“Kasi Mungatijambulako Cithuzithuzi?”

Zuŵa laciŵiri la ungano wa cigaŵa likati lamara, Josué, uyo wakuteŵetera pa Beteli ku Mexico, wakawonanga msumba wa Querétaro. Javier na Maru, ŵakutorana ŵa ku Colombia, awo ŵakiza kuti ŵazakawone malo, ŵakapempha Josué kuti waŵajambureko. Pakuti Josué na ŵabwezi ŵake awo nawo ŵakaŵa Ŵakaboni, ŵakavwara makora ndiposo ŵakavwara mabaji gha ungano, mbumba iyi yikaŵafumba usange ŵafuma ku cikondwelero ca awo ŵamalizga sukulu panji ku cakucitika cinyake capadera. Josué wakayowoya kuti ŵakaŵa pa ungano wa cigaŵa wa Ŵakaboni ŵa Yehova ndipo wakayicema mbumba iyi kuti yizakaŵepo pa ungano uwu pa zuŵa la Sabata.

Mbumba iyi yikawona kuti yingakhozgeka soni para yingaluta ku ungano uwu cifukwa yikaŵavya malaya ghakwenelera ghakuti yivware. Nangauli ŵakakana, Josué wakaŵaphalira zina lake na nambara ya telefoni ya ofesi ya munthavi iyo wakateŵeterangako.

Myezi yinayi yikati yajumphapo, Josué wakazizwa wati wapulika uthenga kufuma kwa Javier. Ŵakutorana aŵa ŵakaluta ku ungano wa cigaŵa ndipo pa nyengo iyi ŵakakhumbanga kuti Ŵakaboni ŵa Yehova ŵaŵayendere mu Msumba wa Mexico, uwo ŵakakhalangamo. Mwaluŵiro Javier na Maru ŵakamba kusambira Baibolo, ndipo ŵakamba kuwungana. Myezi 10 yikati yajumphapo, ŵakaŵa ŵapharazgi. Nangauli ŵakutorana aŵa ŵakasamukira ku Toronto, ku Canada, kweni ŵakalutilira kusambira Baibolo ndipo ŵakabapatizika.

Pamanyuma, Josué wakapokera kalata kufuma kwa Javier yakulongosora cifukwa ico wakazomelera unenesko. Iyo wakalemba kuti: “Pambere tindalute ku ungano wa cigaŵa, ine na muwoli wane tikadumbiskana kuti tikukhumbikwira kulongozgeka na Ciuta. Tikati tawona umo imwe mukavwalira, tikaghanaghana kuti mukwenera kuti mwafuma ku ungano wapadera comene. Pa ungano, tikakondwa comene na umo ŵakatilongolera malo ghakuti tikhalepo, umo ŵakatovwilira kuti tiŵazgenge mu Baibolo para nkhani zikuyowoyeka, ndiposo nkharo iyo ŵanthu awo ŵakaŵa pa ungano uwu ŵakaŵa nayo. Kwa iwo, likaŵa suzgo yayi kuti tikavwara nga mbalendo ŵakuwona malo.”

Josué wakawona kuti mazgu gha Themba Solomoni ngaunenesko nadi. Solomoni wakalemba kuti: “Seŵa mbuto yako namacerocero ndipo na mise ungapumuzganga woko lako; pakuti ulije kumanya izo zitisakatenge, panji izi, panji izo, panji zose ziŵiri wuwo zitiŵenge ziwemi kwakulingana.” (Muph. 11:6) Kasi mungaseŵa mbuto mwakugwiliskira nchito mipata iyo mwayisanga kuphalirako ŵanji vya ungano wa cigaŵa uwo ukwiza panji vya nkhani yacisanisani? Yehova wangamugwiliskirani nchito kuti waguze awo womirwa na nyota yauzimu, nga umo ŵakaŵira Javier na Maru.—Yes. 55:1.

[Cithuzithuzi pa peji 32]

Kufuma ku mazere kuya ku malyero: Alejandro Voeguelin, Maru Pineda, Alejandro Pineda, Javier Pineda, na Josué Ramírez ku ofesi ya munthavi ya Mexico