Natani Wakakhozgera Kusopa Kutuŵa Mwakugomezgeka

Nchipusu yayi kuphalira munthu wamazaza kuti nthowa zake ni zakubendera ndiposo kuti wakukhumbikwira kusintha. Kasi imwe mungazomera kukakumana na munthu uyo mukumanya kuti wakoma munthu mwakuti wavikilire zina lake?

Themba Davide likacita uleŵi na Batisheba, ndipo likamupa nthumbo. Kuti kwananga uku kuleke kuvumbukwa, Davide wakakomeska mfumu wa Batisheba ndipo pamasinda wakatora Batisheba kuŵa muwoli wake. Myezi yikajumphapo uku Davide wakukhala umoyo wa paŵiri, ndipo tikukayika yayi kuti wakalutilira kucita milimo yake pakuŵa themba. Kweni Yehova wakakhumba yayi kuti zakwananga izi zibisike. Wakatuma Natani kuti wakakumane na Davide.

Uwu ukaŵa mulimo upusu yayi. Jitorani kuti ndimwe Natani. Natani wakacita wofi yayi kuphalira Davide kwananga kwake, cifukwa wakaŵa wakugomezgeka kwa Yehova kweniso wakaskepeleranga ku fundo zaurunji. Kasi nchimi iyi, yikacita wuli kuti yikhorweske Themba Davide kuti likukhumbikwira kupera?

WALUSO PAKUSAMBIZGA

Mwalekeraci kupatura maminiti ghacoko waka na kuŵazga 2 Samuel 12:1-25? Jitorani kuti imwe ndimwe Natani ndipo mukuphalira Davide kuti: “Mukaŵa ŵanthu ŵaŵiri mu muzi umoza, yumoza musambazi munyake mukavu. Musambazi yura wakaŵa na miskambo yinandi ya vyakuŵeta vicoko na vikuru; kweni mukavu wakaŵavye kanthu, ndipera kanamberere kanakazi kamoza ako iye wakagura. Ndipo wakakalera, kakakulira naye na ŵana ŵake, kakarya vyakurya vyake na kumwa mu  nkhombo yake, kakagona mu cifuŵa cake. Kakaŵa kwa iye nga ndi kana kake kanakazi. Ndipo kukiza mulendo kwa musambazi, iye ntha wakatorapo pa miskambo ya vyakuŵeta vyake vicoko panji vikuru kuti wamuphikire mulendo, kweni wakatora kanamberere ka mukavu na kuphikira mulendo yura wakamwizira.”—2 Sam. 12:1-4.

Pakuti Davide wakaŵapo muliska, wakwenera kuti wakagomezga kuti nkhani iyi njanadi. Munthu munyake wakati: ‘Mutepanji Natani wakatemwanga kwiza kwa Davide m’malo mwa ŵanthu awo ŵabudilika ŵeneawo ŵandasange urunji, ntheura Davide wakawona kuti uwu ni mwaŵi wakuti walongolere urunji.’ Natani wakakhuŵilizgika kuyowoya na themba cifukwa cakuti wakaŵa wakugomezgeka kwa Ciuta kweniso wacikanga. Natani wakati wamara waka kuyowoya, Davide wakakwiya, ndipo wakati: “Yehova wamoyo! munthu mweneuyo wacita cinthu ici wakwenera kufwa.” Mwacikanga, pamanyuma Natani wakati: “Munthu uyo ndimwe.”—2 Sam. 12:5-7.

Cifukwa wuli Natani wakayowoya mwa ntharika? Kanandi para munthu wabuda cikuŵa cipusu yayi kupokelera ulongozgi. Tose tikutemwa kujigowokera na kujikhungulufya para tacita vinthu vyambura kwenelera. Ntharika iyo Natani wakayowoya, yikakhuŵilizga Davide kuti wajisuske yekha. Themba likawona kuti uyo wacita ivyo Natani wakayowoya, ni muheni comene. Pamanyuma pakuti Davide wasuska za ubudi wa munthu uyu, Natani wakavumbura kuti themba ilolene ndilo likacita vinthu ivi. Apa Davide wakawona kuti kwananga kwake nkhukuru. Ici cikamovwira kuŵa na maghanoghano ghakwenelera na kupokelera nchenyo. Wakamanya kuti ‘wapepuska’ nadi Yehova, pakucita uleŵi na Batisheba, ndipo wakazomera nchenyo iyo wakapika.—2 Sam. 12:9-14; Sal. 51, mazgu ghapacanya.

Kasi apa tikusambirapo vici? Para munthu wakusambizga ŵanthu Baibolo, cilato cake nchakuti ŵafike pa fundo yakwenelera. Natani wakamucindikanga Davide ndipo wakayowoya nayo mwaluso. Natani wakamanya kuti Davide wakutemwa urunji na mtima wake wose. Mu ntharika yake, Natani wakawovwira Davide kuti wafike pa urunji. Nase tingawovwira awo ŵakutemwa fundo zaurunji kuti ŵapulikiske umo Yehova wakuwonera vinthu. Kasi tingacita wuli? Tikwenera kuŵawovwira kuti ŵamanye ico nchakwenelera, kweni tikukhumbikwira kuyowoya mwakujiyuyura. M’malo mwa kuyowoya maghanoghano ghithu, tikwenera kugwiliskira nchito Baibolo kuti munthu wamanye ciwemi na ciheni.

Kweni kuluska vyose, Natani wakacenya themba la nkhongono cifukwa wakaŵa wakugomezgeka kwa Ciuta. (2 Sam. 12:1) Nase para tikugomezgeka, tikhuŵilizgikenge kwimira urunji wa Yehova.

WAKAKHOZGERA KUSOPA KUTUŴA

Davide na Natani ŵakwenera kuti ŵakaŵa paubwezi, cifukwa Davide wakakhizgira zina la Natani pa yumoza wa ŵana ŵake. (1 Mid. 3:1, 5) Apo Natani wakuzunulika kakwamba mu Baibolo wakaŵa na Davide. Wose ŵakatemwanga Yehova. Nchakuwonekerathu kuti Davide wakagomezganga fundo za Natani, cifukwa ndiyo wakamuvumbulira kuti wakukhumba kuzengera Yehova tempele. Davide wakati: “‘Wona sono, ine nkhukhala mu nyumba ya khuni kweni Likasa la Ciuta likukhala mu cihema ca salu.’ Ndipo Natani wakati kwa themba, ‘Citani cose ico cili mu mtima winu; pakuti Yehova wali na imwe.’”—2 Sam. 7:2, 3.

Pakuti Natani wakasopanga Yehova mwakugomezgeka, lekani wakakhozgera khumbo la Davide la kuzenga nyumba ya Ciuta. Ndipouli, pa nyengo iyi Natani wakwenera kuti wakayowoya waka maghanoghano ghake kuti gha Yehova yayi. Usiku wenewura Ciuta wakaphalira nchimi iyi kuti yikaphalire Davide uthenga wakupambanako. Uthenga ukaŵa wakuti ni Davide yayi uyo wazengenge tempele, kweni yumoza wa ŵana ŵake. Kweni Natani wakati Ciuta wacita phangano na Davide kuti cizumbe cake “camkwimikika muyirayira.”—2 Sam. 7:4-16.

Pa nkhani ya uyo wakeneranga kuzenga tempele, khumbo la Ciuta likapambana na maghanoghano gha Natani. Ndipouli, nchimi yakujiyuyura iyi yikasinginika yayi, kweni yikakolerana na khumbo la Yehova. Apa tikusambirapo kuti para Ciuta watipa ulongozgi uwo ukupambana na maghanoghano ghithu, tikwenera kupulikira. Milimo iyo  Natani wakacita pamanyuma pa nkhani iyi, yikulongora kuti Ciuta wakalutilira kumutemwa. Kweniso vikuwoneka kuti Yehova wakaphalira Natani na Gadi kuti ŵawovwire Davide pakusora ŵanthu 4,000 kuti ŵimbenge sumu pa tempele.—1 Mid. 23:1-5; 2 Mid. 29:25.

WAKAVIKILIRA UTHEMBA

Natani wakamanya kuti Solomoni ndiyo waharenge ufumu wa Davide. Ntheura, Natani wakacitapo kanthu apo Adoniya wakakhumbanga kuphanga ufumu wa Davide. Apa napo Natani wakalongora luso kweniso kugomezgeka. Cakwamba wakaciska Batisheba kuti wakumbuske Davide za cilapo cake cakuti wimikenge Solomoni kuŵa themba. Pamasinda Natani wakaluta yekha kwa Davide kukafumba usange wazomerezga Adoniya kuhara uthemba. Davide wakati wawona apo vinthu vyafika, wakatuma Natani na ŵanalume ŵanyake ŵakugomezgeka kuti ŵaphakazge Solomoni na kupharazga kuti ndiyo ni themba. Ivyo Adoniya wakakhumbanga vikatondeka.—1 Mathe. 1:5-53.

WAKAŴA WAKUJIYUYURA

Natani na Gadi ndiwo ŵakayowoyeka kuti ŵakalemba 1 Samuel cipaturo 25 mpaka 31 kweniso buku lose laciŵiri la Samuel. Pakuyowoya za mabuku agha, Baibolo likuti: “Sono milimo ya Davide themba, kufuma pa ciyambo kuyakafika ku umaliro, yili kusimbika mu buku la makani la Samuel muwoni, na mu buku la makani la Natani nchimi, na mu buku la makani la Gadi muwoni.” (1 Mid. 29:29) Natani wakalembaso ‘milimo ya Solomoni.’ (2 Mid. 9:29) Fundo izi zikulongora kuti Natani wakalutilira kucita milimo ya pa nyumba yacifumu nanga mphamasinda pa nyifwa ya Davide.

Vinandi ivyo tikumanya vyakukhwaskana na Natani vikwenera kuti vikalembeka na mweneko. Ndipouli, vinyake ivyo wakaleka kulemba vyakukhwaskana na iyomwene, vikutiphalira vinandi vya iyo. Natani wakaŵa wakujiyuyura. Wakaŵavya khumbo la kujipangira zina. Dikishonare yinyake yakulongosora mazgu gha mu Baibolo, yikuti ‘palije apo Natani wali kujilongosora panji kuyowoya vya ŵapapi ŵake.’ Palije ico tikumanya cakukhwaskana na ŵapapi ŵa Natani panji umoyo wake.

KUGOMEZGEKA KWA YEHOVA NDIKO KUKAMUKHUŴILIZGA

Nkhani zicoko waka zakukhwaskana na Natani izo tawona mu Malemba, zatilongora kuti wakaŵa wakujiyuyura kweni mwacikanga wakakhozgeranga urunji wa Yehova. Yehova Ciuta wakamupa milimo yapadera. Ghanaghaniranipo pa mikhaliro ya Natani nga nkhugomezgeka na kuzirwiska fundo za Ciuta. Fwiliranipo kuŵa na mikhaliro yanthena iyi.

Pasono tingakhumbikwira kucenya mathemba yayi agho ghakucita uleŵi panji kutondeska ciŵembu ca nga ca Adoniya. Ndipouli, Ciuta wangatovwira kukhozgera fundo zake zaurunji kweniso wangatovwira kuti tiŵe ŵakugomezgeka kwa iyo. Nase tingaŵa ŵacikanga na ŵaluso pakusambizga unenesko na kukhozgera kusopa kutuŵa.

[Cithuzithuzi pa peji 25]

Pakuvikilira uthemba, mwaluso Natani wakayowoya na Batisheba