Mungacitiskanga Citima Mzimu Utuŵa wa Yehova Cara
Mungacitiskanga Citima Mzimu Utuŵa wa Yehova Cara
“Mungacitiskanga citima mzimu utuŵa wa Ciuta cara, weneuwo mwadindika nawo.”—EFE. 4:30.
1. Kasi Yehova waŵapa mwaŵi wuli ŵanthu, ndipo ŵakwenera kucitaci?
ŴANTHU awo ŵakukhala mu caru ca masuzgo ici, Yehova waŵacitira cinthu capadera comene. Waŵapa mwaŵi wakuti ŵasendelere kwa iyo kwizira mwa Mwana wake Yesu Khristu. (Yoh. 6:44) Usange muli kujipatulira, ndipo mukukhala mwakuyana na kujipatulira kwinu, ndikuti namwe Yehova wamupani mwaŵi uwu. Pakuti muli kubapatizika mu zina la mzimu utuŵa, mukwenera kucita vinthu mwakukolerana na mzimu uwu.—Mat. 28:19.
2. Kasi tidumbiskanenge mafumbo wuli?
2 Ise ‘tikuseŵa ku mzimu’ tikuyezgayezga kuvwara wunthu uphya. (Gal. 6:8; Efe. 4:17-24) Kweni mpositole Paulosi wakuticenjezga kuti tigege kucitiska citima mzimu utuŵa wa Ciuta. (Ŵazgani Ŵaefeso 4:25-32.) Sono tisandenge ulongozgi wa mpositole uyu. Kasi Paulosi wakang’anamurangaci apo wakayowoya za kucitiska citima mzimu utuŵa wa Ciuta? Kasi munthu wakujipatulira kwa Yehova wangacitiska wuli citima mzimu utuŵa? Kasi tingacita wuli kuti tigege kucitiska citima mzimu wa Yehova?
Ivyo Paulosi Wakang’anamuranga
3. Longosorani ivyo lemba la Ŵaefeso 4:30 likung’anamura.
3 Cakwamba, wonani ivyo Paulosi wakalemba pa Ŵaefeso 4:30. Iyo wakati: “Mungacitiskanga citima mzimu utuŵa wa Ciuta cara, weneuwo mwadindika nawo cifukwa ca zuŵa la kufwatulika na ciwombolero.” Paulosi wakakhumbanga yayi kuti umoyo wauzimu wa Ŵakhristu ŵanyake unangike. Iwo ‘ŵakadindika’ na mzimu utuŵa wa Yehova “cifukwa ca zuŵa la kufwatulika na ciwombolero.” Mzimu wa Ciuta ndiwo kale ukaŵa cidindo ndipo ucali cidindo panji kuti “cikholi ca ivyo vikwiza,” vyakukhwaskana na ŵakuphakazgika awo ŵalutilira kugomezgeka. (2 Kor. 1:22) Cidindo ici cikupeleka ukaboni wakuti ŵasoleka na Ciuta ndipo ŵazamupokera umoyo wakucanya. Wose awo ŵakwenera kudindika ŵakukwana 144,000.—Uvu. 7:2-4.
4. Cifukwa wuli tikwenera cara kucitiska citima mzimu wa Ciuta?
4 Kucitiska citima mzimu utuŵa nchinthu cakwamba ico cingatondeska kuti uleke kugwira nchito pa Mkhristu. Tikuwona ukaboni wa fundo iyi para tikuŵazga ivyo Davide wakayowoya wati wacita uleŵi na Batisheba. Wati wazomera kuti wananga, Davide wakaŵeyelera Yehova wakati: “Lekani kundijowora kundifumya pamaso pinu, ndipo muleke kuwuskapo pa ine mzimu winu utuŵa.” (Sal. 51:11) Ŵakuphakazgika awo ‘ŵagomezgeka mpaka nyifwa’ ndiwo ŵazamupokera “mphumphu” ya umoyo wamuyirayira kucanya. (Uvu. 2:10; 1 Kor. 15:53) Ŵakhristu awo ŵakulindilira kuzakakhala pa caru capasi nawo ŵakukhumbikwira mzimu utuŵa kuti ŵalutilire kugomezgeka kwa Ciuta ndiposo kuti ŵazakapokere umoyo uwo ulipo cifukwa ca sembe yakuwombora iyo Khristu wali kupeleka. (Yoh. 3:36; Rom. 5:8; 6:23) Ntheura, tose tikwenera kuŵa maso mwakuti tigege kucitiska citima mzimu utuŵa wa Yehova.
Mkhristu Wangacitiska Wuli Citima Mzimu?
5, 6. Kasi Mkhristu wangacitiska wuli citima mzimu wa Yehova?
5 Pakuŵa Ŵakhristu, tingayezgayezga kuti tigege kucitiska citima mzimu. Tingacita nthena usange tingalutilira “kwenda mwa mzimu,” cifukwa kwenda mwa mzimu kukutovwira kuti tileke kuthera ku makhumbiro ghaheni gha thupi lithu, ndiposo kuti tileke kutolera mikhaliro yiheni. (Gal. 5:16, 25, 26) Kweni nyengo zinyake tingaleka kwenda mwa mzimu. Tingacitiska citima mzimu wa Ciuta usange tingawelera nyuma pacoko waka mwauzimu na kwamba nkharo iyo Baibolo likuti njiheni.
6 Usange tingalutilira kucita vinthu ivyo vikususkana na ulongozgi wa mzimu utuŵa, mbwenu tiwucitiskenge citima. Ticitiskengeso citima Yehova, uyo ni mweneco wa mzimu uwu. Kusanda Ŵaefeso 4:25-32 kutovwirenge kuwona umo tingacitira mwakuti tigege kucitiska citima mzimu wa Ciuta.
Umo Tingacitira Kuti Tigege Kucitiska Citima Mzimu
7, 8. Cifukwa wuli tikwenera kuyowoya unenesko?
7 Tikwenera kuyowoya unenesko. Pa Ŵaefeso 4:25 Paulosi wakalemba kuti: “Sono pakuti mwawuskako utesi, yowoyani unenesko waliyose wa imwe na mzengezgani wake, pakuti tili viŵaro vya thupi limoza.” Pakuti tili ŵakukolerana nga ni “viŵaro vya thupi limoza,” tikwenera yayi kucita vinthu mwauryarya, nesi kupuluskira dala ŵabali, cifukwa kucita nthena kukuyana waka na kuŵapusika. Uyo wangalutilira kucita vinthu ivi, paumaliro ubwezi wake na Ciuta ungadumuka.—Ŵazgani Zintharika 3:32.
8 Utesi ungatimbanizga mtende wa mpingo. Ntheura, tikwenera kucita vinthu nga ni Daniyeli, uyo wakaŵa wakugomezgeka. Ŵanji ŵakasangamo upusikizgi uliwose yayi mwa iyo. (Dan. 6:4) Tikwenera kukumbuka ulongozgi uwo Paulosi wakaphalira Ŵakhristu awo ŵakulindilira kuya kucanya, wakuti waliyose uyo nchiŵaro ca “thupi la Khristu” ngwakubamphikizgika ku ŵanyake, ndipo wakwenera kukolerana na ŵakuphakazgika ŵa Yesu. (Efe. 4:11, 12) Usange tikulindilira kuzakakhala mu Paradiso kwamuyirayira, nase tikwenera kuyowoya unenesko, cifukwa kucita nthena kukovwira kuti pakati pithu palutilire kuŵa mtende.
9. Cifukwa wuli kulondezga ulongozgi wa pa Ŵaefeso 4:26, 27 nkhwakuzirwa?
9 Tikwenera kumukana Dyabulosi na kuleka kuzomerezga kuti watipweteke mwauzimu. (Yak. 4:7) Mzimu utuŵa ukutovwira kuti tikane Satana. Mwaciyelezgero, tingamukana usange tingaleka kuŵa ŵakali. Paulosi wakalemba kuti: “Para mwatukutwa, muleke kwananga; dazi lileke kunjira uku mucali kutukutwa, ndipo muleke kumupa malo Dyabulosi.” (Efe. 4:26, 27) Usange tingakwiya pa cifukwa ciwemi, lurombo lwa mu mtima lungatovwira kuti ticite vinthu ‘mwaumanyi,’ ndiposo mwakujikora, m’malo mwa kucitiska citima mzimu wa Ciuta. (Zinth. 17:27) Ntheura, tingakwiyanga kwa nyengo yitali yayi cifukwa Satana wanganjilirapo na kutikhuŵilizga kuti ticite cinthu ciheni. (Sal. 37:8, 9) Nthowa yimoza yakukanira Satana nkhumazga mphindano mwaluŵiro, mwa kulondezga ulongozgi wa Yesu.—Mat. 5:23, 24; 18:15-17.
10, 11. Cifukwa wuli tikwenera yayi kwiba ndiposo kucita mwaupusikizgi?
10 Tingibanga yayi nesi kucita mwaupusikizgi. Pakuyowoya za unkhungu Paulosi wakalemba kuti: “Wakwiba waleke kwibaso, kweni wafukafuke, kugwira nchito yiwemi na mawoko ghake, mwakuti waŵe na kanthu kakuti wamupeko uyo wakusoŵerwa.” (Efe. 4:28) Para Mkhristu wiba, ‘wakunangiska zina la Ciuta.’ (Zinth. 30:7-9) Kwiba cifukwa ca ukavu nako nkhwananga. Awo ŵakutemwa Ciuta na ŵazengezgani ŵawo ŵakumanya kuti kwiba nkhwiba, vilije kanthu kuti ŵiba pa cifukwa wuli.—Mrk. 12:28-31.
11 Padera pa kuyowoya vinthu ivyo tikwenera yayi kucita, Paulosi wakayowoyaso ivyo tikwenera kucita. Usange tikwenda mwa mzimu, tilimbikirenge nchito mwakuti tipwelelere mbumba yithu ndiposo kuŵa na “kanthu kakuti tipeko uyo wakusoŵerwa.” (1 Tim. 5:8) Yesu na ŵapositole ŵakaŵikanga ndalama padera, kuti ŵawovwilirenge ŵakusuzgika, kweni Yudasi Isikariyoti wakibangapo. (Yoh. 12:4-6) Wakalongolerathu kuti wakalongozgekanga na mzimu utuŵa yayi. Tose ise tikulongozgeka na mzimu wa Ciuta tikucita “mwakugomezgeka mu vinthu vyose” nga umo Paulosi wakacitiranga. (Heb. 13:18) Kucita nthena kukulongora kuti tikukana kucitiska citima mzimu utuŵa wa Yehova.
Nthowa Zinyakeso
12, 13. (a) Nga umo lemba la Ŵaefeso 4:29 likuyowoyera, nkhayowoyero wuli ako tikwenera kugega? (b) Kasi tikwenera kuyowoya vinthu wuli?
12 Tiyowoyenge vyakwenelera. Paulosi wakati: “Kayowoyero kakuvunda kangafumanga cara mu mulomo winu, kweni kayowoyero kose ako nkhawemi pakuzenga ŵanji mwakuyana na ico cikukhumbikwa pa nyengo iyo, kuti kaŵape ico nchakukhozga awo ŵakupulika.” (Efe. 4:29) Apa napo, Paulosi wakayowoya ivyo tikwenera kuleka kucita, ndiposo ivyo tikwenera kucita. Mwakukhuŵilizgika na mzimu wa Ciuta tiyowoyenge “ako nkhawemi pakuzenga ŵanji mwakuyana na ico cikukhumbikwa pa nyengo iyo, kuti kaŵape ico nchakukhozga awo ŵakupulika.” Kweniso tikwenera kukana kuti “kayowoyero kakuvunda” kafume pa milomo yithu. Lizgu la Cigiriki ilo lili kung’anamulika kuti “kuvunda” likuyowoya za vyakuvunda nga ni vipambi, somba, panji nyama. Umo tikutinkhira vinthu vyakuvunda ndimo tikutinkhiraso kayowoyero ako Yehova wakuti nkhakuvunda.
13 Ivyo tikuyowoya viŵenge vyakukondweska, vyalusungu kweniso “vyakulungika na mcere.” (Kol. 3:8-10; 4:6) Para ŵanthu ŵapulika ivyo tikuyowoya, ŵawonenge kuti tili ŵakupambana na ŵanthu wose. Tiyeni tovwire ŵanji mwa kuyowoya “ico nchakukhozga.” Tiŵe na maghanoghano ghakuyana na gha wamasalmo, uyo wakimba kuti: “Mazgu gha mulomo wane na malanguruko gha mtima ghaŵe gha mapokelereko pamaso pinu, A Yehova, jalawe lane na muwomboli wane.”—Sal. 19:14.
14. Ni vinthu wuli ivyo lemba la Ŵaefeso 4:30, 31 likuti tikwenera kugega?
14 Tikwenera kugega ukali, kutukutwa, kayowoyero kaheni, na uheni wose. Wati wacenjezga Ŵakhristu kuti ŵangacitiskanga citima mzimu wa Ciuta cara, Paulosi wakalemba kuti: “Kuŵinya mtima kose na ukali na kutukutwa na kukolomoka na kayowoyero kaheni, viwuskikeko kwa imwe pamoza na uheni wose.” (Efe. 4:30, 31) Pakuti tose tili ŵambura kufikapo, tikwenera kuyezgayezga kujikora. Tingacitiska citima mzimu wa Ciuta usange ndise ‘ŵakali ndiposo ŵakutukutwa.’ Ndimo vingaŵiraso usange tikusunga cakusingo para ŵanji ŵatibudira, kuŵakwiyira, ndiposo kukana kuphemana nawo. Usange tikusurako ulongozgi wa mu Baibolo, tingamba kucita vinthu ivyo vingatilongozgera ku kwanangira mzimu, ndipo tingasangana na masuzgo.
15. Kasi tikwenera kucitaci para munyithu watibudira?
15 Tikwenera kuŵa ŵalusungu, ŵa mtima wa ciwuravi, ndiposo ŵakugowokerana. Paulosi wakalemba kuti: “Muŵe na lusungu kwa yumoza na munyake, mtima wa ciwuravi, kugowokerana na mtima wose umo Ciuta nayo kwizira mwa Khristu wakagowokera imwe na mtima wose.” (Efe. 4:32) Nanga munyithu wangatinangira wuli, tiyeni timugowokere nga umo Ciuta wakutigowokelera. (Luka 11:4) Tiyelezgere kuti Mkhristu munyithu watiyowoyera ciheni. Tayezga kudumbiskana nayo kuti timazge nkhani iyi. Watiphepiska na mtima wose, ndipo wapempha kuti timugowokere. Padera pa kumugowokera, tikwenera kucitaso cinthu cinyake. Lemba la Leviticus 19:18 likuti: “Ungawerezgeranga nduzga, panji kukhala na kandundu pa ŵana ŵa ŵanthu ŵakwinu, kweni utemwenge mzengezgani wako nga ndi umo ukujitemwera wekha: Ine ndine Yehova.”
Kuŵa Maso Nkhwakukhumbikwa
16. Yowoyani ciyelezgero cakulongora kuti tingakhumbikwira kusintha vinthu vinyake kuti tigege kucitiska citima mzimu wa Ciuta.
16 Nanga ni para tingaŵa kwatekha, tingayezgeka kucita cinthu ico Ciuta wakutinkha. Mwaciyelezgero, mbali munyake wangaŵa kuti wategherezganga sumu ziheni. Pamasinda njuŵi yake yamba kumusuzga cifukwa ca kuzerezga ulongozgi wa mu Baibolo uwo ukusangika mu mabuku gha “muzga wakugomezgeka na wakucenjera.” (Mat. 24:45) Wangalomba na kukumbuka mazgu gha pa Ŵaefeso 4:30. Walekerathu kutegherezga sumu ziheni cifukwa ca kopa kucitiska citima mzimu wa Ciuta. Para wacita nthena Yehova wamutumbikenge. Ntheura, tiyeni tiŵe maso kuti tigege kucitiska citima mzimu wa Ciuta.
17. Nchivici cingacitika usange tingatondeka kuŵa maso?
17 Para tingaŵa maso na kulomba, mbwenu ticitenge yayi vinthu ivyo vingacitiska citima mzimu. Pakuti mzimu utuŵa ukupambika mikhaliro yakuyana na ya Ŵadada ŵithu ŵakucanya, ntheura ungacita citima, ndipo ise tikukhumba yayi kuucitiska citima. (Efe. 4:30) Ŵalembi Ŵaciyuda ŵakananga cifukwa ca kuyowoya kuti Yesu wakacitanga minthondwe mwakugwiliskira nchito nkhongono ya Satana. (Ŵazgani Mariko 3:22-30.) Ŵalwani ŵa Khristu aŵa ‘ŵakayuyura mzimu utuŵa’ ndipo ŵakacita kwananga kwambura cigowokero. Tingazomerezganga yayi kuti ivi viticitikire.
18. Tingamanya wuli kuti tindacite kwananga kwambura cigowokero?
18 Pakuti tikukhumbisiska kuti tigege kucita kwananga kwambura cigowokero, tikwenera kukumbuka ulongozgi wa Paulosi wakukhwaskana na kucitiska citima mzimu. Kweni wuli usange tacita kwananga kukuru? Usange tapera, ndipo ŵalara ŵatovwira, tingaŵa na cigomezgo kuti Ciuta watigowokera ndiposo kuti tindanangire mzimu utuŵa. Ciuta wangatovwira kuti tileke kucitaso cilicose ico cingacitiska citima mzimu wake.
19, 20. (a) Ni vinthu wuli ivyo tikwenera yayi kucita? (b) Kasi tikwenera kuŵikapo mtima kucita vici?
19 Ŵanthu ŵa Ciuta ŵakutemwana, mbamtende, ndiposo ŵakukolerana cifukwa ca mzimu utuŵa. (Sal. 133:1-3) Ntheura, tigege kucitiska citima mzimu utuŵa cifukwa ca kusesa panji kuyowoya vinthu ivyo vingayuyura ŵalara, pakuti ŵakwimikika na mzimu. (Mil. 20:28; Yuda 8) Kweniso tikwenera kucindikana mu mpingo na kukhuŵilizga mtende. Tikwenera yayi kwambiska mphatuko mu mpingo. Paulosi wakalemba kuti: “Nkhumuciskani, ŵabali, kwizira mu zina la Fumu yithu Yesu Khristu kuti mose muyowoyenge mwakuzomerezgana, ndiposo kuti paŵavye kugaŵikana pakati pinu, kweni kuti muŵe ŵakukolerana makoraghene mu maghanoghano ghakuyana na mu kaghanaghaniro kamoza.”—1 Kor. 1:10.
20 Yehova ngwakunozgeka kutovwira kuti tigege kucitiska citima mzimu wake. Tiyeni tilutilire kulomba mzimu utuŵa na kuŵikapo mtima kuti tigege kuucitiska citima. Tiyeni tilutilire ‘kuseŵa ku mzimu,’ ndipo tifwilirepo kupenja nthowa zakuti mzimu utilongozgerenge, sono ndiposo muyirayira.
Kasi Mungazgora Wuli?
• Kasi kucitiska citima mzimu wa Ciuta kukung’anamuraci?
• Kasi munthu wakujipatulira kwa Yehova wangacitiska wuli citima mzimu utuŵa?
• Tingacita wuli kuti tigege kucitiska citima mzimu utuŵa?
[Mafumbo]
[Cithuzithuzi pa peji 30]
Phemanani luŵiro
[Cithuzithuzi pa peji 31]
Kasi ivyo mukuyowoya vikuyana na vipambi vi?