Lutilirani Kuŵa Ŵakukhora Mwauzimu Apo Mukupwelelera Mulwari

KIMU wakati wasangika na cakutupa pa musana, wakasangikaso na nthenda ya kansa. * Mfumu wake Sitivini wakati: “Ŵati ŵamucita opareshoni na kuwuskapo cakutupa, ŵakamupima na kumupa munkhwala. Cifukwa ca munkhwala uwu, wakaŵavyirathu nkhongono, ndipo wakendanga mwakusuzgikira.”

Kasi mungaghanaghanira citima ico Sitivini wakaŵa naco kuwona kuti wakutemweka wake wakusuzgika? Mutepanji muli na mbali winu uyo wakusuzgika na ulwari panji ucekuru. (Muph. 12:1-7) Para ni nthena, kuti mumuphwelelere makora, namwe mungaluwanga yayi kujipwelelera. Para mwawelera nyuma mwauzimu, mungamba kusuzgika maghanoghano ndipo thupi linu lingamba kulopwa, mwakuti mungatondeka kupwelelera makora mulwari. Kasi mungacita wuli kuti mulutilire kuŵa ŵakukhora mwauzimu apo mukupwelelera mbali winu uyo ni mulwari panji mucekuru? Kasi mpingo ungawovwirapo wuli?

Mungacita Wuli Mwamahara?

Kuti mulutilire kuŵa na umoyo uwemi wauzimu ndiposo wakuthupi apo mukupwelelera mulwari, mukwenera kusintha vinthu vinyake na kugaŵa makora nyengo yinu. Lemba la Zintharika 11:2 likuti: “Vinjeru vili na awo ŵakujicefya.” Mu nkhani iyi lizgu lakuti “kujicefya” likung’anamura kumanya ivyo tingatondeka. Kuti muleke kucita vinthu mwakujivuska, sandani ivyo mukucita ndiposo ivyo mukukhumba kucita.

Sitivini wakalongora vinjeru na kujicefya mwa kucepeskako milimo yake. Padera pa nchito yakulembeka, wakaŵaso mulaŵiliri wa milimo ya wupu wa ŵalara, ndiposo  mulaŵiliri wa uteŵeti mu mpingo ku Ireland. Wakaŵaso mu Komiti Yakudumbiskana na Cipatala. Sitivini wakati: “Kimu wakadandawurapo yayi kuti nkhumalira nyengo yinandi ku milimo iyi. Kweni nkhamanyanga kuti milimo iyi njinandi.” Kasi Sitivini wakacita wuli? Iyo wakati: “Nkhati nalomba na kughanaghanirapo, nkhaleka dankha kuteŵetera nga ni mulaŵiliri wa milimo ya wupu wa ŵalara. Kweni nkhalutilira kuteŵetera nga mulara, ndipo kulekera ŵanji mauteŵeti ghanyake gha mpingo kukanovwira kuti niŵe na nyengo yinandi yakupwelelera Kimu.”

Pakati pajumpha nyengo, Kimu wakacira. Sitivini na Kimu ŵakasandaso umo vinthu vikaŵira pa umoyo wawo, ndipo mwakovwirika na muwoli wake, Sitivini wakambaso mauteŵeti agho wakacitanga pakwamba mu mpingo. Sitivini wakulongosora kuti: “Tose tikasambira kucita vinthu ivyo tingakwaniska kuyana na suzgo lithu. Nkhuwonga comene Yehova cifukwa ca kutovwira, kweniso nkhuwonga muwoli wane cifukwa ca kuleka kudinginyika nangauli wakaŵa mulwari.”

Aghanaghaniraniso za mulaŵiliri wakwendakwenda Jere na muwoli wake Mariya. Ŵakasintha cilato cawo mwakuti ŵapwelelere  ŵapapi ŵawo ŵacekuru. Mariya wakati: “Ine na mfumu wane tikaŵa na cilato ca kuteŵetera nga mbamishonale, kweni pakuti mfumu wane wakababika yekha kwawo, wakakhumbikwiranga kovwira ŵapapi ŵake. Ntheura, tikaghanaghana kuti tikhalenge ku Ireland kuti tiŵapwelelere. Pakuti tikaŵa pafupi, para adadavyara ŵalwara tikalutanga kukaŵawovwira mpaka apo ŵakafwira. Nakuti tikuyowoyeskana na amamavyara zuŵa lililose ndipo para ŵakukhumba wovwiri tikuŵawovwira. Ŵabali ŵa mu mpingo uwo amamavyara ŵakuwungana ŵatovwira comene, ndipo talutizga uteŵeti wakwendakwenda cifukwa ca wovwiri wawo.”

Umo Ŵanji Ŵangawovwilira

Pakuyowoya za vinthu ivyo ŵangapeleka ku vyokoro mu mpingo, mpositole Paulosi wakalemba kuti: “Usange yunji wakuŵapa cara vyakukhumbikwa awo mbake na ŵake, ndipo comenecomene awo mba mu nyumba yake, wakana cipulikano ndipo ni muheni comene kuluska munthu wambura cipulikano.” Paulosi wakakumbuska Ŵakhristu ŵanyake kuti para ŵakukhumba kuŵa ‘ŵakuzomerezgeka pamaso pa Ciuta,’ ŵakeneranga kupwelelera ŵapapi ŵawo ŵacekuru. (1 Tim. 5:4, 8) Nangauli vili nthena, kweni ŵanji mu mpingo ŵangawovwirapo ndipo ŵakwenera kucita nthena.

Wonani nkhani ya Hakani na Inga, ŵakutorana awo mbacekuru ndipo ŵakukhala ku Sweden. Hakani wakati: “Muwoli wane wakati wasangika na kansa, tikaŵa na citima cikuru comene. Pakwamba Inga wakaŵa na umoyo uwemi ndiposo wankhongono. Kweni wakati wamba kulwara tikalutanga ku cipatala zuŵa lililose, ndipo munkhwala uwo wakapokeleranga ukambiska masuzgo ghanyake mu thupi lake. Panyengo iyi wakakhalanga waka pa nyumba, ndipo ine nkhakhumbikwiranga kukhala nayo kuti nimupwelelere.” Kasi mpingo ukaŵawovwira wuli?

Ŵalara ŵakanozga ndondomeko yakuti Hakani na Inga ŵategherezgenge maungano gha mpingo pa telefoni. Padera pa ivi, ŵabali na ŵadumbu ŵakalutanga kukacezga nawo panji kuŵayimbira foni. Ŵakaŵalemberangaso makalata panji makadi. Hakani wakati: “Tikawona kuti tawovwirika na ŵabali wose kweniso na Yehova. Cifukwa ca kutipwelelera, talutilira kuŵa ŵakukhora mwauzimu. Nkhuwongaso comene cifukwa Inga wali kucira ndipo sono tikuwunganaso ku Nyumba ya Ufumu.” Para ŵabali ŵakuyezgayezga kovwira ŵalwari na ŵacekuru, ŵakulongora kuti ‘mbanase ŵakutemwa nyengo zose, ndipo mbabali awo ŵakubabiwira kovwira para pali suzgo.’—Zinth. 17:17.

Yehova Wakuwonga Ivyo Mukucita

Kupwelelera mulwari kungaŵa kwakuvuska. Ndipouli, Themba Davide likalemba kuti: “Ngwakutumbikika uyo wakupwelera ŵakavu” panji awo ŵakusuzgika cifukwa ca ulwari.—Sal. 41:1.

Cifukwa wuli awo ŵakupwelelera ŵalwari mbakutumbikika? Baibolo likuti uyo wakucitira lusungu mukavu panji wakusuzgika wakubwereka Yehova, ndipo wazamumuwezgerapo. (Zinth. 19:17) Ciuta waunenesko wakulengera lusungu ŵateŵeti ŵake awo ŵakusuzgika ndipo wakutumbika awo ŵakuŵawovwira. Davide wakimba kuti: “Yehova wakumufukatira pa citara ca ulwari; mu nthenda zake mukumucizga.” (Sal. 41:3) Tingaŵa na cigomezgo cose kuti awo ŵakupwelelera ŵakusuzgika, Yehova waŵawovwirenge para nawo ŵangasuzgika.

Ipo nchakukondweska kumanya kuti Yehova wakuwona ivyo tikucita pakupwelelera mbali withu uyo ni mulwari ndiposo kuti ivyo tikucita vikumukondweska. Nangauli kovwira mulwari kukukhumba kulimbikira, kweni Malemba ghakutikumbuska kuti, “na sembe zantheura Ciuta wakukondweskeka nkhanira.”—Heb. 13:16.

[Mazgu ghamusi]

[Vithuzithuzi pa peji 18]

Lutilirani kuŵa ŵakukhora mwauzimu, ndipo zomerani wovwiri