Kasi Mukukumbuka?

Kasi muli kuŵazgapo magazini gha Gongwe la Mulinda ghasonosono apa? Yezgani kuzgora mafumbo agha:

• Cifukwa wuli tingagomezga kuti munda wa Edeni ukaŵako nadi?

Baibolo likulongora kuti ukaŵako nadi, nakuti likulongora na uko ukaŵa. Milonga yiŵiri iyo yikuzunulika yicalipo mpaka sono. Nkhani iyi yikupambana na umo vidokoni vikulongosolera. Yesu, uyo ni Kaboni wakugomezgeka comene, wakati Adamu na Eva ŵakaŵako nadi.—1/1-CN, peji 5-6, 9.

• Kasi Ciuta wakamanyirathu kuti Adamu na Eva ŵanangenge?

Yayi. Yehova wakaŵalenga na wanangwa wakusankha kupulikira panji yayi. Mbunenesko kuti Ciuta wakumanyirathu vyamunthazi, kweni wakucita kusankha cifukwa palije ico cingatondeska khumbo lake.—1/1-CN, peji 13-15.

• Kasi Ŵakhristu ŵaunenesko ŵakugwiliskira nchito zina la Ciuta nga nchinthumwa?

Ŵanthu ŵanyake ŵakuwona kuti vinthu ivyo pali zina la Ciuta vingaŵavikilira mwamunthondwe, kweni ŵanthu ŵa Ciuta ŵakumanya kuti zina lake nchinthumwa yayi. Iwo ŵakugomezga mwa Yehova na kukhumba kucita khumbo lake, ntheura ŵakusanga ciphokwero mu zina lake. (Zef. 3:12, 13)—1/15, peji 5-6.

• Kasi mbanjani mu Israyeli awo ŵakasanganga candulo na dango la kuvulura?

Wose ŵakasanganga nalo candulo. Likawovwiranga ŵakavu awo ŵakavuluranga kuti ŵalimbikirenge nchito. Ŵanji likaŵawovwiranga kuti ŵaŵenge na mtima wakupa na kuthemba vitumbiko vya Ciuta.—2/1-CN, peji 15.

• Cifukwa wuli Yehova wakakana Themba Sauli?

Sauli wakeneranga kulindilira nchimi ya Ciuta kuti yizakapeleke sembe, kweni themba ili likapulikira yayi, likapeleka lekha sembe. Pamasinda likapulikiraso yayi languro lakuti liparanye ŵalwani wose.—2/15, peji 22-23.

• Kasi tingalongora wuli kuti tikutinkha ucikanamalango?

Para tikukana uloŵevu, kucita vyamizimu, ndiposo para tikupulikira cenjezgo la Yesu lakukhwaskana na uzaghali. Mwaciyelezgero, tiŵambarenge kuwonelera vinthu vyamuziro na vyawakawaka ivyo vingawuska khumbo la kugonana. (Mat. 5:27, 28) Kweniso ticezgenge yayi na ŵanthu ŵakusezgeka.—2/15, peji 29-32.

• Kasi cakukondweska nchivici cakukhwaskana na mizinga ya njuci yakale iyo ŵasayansi ŵasanga mu Israyeli?

Ŵasayansi ŵasanga mizinga yakujumpha 30 ya njuci, iyo ŵanji ŵakuti ŵakapakurangamo uci unandi pa cilimika. Ici cikulongora kuti kale mu caru ici ŵakaŵetanga njuci mwakukolerana na mazgu gha Ciuta ghakuti cikaŵa “caru cakuzara na sulu na uci.” (Ex. 3:8)—3/1-CN, peji 15.

• Kasi ni mwawuli umo Yeremiya wakaŵira nga ni “khuni lakupandika mu mphepete mwa maji, ilo likutambalira misisi yake mu mlonga”? (Yer. 17:7, 8)

Wakalekapo yayi kupambika cipambi; nesi kugongoweskeka na ŵakugoska. M’malo mwake, wakademelera kwa uyo wakusungilira maji ghaumoyo, mwa kupulikira ivyo Ciuta wakamuphalira.—3/15, peji 14.

• Kasi Yesu wakang’anamurangaci apo wakaphalira Marita kuti vinthu vicoko waka vikukhumbikwa, panji cimoza pera? (Luka 10:41, 42)

Wakang’anamuranga kuti Marita wakutemwa vinthu vyakuthupi yayi apo wakaphikanga vyakurya vyakupambanapambana; nesi kuyuyura mulimo wake. M’malo mwake, wakayowoyanga fundo yakuŵika panthazi vinthu vyakuzirwa comene. Cifukwa ca kutangwanika na kuphika, Marita ŵakataya mwaŵi wapadera wakuti wakhozge cipulikano cake.—4/1-CN, peji 12-13.

• Kasi ni vinthu wuli vinyake ivyo vikabudika pakweruzga Yesu?

Khoti likapulikako cilicose yayi kwa Yesu. Ŵakapenjerezga ŵakaboni ŵatesi. Khoti likakhala pasi usiku kuti lipulike mulandu uwu. Ŵakamba kupulika mulandu wake na kumweruzga pa zuŵa limoza pera.—4/1-CN, peji 20.