Tiyeni Tisekelere Pamoza

MAZUŴA ghano, nchipusu yayi kuŵa wakukondwa panji wacimwemwe. Ŵanandi ŵakutemwa yayi kuyowoya viwemi na ŵanyawo. Umoyo wa mazuŵa ghano wapangiska ŵanthu kukhala paŵekha, comenecomene mu matawuni ghakurughakuru.

Profesa Alberto Oliverio wakati: ‘Kujipatura kwazara comene, ndipo kazengero ka nyumba za mu matawuni kakucitiska kuti ŵanthu ŵajipaturenge. Cifukwa ca ukhaliro uwu, ŵanandi ŵakusulako awo ŵakugwira nawo nchito, ŵazengezgani na awo ŵakuguliska mu sitoro.’ Kanandi awo ŵakujipatura ŵangaŵa na suzgo la maghanoghano.

Kweni Ŵakhristu ŵali na mzimu wanthena yayi. Mpositole Paulosi wakalemba kuti: “Sekelerani nyengo zose.” (1 Tes. 5:16) Pali vifukwa vinandi comene vyakuŵira ŵakukondwa ndiposo kusekelera pamoza na Ŵakhristu ŵanyithu. Tikusopa Yehova, uyo ni Ciuta Wapacanya Nkhanira, tikupulikiska unenesko wa mu Baibolo, tili na cigomezgo ca kuzakapona  na kukhala kwamuyirayira, kweniso tingawovwira ŵanji kuti nawo ŵasange vitumbiko ivi.—Sal. 106:4, 5; Yer. 15:16; Rom. 12:12.

Ŵakhristu ŵaunenesko mbacimwemwe ndipo ŵakovwira ŵanji kuŵa ŵakukondwa. Ntheura, nchakuzizika yayi kuti Paulosi wakalembera Ŵafilipi kuti: “Nkhukondwa na kusekelera pamoza na imwe mose. Mwakuyana waka, imwe namwe mukondwenge na kusekelera pamoza na ine.” (Fil. 2:17, 18) Mu mazgu ghacoko waka agha Paulosi wakayowoya kaŵiri za kuŵa wakukondwa ndiposo kusekelera pamoza na ŵanji.

Ŵakhristu ŵakwenera kuŵa maso comene kuti ŵaleke kujipatura. Uyo wakujipatura wangasekelera yayi na ŵanyake. Ipo tingalondezga wuli mazgu gha Paulosi, ghakuti tilutilire “kusekelera mu Fumu” pamoza na ŵabali ŵithu?—Fil. 3:1.

Sekelerani na Ŵakhristu Ŵanyinu

Apo Paulosi wakalemberanga kalata Ŵafilipi, wakwenera kuti wakaŵa mu jele ku Romu cifukwa ca mulimo wa kupharazga. (Fil. 1:7; 4:22) Nangauli wakaŵa mu jele, wakaleka yayi kupharazga mwamwamphu. Ndipo wakakondwa kuteŵetera Yehova mwakukwana, ‘kupungulika nga nchakumwa pa sembe.’ (Fil. 2:17) Paulosi wakalongora kuti munthu wakuŵa na cimwemwe para vinthu vikumwendera makora pera yayi. Nangauli wakakakika, iyo wakati: “Nilutilirenge kusekelera.”—Fil. 1:18.

Paulosi wati wambiska mpingo ku Filipi, wakaŵalongora citemwa capadera Ŵakhristu aŵa. Wakamanya kuti nawo ŵangakhozgeka para waŵaphalirako umo wakukondwera pakuteŵetera Yehova. Ntheura, wakalemba kuti: “Sono nkhukhumba kuti mumanye, ŵabali, kuti ivyo vyaniwira vyawovwira kuthandazga makani ghawemi, m’malo mwa kujandizga, nakuti vyamanyikwa pakati pa Ŵasilikari wose ŵa Themba la Romu na ŵanji wose, kuti nili kukakika cifukwa ca Khristu.” (Fil. 1:12, 13) Paulosi wakalemba fundo iyi kuti walongore kuti wakukondwa na kusekelera pamoza na Ŵakhristu ŵanyake. Ŵakhristu ŵa ku Filipi ŵakeneranga kukondwa nayo. Ndipouli, ŵakeneranga yayi kugongoweskeka na masuzgo agho Paulosi wakasangana nagho. M’malo mwake, ŵakakhumbikwiranga kucita nga ndiyo. (Fil. 1:14; 3:17) Ŵafilipi ŵakenerangaso kumuzunura Paulosi mu malurombo ghawo na kumupa wovwiri uliwose uwo ŵangafiska.—Fil. 1:19; 4:14-16.

Nga ni Paulosi, kasi nase tikulongora mzimu  wakusekelera? Kasi tikuyezgayezga kuwona viwemi mu masuzgo ghithu kweniso mu uteŵeti uwo tikucita? Para tikucezga na ŵabali, nchiwemi kuyowoyeskana mwakukondwa vyakukhwaskana na mulimo withu wa kupharazga. Tileke kulindizga kuti tikumane dankha na cinthu capadera. Tingaphalirako ŵanyithu umo tikacitira kuti munthu wanweke na uthenga wa Ufumu. Mutepanji mweneko nyumba tangudumbiskana nayo makora vesi linyake la mu Baibolo. Panji ŵanthu ŵakatiŵanika kuti ndise Ŵakaboni ŵa Yehova, ndipo umaliro wake ukaŵa wakuti tikadumbiskana nawo uthenga wa mu Baibolo. Ivi ni vinyake mwa vinthu ivyo tingaphalirako ŵanyithu na kusekelera nawo lumoza.

Ŵanthu ŵanandi ŵa Yehova, ŵakujipata na cilato cakuti ŵaciteko mulimo wa kupharazga. Ŵapayiniya, ŵalaŵiliri ŵakwendakwenda, ŵateŵeti ŵa pa Beteli, ŵamishonale, na awo ŵakutumika mu vyaru vinyake kukazenga ŵakusekelera na uteŵeti wawo wanyengozose. Kasi nase tikusekelera nawo pamoza? Tiyeni tilongore kuti tikuwonga ŵabali ŵithu aŵa, awo ‘mbanchito ŵanyithu cifukwa ca ufumu wa Ciuta.’ (Kol. 4:11) Tingaŵawonga ŵabali aŵa para tikuwungana nawo pa mpingo panji para tili pa maungano ghakurughakuru. Nase tingatolerako mwamphu wawo. Nyengo zinyake tingaŵacema kuti tikarye nawo cakurya ndipo ici cingatipa “mpata” wakuti ŵatiphalireko ivyo ŵakukumana navyo na kutikhozga.—Fil. 4:10.

Sekelerani na Awo Ŵakukumana na Viyezgo

Nthambuzgo ndiposo viyezgo ivyo Paulosi wakazizipizga, vikamovwira kuti walutilire kugomezgeka kwa Yehova. (Kol. 1:24; Yak. 1:2, 3) Paulosi wakamanya kuti ŵabali ŵa ku Filipi nawo ŵakumanenge na viyezgo ndipo ŵangakhozgeka usange waŵaphalirako umo iyo wakuzizipizgira. Lekani wakakondwa na kusekelera nawo pamoza. Ndipo wakalemba kuti: “Kwa imwe kuli kupika mwaŵi wa kuŵa na cipulikano mwa Khristu, apo pera cara, kweniso wa kusuzgika cifukwa ca iyo. Pakuti namwe mukupilipita mwakuyana waka, umo mukawonera kwa ine ndiposo umo sono mukupulikira vya ine.”—Fil. 1:29, 30.

Mwakuyana waka, Ŵakhristu mazuŵa ghano ŵakutambuzgika cifukwa ca mulimo wa kupharazga. Nyengo zinyake tingasuskika mwankhaza, kweni kanandi tikususkika mwacibisibisi. Ŵakugaluka ŵangatipusikizgira, ŵamumbumba yithu ŵangaticitira nkhaza, awo tikugwira nawo nchito panji awo tikusambira nawo sukulu ŵangatigoska. Yesu wakati viyezgo ivi vileke kutizizika nesi kutigongoweska. M’malo mwake, vikwenera kutipa cimwemwe. Iyo wakati: “Ŵakukondwa ndimwe para ŵanthu ŵakumutombozgani na kumutambuzgani ndiposo kumuteterani uheni wa mtundu uliwose cifukwa ca ine. Sekelerani ndipo dukani na cimwemwe, pakuti njombe yinu njikuru kucanya.”—Mat. 5:11, 12.

Tileke kucita wofi para tikupulika kuti ŵabali ŵithu mu vyaru vinyake ŵakuyuzgika comene. Kweni tikwenera kuŵa ŵakukondwa cifukwa ca kuzizipizga uko ŵakulongora. Tingaŵalombera kuti Yehova walutilire kukhozga cipulikano cawo mwakuti ŵalutilire kuzizipizga. (Fil. 1:3, 4) Nangauli tingacita vinandi yayi kuti tovwire ŵabali ŵithu awo ŵakuyuzgika mu vyaru vinyake, kweni tingawovwira awo ŵakuyezgeka mu mpingo withu. Tikwenera kuŵaghanaghanira na kuŵawovwira. Tingacita makora nyengo zinyake kuŵacema kuti ŵaŵe nase para tikusopa na mbumba yithu, kupharazga nawo, na kucita nawo vyakusanguluska vinyake.

Tili na vifukwa vinandi vyakusekelelera pamoza na ŵanyithu. Tiyeni tiŵambare mzimu wa caru wa kujipatura, ndipo tilutilire kusekelera pamoza na ŵabali ŵithu. Para tingacita nthena, titemwanenge na kukolerana mu mpingo, kweniso tisangwenge fikepo na ubali Wacikhristu. (Fil. 2:1, 2) Paulosi wakuticiska kuti: “Sekelerani mu Fumu nyengo zose. Nkhuwerezgaso kuti, Sekelerani!”—Fil. 4:4.

[Kulongosora Cithuzithuzi pa peji 6]

Globe: Courtesy of Replogle Globes