Lutilirani Kuzgoŵezga Nkhongono Zinu Zakamanyiro

ŴANTHU ŵakukondwa comene para ŵakuwonelera munthu uyo wakucita maseŵero mwaluso. Baibolo likuciska Ŵakhristu kuti ŵazgoŵezgenge nkhongono zawo zakamanyiro nga ni munthu uyo wakucita maseŵero mwaluso.

Mu kalata iyo mpositole Paulosi wakalembera Ŵahebere, wakati: “Cakurya cakukhoma ncha ŵanthu ŵakukhwima, awo mu kucita, ŵali kuzgoŵezga nkhongono zawo zakamanyiro kupambaniska pakati pa cakwenelera na cakubudika.” (Heb. 5:14) Cifukwa wuli Paulosi wakaciska Ŵakhristu Ŵacihebere kuti ŵazgoŵezgenge nkhongono zawo zakamanyiro, nga umo munthu uyo wakucita maseŵero wakucitira? Kasi tingazgoŵezga wuli nkhongono zithu zakamanyiro?

“Mukwenera Kuŵa Ŵasambizgi”

Pakulongosora za Yesu nga ni “musofi mukuru umo vikaŵira na Melekizedeki,” Paulosi wakati: “Pali vinandi vya iyo [Yesu] vyakuti tiyowoye na vinonono kuvilongosora, cifukwa mwazgoka ŵazito mu kupulika kwinu. Pakuti, nangauli mukwenera kuŵa ŵasambizgi mwakuyana na nyengo, mukukhumbikwira munthu kuti wamusambizgani kufuma pakwamba vinthu vyakwambilira vya mazgu ghakupatulika gha Ciuta; ndipo mwazgoka nga ni awo ŵakukhumbikwira mkaka, cakurya cakukhoma cara.”—Heb. 5:10-12.

Nchakuwonekerathu kuti mu nyengo ya Paulosi, Ŵakhristu ŵanji Ŵaciyuda ŵakapulikiskanga yayi vinthu vinyake, ndipo ŵakatondeka kukura mwauzimu. Mwaciyelezgero, cikaŵaŵira cinonono kuzomerezga ungweru uwo ukaŵalirangaŵaliranga wakukhwaskana na Dango ndiposo ukotoli. (Mil. 15:1, 2, 27-29; Gal. 2:11-14; 6:12, 13) Ŵanji cikaŵasuzga kuleka kucita tunthu tunyake twakukhwaskana na kusunga Sabata ndiposo Zuŵa la Mphepiska. (Kol. 2:16, 17; Heb. 9:1-14) Ntheura, Paulosi wakaŵaciska kuti ŵazgoŵezge nkhongono zawo zakamanyiro, mwakuti ŵamanye kupambaniska pakati pa cakwenelera na cakubudika. Ndipo wakaŵaphaliraso kuti ‘ŵaŵe ŵakukhwima.’ (Heb. 6:1, 2) Cifukwa ca ivyo Paulosi wakayowoya, ŵanji ŵakwenera kuti ŵakaghanaghanirapo umo ŵakacitiranga na nkhongono zawo zakamanyiro, ndipo vikaŵawovwira kuti ŵakure mwauzimu. Wuli pakuyowoya za ise?

Zgoŵezgani Nkhongono Zinu Zakamanyiro

Kasi tingacita wuli kuti tizgoŵezge nkhongono zithu zakamanyiro mwakuti tikhwime mwauzimu? Mwa kucita nga umo munthu uyo wakucita maseŵero wakuzgoŵezgera thupi lake kuti lendenge mwaluso, nase tikwenera kuzgoŵezga maghanoghano ghithu kuti ghapambaniskenge cakwenelera na cakubudika.

John Ratey, wa pa Harvard Medical School wakati: ‘Wongo ukukhumba kuwuzgoŵezga, ndipo ici nchinthu ciwemi comene ico mungawucitira.’ Gene Cohen, mulara wa Center on Aging, Health and Humanities pa George Washington University, wakati: ‘Para tikuyezgayezga kucita cinthu cakusuzga, ico cingakhumba kughanaghanirapo comene, mu wongo mukupangika maselo ghaphya,’ agho ghakovwira kuti tighanaghanenge comene.

Ipo nchiwemi kuzgoŵezga nkhongono zithu zakamanyiro ndiposo kupulikiska Mazgu gha Ciuta. Para tingacita nthena, tizamuŵa ŵakunozgeka  kucita “khumbo lakufikapo la Ciuta.”—Rom. 12:1, 2.

Mudokerenge “Cakurya Cakukhoma”

Usange tikukhumba kuŵa ‘ŵakukhwima’ mwauzimu tikwenera kujifumba kuti: ‘Kasi nkhuyezgayezga kupulikiska unenesko wa mu Baibolo? Kasi ŵanji ŵakuwona kuti nili wakukhwima mwauzimu?’ Mama wakukondwa konkheska bonda wake na kumupa vyakurya vyakwenelera. Kasi mukughanaghana kuti mama wangajipulika wuli para vilimika vikujumpha kweni mwana wake wacali konkha? Nase tikukondwa para tikuwona munthu uyo tikumusambizga Baibolo wakura mwauzimu na kubapatizika. Kweni wuli usange munthu uyo tikusambira nayo Baibolo wakukura yayi mwauzimu? Ici cingaŵa cakugongoweska comene. (1 Kor. 3:1-4) Msambizgi wakukhumba kuti para nyengo yajumphapo msambiri nayo waŵe msambizgi.

Kulanguruka ndiposo citatata ni vyakukhumbikwa comene kuti nkhongono zithu zakamanyiro zigwire nchito. (Sal. 1:1-3) Tikwenera cara kuzomerezga vinthu nga nkhuwonelera TV panji maseŵero ghanyake kutitimbanizga kulanguruka. Kuti tizgoŵezge nkhongono zithu zakamanyiro, tikwenera kusambira Baibolo na mabuku gha “muzga wakugomezgeka na wakucenjera.” (Mat. 24:45-47) Padera pa kusambira Baibolo patekha, nchakuzirwa comene kuti tiŵenge na Nyengo Yakusopera ya Mbumba, ndiposo kusambira nkhani za ndimba za mu Baibolo.

Jerónimo, uyo ni mulaŵiliri wakwendakwenda ku Mexico, wakati wakusambira Gongwe la Mulinda lililose para lafika waka. Wakupaturaso nyengo yakusambilira pamoza na muwoli wake. Jerónimo wakati: “Ine na muwoli wane tili na cizgoŵi ca kuŵazga Baibolo zuŵa lililose, ndipo tikovwirikaso na mabuku ghanyake nga ni burosha la ‘Wonani Caru Ciweme.’ Mkhristu munyake, zina lake Ronald wakati nyengo zose wakulondezga ndondomeko ya mpingo ya kuŵazga Baibolo. Wakuŵaso na ndondomeko ya kusambira nkhani za ndimba kwa nyengo yitali kamoza panji kaŵiri. Ronald wakati: “Ndondomeko iyi yikunovwira kuti ninwekenge na ivyo nizamusambira ulendo wakulondezgapo.”

Wuli pakuyowoya za ise? Kasi tikupatura nyengo yakukwana yakusambilira na kughanaghanirapo pa Mazgu gha Ciuta? Kasi tikuzgoŵezga nkhongono zithu zakamanyiro na kucita vinthu mwakuyana na fundo za mu Malemba? (Zinth. 2:1-7) Mphanyi taŵa na khumbo la kuŵa munthu wakukhwima mwauzimu, ndiposo umanyi na vinjeru nga umo ŵaliri awo ŵali kuzgoŵezga nkhongono zawo zakamanyiro ndipo ŵakupambaniska cakwenelera na cakubudika.

[Cithuzithuzi pa peji 23]

Tikuzgoŵezga nkhongono zithu zakamanyiro mwa kucita