Kufuma mu Nthamba Yithu

Kusunga Vinthu Vyakuzirwa Vyakale

ŴANTHU ŵa Yehova ŵali na ciharo cauzimu ico nchakuzirwa comene. Padera pa kuŵazga mabuku ghithu, tingasambiraso vinthu vyakuzirwa kufuma mu vinthu vyakale nga ni vithuzithuzi, makalata, nkhani zakulongosora umo ŵanji ŵakacitiranga pakuteŵetera Ciuta, vinthu vyakuŵaja panji kuwumba, mulimo withu wa kupharazga, na mdauko withu. Kweni cifukwa wuli tikukhumbikwira kusungilira vinthu vyakale ivi na kupeketuramoso? Mitu ya mbumba za Ŵaisrayeli yikasambizganga ŵana ŵawo malango na milimo yakuzizwiska ya Yehova mwakuti “ŵajinthe cigomezgo cawo mwa Ciuta.”—Sal. 78:1-7.

Kusanda vinthu vyakuzirwa vyakale, kukovwira pa kufiska khumbo la Yehova. Mwaciyelezgero, apo ŵakususka ŵakakhumbanga kuyimiska mulimo wa kuzenga tempele mu Yerusalemu, vinthu vyakale ivyo ŵakasanda mu msumba wa Mediya Ekibatana, vikavumbura kalata yakuzomerezga mulimo wa kuzenga tempele iyo yikafuma kwa Themba Sayirasi. (Ezra 6:1-4, 12) Ntheura, tempele likazengekaso mwakuyana na khumbo la Ciuta. Luka nayo wakagwiliskirapo nchito vinthu vyakale, ndipo ‘wakasanda vinthu vyose makoraghene kufuma pakwamba.’—Luka 1:1-4.

 Wupu Wakulongozga ngwakunweka comene na mdauko withu. Pakuyowoya za kuzirwa kwa kusunga viharo vithu vyauzimu na kulekera ŵanji, mbali munyake wa mu Wupu Wakulongozga wakati: “Kuti timanye uko tikuya, tikweneraso kumanya uko tafuma.” Pa cifukwa ici, sonosono apa pakhazikiskika Dipatimenti Yakusunga Vinthu Vyakale, iyo yili pasi pa Komiti Yakulemba ku Brooklyn, New York.

ALIBAMU YA MBUMBA YITHU NA VIHARO

Mazuŵa ghano, vinthu vyakale vikucepa ndipo taŵanandi tikwenera kuti tikudokera kuti mphanyi tikasunga vinthu vyose vyakukhwaskana na mdauko wa mbumba yithu. Pasono Dipatimenti Yakusunga Vinthu Vyakale, yikufwilirapo kusunga usambazi na viharo vithu vyauzimu. Vithuzithuzi ivyo vili mu nthamba yithu iyi, tingati nchigaŵa ca alibamu ya mbumba yithu. Vinyake ivyo vikusungika mu nthamba iyi, ni mabuku ghithu ghakale, nkhani za kukondweska zakulongosora umoyo wa ŵanji, na vinthu vyapadera ivyo ni vyambura kuluwika. Vinthu ivi ni viharo ivyo vikutilongora uko tafuma, ndipo vikutovwira kumanya uko tikuya.

Tikumuciskani kuti muŵazgenge nkhani izo ziŵenge mu cigaŵa ciphya cakuti “Kufuma mu Nthamba Yithu.” Cigaŵa ici ciŵenge mu Gongwe la Mulinda lakusambira pa mpingo. Mwaciyelezgero, mu Gongwe lakulondezgapo tikunozgekera kuzakazgora mafumbo ghatatu agha: Kasi Dawn Mobile cikaŵa cinthu wuli? Kasi mbanjani awo ŵakacigwiliskiranga nchito? Kasi cikaŵako pawuli, ndipo cikaŵa ca nchito wuli?

Nga umo alibamu ya mbumba yikutikumbuskira vinandi, mu nthamba iyi namo muli vinthu vyakukhwaskana na taŵene kweniso ŵasekuru ŵithu ŵauzimu. Yikutilongora umo ŵanji ŵakalongolera cipulikano na cikanga, umo ŵakakondweranga pakuteŵetera Yehova, masuzgo agho ŵakakumananga nagho, umo Ciuta wakulongozgera na kukhozgera ŵanthu ŵake. (Dute. 33:27) Tili na cigomezgo cose kuti Yehova watovwirenge kusungilira mdauko withu wauzimu mwakuti tose tilutilire kukolerana comene na kukhozgana apo tikucita khumbo lake.

[Bokosi/Cithuzithuzi pa peji 31]

Wonani Ivyo Vikucitika

Pakunozgekera kulemba mabuku ghithu na kupanga ma DVD, na vinthu vinyake vyakukhwaskana na Baibolo, tikuwona dankha mu nthamba iyi. Dipatimenti yakusunga vinthu vyakale, yili na nthowa ziwemi za kuwunjikira na kusungira vinthu vinandi vyakale ivyo vikufuma ku maofesi gha minthavi, madipatimenti gha pa Beteli, mipingo, ŵanthu, na kunyake kwantheura. Wonani fundo zakulondezgapo izi zakukhwaskana na mulimo uwu:

Kusanga na Kusanda: Tikulutilira kusanga vinthu vyakuzirwa vyauzimu na kuvisunga mu nthamba yithu. Vinandi mwa vinthu ivi ni ivyo ŵanji ŵakupeleka panji kubwerekeska. Ŵanthu aŵa ni awo mbumba zawo zateŵetera Yehova mwakugomezgeka kwa vilimika vinandi. Kusanda vinthu ivi kukovwira kuti timanye uko tafuma.

Kasungiro: Nthamba yithu iyi yili na vinthu vinandi, ndipo vinyake vyakhala vilimika vyakujumpha 100. Ni vyakupambana kawonekero, ukuru wake, kalembekero, ndipo vikusungika makora kuti munthazi vizakagwire nchito.

Kunozga na Kupwelera: Mabuku ghakoloŵere comene na vinthu vinyake vyakale, vikunozgeka na kuvipwelelera mu nthowa yapadera. Makalata, vithuzithuzi, nkhani zakudumura, mafilimu, na vinyake vyantheura ŵakuvinozga na kuviŵika pa kompyuta. Mwantheura, munthu wangasanda vinthu ivi kwizira pa kompyuta, ndipo nthowa iyi yikovwira kuti cinthu cakale cileke kunangika.

Kusunga na Kugwiliskira Nchito: Vinthu ivi vikusungika makora mwakuti vileke kuzgeŵa panji kunangika na zuŵa panji mtika. Pakupangika pulogiramu ya pa kompyuta iyo yiwovwirenge kuti ciŵe cipusu kusanga usambazi wakuzirwa mu nthamba yithu iyi.

[Vithuzithuzi pa peji 32]

1. Posita ya “Photo-Drama of Creation.” 2. Pakulemba sabusikiripishoni. 3. Galimoto ya vyakukuzgira mazgu. 4. Cikopi ca Gongwe la Mulinda la Epulero 15, 1912. 5. Fomu ya ku jele ya J. F. Rutherford. 6. Mayikirofoni gha wayilesi ya WBBR. 7. Giramafoni. 8. Sutikesi yakunyamulira mabuku. 9. Pakulemba fundo. 10. Telegiramu yakuya kwa J. F. Rutherford.