‘Sanguluskani Wose Awo Ŵakutengera’

“Yehova wandiphakazga . . . kusanguluska wose awo ŵakutengera.”—YES. 61:1, 2.

1. Kasi Yesu wakacitanga nawo wuli ŵakutengera, ndipo cifukwa wuli?

YESU KHRISTU wakati: “Cakurya cane nchakuti nicite khumbo la uyo wakanituma na kufiska mulimo wake.” (Yoh. 4:34) Apo Yesu wakacitanga mulimo uwo Ciuta wakamutuma, wakalongora mikhaliro yapacanya ya Ŵawiske. Umoza mwa mikhaliro iyi nchitemwa cikuru ico Yehova wakulongora ŵanthu. (1 Yoh. 4:7-10) Mpositole Paulosi wakawona citemwa ici apo wakati Yehova ni “Ciuta wa cisangulusko cose.” (2 Kor. 1:3) Mwakukolerana na ucimi wa Yesaya, Yesu wakalongora citemwa canthena ici. (Ŵazgani Yesaya 61:1, 2.) Apo Yesu wakaŵa mu sunagoge ku Nazarete, wakaŵazga ucimi uwu na kuyowoya kuti wafiskika pa iyo. (Luka 4:16-21) Yesu wakasanguluskanga mwacitemwa awo ŵakatengeranga, kuŵakhozga, ndipo ŵakaŵanga na mtende wa mu maghanoghano.

2, 3. Cifukwa wuli ŵalondezgi ŵa Khristu ŵakwenera kusanguluska ŵanji?

² Ŵalondezgi ŵa Yesu nawo ŵakwenera kusanguluska awo ŵakulira. (1 Kor. 11:1) Paulosi  wakati: “Lutilirani kusanguluskana yumoza na munyake na kuzengana.” (1 Tes. 5:11) Comene sono ndiyo ni nyengo yakuti tisanguluskire ŵanji, cifukwa tili mu “nyengo zinonono na zakusuzga.” (2 Tim. 3:1) Ŵanthu ŵawemi mitima pa caru cose, ŵakukwenyelera cifukwa ca ivyo ŵaheni ŵakuyowoya na kucita.

³ Nga umo Baibolo likayowoyera, mu mazuŵa ghaumaliro agha, ŵanthu ŵanandi “ŵakujitemwa iwoŵene, ŵakutemwa ndalama, ŵakujituntha, ŵakujikuzga, ŵakuyuyura Ciuta, ŵambura kupulikira ŵapapi, ŵambura kuwonga, ŵambura kugomezgeka, ŵambura citemwa cakawiro, ŵanonono, ŵakusesa, ŵambura kujikora, ŵakofya, ŵambura kutemwa uwemi, ŵakwendera mphiska, ŵakajilangi, ŵakujitukumura cifukwa ca kunotha, ŵakutemwa vyakusanguluska m’malo mwa kutemwa Ciuta.” Mazuŵa ghano, nkharo izi zafika paheni comene, cifukwa ‘ŵanthu ŵaheni na ŵakupusika ŵakulutilira kuhenipa.’—2 Tim. 3:2-4, 13.

4. Kasi mazuŵa ghano vinthu vili wuli mu caru?

⁴ Ivi vikwenera kutizizika yayi, cifukwa mazgu gha Ciuta ghakuti “caru cose cikugona mu nkhongono za muheni.” (1 Yoh. 5:19) Mazgu ghakuti “caru cose” ghakwimira ŵandyali, ŵavisopa, ŵamalonda, kweniso nthowa izo Satana wakuthandazgira mautesi ghake. Mphake kuti Satana Dyabulosi wakucemeka kuti ni “muwusi wa caru” ndiposo “ciuta wa mgonezi uno.” (Yoh. 14:30; 2 Kor. 4:4) Vinthu pa caru cose vikuhenipirahenipira cifukwa Satana wali na ukali ukuru, pakumanya kuti Yehova wali pafupi kumuparanya. (Uvu. 12:12) Nchakukhozga kumanya kuti sonosono apa Ciuta wawuskengepo Satana pamoza na viheni vyose, na kumazga nkhani ya muwuso iyo Satana wakambiska.—Gen., cipaturo 3; Job, cipaturo 2.

Makani Ghawemi Ghakupharazgika pa Caru Cose

5. Kasi ucimi wakukhwaskana na kupharazga ukufiskika wuli mu mazuŵa ghaumaliro agha?

⁵ Ivyo Yesu wakayowoya vikufiskika mu nyengo zakusuzga izi. Wakati: “Makani ghawemi agha gha ufumu, ghazamupharazgika mu caru cose kuti uŵe ukaboni ku mitundu yose; penepapo ndipo umaliro wizenge.” (Mat. 24:14) Nga umo Yesu wakayowoyera, ŵanthu ŵa Yehova pa caru cose ŵakupharazga vya Ufumu wa Ciuta. Pasono pali Ŵakaboni ŵa Yehova ŵakujumpha 7,500,000, ndipo ŵakupharazga Ufumu wa Ciuta, uwo Yesu wakapharazganga, ndipo ŵakuwungana mu mipingo yakujumpha 107,000 pa caru cose capasi. (Mat. 4:17) Ŵanthu ŵanandi awo ŵakutengera, ŵakusanguluskika na mulimo wa kupharazga uwu. Nchakukondweska comene kuwona kuti ŵanthu ŵakukwana 570,601 ŵakabapatizika kuŵa Ŵakaboni ŵa Yehova mu vilimika viŵiri ivyo vyajumpha.

6. Kasi mukutipo wuli pa umo mulimo wa kupharazga ukulutira panthazi?

 ⁶ Mulimo wa kung’anamura na kuthandazga mabuku ghakusambizga Baibolo mu viyowoyero vyakujumpha 500 uwo Ŵakaboni ŵa Yehova ŵakucita, ukulongora makora kuzirwa kwa mulimo wa kupharazga. Ici nchinthu ico cindacitikepo kumasinda kose uku. Nchinthu capadera comene kuwona umo gulu la Yehova likucitira mulimo wa kupharazga na umo mulimo uwu ukulutira panthazi. Ivi vingacitika yayi kwambura kuti Ciuta wawovwirapo na mzimu wake utuŵa cifukwa caru cose cikugona mu nkhongono za Satana. Makani ghawemi ghakupharazgika pa caru cose, ndipo padera pa ŵateŵeti ŵa Yehova, ŵanthu awo ŵakupokelera uthenga wa Ufumu nawo ŵakusanguluskika.

Kusanguluska Ŵakhristu Ŵanyithu

7. (a) Cifukwa wuli pasono tileke kukhazga kuti Yehova wawuskengepo masuzgo ghose? (b) Cifukwa wuli nase tingazizipizga masuzgo?

⁷ Nchakumanyikwirathu kuti mu caru cakuzura na masuzgo ici, tikumanenge na masuzgo agho tingenjerwa nagho. Tileke kukhazga kuti pasono Ciuta wawuskengepo masuzgo ghose agho tikutambura nagho. Apo tikulindilira zuŵa ilo Yehova wazamuwuskirapo viheni vyose, pasono titambuzgikenge mwakuti tilongore kuti ndise ŵakugomezgeka ku muwuso wake. (2 Tim. 3:12) Ndipouli, para Adada ŵithu ŵa kucanya ŵatisanguluska na kutovwira, nase tingaŵa nga Mbakhristu ŵakuphakazgika ŵa ku Tesalonika awo ŵakacitira ukaboni mu nyengo ya suzgo.—Ŵazgani 2 Ŵatesalonika 1:3-5.

8. Kasi pali ukaboni wuli wa mu Malemba uwo ukulongora kuti Yehova wakusanguluska ŵateŵeti ŵake?

⁸ Tikukayika yayi kuti Yehova wakupeleka cipembuzgo cakwenelera ku ŵateŵeti ŵake. Mwaciyelezgero, Eliya wakathika lusoko ndipo wakacimbira na kuyowoya kuti wafwe waka apo Fumukazi Yezebeli yikakhumbanga kumukoma. Yehova wakamususka yayi Eliya, m’malo mwake, wakamusanguluska na kumukhozga kuti walutilire kucita uteŵeti wake. (1 Mathe. 19:1-21) Ivyo vikacitika mu nyengo ya ŵapositole, navyo vikulongora makora kuti Yehova wakusanguluska ŵateŵeti ŵake. Mwaciyelezgero, Baibolo likutiphalira za nyengo iyo “mpingo mu Yudeya mose na Galileya na Samariya ukanjira mu nyengo ya mtende, [ndipo] ukazengekanga.” Kweniso apo “ukendanga mu kopa Yehova na mu cisangulusko ca mzimu utuŵa ukalutilira kwandana.” (Mil. 9:31) Nase tikuwonga comene cifukwa tikupokera “cisangulusko ca mzimu utuŵa.”

9. Cifukwa wuli kumanya za Yesu kungatisanguluska?

⁹ Taŵakhristu tikusanguluskika cifukwa cakuti tikumanya Yesu Khristu na kulondezga mendero ghake. Yesu wakati: “Zani kwa ine, mose imwe mukuphyoka na kunyekezgeka, ndipo nimusamphuskaninge. Jitolerani joko lane ndipo sambirani kwa ine, pakuti nili wakuzika na wakujiyuyura mu mtima, ndipo muzamusamphuskika mu umoyo winu. Cifukwa joko lane ndipusu na katundu wane ngwakupepuka.” (Mat. 11:28-30) Para tingamanya umo Yesu wakacitiranga pakukhozga ŵanthu na kulondezga umo wakacitiranga, vitovwirenge kuti tileke kwenjerwa comene na masuzgo ghithu.

10, 11. Kasi mbanjani awo ŵakwenera kusanguluska ŵanyawo mu mpingo?

¹⁰ Ŵakhristu ŵanyithu nawo ŵangatisanguluska. Ghanaghanirani waka umo ŵalara mu mpingo ŵakovwilira awo ŵakusuzgika. Msambiri Yakobe wakalemba kuti: “Kasi walipo mulwari [mwauzimu] pakati pinu? Waceme ŵanalume ŵalara ŵa mpingo, ndipo ŵamulombere.” Kasi cikucitika nchivici para ŵamulombera? “Lurombo lwa cipulikano lumucizgenge mulwari, ntheura Yehova wamuwuskenge. Kweniso usange wacita zakwananga, zizamugowokereka.” (Yak. 5:14, 15) Padera pa ŵalara, ŵanji mu mpingo nawo ŵangatisanguluska.

 ¹¹ Kanandi ŵanakazi ŵakufwatuka kuphalirana masuzgo na ŵanakazi ŵanyawo. Ŵadumbu ŵalara ŵakumanya vinandi, ndipo ŵangapeleka ulongozgi wakovwira comene ku ŵadumbu ŵaciwukirano. Ŵadumbu ŵakukhwima aŵa ŵangaŵa kuti nawo ŵali kukumanapo na masuzgo ghakuyana waka. Ŵanakazi ŵali na mikhaliro yapadera iyo yingawovwira comene ŵanji. (Ŵazgani Tito 2:3-5.) Ndipouli, ŵalara na wose mu mpingo ŵakwenera kuyowoya “mwakupembuzga kwa awo ŵakusuzgika maghanoghano” pakati pithu. (1 Tes. 5:14, 15) Kweni tingacita makora kukumbuka kuti Ciuta “wakutisanguluska mu suzgo yithu yose, mwakuti nase timanye kusanguluska awo ŵali mu suzgo ya mtundu uliwose.”—2 Kor. 1:4.

12. Cifukwa wuli nchakuzirwa kusangika pa maungano?

¹² Cinthu cakuzirwa comene ico tingacita kuti tipembuzgike nkhusangika pa maungano apo pakuyowoyeka nkhani zakukhozga kufuma mu Baibolo. Baibolo likutiphalira kuti Yudasi na Sila, “ŵakakhwimiska ŵabali na mazgu ghanandi ndipo ŵakaŵakhozga.” (Mil. 15:32) Pambere maungano ghandambe ndiposo para ghamara tikukhozgana na ŵabali ŵithu. Ntheura, para tasuzgika maghanoghano cifukwa ca suzgo linyake, tileke kujipatura cifukwa kucita nthena kungawovwira cara. (Zinth. 18:1) M’malo mwake, tingacita makora comene kulondezga ulongozgi wa Paulosi wakuti: “Tiyeni tighanaghanirane yumoza na munyake na kuciskirana ku citemwa na milimo yiwemi, kusulako cara kuwungana kwithu pamoza, umo kaliri kaluso ka ŵanji, kweni tikhwimiskanenge yumoza na munyake, ndipo comenecomene apo tikuwona zuŵa likuneng’enera.”—Heb. 10:24, 25.

Sangani Cisangulusko mu Mazgu gha Ciuta

13, 14. Longosorani umo Malemba ghangatisanguluskira.

¹³ Kwali tili kubapatizika ni kale panji tamba waka sono kusambira vya Ciuta na khumbo lake, tose tingasanguluskika comene na Mazgu gha Ciuta. Paulosi wakalemba kuti: “Vinthu vyose ivyo vikalembeka kale, vikalembekera kutisambizga, kuti kwizira mu cizizipizgo cithu na mu cisangulusko cakufuma mu Malemba, tiŵe na cigomezgo.” (Rom. 15:4) Mzimu utuŵa ungatisanguluska na kutovwira kuŵa ‘ŵakukwana fikepo, ŵakunozgekera nkhanira mulimo uliwose uwemi.’ (2 Tim. 3:16, 17) Tingasanguluskika comene para tingamanya khumbo la Ciuta ndiposo ivyo tikulindilira munthazi. Tiyeni tiŵazgenge comene Mazgu gha Ciuta kweniso mabuku agho ghakulongosora Baibolo cifukwa ndivyo vingatisanguluska na kutovwira mu nthowa zinandi.

 ¹⁴ Yesu nchakuwonerapo ciwemi comene pa nkhani ya kugwiliskira nchito Malemba pakusambizga na kupembuzga ŵanji. Mwaciyelezgero, Yesu wati wawuka ku ŵakufwa ulendo unyake wakawonekera ku ŵasambiri ŵake ŵaŵiri, ndipo ‘wakaŵalongosolera Malemba makoraghene.’ Apo wakayowoyanga nawo, mitima yawo yikacontheka comene. (Luka 24:32) Nga ni Yesu, Paulosi nayo ‘wakadumbiskananga na ŵanthu kufuma mu Malemba.’ Ŵanthu ŵa ku Bereya “ŵakapokera mazgu na kunweka kukuru, kusanda Malemba mwakupwelelera zuŵa na zuŵa.” (Mil. 17:2, 10, 11) Ipo nchakwenelera kuti nyengo zose tiŵazgenge Baibolo na kusanga nalo candulo, ndipo mabuku ghithu ghangatovwira comene pa fundo iyi cifukwa ghakulembeka kuti ghatisanguluske mu nyengo za masuzgo izi.

Nthowa Zinyake Zakusanguluskira Ŵanji

15, 16. Kasi ni vinthu wuli vinyake ivyo tingacita kuti tovwire na kusanguluska Ŵakhristu ŵanyithu?

¹⁵ Pali nthowa zinandi izo tingasanguluskira na kovwira ŵanji. Mwaciyelezgero, m’malo mwakuti ŵacekuru panji ŵalwari, ŵalute ŵekha kukagura ivyo ŵakukhumba, ise tingajipeleka. Ŵanji tingaŵawovwira kucita milimo ya pa nyumba nga nkhuphyera na vinyake vyantheura. (Fil. 2:4) Nyengo zinyake tingaŵawonga ŵabali ŵithu cifukwa ca mikhaliro yiwemi iyo ŵakulongora nga nchitemwa, kujipeleka, cikanga, na cipulikano.

¹⁶ Tingasanguluskaso ŵacekuru mwa kuŵendera ku nyumba zawo na kutegherezga comene para ŵakuyowoya umo ŵateŵetelera Yehova na vitumbiko ivyo ŵasanga. Ivi vingatikhozga na kutisanguluska comene. Awo taŵendera, tingaŵazgira nawo lumoza Baibolo panji mabuku ghanyake agho ghakulongosora Baibolo. Panji tingadumbiskana nawo fundo za mu Sambiro la Gongwe la Mulinda panji izo tamusambira pa Sambiro la Baibolo la Mpingo. Nyengo zinyake tingawonelera nawo lumoza ma DVD gha gulu. Tingaŵalongosolerako vinthu vinyake vyakukhozga ivyo tasambira mu mabuku ghithu.

17, 18. Pakuŵa ŵateŵeti ŵake ŵakugomezgeka, cifukwa wuli tili na cigomezgo cose kuti Yehova watikhozgenge na kutisanguluska?

¹⁷ Usange tamanya kuti Mkhristu munyithu wakukhumbikwira cisangulusko, tingamuzunura mu malurombo ghithu. (Rom. 15:30; Kol. 4:12) Apo nase tikulimbana na masuzgo ghithu uku tikuyezgayezga kusanguluska ŵanji, tingaŵa na cipulikano cakukhora nga ni wamasalimo uyo wakimba kuti: “Katundu wako umuyeghiske Yehova ndipo Iye tiwakufighirire; kuti tiwazomerenge cara na kanthini kose kuti munthu murunji wasunkhunike.” (Sal. 55:22) Pakuŵa ŵateŵeti ŵake ŵakugomezgeka, nyengo zose Yehova watisanguluskenge na kutikhozga.

¹⁸ Mu nyengo ya Yesaya, Ciuta wakaphalira ŵateŵeti ŵake kuti: “Ine, ndine mweneuyo wakumusanguluskani.” (Yes. 51:12) Nase waticitirenge mwakuyana waka, ndipo watitumbikenge apo tikuyezgayezga kusanguluska awo ŵakutengera. Kwali tikulindilira kuluta kucanya panji kuzakakhala pa caru capasi kwamuyirayira, waliyose wa ise wangasanguluskika na mazgu gha Paulosi ghakuti: “Mphanyi Fumu yithu Yesu Khristu na Ciuta Ŵadada ŵithu, awo ŵakatitemwa na kutipa cisangulusko camuyirayira na cigomezgo ciwemi kwizira mu lusungu lukuru, ŵasanguluska mitima yinu na kumukhozgani mu mulimo wose uwemi na mazgu.”—2 Tes. 2:16, 17.

Kasi Mukukumbuka?

• Kasi mulimo withu wa kusanguluska awo ŵakutengera wathandazgika wuli?

• Kasi ni vinthu wuli vinyake ivyo tingacita kuti tisanguluske ŵanji?

• Kasi pali ukaboni wuli wa mu Malemba uwo ukulongora kuti Yehova wakusanguluska ŵanthu ŵake?

[Mafumbo]

[Cithuzithuzi pa peji 28]

Kasi namwe mukusanguluska ŵanji?

[Cithuzithuzi pa peji 30]

Waliyose wangasanguluska ŵanji