Mafumbo Ghakufumira ku Ŵaŵazgi

Kasi ningacita wuli para nili na fumbo pa fundo yinyake iyo naŵazga mu Baibolo panji para nkhupenja ulongozgi pa suzgo ilo nili nalo?

Lemba la Zintharika 2:1-5 likuticiska kuti tilutilire kupenja umanyi na mahara nga umo tikupenjera ‘usambazi wakubisika.’ Fundo iyi yikung’anamura kuti tikwenera kufwilirapo kupenja mazgoro gha mafumbo agho tili nagho na kusanga nthowa ya umo tingacitira na masuzgo ghithu. Kasi tingacita wuli?

Buku la Sangani Candulo na Sukulu ya Uteŵeti wa Ciuta, pa peji 33 mpaka 38 likulongosora “Umo Tingacitira Kafukufuku” mwa kugwiliskira nchito mabuku agho “muzga wakugomezgeka na wakucenjera” wakutipa. (Mat. 24:45) Peji 36 likutiphalira kuti Watch Tower Publications Index yili na vilongolero vya mitu ya nkhani na vilongolero vya malemba. Ici cikovwira kuti musange nkhani mwa kupenja waka mazgu panji vesi la mu Baibolo. Kweniso tingawona Cilongolero ca Nkhani za mu Gongwe la Mulinda lakusambira pa mpingo la Disembala la cilimika cilicose. Lekani kucimbilira para mukupenja mazgoro panji ulongozgi uwo mukukhumba. Kumbukani kuti mukupenja ‘usambazi wakubisika,’ uwo kuti muwusange pakukhumbikwira nyengo na citatata.

Kweni pali nkhani zinyake na malemba ghanyake agho mabuku ghithu ghandayowoyepo mwakudunjika. Nanga ghangaŵa malemba agho ghali kulongosoreka mu mabuku ghithu kuti ghangazgora fumbo lililose yayi ilo mungaŵa nalo. Kweniso tikuŵa na mafumbo pa nkhani zinyake cifukwa cakuti Baibolo lindalongosore kalikose kakukhwaskana na nkhani izo. Ntheura, nchipusu yayi kusanga zgoro mwaluŵiro pa fumbo lililose ilo lingaŵapo. Para vili nthena, nchiwemi yayi kuyowoya waka maghanoghano yithu, nesi kupindana pa “mafumbo ghawaka m’malo mwa kupeleka vinthu vya Ciuta vyakukhozga cipulikano.” (1 Tim. 1:4; 2 Tim. 2:23; Tito 3:9) Ofesi ya munthavi panji ofesi yithu yikuru ya pa caru cose, yingafiska yayi kusanda na kuzgora mafumbo ghose agho ghandalongosorekepo mu mabuku ghithu. Kweni tikukhorwa kuti Baibolo lili na ulongozgi wakukwana pa umoyo withu. Ndipo vinthu ivyo tindavipulikiske vikutipa mwaŵi wakuti tilongore usange tili na cipulikano cakukhora mwa Ciuta kweniso mu Mazgu ghake.—Wonani peji 185 mpaka 187 mu buku la Sendelerani kwa Yehova.

Kasi mukwenera kucitaci para mwatondeka kusanga ulongozgi panji nthowa yakumazgira suzgo linu pamasinda pakuti mwayezga kupenjerezga? Fwatukani kufumba ku Ŵakhristu ŵanyinu, comenecomene ŵalara. Ŵalara mu mpingo ŵakumanya vinandiko vyakukhwaskana na Baibolo, ndipo ŵateŵeterapo Yehova kwa vilimika vinandi. Ŵangamovwirani makora pa suzgo linu, cifukwa ŵakumumanyani ndipo ŵali namwe pafupi nakuti ŵakumanyaso umoyo winu. Mungaluwanga yayi kulomba kwa Yehova na kumuphalira suzgo linu kweniso kumupempha kuti wamulongozgani na mzimu wake utuŵa, “pakuti Yehova wakupa vinjeru . . . na umanyi.”—Zinth. 2:6; Luka 11:13.