Pokerani Mzimu wa Ciuta, wa Caru Cara
Pokerani Mzimu wa Ciuta, wa Caru Cara
“Tili kupokera mzimu wa caru cara, kweni mzimu uwo ngwakufuma kwa Ciuta, kuti timanye vinthu ivyo tapika na Ciuta mwalusungu.”—1 KOR. 2:12.
1, 2. (a) Kasi Taŵakhristu tikurwa nkhondo wuli? (b) Kasi tidumbiskanenge mafumbo wuli?
TAŴAKHRISTU tikurwa nkhondo. Mulwani withu ngwankhongono comene, ni muryarya, ndipo nchinkhara ca nkhondo. Wali na cilwero cankhongono ico wathereskera naco ŵanandi. Kweni tileke kujiwona kuti tilijirethu nkhongono panji kuti tatondeka kale. (Yes. 41:10) Tili na civikiliro ico nchankhongono comene.
2 Nkhondo yithu njathupi cara, kweni njauzimu. Mulwani withu ni Satana Dyabulosi, ndipo cilwero cake cankhongono ico wakugwiliskira nchito ni “mzimu wa caru.” (1 Kor. 2:12) Mzimu wa Ciuta nchivikiliro cithu cankhongono comene. Kuti tipone pa nkhondo iyi na kulutilira kuŵa ŵankhongono mwauzimu, tikukhumbikwira kulomba mzimu wa Ciuta na kulongora vipambi vyake. (Gal. 5:22, 23) Ipo kasi mzimu wa caru ni vici, ndipo ukathandazgika wuli? Kasi tingamanya wuli usange tikulongozgeka na mzimu wa caru? Ndipo kasi tingasambirako vici kwa Yesu pa nkhani ya kupokera mzimu wa Ciuta ndiposo kukana mzimu wa caru?
Cifukwa Wuli Mzimu wa Caru Wazara Comene?
3. Kasi mzimu wa caru ni vici?
3 Mzimu wa caru ici ukufuma kwa Satana, uyo ni “muwusi wa caru” ndipo ukwimikana na mzimu utuŵa wa Ciuta. (Yoh. 12:31; 14:30; 1 Yoh. 5:19) Mzimu wa caru ni maghanoghano agho ŵanandi ŵakwendera ndipo ukuŵakhuŵilizga kuti ŵacitenge vinthu viheni. Nkhongono iyi yikupangiska ŵanthu kuti ŵalimbanenge na khumbo la Ciuta.
4, 5. Kasi mzimu wa Satana ukamba wuli kuthandazgika?
4 Kasi mzimu wa Satana ukamba wuli kuthandazgika? Pakwamba, Satana wakapusika Eva mu munda wa Edeni. Wakati usange Eva wangajiyimira payekha kwambura Ciuta, vinthu vimwenderenge makora. (Gen. 3:13) Uwu ukaŵa utesi ukuru comene. (Yoh. 8:44) Pamasinda kwizira mu mwanakazi, Satana wakapusika Adamu kuti waleke kupulikira Yehova. Cifukwa ca ivyo Adamu wakasankha, ŵanthu ŵali kuguliskika ku kwananga, lekani ŵakulongozgeka na mzimu wa Satana wambura kupulikira.—Ŵazgani Ŵaefeso 2:1-3.
5 Satana wakapuluskaso ŵangelo ŵanandi awo ŵakazgoka viŵanda. (Uvu. 12:3, 4) Ivi vikacitika pambere ciwowota ca mu nyengo ya Nowa cindacitike. Ŵangelo aŵa ŵakawona kuti nchiwemi kuleka malo ghawo gha kucanya na kuzakacita vinthu vyamuziro pa caru capasi. (Yuda 6) Pamoza na viŵanda ivi, Satana “wakupuluska caru cose.” (Uvu. 12:9) Cacitima nchakuti ŵanthu ŵanandi ŵakumanya yayi kuti ŵakulongozgeka na mzimu wa uciŵanda.—2 Kor. 4:4.
Kasi Mukulongozgeka na Mzimu wa Caru?
6. Kasi mzimu wa caru ungatilongozga pekha para tacita vici?
6 Ŵanthu ŵanandi ŵakuzimanya yayi njomba za Satana, kweni Taŵakhristu ŵaunenesko tikuzimanya. (2 Kor. 2:11) Nakuti mzimu wa caru ungatilongozga pekha para tingawuzomerezga. Tiyeni tisande mafumbo ghanayi agho ghatovwirenge kumanya usange tikulongozgeka na mzimu wa Ciuta panji wa caru.
7. Kasi ni nthowa wuli yinyake iyo Satana wakuyezga kutipatuskira kwa Yehova?
7 Kasi vyakusanguluska ivyo nkhusankha vikuvumburaci za ine? (Ŵazgani Yakobe 3:14-18.) Satana wakuyezga kutipatuska kwa Ciuta mwakutipangiska kuti titemwenge nkhaza. Wakumanya kuti Yehova wakutinkha waliyose uyo wakutemwa nkhaza. (Sal. 11:5) Ntheura, wakuyezga kutisanguluska na vinthu vyakukondweska makhumbiro ghithu gha thupi ivyo vikukhuŵilizga uzaghali na nkhaza, ndipo vinthu ivi vikusangika mu mabuku, mafilimu, sumu, na mavidiyo. Satana wakukondwa usange ndise ŵamutimba kuŵiri, para tikutemwa viwemi na viheni ivyo wakukhuŵilizga.—Sal. 97:10.
8, 9. Kasi tikwenera kujifumba mafumbo wuli pa nkhani ya vyakusanguluska?
8 Kweni mzimu wa Ciuta ukovwira awo ŵaupokelera kuti ŵaŵe ŵatuŵa, ŵamtende, ndiposo ŵakuzura na lusungu. Tingacita makora kujifumba kuti, ‘Kasi vyakusanguluska ivyo nkhusankha vikunikhuŵilizga kuŵa na nkharo yiwemi?’ Vinjeru vyakufuma kucanya “vikupusikizga cara.” Awo ŵakulongozgeka na mzimu wa Ciuta para ŵakupharazga za utuŵa na mtende uku kuudesi ŵakuwonelera vinthu vya nkhaza na uzaghali ndikuti ŵakucita upusikizgi.
9 Yehova wakukhumba kuti tisopenge iyo pera. Nga umo wakacitira na Yesu, Satana wangakondwa nanga tingamusopa kamoza pera. (Luka 4:7, 8) Tikwenera kujifumba kuti: ‘Kasi vyakusanguluska ivyo nkhusankha vikulongora kuti nkhusopa Ciuta pera? Kasi ivyo nkhusankha vikupangiska kuti ciniŵire cinonono panji cipusu kukana mzimu wa caru? Kasi nkhwenera kusintha vyakusanguluska ivyo nkhusankha?’
10, 11. (a) Pa nkhani ya vinthu vyakuthupi, kasi mzimu wa caru ukukhuŵilizga vici? (b) Kasi Mazgu gha Ciuta ghakuticiska vici pa nkhani iyi?
10 Kasi nkhuviwona wuli vinthu vyakuthupi? (Ŵazgani Luka 18:24-30.) Mzimu wa caru ukukhuŵilizga “makhumbiro gha maso,” agho ghakucitiska ŵanthu kuŵa ŵaryezi na kutemwa vinthu vyakuthupi. (1 Yoh. 2:16) Ukupangiska ŵanandi kuti ŵakhumbisiskenge kuŵa ŵasambazi. (1 Tim. 6:9, 10) Mzimu uwu ungatipusika kuti para tajiwunjikira vinthu vyakuthupi mbwenu tiŵenge ŵakuvikilirika. (Zinth. 18:11) Satana watithereskenge usange tikutemwa comene ndalama kuluska Ciuta. Tikwenera kujifumba kuti, ‘Kasi nkhuŵika mtima comene pakupenja vinthu vyakuthupi?’
11 Mwakupambana na mzimu wa caru, Mazgu gha Ciuta ghakuticiska kuti tiwonenge ndalama mwakwenelera, tilimbikirenge kugwira nchito mwakuti tisange vyakukhumbikwa pa umoyo withu na wa mbumba yithu. (1 Tim. 5:8) Mzimu utuŵa ukovwira awo ŵakuwupokera kuti ŵaŵenge ŵakupa nga umo Yehova wakucitira. Ŵakumanyikwa na mzimu wakupa kuti wakupokera cara. Ŵakuzirwiska comene ŵanthu kuluska vinthu, ndipo ŵakusangwa kuŵagaŵirako ivyo ŵali navyo para ŵangafiska. (Zinth. 3:27, 28) Ndipo ŵakuzomerezga yayi kuti kupenja ndalama ndiko kuŵe panthazi m’malo mwa kuteŵetera Ciuta.
12, 13. Mwakupambana na mzimu wa caru, kasi mzimu wa Ciuta ungatovwira wuli?
12 Kasi nkharo yane yikulongora kuti nkhulongozgeka na mzimu wuli? (Ŵazgani Ŵakolose 3:8-10, 13.) Mzimu wa caru ukukhuŵilizga milimo ya thupi. (Gal. 5:19-21) Para vinthu vikwenda makora tingamanya makora yayi mzimu uwo ukutilongozga, kweni para Mkhristu munyithu watikwiyiska, kutibudira, panji kutisulako ndipo tingamanya mzimu uwo ukutilongozga. Kweniso mu nyumba zithu, tingalongora usange tikulongozgeka na mzimu wa Ciuta panji wa caru. Nchakuzirwa kuti tijisandenge. Jifumbani kuti, ‘Mu myezi yinkhondi na umoza iyo yajumpha, kasi mikhaliro yane yakolerananga na ya Khristu panji nangwambiraso nkharo zinyake ziheni?’
13 Mzimu wa Ciuta ungatovwira kuti tivure “wunthu wakale na milimo yake” na kuvwara “wunthu uphya.” Kucita nthena kutovwirenge kuti tiŵe ŵacitemwa kweniso ŵalusungu comene. Tiŵenge ŵakunozgeka kugowokera ŵanyithu na mtima wose para ŵatibudira. Para tawona kuti ŵanji ŵaticitira vinthu mwambura urunji tizamuŵinya mtima yayi nesi kulongora “ukali na kutukutwa na kukolomoka na kayowoyero kaheni.” M’malo mwake, tifwilirengepo kuŵa na “mtima wa ciwuravi.”—Efe. 4:31, 32.
14. Kasi ŵanandi ŵakughawona wuli Mazgu gha Ciuta?
14 Kasi nkhuzirwiska na kutemwa fundo za mu Baibolo? (Ŵazgani Zintharika 3:5, 6.) Mzimu wa caru ukususkana na Mazgu gha Ciuta. Awo ŵakulongozgeka na mzimu wa caru ŵakusulako fundo za mu Baibolo izo ŵakuwona kuti zikukolerana yayi na ivyo ŵakukhumba, mwakuti ŵakusankha kulondezga maluso na vinjeru vya ŵanthu. (2 Tim. 4:3, 4) Ŵanji ŵakukanirathu Mazgu gha Ciuta. Ŵakususka kuti Baibolo ndakuzirwa ndiposo kuti ni mazgu gha Ciuta, ŵakujiwona kuti iwo ndiwo mbavinjeru. Ŵakuyuyura fundo za mu Baibolo zakukhwaskana na uzaghali, kugonana kwa ŵanalume panji ŵanakazi pera, ndiposo kupatana. Ŵakusambizga kuti “uheni ndiwo uwemi na uwemi uheni.” (Yes. 5:20) Kasi nase tikulongozgeka na mzimu uwu? Kasi tikwendera vinjeru vya ŵanthu, kweniso maghanoghano ghithu para takumana na masuzgo? Panji kasi tikuyezgayezga kulondezga ulongozgi wa mu Baibolo?
15. M’malo mwa kuthemba vinjeru vithu, kasi tikwenera kucitaci?
15 Mzimu wa Ciuta ukutovwira kuti tizirwiskenge Baibolo. Nga ngwamasalmo, nase tikuwona mazgu gha Ciuta kuŵa nyali ya ku malundi ghithu na muliko wa mu nthowa yithu. (Sal. 119:105) M’malo mwa kuthemba vinjeru vithu, tikugomezga Mazgu gha Ciuta kuti ghatovwire kupambaniska pakati pa cakwenelera na cakubudika. Tikuzirwiska Baibolo ndipo tikutemwa malango gha Ciuta.—Sal. 119:97.
Sambirani kwa Yesu
16. Kasi tikukhumbikwira vici kuti tiŵe na “maghanoghano gha Khristu”?
16 Kuti tipokere mzimu wa Ciuta, tikwenera kuŵa na “maghanoghano gha Khristu.” (1 Kor. 2:16) Kuti tiŵe “na kaghanaghaniro kakuyana na ako Khristu Yesu wakaŵa nako,” tikukhumbikwira kumanya umo wakaghanaghaniranga ndiposo umo wakacitiranga vinthu. (Rom. 15:5; 1 Pet. 2:21) Wonani nthowa zinyake izo tingacitira nthena.
17, 18. (a) Kasi tikusambirako vici kwa Yesu pa nkhani ya lurombo? (b) Cifukwa wuli tikwenera ‘kulutilira kulomba’?
17 Lombani mzimu wa Ciuta. Apo Yesu wakaŵa pafupi kweruzgika, wakalomba mzimu wa Ciuta kuti umovwire. (Luka 22:40, 41) Nase tikwenera kulomba Ciuta kuti watipe mzimu wake. Yehova wakupeleka mzimu wake kwawanangwa ku awo ŵakumulomba na cigomezgo. (Luka 11:13) Yesu wakati: “Lutilirani kulomba, ndipo kupikenge kwa imwe; lutilirani kupenja, ndipo musangenge; lutilirani kukhung’uska, ndipo kumujulikiraninge. Pakuti waliyose uyo wakulomba wakupokera, ndipo waliyose uyo wakupenja wakusanga, ndipo waliyose uyo wakukhung’uska kumujulikirenge.”—Mat. 7:7, 8.
18 Para mukulomba mzimu wa Yehova kuti umovwirani, mungalekanga luŵiro yayi kulomba. Mukwenera kulomba kanandi waka ndiposo kuŵa na nyengo yakukwana ya kulombera. Nyengo zinyake pambere Yehova wandazgore malurombo, wakukhumba kuti awo ŵakumulomba, ŵalongore kuti ŵali na cipulikano ndiposo kuti ico ŵakulomba ŵakucikhumbisiska nadi. *
19. Kasi nyengo zose Yesu wakacitanga vici, ndipo cifukwa wuli tikwenera kumuyezga?
19 Pulikirani Yehova na mtima wose. Nyengo zose Yesu wakacitanga vinthu vyakukondweska Ŵawiske. Kweni nyengo yinyake wakaŵa na maghanoghano ghakupambanako na gha Ŵawiske. Ndipouli, na cigomezgo cose wakaphalira Ŵawiske kuti: “Khumbo linu licitike, lane cara.” (Luka 22:42) Jifumbani kuti, ‘Kasi nkhupulikira Ciuta nanga ni apo cingaŵa cakusuzga kucita nthena?’ Kuti tizakasange umoyo, kupulikira Ciuta nkhwakuzirwa comene. Tikwenera kumupulikira mu vyose cifukwa ndiyo wali kutilenga ndipo ndiyo wakutisunga. (Sal. 95:6, 7) Palije ico cikunjira m’malo mwa kupulikira. Tingamukondweska yayi Ciuta usange tikuleka kumupulikira.
20. Kasi umoyo wa Yesu ukagona pa vici, ndipo tingamulondezga wuli?
20 Limanyani makora Baibolo. Apo wakalimbananga na viyezgo vyakudunjika vyakufuma kwa Satana, Yesu wakayowoyanga fundo za mu Malemba. (Luka 4:1-13) Pakuzgora ŵalongozgi ŵa cisopa awo ŵakamususkanga, Yesu wakagwiliskiranga nchito Mazgu gha Ciuta m’malo mwa kuyowoya maghanoghano ghake. (Mat. 15:3-6) Umoyo wose wa Yesu ukagona pakumanya na kufiska dango la Ciuta. (Mat. 5:17) Nase tikwenera kulutilira kusambira Mazgu gha Ciuta agho ghakukhozga cipulikano. (Fil. 4:8, 9) Taŵanji cingatiŵira cakusuzga kusanga nyengo yakucitira sambiro la taŵene panji la mbumba. M’malo mwa kusanga nyengo, tikwenera kujigulira nyengo.—Efe. 5:15-17.
21. Kasi pali ndondomeko wuli iyo yingatovwira kuti timanyenge makora Mazgu gha Ciuta na kughalondezga?
21 “Muzga wakugomezgeka na wakucenjera” watovwira kuti tiŵenge na nyengo ya kucitira sambiro la taŵene na la mbumba, mwa kutiphalira kuti tiŵenge na Nyengo Yakusopera ya Mbumba sabata yiliyose. (Mat. 24:45) Kasi mukugwiliskira nchito mwamahara nyengo iyi? Para mukusambira mungadumbiskana ivyo Yesu wakasambizga, mwakuti muŵe na kaghanaghaniro ka Khristu. Mungagwiliskira nchito Watch Tower Publications Index kuti musange nkhani iyo mukukhumba kusambira. Mwaciyelezgero, kwambira mu 2008 mpaka 2010, mu Gongwe la Mulinda lakugaŵira mukaŵanga nkhani zakupambanapambana pa mutu wakuti “Ivyo Tikusambirako kwa Yesu.” Mungasambira nkhani izi. Kwambira mu 2006, mu Galamukani! mukaŵanga cigaŵa cakuti “Kodi Mungayankhe Bwanji”? Cigaŵa ici cilato cake nchakuti timanye vinandi kufuma mu Mazgu gha Ciuta. Kasi mwalekeraci kusambirapo nkhani za mu vigaŵa ivi pa Nyengo Yakusopera ya Mbumba?
Tingatonda Caru
22, 23. Kasi tikwenera kucitaci kuti titonde caru?
22 Kuti tilongozgeke na mzimu wa Ciuta, tikwenera kukana mzimu wa caru. Nchipusu yayi kukana mzimu wa caru. Pakukhumbikwira kufwilirapo panji kuti kukoleska nkhondo. (Yuda 3) Kweni tingatonda. Yesu wakaphalira ŵasambiri ŵake kuti: “Mu caru muli na suzgo, kweni khwimani mtima! Ine natonda caru.”—Yoh. 16:33.
23 Nase tingatonda caru usange tikukana mzimu wake na kucita vyose ivyo tingafiska kuti tipokere mzimu wa Ciuta. Nakuti “usange Ciuta wali kwa ise, ni njani wimikanenge nase?” (Rom. 8:31) Para tapokera mzimu wa Ciuta na kulondezga ulongozgi wa mu Baibolo, tiŵenge ŵakukhorwa, ŵamtende, ŵakukondwa, ndiposo tiŵenge na cigomezgo ca umoyo wamuyirayira mu caru ciphya ico cili pafupi kwiza.
[Mazgu ghamusi]
^ ndime 18 Kuti mumanye vinandi, wonani peji 170-173 mu buku la Kasi Baibolo Likusambizgaci Comenecomene?
Kasi Mukukumbuka?
• Cifukwa wuli mzimu wa caru wazara comene?
• Ni mafumbo wuli ghanayi agho tikwenera kujifumba?
• Ni vinthu wuli vitatu ivyo tikusambira kwa Yesu pa nkhani ya kupokera mzimu wa Ciuta?
[Mafumbo]
[Cithuzithuzi pa peji 8]
Kasi ŵangelo ŵanji ŵakazgoka wuli viŵanda?
[Cithuzithuzi pa peji 10]
Satana wakupuluska ŵanthu na mzimu wa caru, kweni ise tingaŵambara mzimu uwu
