Timupe Sembe Yehova na Umoyo Wose
Timupe Sembe Yehova na Umoyo Wose
“Cilicose ico mukucita, mucitenge na umoyo wose nga nkhwa Yehova.”—KOL. 3:23.
WONANI PARA MUNGAZGORA:
Kasi tingacindika wuli Yehova pa vyakucita vithu vya zuŵa na zuŵa?
Kasi ni sembe wuli izo tikupeleka pakusopa Ciuta?
Kasi tingapeleka wuli vyawanangwa kwa Yehova?
1-3. (a) Kasi nyifwa ya Yesu pa khuni la kusuzgikirapo, yikulongora kuti Yehova wakukhumbaso sembe yiliyose yayi? Longosorani. (b) Kasi pali fumbo wuli lakukhwaskana na sembe za mazuŵa ghano?
MU NYENGO ya Ŵakhristu ŵakwambilira, Yehova wakavumbulira ŵanthu ŵake kuti sembe ya Yesu yili kumazga Dango la Mozesi. (Kol. 2:13, 14) Sembe izo Ŵayuda ŵakapelekanga kumasinda, zikaŵaso zakukhumbikwa yayi. Dango likaŵa kuti lafiska cilato cake pakuŵa ‘mulindaŵana wakulongozgera kwa Khristu.’—Gal. 3:24.
2 Fundo iyi yikung’anamura kuti Ŵakhristu ŵalekerathu kupeleka sembe yayi. Petrosi wakayowoya za kukhumbikwa kwa kupeleka “sembe zauzimu zakuzomerezgeka kwa Ciuta kwizira mwa Yesu Khristu.” (1 Pet. 2:5) Paulosi nayo wakati vyose ivyo Mkhristu wakucita vili nga ni “sembe” kwa Ciuta.—Rom. 12:1.
3 Ntheura, Mkhristu wangapeleka sembe kwa Yehova mwa kovwirapo pa mulimo wa Ufumu panji kusintha vinthu vinyake pa umoyo wake. Pakuti tikumanya malango agho Ŵaisrayeli ŵakalondezganga pakupeleka sembe, kasi tingacita wuli kuti sembe zithu ziŵenge zakuzomerezgeka kwa Yehova?
VYAKUCITA VYA ZUŴA NA ZUŴA
4. Kasi tikwenera kukumbuka vici apo tikucita milimo yithu ya zuŵa na zuŵa?
4 Cingaŵa cakusuzga kuŵanika umo vyakucita vithu vya zuŵa na zuŵa vikukolerana na kupeleka sembe kwa Yehova. Vinthu ivyo tikucita pa nyumba, ku sukulu, ku nchito, ku musika, na kulikose uko tingaŵa, vingawoneka nga vikukhwaska viŵi yayi ubwezi withu na Yehova. Ndipouli, usange muli kujipatulira kwa Yehova panji mukukhumba kujipatulira, nchakuzirwa comene kuŵa maso na ivyo mukucita zuŵa na zuŵa. Zuŵa lililose ndise Ŵakhristu maora 24. Nyengo zose tikukhumbikwira kulondezga fundo za mu Malemba. Lekani Paulosi wakuciska kuti: “Cilicose ico mukucita, mucitenge na umoyo wose nga nkhwa Yehova, kwa ŵanthu cara.”—Ŵazgani Ŵakolose 3:18-24.
5, 6. Kasi tikwenera kughanaghanira fundo wuli pa nkhani ya kavwaliro na nkharo yithu?
5 Milimo yinyake iyo tikucita zuŵa na zuŵa nchigaŵa ca uteŵeti wakupatulika yayi. Kweni pakuti Paulosi wakuticiska kuti ticitenge na “umoyo wose nga nkhwa Yehova,” ipo tikwenera kusanda cilicose ico tikucita pa umoyo withu. Ntheura, kasi tingalondezga wuli ulongozgi uwu? Kasi nyengo zose vyakucita vithu na kavwaliro kithu vikuŵa vyakwenelera? Kasi nyengo zinyake tikucita soni kujivumbura kuti ndise Ŵakaboni ŵa Yehova, cifukwa ca nkharo iyo tikulongora panji umo tikuvwalira? Vingaŵanga nthena yayi. Ŵanthu ŵa Yehova, ŵangakhumba yayi kucita cilicose ico cingabinkhiska zina la Ciuta.—Yes. 43:10; 2 Kor. 6:3, 4, 9.
6 Tiyeni tisande umo tikukhwaskikira na khumbo la kucita vinthu na “umoyo wose nga nkhwa Yehova.” Apo tikusanda fundo iyi, tingaluwanga yayi kuti sembe zose izo Ŵaisrayeli ŵakapelekanga kwa Yehova zikeneranga kuŵa ziwemi comene.—Ex. 23:19.
UMO UMOYO WINU UKUKHWASKIKIRA
7. Kasi kujipatulira kukung’anamuraci?
7 Apo mukajipatuliranga kwa Yehova, mukalayizga kuti mumuteŵeterenge na umoyo winu wose, asi nthena? Apa mukang’anamuranga kuti kuteŵetera Yehova ndiko kuŵenge pakwamba mu umoyo winu. (Ŵazgani Ŵahebere 10:7.) Mukapuvya yayi kusankha nthena. Mukwenera kuti muli kuwonapo kuti munthu para wakulondezga malango gha Yehova vinthu vikwenda makora. (Yes. 48:17, 18) Ŵanthu ŵa Ciuta mbatuŵa ndipo mbacimwemwe cifukwa ŵakulongora mikhaliro ya msambizgi wawo Yehova.—Lev. 11:44; 1 Tim. 1:11.
8. Kasi fundo yakuti Yehova wakakhumbanga sembe zakupatulika yikutisambizgaci?
8 Sembe izo Ŵaisrayeli ŵakapelekanga kwa Yehova, zikaŵanga zakupatulika. (Lev. 6:25; 7:1) Lizgu Lacihebere ilo lili kung’anamulika kuti ‘kupatulika’ likung’anamura kuti cinthu ico ncha Ciuta pera. Kuti sembe zithu ziŵe zakupokelereka kwa Yehova, zikwenera kuŵa zambura kubinkhiskika na caru. Palije cifukwa ca kutemwera vinthu ivyo Yehova wakutinkha. (Ŵazgani 1 Yohane 2:15-17.) Fundo iyi yikung’anamura kuti tikwenera kugega vyose ivyo vingatipangiska kuŵa ŵakufipirwa pa maso pa Ciuta. (Yes. 2:4; Uvu. 18:4) Tikweneraso cara kudodoliska panji kughanaghanira cinthu caukazuzi panji cakufipirwa.—Kol. 3:5, 6.
9. Cifukwa wuli ivyo tikucitira ŵanji ni vyakuzirwa?
9 Paulosi wakaciska Ŵakhristu kuti: “Mungaluwanga cara kucita uwemi na kugaŵana vinthu na ŵanji, cifukwa na sembe zantheura Ciuta wakukondweskeka nkhanira.” (Heb. 13:16) Ntheura, tingaluwanga yayi kuti para tikucita uwemi na kucitira ŵanji viwemi ndikuti tikupeleka sembe zakukondweska Yehova. Para tikucita nthena, tikulongora kuti ndise Ŵakhristu ŵaunenesko.—Yoh. 13:34, 35; Kol. 1:10.
SEMBE PAKUSOPA
10, 11. Kasi Yehova wakuwuwona wuli uteŵeti withu, ndipo tikwenera kujifumba fumbo wuli?
10 Yimoza mwa nthowa izo tikucitira ŵanji viwemi nkhupharazga “pakweru cigomezgo cithu.” Kasi mukucitira ukaboni pa mpata uliwose? Mulimo wakuzirwa uwu Paulosi wakati ni ‘sembe ya malumbo, ndiko kuti, cipambi ca milomo iyo yikuzomera pakweru zina’ la Ciuta. (Heb. 10:23; 13:15; Hos. 14:2) Tingacita makora kughanaghanirapo pa nyengo iyo tikumalira pakupharazga makani ghawemi gha Ufumu. Kweniso nkhani zinandi za mu Ungano wa Uteŵeti zikutikhuŵilizga kuti tighanaghanirenge mulimo uwu. Mwakudumura, pakuti uteŵeti withu wa m’munda na upharazgi wa mwamwaŵi ni ‘sembe zamalumbo’ izo nchigaŵa ca kusopa kwithu, ipo sembe izi zikwenera kuŵa ziwemi comene. Nangauli vinthu vingatiŵira makora nyengo zose yayi, kweni nyengo iyo tikumalira pa kupharazga makani ghawemi yikulongora umo tikuwonera vinthu vyauzimu.
11 Nyengo zose Ŵakhristu ŵakupatura nyengo yakusopera Yehova pa nyumba zawo kweniso pamoza na mpingo. Ndimo Yehova wakukhumbira kuti ticitirenge. Pasono tikukhumbikwiraso kusunga Sabata yayi panji kukacita viphikiro ku Yerusalemu. Ndipouli, Ŵakhristu ŵakusambirapo kanthu pa vyakucitika ivi. Ciuta wakukhumba kuti tipatukeko ku milimo yakufwa, ndiposo kuti tisambirenge Mazgu ghake, kulomba, na kuwungana na mpingo. Mkhristu uyo ni mutu wa mbumba wali na mulimo wakudangilira mbumba yake pakusopa. (1 Tes. 5:17; Heb. 10:24, 25) Pa nkhani ya milimo yithu yauzimu, tingacita makora kujifumba kuti, ‘Kasi palipo apo ningakhumbikwira kuwonapo makora?’
12. (a) Kasi vyakununkhira ivyo Ŵaisrayeli ŵakapelekanga tingaviyaniska na vici mazuŵa ghano? (b) Kasi fundo iyi yikutikumbuska vici para tikulomba?
12 Themba Davide likimbira Yehova kuti: “Lurombo lwane luŵe nga ndi sungu liwemi panthazi zinu.” (Sal. 141:2) Jifumbani kuti, kasi nkhulomba kalinga ndipo nkhulomba vici? Buku la Uvumbuzi likuyaniska malurombo “gha ŵatuŵa” na vyakununkhira cifukwa malurombo ghawo ghakuzomerezgeka, ghakukwera kwa Yehova nga ni sungu liwemi. (Uvu. 5:8) Mu nyengo ya Ŵaisrayeli, vyakununkhira ivyo ŵakapelekanga pa jochero la Yehova vikanozgekanga makora. Yehova wakavipokeleranga pekha usange vyapelekeka mwakuyana na ulongozgi wake. (Ex. 30:34-37; Lev. 10:1, 2) Mwakuyana waka, usange tikulomba mwakuyana na khumbo la Yehova, tingaŵa na cigomezgo cose kuti wapokelerenge malurombo ghithu.
KUPA NA KUPOKERA
13, 14. (a) Kasi Epafurodito na Ŵakhristu ŵa ku Filipi ŵakamucitira vici Paulosi, ndipo Paulosi wakajipulika wuli? (b) Kasi nase tingacita wuli nga ni Epafurodito na Ŵafilipi?
13 Ndalama izo tikupeleka pa mulimo wa pa caru cose, tingaziyaniska na sembe kwali tikupeleka zinandi panji zicoko. (Mrk. 12:41-44) Mu nyengo yakale, mpingo wa ku Filipi ukatuma Epafurodito kuti wakawovwire Paulosi. Epafurodito wakwenera kuti wakayegha ndalama izo mpingo ukapeleka. Aka kakaŵa kakwamba yayi kuti Ŵafilipi ŵawovwire Paulosi. Ŵakatumizga wovwiri uwu na cilato cakuti Paulosi waleke kwenjerwa na ndalama mwakuti walutilire kuŵika mtima pa uteŵeti wake. Kasi Paulosi wakaciwona wuli cawanangwa ici? Paulosi wakati cawanangwa ici ni “sungu liwemi, sembe yakuzomerezgeka, yakukondweska Ciuta.” (Ŵazgani Ŵafilipi 4:15-19.) Paulosi wakawonga comene wovwiri wa Ŵafilipi, ndipo Yehova nayo wakawonga.
14 Mwakuyana waka, Yehova wakuwonga comene vyawanangwa ivyo tikupeleka kuti viwovwire pa mulimo wa pa caru cose. Nakuti wakulayizga kuti para tilutilirenge kuŵika vinthu vya Ufumu pakwamba, watipwelelerenge mwauzimu na kuthupi.—Mat. 6:33; Luka 6:38.
LONGORANI KUWONGA
15. Kasi ni vinthu wuli vinyake ivyo imwe mukuwongera Yehova?
15 Cingatitolera nyengo yitali kuti tilongosore vifukwa vyose vyakuwongera Yehova. Kasi zuŵa lililose tingamuwonga yayi Yehova cifukwa ca cawanangwa ca umoyo? Wakutipa vyose ivyo vikukhumbikwa kuti tilutilire kuŵa ŵamoyo, nga nchakurya, vyakuvwara, malo ghakugona, na mphepo iyo tikuthuta. Kweniso watovwira kumanya unenesko wa mu Baibolo uwo ukutipa cigomezgo. Mphake kumusopa Yehova na kumupa sembe zamalumbo, cifukwa ni Mlengi withu uyo wakuticitira viwemi.—Ŵazgani Uvumbuzi 4:11.
16. Kasi tingalongora wuli kuti tikuwonga sembe ya Khristu?
16 Nga umo tikawonera mu nkhani iyo yajumpha, sembe ya Khristu ndico nchawanangwa capadera comene ico Ciuta wali kupeleka ku ŵanthu. Sembe iyi yikulongora umo Ciuta wakutitemwera. (1 Yoh. 4:10) Kasi tingalongora wuli kuwonga? Paulosi wakati: “Citemwa ico Khristu wali naco cikuticicizga, cifukwa ici ndico tadumura, cakuti munthu yumoza wakafwira wose; . . . ndipo wakaŵafwira wose kuti awo mbamoyo ŵaleke kujikhalira iwoŵene, kweni uyo wakaŵafwira ndipo wakawuskika.” (2 Kor. 5:14, 15) Apa Paulosi wakang’anamuranga kuti usange tikuwonga lusungu lukuru lwa Ciuta, umoyo withu wose ucindikenge Ciuta na Mwana wake. Para tikupulikira na kucitako mulimo wa kupharazga na kuzgora ŵanthu kuŵa ŵasambiri, tikulongora kuti tikutemwa na kuwonga Ciuta kweniso Khristu.—1 Tim. 2:3, 4; 1 Yoh. 5:3.
17, 18. Kasi ŵanji ŵasazgirako wuli sembe zawo za malumbo kwa Yehova? Yowoyani ciyelezgero.
17 Kasi mungasandaso sembe zinu zamalumbo izo mukupeleka kwa Ciuta? Pamasinda pakuti ŵaghanaghanirapo viwemi vyose ivyo Yehova waŵacitira, ŵanandi ŵasintha vinthu vinyake pa umoyo wawo mwakuti ŵaŵe na nyengo yinandi yakupharazgira Ufumu panji kucitira milimo yinyake yauzimu. Cilimika cilicose, ŵanji kwa mwezi umoza panji myezi yinandiko, ŵakucita upayiniya wakanyengo apo ŵanji ŵakucita upayiniya wanyengozose. Ŵanji ŵakucita mulimo wa vyakuzengazenga. Izi ni nthowa ziwemi comene zakuwongera ivyo Yehova wakuticitira. Usange tikucita mauteŵeti agha na cilato ciwemi, ico nkhuwonga, uteŵeti withu wakupatulika uŵenge wakupokelereka na Yehova.
18 Ŵanji ŵawona kuti ŵali na ngongoli yakuti ŵawonge Yehova ndipo ŵakukhuŵilizgika kumuteŵetera. Morena njumoza wawo. Wakapenja mazgoro pa mafumbo agho wakaŵa nawo mu chalichi la Katolika umo wakakulira, kweniso mu vinjeru vya ŵa ku Asiya. Kweni wakasangako zgoro lakukhorweska yayi. Nyota yake yauzimu yikamara wati wamba kusambira Baibolo na Ŵakaboni ŵa Yehova. Morena wakawonga comene cifukwa ca kusanga mazgoro ghakufuma mu Malemba kweniso kuwona umo mazgoro agha ghakumovwilira, ntheura wakaŵa na khumbo la kuteŵetera Yehova na nkhongono zake zose. Wakati wabapatizika waka wakamba upayiniya wakanyengo, ndipo pamasinda wakamba upayiniya wanyengozose. Pasono Morena wacita uteŵeti wanyengozose vilimika vyakujumpha 30.
19. Kasi mungacita wuli kuti musazgireko sembe zinu kwa Yehova?
19 Pali ŵateŵeti ŵanandi ŵa Yehova awo ŵangafiska yayi kucita upayiniya. Kweni cilicose ico tose tingacita pakuteŵetera Yehova, ni sembe zakuzomerezgeka. Pa nkhani ya nkharo, tikwenera kulondezga fundo zaurunji za Yehova pakumanya kuti tikwimira iyo nyengo zose. Pa nkhani ya cipulikano, tikwenera kuŵa na cigomezgo cose kuti Ciuta wafiskenge vyose ivyo wali kulayizga. Pa nkhani ya milimo yiwemi, tikwenera kovwirapo pakuthandazga makani ghawemi. Na mtima wose tikuwonga vyose ivyo Yehova wakuticitira, ipo tiyeni tilutilire kupeleka sembe kwa Yehova na umoyo withu wose.
[Mafumbo]
[Mazgu Ghakukhozgera pa peji 25]
Kasi uwemi wa Yehova ukumuciskani yayi kuti musazgireko sembe zinu zamalumbo?
[Cithuzithuzi pa peji 23]
Kasi mukucitira ukaboni pa mpata uliwose?
