Cifukwa Wuli Tikwenera Kucindika Ŵacekuru?

MUMPHEPETE mwa nyanja ya Pacific, mu caru ca California ku U.S.A., muli khuni linyake lakucemeka Lone Cypress. Khuni ili ndimoza mwa makuni ghakumanyikwa comene pa caru cose cifukwa ŵakuti lili na vilimika vyakujumpha 250. Cifukwa ca kumanyikwa kuti ndakale comene, ŵanthu ŵakuliwona kuŵa lakuzirwa comene ndipo ŵakulipwelelera mu nthowa zakupambanapambana. Mwaciyelezgero, ŵali kulikakilira na vingwe kuti likholerenge ndipo pasi mu mphepete mwake ŵali kulizingilizga na malibwe.

Khuni ili likutikumbuska ŵacekuru awo tili nawo mu mpingo, ŵeneawo ŵakumanyikwa cifukwa ca kugomezgeka. Nthowa yimoza iyo ŵalongolera kuti mbakugomezgeka nkhupharazga makani ghawemi gha Ufumu. Nchimi Joyeli yikacima kuti “ŵalara” panji kuti ŵacekuru ŵazamupharazga uthenga wa mu Baibolo. (Joel 2:28-32; Mil. 2:16-21) Ghanaghanirani waka unandi wa nyengo iyo ŵamalira pa kuphalira ŵanthu ‘makani ghawemi gha Ufumu.’ (Mat. 24:14) Ŵanji mwa ŵacekuru aŵa ŵazizipizga nthambuzgo panji masuzgo ghanyake. Usange khuni la Lone Cypress ŵakulipwelelera cifukwa cakuti lakhala vilimika vinandi, ipo nchakwenelera kuti ticindikenge comene ŵacekuru awo ŵali pakati pithu.

Yehova Ciuta wakaphalira ŵanthu ŵake kuti: “Citira ulemu wambuha, na kumucindika mucekuru.” (Lev. 19:32) Pakati pa ŵateŵeti ŵa Yehova ŵa mazuŵa ghano pali  ŵanji awo ‘ŵenda na Ciuta’ kwa vilimika vinandi comene. (Mika 6:8) Cifukwa cakuti ŵakulutilira kulondezga ulongozgi wa mu Malemba, mbuha zawo ni “mphumphu ya ucindami.”—Zinth. 16:31.

Mpositole Paulosi wakaphalira Timote kuti: “Ungacenyanga munthu mulara mwaukali cara.” M’malo mwake, Timote wakeneranga ‘kumudandawulira nga ni wiske’ na kuwona ‘ŵanakazi ŵalara nga mbanyina.’ (1 Tim. 5:1, 2) Timote wakeneranga ‘kucitira ulemu’ ŵambuha. Yehova wakukhumba kuti ivyo tikuyowoya vilongorenge kuti tikucindika ŵacekuru.

Lemba la Ŵaroma 12:10 likuti: “Pakulongora nchindi kwa yumoza na munyake, yambani ndimwe.” Ŵalara mu mpingo ŵakucindika ŵacekuru. Ndipouli, waliyose wakwenera kuŵa panthazi kucindika ŵanji.

Mbunenesko kuti ŵa mu mbumba ndiwo ŵali na mulimo wa kupwelelera ŵapapi ŵawo awo mbacekuru. Kweni kumbukani kuti ŵanthu ŵayezga nthowa zakupambanapambana kuti ŵapwelelere khuni la Lone Cypress, mwakuti lilutilire kuŵa lamoyo. Ipo nchakwenelera kuti nase tiyezgeyezge kusanga nthowa za umo tingacitira kuti ŵacekuru ŵalutilire kucindikika. Mwaciyelezgero, usange tingategherezga comene ku ivyo ŵakuyowoya, mbwenu tikoserenge yayi kucita vinthu mu nthowa iyo ise takhumba, kweni tighanaghanirengeso ivyo ŵayowoya.—Zinth. 23:22; 1 Tim. 5:4.

Ŵacekuru awo ŵali pakati pithu Yehova wakuŵawona kuti mbakuzirwa comene. Wazamuŵaluwapo yayi. (Sal. 71:18) Nakuti wakuŵakhozga kuti ŵalutilire kumuteŵetera mwakugomezgeka. Ntheura, tiyeni tilutilire kovwira ndiposo kucindika ŵacekuru.

[Vithuzithuzi pa peji 7]

Nga umo khuni la Lone Cypress likukhumbikwira wovwiri, ŵacekuru nawo ŵakukhumbikwira wovwiri ndiposo kuŵacindika

[Kulongosora Cithuzithuzi]

American Spirit Images/age fotostock