Mungacita Wuli Kuti Mulutilire Kugomezgeka mu Caru Cambura Kugomezgeka?

ŴANTHU ŵanandi mbambura kugomezgeka. Ŵakuteta, ŵakuduliska vinthu, ŵakwiba, ŵakuwezga yayi ngongoli, ndipo ŵakujihaya cifukwa ca kucita bizinesi mwauryarya. Pakuti tikukhala na ŵanthu ŵa nthena, kanandi tikuyezgeka kuti tileke kuŵa ŵakugomezgeka. Kasi tingacita wuli kuti tilutilire kuŵa ŵakugomezgeka. Tiyeni tiwone fundo zitatu izo zingatovwira. Kopa Yehova, njuŵi yiwemi, na kukhorwa.

Kopa Yehova Mwakwenelera

Nchimi Yesaya yikati: “Yehova ndiye mweruzgi withu, ndiye wakutiwusa, Yehova ndiye themba lithu.” (Yes. 33:22) Para tikumanya mazaza gha Yehova, timopenge. Ndipo ici citovwirenge kuti tilutilire kuŵa ŵakugomezgeka. Lemba la Zintharika 16:6 likuti: “Na kumopa Yehova munthu wakuwukako ku uheni.” Wofi uwu ngwakwenelera, ndipo ukutovwira kuti tileke kucita vinthu ivyo vingakwiyiska Ŵadada ŵithu ŵa kucanya awo nyengo zose ŵakutikhumbira viwemi.—1 Pet. 3:12.

Ivyo wakacita Ricardo na muwoli wake Fernanda, vikulongora uwemi wa kuŵa na wofi wakwenelera. Ŵakatora ndalama ku banki zakukwana madola 700 gha U.S. * Fernanda wakapoka waka ndalama izi na kuŵika mu cikwama kwambura kupenda. Ŵakati ŵalipira mabilu ghanyake, ŵakazizwa kuwona kuti ndalama izo ŵatenge ŵatora ku banki zose zicali mu cikwama. Iwo ŵakati: “Uyo watipanga ndalama izi ku banki wakwenera kuti wangutipa zinandi.” Pakwamba ŵakakhumbanga kuti ŵasunge waka ndalama izi cifukwa ŵakaŵa na mabilu ghanyake ghanandi ghambura kulipira. Ricardo wakati: “Tikalomba kwa Yehova kuti watipe nkhongono kuti tikawezge ndalama izi. Tikawezga ndalama izi cifukwa ca kukhumba kukondweska Yehova nga umo lemba la Zintharika 27:11 likuyowoyera.”

Njuŵi Yakusambizgika Baibolo

Tingaŵa na njuŵi yamoyo para tikusambira Baibolo na kuyezgayezga kulondezga ivyo tikusambira. Ntheura, ‘mazgu gha Ciuta agho ngamoyo na ghankhongono’ ghanjirenge mu maghanoghano na mu mitima yithu. Ghaticiskenge kuti ticite “mwakugomezgeka mu vinthu vyose.”—Heb. 4:12; 13:18.

Wonani ivyo vikacitikira João. Wakaŵa na ngongoli yikuru yakukwana madola 5,000 gha U.S. Wakasamira ku tawuni yinyake pambere wandawezge ngongoli iyi . Pakati pajumpha vilimika vinkhondi na vitatu, João wakasambira unenesko ndipo njuŵi yake yikamuciska kuti wakakumane na mweneko wa ndalama kuti wawezge ngongoli iyi. Pakuti João wakasanganga ndalama zicoko waka pa mwezi ndipo wakaŵa na muwoli ndiposo ŵana ŵanayi, ntheura uyo wakakongorako wakamuzomerezga kuti mwezi uliwose wapelekengeko pacokopacoko.

Mukhorwenge

Mpositole Paulosi wakati: “Kusopa Ciuta mwakujipeleka uku pamoza na kukhorwa, ni nthowa yakusangira candulo cikuru. . . . Pakuŵa na vyakurya ndiposo vyakuvwara na nyumba, tiŵenge ŵakukhorwa na vinthu ivi.” (1 Tim. 6:6-8) Kupulikira ulongozgi wavinjeru uwu kutovwirenge kuti tileke kuwira mu uryezi, ndiposo kucita mabizinesi ghakukayikiska  panji ghanjomba kuti tisambazge luŵiro. (Zinth. 28:20) Kulondezga ulongozgi wa Paulosi kutovwirengeso kuti tiŵikenge Ufumu wa Ciuta pakwamba, na kugomezga kuti tipikenge vinthu vyakukhumbikwa pa umoyo.—Mat. 6:25-34.

Ndipouli, cifukwa ca “nkhongono yakupusika ya usambazi,” nase tingawira mu uryezi ndiposo udokezi. (Mat. 13:22) Kumbukani ivyo Akani wakacita. Nayo wakaŵapo apo Ŵaisrayeli ŵakambukanga Mlonga wa Yorodani mwamunthondwe. Ndipouli, cifukwa ca uryezi, wakiba siliva, golide, na malaya ghawemi pa ivyo vikaskoyeka mu msumba wa Yeriko. Ivyo wakacita vikapangiska kuti wataye umoyo wake. (Josh. 7:1, 20-26) Lekani Yesu wakacenjezga kuti: “Muŵenge maso ndipo cenjerani na mtundu uliwose wa udokezi.”—Luka 12:15.

Muŵe Ŵakugomezgeka pa Nchito

Sono tiyeni tiwone vyakucitika vinyake ivyo vingatitondeska kuŵa ŵakugomezgeka mu vinthu vyose. Kugomezgeka pa nchito kukusazgapo kuleka ‘kwiba,’ nanga nipara ŵanandi ŵakucita nthena. (Tito 2:9, 10) Jurandir, uyo wakugwira nchito mu ofesi yinyake ya boma, wakatetanga yayi para wakupeleka lipoti la ndalama izo wendera. Kweni ŵanyake ŵakazunuranga ndalama zinandi kuluska izo ŵagwiliskira nchito. Ŵakacitanga nthena cifukwa cakuti mulaŵiliri wawo wakawonanga kuti ni suzgo yayi. Nakuti mulaŵiliri uyu wakamukalipira Jurandir cifukwa ca kugomezgeka, ndipo wakaleka kumutuma ku malo ghanyake kuti wakagwirenge nchito. Ndipouli, pa ofesi iyi pakiza awo ŵakupenda umo ndalama zikugwilira nchito ndipo Jurandir wakawongeka comene cifukwa ca kugomezgeka kwake. Pamasinda wakakwezgeka pa nchito.

André wakagwiranga nchito mu sitoro, ndipo bwana wake wakamuphalira kuti wasazgirengeko mtengo pakuguliska. Mbali withu wakalomba kwa Yehova kuti wamovwire kuskepelera ku fundo za mu Baibolo. (Sal. 145:18-20) Wakamulongosolera bwana wake cifukwa ico wakatondekera kupulikira ivyo wakaphalirika, kweni vinthu vikasintha yayi. Ntheura, André wakaleka nchito iyi nangauli yikaŵa na malipiro ghawemi. Kweni pakati pajumpha cilimika cimoza, bwana wake wakamucema kuti wambeso nchito, ndipo wakamusimikizgira kuti wali kuleka kusazgirako mtengo pakuguliska. André wakakwezgeka pa nchito.

Muwezgenge Ngongoli

Mpositole Paulosi wakaciska Ŵakhristu kuti: “Mwaŵanthu muleke kuŵa na ngongoli ya kanthu nanga nkhamoza kwa waliyose.”  (Rom. 13:8) Tingatondeka kuwezga ngongoli cifukwa ca kughanaghana kuti uyo watikongozga wakusanga kale makora, ndipo wangadandawura yayi nanga tileke kuwezga. Kweni, Baibolo likuti: “Muheni wakubwereka ndipo kuti wakuwezga cara.”—Sal. 37:21.

Kweni wuli usange vinthu vyamabuci vyatitondeska kuwezga ngongoli? (Muph. 9:11) Francisco wakabwereka ndalama zakukwana madola 7,000 gha U.S. kwa Alfredo kuti wawezge ngongoli iyo wakaŵa nayo. Kweni cifukwa cakuti bizinesi yake yikenda makora yayi, Francisco wakatondeka kuwezga pa deti ilo ŵakapangana. Francisco wakaluta kwa Alfredo kuti ŵakadumbiskane, ndipo Alfredo wakamuzomerezga kuti wapelekengeko pacokopacoko.

Lekani Kupeleka Cithuzithuzi Cautesi

Kumbukani nkhani ya Hananiya na Safira. Ŵakati ŵaguliska munda, ŵakabisako ndalama zinyake na kuphalira ŵapositole kuti ŵiza nazo zose. Ŵakakhumbanga kumanyikwa kuti mbakupa uku ŵakaŵa ŵapusikizgi. Kweni mpositole Petrosi mwakovwirika na mzimu utuŵa, wakavumbura upusikizgi wawo, ndipo Yehova wakaŵakoma.—Mil. 5:1-11.

Mwakupambanako na Hananiya na Safira, awo ŵakalembanga Baibolo ŵakayowoyanga unenesko ndipo ŵakaŵa ŵakugomezgeka. Mozesi wakabisa yayi kuti wakakalipa, ivyo vikacitiska kuti waleke kunjira mu Caru ca Layizgano. (Maŵa. 20:7-13) Yona nayo wakabisa yayi ivyo wakacita pambere wandapharazge ku Ŵaninevi ndiposo ivyo wakacita pamasinda. M’malo mwake, wakalemba vyose ivyo wakacita.—Yona 1:1-3; 4:1-3.

Kuyowoya unenesko kukukhumba cikanga, nanga ni para vinthu vinyake vimwenderaninge makora yayi. Wonani ivyo vikacitikira Nathalia muwukirano wa vilimika 14. Apo wakawelerangamo mayeso agho wakalemba, wakawona kuti zgoro linyake ilo asambizgi ŵake ŵakaconga likaŵa lautesi. Nangauli wakamanya kuti magiredi ghake ghakhirenge, Nathalia wakaŵaphalira asambizgi. Pamasinda wakati: “Nyengo zose ŵapapi ŵane ŵakunisambizga kuti nkhwenera kuŵa wakugomezgeka mwakuti nikondweske Yehova. Nilekenge kuŵaphalira asambizgi, njuŵi yikatenge yinisuzgenge.” Asambizgi ŵakamuwonga Nathalia cifukwa ca kugomezgeka.

Kugomezgeka Kukucindika Yehova

Giselle, msungwana wa vilimika 17, wakasora kacikwama ako mukaŵa vikalata vinyake ndiposo ndalama zakukwana madola 35 gha U.S. Wakaphalira ŵalara ŵa pa sukulu kuti wakukhumba kuwezga kacikwama aka kwa mweneko. Mwezi ukati wajumphapo, waciŵiri ku mulara wa pa sukulu, wakaŵazga kalata mu kilasi yakulumba Giselle cifukwa ca kugomezgeka ndipo wakawongaso mbumba yakwake cifukwa ca kumusambizga makora. ‘Milimo yake yiwemi’ yikapeleka ucindami kwa Yehova.—Mat. 5:14-16.

Citatata nchakukhumbikwa kuti tiŵe ŵakugomezgeka nangauli tikukhala na ŵanthu awo ‘ŵakujitemwa, ŵakutemwa ndalama, ŵakujituntha, ŵakujikuzga, ŵambura kugomezgeka.’ (2 Tim. 3:2) Ndipouli, kopa Yehova mwakwenelera, njuŵi yakusambizgika Baibolo, ndiposo kukhorwa vitovwirenge kuti tilutilire kuŵa ŵakugomezgeka mu caru cambura kugomezgeka ici. Tikuŵaso paubwezi wakukhora na Yehova, uyo ‘ni murunji ndipo wakutemwa vyaurunji.’—Sal. 11:7.

[Mazgu ghamusi]

[Vithuzithuzi pa peji 7]

Kopa Yehova mwakwenelera kukovwira kuti tilutilire kugomezgeka

[Cithuzithuzi pa peji 8]

Yehova wakucindikika cifukwa ca kugomezgeka kwithu