nileke kugongowa, kweni nilutilire kunwekera.”

¹⁸ Usange namwe mukaŵapo mulara panji muteŵeti wakovwira, mungagongowanga yayi. Ghanaghanirani umo Yehova watumbikira uteŵeti winu ndiposo mbumba yinu. Khozgani mbumba yinu mwauzimu, yenderani ŵalwari, ndipo ciskani ŵakulopwa. Kuluska vyose, pakuti ndimwe yumoza wa Ŵakaboni ŵa Yehova, zirwiskani mwaŵi wa kulumba Ciuta na kupharazga makani ghawemi gha Ufumu. *—Sal. 145:1, 2; Yes. 43:10-12.

Ghanaghaniranipo Comene

19, 20. (a) Kasi ŵabali wose ŵakubapatizika ŵakuciskika kucitaci? (b) Kasi tizamudumbiskana vici mu nkhani yakulondezgapo?

¹⁹ Kuluska kale, mazuŵa ghano ŵalara na ŵateŵeti ŵakovwira ŵakukhumbikwa comene. Ntheura, tikuciska ŵabali wose awo ŵali kubapatizika kuti ŵaghanaghanirepo comene nkhani iyi. Ŵangajifumba kuti: ‘Usange ndine muteŵeti wakovwira panji mulara yayi, kasi cingaŵa cifukwa wuli?’ Ŵabali, zomerezgani mzimu wa Ciuta kuti umovwirani kuwona nkhani iyi mwakwenelera.

²⁰ Mpingo wose ukusanga candulo cifukwa ca ŵabali awo ŵakujipeleka kucita mauteŵeti ghakusazgikira. Tikuŵa na cimwemwe para tikujipeleka kuteŵetera ŵanji ndiposo kuseŵa ku mzimu. Kweni tikwenera cara kucitiska citima mzimu utuŵa wa Ciuta nga umo nkhani yakulondezgapo yizamulongosolera. Kasi tingacita wuli kuti tileke kucitiska citima mzimu wa Ciuta?

[Mazgu ghamusi]

Kasi Mungazgora Wuli?

• Kasi ucimi uwo uli pa Mika 5:5 ukutiphalira vici?

• Longosorani ico mzimu wa kujipata ukung’anamura.

• Kasi mbali wangacitaci kuti waŵe na khumbo la kuteŵetera ŵanji?

• Cifukwa wuli kukolerana mu mbumba nkhwakuzirwa kuti mbali waŵe muteŵeti wakovwira panji mulara?

[Mafumbo]

[Vithuzithuzi pa peji 25]

Kasi mungacitaci kuti munwekere milimo yakusazgikira?