Naŵa Wakukondwa Comene Pakuteŵetera Yehova

Yikayowoyeka na Fred Rusk

Apo nkhaŵa mwanici, nkhawona umo mazgu gha pa Salmo 27:10 ghakafiskikira pa ine. Davide wakati: “Ŵadada na ŵamama nanga ŵandiside, kweni Yehova tiwanditorenge.” Lekani nimuphalirani umo vikendera.

NKHAKULIRA ku famu ya thonje, ya ŵasekuru iyo yikaŵa ku Georgia, U.S.A. pa nyengo iyo kukaŵa suzgo likuru la vya cuma ca m’ma 1930. Adada ŵakaŵa na citima cikuru cifukwa ca nyifwa ya ŵamama na munung’una wane uyo wakaŵa kuti wababika waka, ntheura ŵakanileka na ŵasekuru iwo ŵakaluta kukagwira nchito ku msumba unyake. Pamasinda ŵakayezgayezga kuti ŵanitore kuti nkhakhalenge nawo, kweni vikatondeka.

Ankhazi ŵalara ndiwo ŵakapweleleranga pa nyumba. Nangauli ŵasekuru ŵakasopanga yayi, kweni ankhazi ŵakasopanga mu chalichi la Baptist ndipo ŵakanikoserezganga kusopa. Cifukwa ca kopa kuthyapulika, zuŵa lililose la Sabata nkhalutanga ku chalichi lawo. Ntheura, kufuma waka pa wanici wane, nkhatemwanga viŵi yayi vyakusopa. M’malo mwake, nkhatemwanga sukulu na maseŵera.

Awo Ŵakasintha Umoyo Wane

Zuŵa linyake muhanya, mu 1941, apo nkhaŵa na vilimika 15, mwanalume munyake mucekuru wakiza ku nyumba kwithu pamoza na muwoli wake. Nkhaphalirika kuti “aŵa mbawuso, a Talmadge Rusk.” Nkhaŵa kuti nindapulikepo za iwo, kweni nkhamanya kuti iwo pamoza na ŵawoli ŵawo Mbakaboni ŵa Yehova. Ivyo ŵakalongosora vyakukhwaskana na khumbo la Ciuta lakuti ŵanthu ŵazamukhala kwamuyirayira pa caru capasi, vikaŵa vyakupambana comene na ivyo nkhapulikanga ku chalichi. Ŵanandi pa nyumba ŵakakana kutegherezga ndipo ŵakayuyura ivyo ŵakayowoya. Nakuti ŵakaŵaphalira kuti ŵaleke kwizaso pa nyumba. Kweni ankhazi ŵacoko a Mary, awo tikapambananga vilimika vitatu na ine, ŵakapoka Baibolo na mabuku ghakulongosora Baibolo.

Mwaluŵiro a Mary ŵakakhorwa kuti ŵasanga unenesko, ndipo mu 1942 ŵakabapatizika kuŵa yumoza wa Ŵakaboni ŵa Yehova. Kweniso ŵakawona unenesko wa fundo ya Yesu yakuti: “Ŵalwani ŵa munthu ŵazamuŵa ŵanthu ŵamunyumba yake.” (Mat. 10:34-36) Ŵamumbumba ŵakazgoka ŵalwani. Ankhazi ŵalara awo ŵakadikana na a Mary, ŵakaŵa na udindo mu boma, ntheura ŵakakolerana na meya kuti ŵakakiske adada a Talmadge. Ŵakaŵapa mulandu wakuti ŵakugaŵira mabuku kwambura kuzomerezgeka na dango. Ntheura, ŵakaŵaŵika mu gadi.

 Nyuzipepara yinyake ya mu cigaŵa cithu yikati meya uyoso ni mweruzgi, wakaphalira ŵanthu mu khoti kuti: “Mabuku agho munthu uyu wakugaŵizga . . . ngakofya nga ni poyizoni.” Adada ŵakacita apilu ndipo ŵakawina mulandu uwu, kweni ŵakaŵa kuti ŵakhala mu jele mazuŵa 10.

Umo Ankhazi a Mary Ŵakanovwilira

Padera pa ine, a Mary ŵakapharazgirangaso ŵazengezgani. Zuŵa linyake nkhalongozgana nawo apo ŵakaluta kukasambizga Baibolo mwanalume munyake uyo ŵakamugaŵira buku lakuti The New World panji kuti Caru Ciphya. * Muwoli wa mwanalume uyu wakati mfumu wake waŵazga buku ili usiku wose. Nangauli nkhakhumbanga yayi kucimbilira kunjira cisopa, kweni ivyo nkhasambiranga vikaniconthanga mtima. Ndipouli, nkhakhorwa kuti Ŵakaboni ŵa Yehova mbanthu ŵa Ciuta cifukwa ca ivyo ŵakasambizganga pera yayi. Cinyake ico cikanikhorweska ni umo ŵanthu ŵakacitiranga nawo.

Mwaciyelezgero, zuŵa linyake apo ine na a Mary tikafumanga ku dimba la mapuno, tikawona josi mu cakuwocheramo viswaswa ndipo tikasanga kuti ankhazi ŵalara ŵawocha mabuku gha a Mary, kusazgapo giramafoni na vimbale vyake ivyo vikaŵa na uthenga wa mu Baibolo. Nkhakwiya comene, ndipo ankhazi ŵalara aŵa ŵakanisuska na kuniphalira kuti: “Pa ivyo tacita apa uzamutiwonga kunthazi.”

Mu 1943, ankhazi a Mary ŵakacicizgika kuwukapo pa nyumba cifukwa cakuti ŵakakana kuleka ukaboni na kupharazgira ŵazengezgani. Pa nyengo iyi nkhakondwa kumanya kuti zina la Ciuta ni Yehova, kweniso kuti ni Ciuta wacitemwa na lusungu, uyo kuti wakocha ŵanthu ku moto yayi. Nkhamanyaso kuti Yehova wali na gulu lacitemwa, nangauli nkhaŵa kuti nindambe kuwungana.

Zuŵa linyake apo nkhachechanga pa luŵaza, nkhawona galimoto yikwenda pacokopacoko ndipo mukaŵa ŵanalume ŵaŵiri, yumoza wakanifumba usange ndine Fred. Nati naŵamanya kuti Mbakaboni ŵa Yehova, nkhati: “Lekani nikwere, mwakuti tilute pa malo ghawemi.” Ŵakatumika na ankhazi a Mary kuti ŵakumane nane. Yumoza mwa ŵanalume aŵa wakaŵa Shield Joutjian, uyo wakaŵa mulaŵiliri wa dera. Ŵamumbumba ŵakamba kunisuska cifukwa cakuti nkhavikiliranga vigomezgo vya Ŵakaboni ŵa Yehova.

Ankhazi a Mary ŵakanilembera kalata kufuma ku Virginia ndipo ŵakati usange nkhukhumbisiska kuteŵetera Yehova, nilute nkhakhalenge nawo. Nyengo yeneyiyo nkhasankha kuluta. Pa Cinkhondi namise mu Okutobala  1943, nkhapakira katundu wane mu cibokosi na kucikakilira mu cikhuni ca pataliko na pa nyumba. Pa Cisulo, nkhati waka zwee na kutora bokosi lane, ulendo mu tawuni. Nkhati nafika mu msumba wa Roanoke, nkhasanga a Mary ŵali pa nyumba ya Edna Fowlkes.

Kukura Mwauzimu, Kubapatizika, Kuteŵetera pa Beteli

Edna wakaŵa mudumbu wakuphakazgika, munthu walusungu nga ni Lidiya uyo wakuzunulika mu Baibolo. Wakacitanga lenti nyumba yikuru, ndipo padera pakusunga ankhazi a Mary, wakakhalangaso na mulamu wake. Mulamu wake uyu wakaŵa na ŵana ŵasungwana ŵaŵiri. Mazina gha ŵasungwana aŵa ni Gladys na Grace Gregory, ndipo pamanyuma ŵakamba uteŵeti wa umishonale. Gladys uyo sono wali na vilimika vya m’ma 90, wacali kuteŵetera mwakugomezgeka ku munthavi wa ku Japan.

Apo nkhakhalanga ku nyumba ya Edna, nkhamba kuwungana mwakukhazikika ndipo nkhasambizgika umo ningapharazgira. Nkhamba kukura mwauzimu cifukwa nkhaŵa na wanangwa wa kusambira Mazgu gha Ciuta kweniso kuwungana. Nkhabapatizika pa Juni 14, 1944. A Mary pamoza na Gladys na Grace, ŵakamba upayiniya ndipo ŵakatumika kumpoto kwa Virginia. Ŵakawovwira kukhazikiska mpingo mu Leesburg. Ca kuwambiro wa 1946, nkhamba kucita upayiniya kufupi na uko iwo ŵakateŵeteranga. Mu cilimika ici tikalutira lumoza ku ungano wambura kuluwika wa mitundu yose, uwo ukacitikira ku Cleveland, Ohio, pa Ogasiti 4 mpaka 11.

Pa ungano uwu, Nathan Knorr, uyo wakalongozganga gulu, wakayowoya kuti ŵakukhumba kusazgirako Beteli ya ku Brooklyn. Pakakhumbikwiranga kuzenga nyumba yiphya yakugonamo na yakusindikizgiramo mabuku. Ntheura, ŵawukirano ŵanandi ŵakakhumbikwanga kuti ŵajipeleke. Nkhawona kuti uku ndiko nkhwenera kukateŵetera Yehova. Ntheura, nkhapempha uteŵeti wa pa Beteli, ndipo pakati pajumpha myezi yicoko waka, pa Disembala 1, 1946, nkhacemeka.

Pamanyuma pa cilimika cimoza, Max Larson, mulaŵiliri wa dipatimenti yakusindikizga mabuku, wakiza mu ofesi yane ya Dipatimenti Yakupokelera na Kutumizga Makalata. Wakaniphalira kuti nkhambe kuteŵetera ku Dipatimenti Yakulaŵilira Uteŵeti. Ku dipatimenti iyi, nkhamanya vinandi vyakukhwaskana na umo tingalondezgera fundo za mu Baibolo na umo gulu la Ciuta likwendera, comenecomene apo nkhateŵeteranga lumoza na Mbali T. J. (Bud) Sullivan, uyo wakaŵa mulaŵiliri.

Ŵadada ŵakizanga kanandi waka ku Beteli kuzakaniwona. Pamanyuma nawo ŵakamba kusopa. Pa ulendo wawo waumaliro uwo ŵakiza kuzakaniwona mu 1965, ŵakaniphalira kuti: “Ndiwe mwanangwa kwiza ku nyumba  yane, kweni ine nizengekoso cara kuno.” Pambere ŵandafwe nkhalutanga kukaŵawona. Iwo ŵakaŵa na cigomezgo cakuti ŵakuluta kucanya. Kweni ine nkhuwona kuti Yehova wakuŵakumbuka, ndipo para ni nthena, wazamuŵawuska pa nyengo ya ciwuka, ndipo ŵazamukhala kwamuyirayira mu Paradiso pa caru capasi kuti kucanya uko ŵeneko ŵakaghanaghananga yayi.

Maungano Ghanyake Ghambura Kuluwika na Milimo Yakuzenga

Nyengo zose maungano ghakanovwiranga kuti nikure mwauzimu. Maungano gha mitundu yose gha m’ma 1950 agho ghakacitikiranga ku sitediyamu ya ku New York Yankee ghakanovwira comene. Mu 1958, ŵanthu 253,922 ŵakufuma mu vyaru 123, ŵakawungana mu Yankee Stadium na Polo Grounds. Pa ungano uwu pakacitika cinthu cinyake ico nizamuluwa yayi. Apo nkhaŵa mu ofesi yakulaŵilira ungano, mwamabuci Mbali Knorr wakiza kwa ine. Wakati: “Fred, nkhaluwa kusankha mbali wakuti wakayowoye na ŵapayiniya awo ŵawungana mu holo yakulyeryamo. Kasi ungacimbilirako na kukayowoya nkhani yiwemi iyo ukuwona kuti yingaŵakhozga?” Nkhalomba comene pambere nindafike ku malo agha, uku nkhuthutira mucanya.

Ca m’ma 1950 na 1960 apo mipingo yikasazgikiranga mu New York City, malo gha lenti ghakucitiramo maungano ghakamba kusoŵa. Ntheura, kufuma mu 1970 mpaka 1990, kukagulika nyumba zitatu mu msumba wa Manhattan ndipo zikanozgeka kuti ziŵe zakuwunganamo. Ine ndine nkhaŵa ceyamani wa mulimo uwu, ndipo nkhukumbuka umo Yehova wakatumbikira mipingo kuti yisange ndalama zakuzengera malo ghawemi ghakusoperamo.

Umo Umoyo Ukasinthira

Zuŵa linyake mu 1957, apo nkhalutanga kukagwira nchito, kukamba kulokwa vula. Nkhawona kasungwana kakutowa ako kakaŵa kuti kiza waka pa Beteli. Kakaŵavya ambulera, ntheura tikadikiskana na ine. Umu ndimo tikamanyirana na Marjorie, ndipo kufuma waka mu 1960 apo tikatolerana, tendera lumoza mwakukondwa pakuteŵetera Yehova, kwali kulokwe vula panji kuŵe zuŵa. Mu Seputembala 2010, tikakondwelera kuti takwaniska vilimika 50 mu nthengwa.

Tikati tawera waka uko tikaluta kukenda pamanyuma pakuti takwatiska, Mbali Knorr wakaniphalira kuti namwamba kusambizga Sukulu ya Giliyadi. Uwu ukaŵa mulimo wapadera comene! Kufuma mu 1961 mpaka 1965 pakaŵa makilasi gha nyengo yitaliko, tikasambizganga ŵa mu makomiti gha minthavi umo ŵangendeskera milimo yawo. Ca kuumaliro wa 1965, makilasi ghakacitikanga kwa myezi yinkhondi, ndipo tikambaso kusambizga ŵamishonale.

Mu 1972 nkhamba kuteŵetera ku Dipatimenti Yakuzgora Mafumbo, ndipo ine ndine  nkhaŵa mulaŵiliri. Kupenjerezga mazgoro gha mafumbo ghakupambanapambana, kukanovwira kupulikiska Mazgu gha Ciuta ndiposo umo ningawovwilira ŵanji kulondezga fundo za Ciuta.

Mu 1987, nkhamba kuteŵetera ku dipatimenti yiphya, Dipatimenti Yakupeleka Cimanyisko ca Vyacipatala. Tikamba kusambizga ŵalara awo ŵakuteŵetera mu Makomiti Ghakudumbiskana na Cipatala umo ŵangayowoyera na ŵadokotala, ŵeruzgi, na ŵanji kuti ŵapulikiske makora cigomezgo cithu ca mu Malemba pa nkhani ya ndopa. Suzgo likuru likaŵa lakuti ŵadokotala ŵakapelekeranga dala ndopa ku ŵana ŵithu ndipo kanandi ŵakazomerezgekanga na khoti.

Apo ŵadokotala tikaŵaphaliranga masacizgo ghithu pa nthowa zinyake zakucizgira m’malo mwa ndopa, kanandi ŵakazgoranga kuti nthowa izo palije panji kuti ni zakudura comene. Kanandi dokotala uyo wazgora nthena, nkhamuphaliranga kuti, “Korako casa.” Para takorana casa, nkhayowoyanga kuti, “Muli na nthowa ziwemi comene izo mungagwiliskira nchito padera pa ndopa.” Mazgu agha ghakakumbuskanga dokotala kuti pakucita opareshoni wakwenera kupwelelera kuti ndopa zileke kuthika comene.

Kwa vilimika 20 ivyo vyajumpha, Yehova watumbika comene mulimo uwu wa kusambizga ŵadokotala na ŵeruzgi. Ŵakamba kusintha maghanoghano ghawo ŵati ŵapulikiska umo ise tikuwonera nkhani ya ndopa. Ŵakawona kuti kusanda uko kukacitika na awo ŵakumanya vya munkhwala, kukalongora kuti nthowa zakucizgira kwambura ndopa ni ziwemi comene, ndipo pali ŵadokotala ŵanandi awo ŵakukolerana na fundo iyi ndiposo vipatala ivyo ŵalwari ŵangatumizgikako.

Kufuma mu 1996, ine na Marjorie tikuteŵetera pa Watchtower Educational Center ku Patterson, New York, mtunda wa makilomita 110 ca kumpoto kwa Brooklyn. Pa nyengo yicoko waka, nkhateŵetapo ku Dipatimenti Yakulaŵilira Uteŵeti, pamasinda nkhamba kusambizga ŵa mu makomiti ya minthavi na ŵalaŵiliri ŵakwendakwenda. Kwa vilimika 12 ivyo vyajumpha, nateŵeteraposo nga ni mulaŵiliri wa Dipatimenti ya Kuzgora Mafumbo, iyo kale yikaŵa ku Brooklyn.

Masuzgo gha Ucekuru

Apo sono nili na vilimika vya m’ma 80, cikuniŵira cakusuzga comene kucita uteŵeti wane pa Beteli. Nasuzgika na kansa kwa vilimika vyakujumpha 10. Nkhujipulika nga ni Hezekiya, uyo Yehova wakamusazgirako umoyo wake. (Yes. 38:5) Muwoli wane nayo umoyo ukukanakana, ndipo nkhovwirana nayo pakulimbana na suzgo lake la ciluwa. Marjorie wateŵetera Yehova mwakugomezgeka, wawovwirapo ŵawukirano ŵanandi, kweniso waŵa movwiri wane wakugomezgeka comene. Wakaŵa msambiri ndiposo msambizgi muwemi wa mazgu gha Ciuta, ndipo ŵana ŵithu ŵauzimu ŵakulutilira kuyowoyeskana nase.

Ankhazi ŵane a Mary ŵakafwa mu Malici 2010 apo ŵakaŵa na vilimika 87. Ŵakaŵa msambizgi muwemi wa Mazgu gha Ciuta ndipo ŵakawovwirapo ŵanthu ŵanandi kuti ŵambe kusopa kwaunenesko. Ŵakacita uteŵeti wanyengozose kwa vilimika vinandi. Nkhuŵawonga comene cifukwa ca kunovwira kuti nimanye unenesko, na kuŵa muteŵeti wa Yehova, Ciuta withu wacitemwa. A Mary ŵali kusungika pafupi na ŵafumu ŵawo, awo ŵakateŵeterapo ku Israyeli nga mumishonale. Nili na cigomezgo cose kuti Yehova wakuŵakumbuka ndipo wazamuŵawuska.

Para nkhughanaghanira vilimika 67 ivyo nateŵetera Yehova, nkhuwonga comene cifukwa ca vitumbiko ivyo nasanga. Naŵa wakukondwa cifukwa ca kucita khumbo la Yehova. Nkhugomezga comene lusungu lwake lukuru, ndipo nkhulindilira na mtima wose kufiskika kwa layizgo la Mwana wake lakuti: “Waliyose uyo wasida nyumba panji ŵakuru panji ŵanung’una panji ŵadumbu panji wiske panji nyina panji ŵana panji minda cifukwa ca zina lane, wazamupokera vinandi kwakuluska ndipo wazamuhara umoyo wamuyirayira.”—Mat. 19:29.

[Mazgu ghamusi]

[Cithuzithuzi pa peji 19]

Mu famu ya ŵasekuru ya thonje ku Georgia, U.S.A., 1928

[Cithuzithuzi pa peji 19]

Ankhazi a Mary na Adada a Talmadge

[Cithuzithuzi pa peji 20]

Mary, Gladys, na Grace

[Cithuzithuzi pa peji 20]

Apo nkhabapatizikanga, Juni 14, 1944

[Cithuzithuzi pa peji 20]

Pa Beteli mu Dipatimenti Yakulaŵilira Uteŵeti

[Cithuzithuzi pa peji 21]

Na a Mary ku ungano wa mitundu yose ku Yankee Stadium mu 1958

[Cithuzithuzi pa peji 21]

Na Marjorie pa zuŵa la ukwati withu

[Cithuzithuzi pa peji 21]

Ine na Marjorie mu 2008